ꓚꓲꓸ ꓛꓬ ꓖꓳ ꓓꓱ ꓔꓯ ꓠꓲꓹ ꓠꓵ

ꓚꓲꓸ ꓛꓬ ꓖꓳ ꓓꓱ ꓔꓯ ꓠꓲꓹ ꓠꓵ

ꓠꓬꓲꓸ ꓠꓬꓲ ꓠꓬ ꓚꓲꓸ ꓛꓬ ꓖꓳ ꓓꓱ ꓔꓯ ꓠꓲꓹ ꓠꓵ ꓐꓯˍ ꓟ ꓕꓱ ꓕꓲ ꓒꓳꓹ ꓗꓪ ꓐꓰ ꓮ ꓙꓵꓹ ꓢꓴ ꓔꓯ ꓢꓷꓸ ꓙ ꓟꓳ ꓙ ꓩꓴ ꓡ ꓥꓳ= ꓚꓲꓸ ꓛꓬ ꓖꓳ ꓓꓱ ꓔꓯ ꓠꓲꓹ ꓠꓵ ꓡ? ꓐꓰ ꓠꓸ ꓠꓬꓲ ꓕꓯ ꓠꓲꓹ ꓠꓵ ꓡꓳ ꓐꓰ ꓮ ꓙꓵꓹ ꓢꓴ ꓒꓳꓹ ꓖꓶ ꓡ ꓥꓳ= ꓚꓵ ꓚꓵ ꓐꓯ ꓠꓬ ꓚꓲꓸ ꓛꓬ ꓖꓳ ꓓꓱ ꓔꓯ ꓟꓽ ꓠꓲꓹ ꓠꓵ ꓗꓴꓸ ꓔ= ꓣꓳ ꓐꓴ ꓠꓬ ꓢꓴ ꓔꓯ ꓫꓸ ꓪ ꓙꓲ ꓙꓲ ꓕꓱ ꓖꓶ ꓡꓳ= ꓟꓽ ꓥꓳ ꓡꓰ ꓠ ꓢꓯꓼ ꓕꓵꓼ ꓡꓳ= ꓢꓴ ꓔꓯ ꓗꓹ ꓛꓲ ꓡꓰ ꓠ ꓬꓰ ꓖꓶ ꓠꓲꓹ ꓫꓵꓽ ꓡꓳ= ꓢꓴ ꓠꓲꓹ ꓠꓵ ꓡ ꓠ ꓔꓬ ꓡꓳ= ꓢꓴ ꓡꓳꓸ ꓐꓲ ꓡ ꓠ ꓔꓬ ꓡꓳ= ꓚꓲꓸ ꓛꓬ ꓖꓳ ꓓꓱ ꓔꓯ ꓠꓲꓹ ꓠꓵ ꓠ ꓟ ꓟꓲ ꓡꓰ ꓔꓬ ꓡꓳ= ꓠꓲꓹ ꓠꓵ ꓟ ꓮꓽ ꓐ ꓮ ꓟ ꓐꓴ ꓚꓲꓸ ꓛꓬ ꓖꓳ ꓓꓱ ꓔꓯ ꓠꓲꓹ ꓠꓵ ꓡꓯ꓾ꓕꓲ ꓖ ꓕꓲ ꓧꓪꓸ ꓣꓳ ꓔꓯ ꓢꓴ ꓡꓰ ꓘꓴꓽ ꓣꓴ ꓟꓽ ꓑ ꓡ? ꓐꓰ ꓐꓯ ꓡ ꓕꓯ ꓚꓲꓸ ꓚꓬ ꓖꓳ ꓓꓱ ꓔꓯ ꓮ ꓫꓵꓽ ꓪꓴꓸ ꓠꓬꓲ ꓝꓴꓲꓹ ꓓꓰ ꓡ? ꓚꓲꓸ ꓛꓬ ꓖꓳ ꓓꓱ ꓔꓯ ꓟꓽ ꓐꓲ ꓐꓰ ꓙ ꓟꓶ ꓡ? ꓟꓲ ꓠꓯꓕꓱ ꓟ ꓗꓪ ꓞꓳ ꓤ ꓐꓯˍ ꓟ ꓮ ꓟꓬꓹ ꓫꓵꓽ ꓔꓬ ꓡꓳ= ꓖꓳ ꓡꓰ ꓐꓰ ꓠꓲꓹ ꓟ ꓡꓳꓸꓐꓲ ꓟ ꓟꓲ ꓟꓽ ꓫꓱꓹ ꓡꓯ ꓘꓳꓹ꓾ ꓣꓳ ꓠꓯꓸꓼ ꓗꓪ ꓥ ꓟꓲ ꓢꓴ ꓐꓰ ꓟꓽ ꓪ ꓟ ꓙ ꓞꓲ ꓢꓷꓸ ꓠꓲꓹ ꓙꓳˍ ꓡꓳ= ꓢꓴ ꓐꓰ ꓟ ꓫꓱꓹ ꓡꓯ ꓘꓳꓹ ꓟ ꓡꓳꓸ ꓐꓲ ꓟ ꓙꓳˍ ꓡꓳ= ꓢꓴ ꓙ ꓟꓶ ꓟ ꓐꓰ ꓣꓳ ꓙ ꓟꓶ ꓟ ꓟꓽ ꓫꓱꓹ ꓡꓯ ꓘꓳꓹ ꓫꓵ ꓙꓳˍ ꓡꓳ=

ꓟꓲ ꓠꓯ ꓞꓳ ꓤ ꓐꓯ ꓟ ꓠꓬ ꓮ ꓫꓵꓽ ꓪꓴꓸ ꓠꓬꓲ ꓥꓪ ꓠꓯꓼꓹ ꓗꓪ ꓤ ꓠꓬꓲ ꓫꓵ ꓠꓬꓲ ꓓꓴ ꓔꓳꓹ ꓜꓳꓽ ꓡ ꓢꓯꓸ ꓐꓰ ꓐꓯ ꓢꓲ꓾ ꓠꓲꓹ ꓟ ꓫꓸ ꓔꓬ ꓢꓴ ꓙꓳˍ ꓡꓳ= ꓣꓳ ꓠꓯꓸꓼ ꓗꓪ ꓫꓸ ꓓꓴ ꓙꓳˍ ꓟ ꓡꓰ ꓐꓰ ꓢꓴ ꓥ ꓟꓲ ꓫꓸ ꓓꓴ ꓙꓳˍ ꓐꓭ ꓥꓳ= ꓣꓳ ꓗꓹ ꓛꓲ ꓓꓴ ꓙꓳˍ ꓟ ꓡꓰ ꓐꓰ ꓢꓴ ꓥ ꓟꓲ ꓗꓹ ꓛꓲ ꓟ ꓝꓲꓸ ꓙꓳˍ ꓐꓭ ꓥꓳ= ꓟꓲ ꓠꓯ ꓗꓪ ꓕꓲ ꓐꓱ ꓤꓳ ꓤ ꓠꓬ ꓐꓬ ꓡꓰ ꓖꓴ ꓡꓳ= ꓕꓲ ꓐꓱ ꓠꓬ ꓢꓷꓸ ꓔꓽ ꓟ ꓕꓯ ꓢꓲ ꓟꓬ ꓠꓬꓲ ꓢꓷꓸ ꓡ ꓔꓬ ꓡꓳ= ꓕꓲ ꓧꓶꓸ ꓟꓬꓹ ꓐꓲ ꓓꓳꓸꓹ ꓓꓳ ꓕꓯ ꓕꓲ ꓦ ꓧꓶꓸ ꓪ ꓢꓯ ꓪ ꓡꓰ ꓝꓲ= ꓕꓱ ꓟ ꓠꓬ ꓣꓳ ꓚꓲꓸ ꓛꓬ ꓖꓳ ꓓꓱ ꓔꓯ ꓠꓲꓹ ꓠꓵ ꓥ ꓡꓳ= ꓥꓪ ꓠꓬ ꓮ ꓫꓵꓽ ꓡꓰ ꓟꓽ ꓐꓲ꓾ ꓞꓳ ꓧꓪꓸ ꓥ ꓟꓲ ꓠꓯ꓾ ꓕꓱ ꓟꓬ ꓢ ꓟ ꓔꓯ ꓡꓰ ꓬꓰ ꓟꓽ ꓐ ꓡ꓾ꓪꓴꓸ ꓠꓶꓽ ꓥ ꓟꓲ ꓟꓽ ꓙꓵ꓾ꓕꓱ ꓡꓱ ꓐꓯ ꓢꓲ꓾ ꓚꓲꓸ ꓛꓬ ꓖꓳ ꓓꓱ ꓔꓯ ꓝꓴꓲꓸ ꓕꓽ ꓓꓰ ꓪ ꓡꓰ ꓝꓲ= ꓢꓴ ꓐꓱ ꓶ ꓠꓬ ꓪꓴꓸ ꓠꓶꓽ ꓟꓽ ꓙꓲ ꓡꓰ ꓖ ꓖꓶ ꓐ ꓡ ꓡꓳ꓾ ꓮ ꓫꓵꓽ ꓪꓴꓸ ꓠꓬꓲ ꓚꓲꓸ ꓛꓬ ꓖꓳ ꓓꓱ ꓔꓯ ꓖ ꓖꓶ ꓟꓽ ꓐ ꓡ ꓡ? ꓣꓳ ꓠꓯꓼ ꓗꓪ ꓙꓳˍ ꓟ ꓮ ꓙꓵꓹ ꓔꓯ ꓠꓲꓹ ꓖꓪ ꓫꓵ ꓓꓴ ꓬꓰ ꓡꓯ꓾ ꓮꓽ ꓐ ꓮ ꓟ ꓐꓴ꓾ ꓞꓳ ꓤ ꓮ ꓙꓵꓹ ꓠꓬ ꓣꓳ ꓠꓯꓸꓼ ꓗꓪ ꓕꓲ ꓑ ꓤ ꓓꓵ ꓡ ꓢꓲ꓾ ꓡ ꓙꓰ ꓡ ꓥꓳ꓾ ꓬꓲ ꓟꓶ ꓗꓪ ꓠꓬ ꓣꓳ ꓕꓲ ꓣꓳ ꓡꓰ ꓗꓷ ꓡꓲ ꓡ ꓥꓳ=

ꓣꓳ ꓠꓲꓹ ꓟ ꓫꓸ ꓢꓲ꓾ ꓥꓳꓽ ꓔꓬ ꓕꓯ ꓥ ꓟꓲ ꓣꓳ ꓡꓯꓹ ꓒꓯ ꓡꓰ ꓣꓳ ꓟꓬ ꓐꓲ ꓔꓯ ꓢꓲꓽ ꓖꓶ ꓛꓲ ꓡꓳ= ꓖꓳ ꓟ ꓑꓶꓸ ꓓꓴ ꓮ ꓟ ꓔꓯ ꓥ ꓟꓲ ꓮ ꓘꓶꓸ ꓕꓽ ꓥꓳ ꓡꓳ꓾ꓚꓲꓸ ꓛꓬ ꓖꓳ ꓓꓱ ꓕꓯ ꓢꓲ ꓮ ꓟ ꓔꓯ ꓥ ꓟꓲ ꓕꓽ ꓠꓵ ꓪ ꓡꓰ ꓝꓲ= ꓚꓲꓸ ꓛꓬ ꓖꓳ ꓓꓱ ꓔꓯ ꓠꓲꓹ ꓠꓵ ꓕꓯ ꓢꓲ꓾ ꓢꓴ ꓥ ꓟꓲ ꓣꓳ ꓔꓯ ꓠꓲꓹ ꓠꓵ ꓡ ꓥꓳ= ꓚꓲꓸ ꓛꓬ ꓖꓳ ꓓꓱ ꓔꓯ ꓮ ꓡꓰ ꓠꓵ ꓠ ꓗꓹ ꓐꓯ ꓠꓬ ꓢꓴ ꓑꓶꓸ ꓓꓴ ꓣꓳ ꓠꓲꓹ ꓟ ꓫꓸ ꓔꓬ ꓟ ꓔꓯ ꓕꓽ ꓗꓷ ꓡꓰ ꓝꓲ= ꓢꓴ ꓡꓰ ꓐꓯ ꓟ ꓫꓸ ꓪ ꓔꓯ ꓠꓸ ꓠ ꓢꓲ꓾ ꓠꓲꓹ ꓟ ꓕꓽ ꓫꓸ= ꓬꓲ ꓟꓶ ꓐꓳ ꓠ ꓬꓲ ꓟꓶ ꓪ ꓡꓰ ꓝꓲ꓾ ꓧꓪꓸ ꓖꓳ ꓓꓱ ꓔꓬ ꓢ ꓝꓲ= ꓚꓲꓸ ꓛꓬ ꓖꓳ ꓓꓱ ꓔꓯ ꓫꓸ ꓠꓬꓲ ꓤ꓾ꓚꓲꓸ ꓛꓬ ꓖꓳ ꓓꓱ ꓔꓯ ꓠꓲꓹ ꓠꓵ꓾ ꓚꓲꓸ ꓛꓬ ꓖꓳ ꓓꓱ ꓔꓯ ꓞꓳ ꓒꓵꓽ ꓪ ꓡꓰ ꓠꓹ ꓟ ꓢꓯꓼ ꓕꓵ ꓙꓰ ꓡꓯ=