ꓚꓲꓸ ꓛꓬ ꓤꓶ., ꓐꓱ ꓶ ꓢꓯꓼ ꓕꓵꓼ ꓔꓬ ꓢꓴ ꓐꓴ ꓔꓯ ꓢꓯꓼ ꓖꓶ ꓘꓶꓽ (5) ꓘꓶꓽ

Monday, June 12, 2023

1. ꓠꓲ, ꓟ ꓕꓽ ꓐꓬ ꓡꓰ ꓝꓲ꓾

ꓕꓲ ꓖ ꓕꓲ ꓧꓪꓹ ꓣꓳ ꓤꓶ., ꓗꓪ ꓞꓳꓸ ꓡꓰ ꓓꓴ ꓡꓰ ꓟꓽ ꓠ ꓠ ꓔꓳꓹ ꓜꓳꓽ ꓔꓬ ꓟ ꓬꓲ ꓙꓵꓹ ꓥ ꓟꓲ ꓙꓳ ꓡꓳ= ꓖꓳ ꓡꓱ ꓐꓯ ꓥˍ ꓟꓲ ꓖꓳ ꓕꓲ ꓙꓵꓹ ꓗꓪ ꓠꓲꓹ ꓟ ꓕꓽ ꓐꓬ ꓡꓰ ꓝꓲ꓾ ꓫꓸ ꓓꓴ ꓠꓬ ꓕꓲ ꓑ ꓤ ꓡꓰ ꓥ ꓡꓳ= ꓧꓪꓸ ꓡꓰ ꓓꓴ ꓔꓯ ꓪ ꓠꓲꓹ ꓫꓵ ꓐꓭ ꓠꓬ ꓞꓳꓸ ꓡꓰ ꓟ ꓬꓲ ꓙꓵꓹ ꓔꓯ ꓥ ꓟꓲ ꓘꓳꓹ ꓣꓴ ꓗꓴꓸ ꓠ ꓗꓹ ꓡꓳ=

2ꓸ ꓡꓱꓸ ꓡꓰ ꓠꓬ ꓝꓮꓲ ꓕꓲ ꓧꓪꓹ ꓔꓴ꓾

ꓤꓶꓸꓹ ꓐꓯ ꓟ ꓠꓬ ꓮ ꓟꓬꓹ ꓧꓪꓹ ꓡꓱꓸ ꓡꓰ ꓢꓲ꓾ ꓮ ꓟꓬꓹ ꓧꓪꓹ ꓔꓴ ꓕꓯ ꓢꓲ꓾ ꓬꓲ ꓬꓰ ꓢꓲ ꓙꓳ ꓡꓳ= ꓟꓽ ꓡꓱꓸ ꓠꓬꓲ ꓢꓴ ꓕꓲ ꓣꓳ ꓟꓲ ꓟꓽ ꓔꓬ= ꓮ ꓟꓶ ꓣꓳ ꓡꓳ ꓟꓳ ꓪ ꓟ ꓧꓪꓸ ꓡꓰ ꓢꓴ ꓐꓰ ꓔꓶꓻ ꓙꓱꓼ ꓗꓪ ꓛꓲ ꓡꓰ ꓢꓴ ꓐꓴ ꓥ ꓟꓲ ꓬꓰ ꓪ ꓢꓯꓼ ꓕꓵꓼ ꓟ ꓕꓲ ꓙꓵꓹ ꓗꓪ ꓮ ꓟꓬꓹ ꓧꓪꓹ ꓡꓱꓸ ꓢꓲ꓾ ꓢꓯꓼ ꓕꓵꓼ ꓡꓳꓹ ꓬꓰ ꓢꓴ ꓐꓴ ꓥ ꓡꓳ=

3ꓸ ꓫꓸ ꓙꓵ ꓓꓴ ꓠꓬ ꓧꓪꓸ ꓡꓰ ꓓꓴ ꓚꓱꓹ ꓥꓳ=

ꓣꓳ ꓤꓶꓸꓹ ꓗꓪ ꓫꓸ ꓓꓴ ꓟꓬ ꓓꓴ ꓠꓲꓹ ꓫꓸ ꓟꓬ ꓫꓸ ꓓꓴ ꓠꓬ ꓮ ꓕꓯ ꓥ ꓟꓲ ꓔꓳꓹ ꓜꓳꓽ ꓔꓬ ꓟ ꓥ ꓡꓳ= ꓖꓳ ꓡꓰ ꓐꓯ ꓥ ꓟꓲ ꓣꓳ ꓢꓷꓸ ꓠ ꓔ ꓟ ꓠꓬ ꓫꓸ ꓓꓴ ꓗꓪ ꓐꓰ ꓧꓪꓸ ꓡꓰ ꓓꓴ ꓚꓱꓹ ꓙꓳ ꓡꓳ꓾ ꓞꓳꓸ ꓡꓰ ꓓꓴ ꓗꓪ ꓐꓰ ꓢꓯꓼ ꓕꓵꓼ ꓚꓱꓹ ꓙꓳ ꓡꓳ ꓐꓰ ꓓꓵꓽ ꓙ ꓠ ꓔ ꓡꓳ= ꓖꓳ ꓟ ꓡꓰ ꓐꓰ ꓟꓽ ꓞꓲ꓾ ꓜꓲ ꓘꓴ ꓠꓲꓹ ꓥ ꓟꓲ ꓙꓳˍ ꓠ ꓗꓹ ꓡꓳ=

4ꓸ ꓐꓱ ꓡꓯꓽ ꓘꓳ ꓟ

ꓠꓴ ꓤꓶꓸꓹ ꓗꓪ ꓮ ꓟꓬ ꓗꓪ ꓛꓲ ꓫꓸ ꓓꓴ ꓙꓳ ꓡ ꓐꓯ ꓥˍ ꓟꓲ ꓠꓴ ꓕꓯ ꓢꓲ ꓟꓬ ꓠꓬꓲ ꓫꓸ ꓓꓴ ꓔꓳꓹ ꓜꓳꓽ ꓔꓬ ꓢꓴ ꓙꓳˍ ꓡꓳ= ꓖꓳ ꓟ ꓑꓶꓸ ꓓꓴ ꓢꓴ ꓔꓯ ꓐ ꓡ ꓟꓬ ꓛꓲ ꓬꓰ ꓙ꓾ ꓐꓱ ꓡꓯꓽ ꓘꓳ ꓠꓹ ꓟ ꓮ ꓕꓯ ꓥ ꓟꓲ ꓠꓴ ꓠꓲꓹ ꓟ ꓠꓯꓸꓼ ꓗꓪ ꓗꓷ ꓔ= ꓖꓳ ꓡꓰ ꓬꓰ ꓙ ꓪ ꓡꓰ ꓢꓲ꓾ ꓢꓴ ꓗꓹ ꓛꓲ ꓡꓰ ꓐꓭ ꓠꓬ ꓣꓳ ꓥˍ ꓟꓲ ꓗꓹ ꓛꓲ ꓓꓴ ꓥ ꓡꓳ=

5ꓸ ꓕꓳꓽ ꓶ ꓵꓸꓹ

ꓣꓳ ꓤꓶꓸꓹ ꓗꓪ ꓕꓳꓽ ꓶ ꓵꓸꓹ ꓟ ꓕꓱ ꓟ ꓥ ꓟꓲ ꓮ ꓓꓰꓽ ꓣꓳꓸꓹ ꓚꓵꓸꓸ ꓡꓳ= ꓣꓳ ꓤꓶꓸꓹ ꓐꓱ ꓶ ꓢꓯꓼ ꓕꓵꓼ ꓟ ꓗꓪ ꓢꓴ ꓡꓰ ꓟꓽ ꓢꓯꓼ ꓖꓶ ꓡ ꓕꓲ ꓙꓵꓹ ꓗꓪ ꓣꓳ ꓟꓯꓼ ꓛꓳ ꓒꓯꓹ ꓠꓬ ꓕꓳꓽ ꓶ ꓥ ꓡꓳ= ꓖꓳ ꓟ ꓪꓴꓸ ꓠꓬꓲ ꓣꓳ ꓚꓲꓸ ꓛꓬ ꓐꓱ ꓶ ꓙꓲ ꓖꓴ ꓙꓳˍ ꓟ ꓕꓳꓽ ꓶ ꓔꓯ ꓧꓪ ꓢꓲ꓾ ꓵꓸꓹ ꓓꓴ ꓬꓰ ꓡꓯ= ꓟꓬꓱꓽ ꓥˍ ꓟꓲ ꓬꓰ ꓬꓲ ꓙꓵꓹ ꓖꓶ ꓢꓲ꓾ ꓕꓳꓽ ꓶ ꓔꓯ ꓟꓽ ꓠ ꓠ ꓵꓸꓹ ꓐꓭ ꓠꓬ ꓚꓲꓸ ꓛꓬ ꓤꓶꓸꓹ ꓗꓪ ꓚꓵ ꓚꓵ ꓧꓪꓸ ꓡꓰ ꓢꓴ ꓕꓲ ꓣꓳ ꓒꓬꓱꓼ ꓡ ꓥꓳ=