ꓞꓲ; ꓟꓳ: ꓡꓰ ꓟ ꓞꓳ ꓟꓳ: ꓐꓴ ꓔꓯ ꓧꓪ: ꓖꓳꓼ ꓓꓱ ꓐꓱ ꓶ ꓙꓲꓻ ꓖꓴ ꓙꓳ ꓠꓹ ꓟ ꓮ ꓡꓰ ꓫꓵ: ꓜ: ꓫꓵ: ꓔꓯ ꓖꓶ ꓠ: ꓗꓹ ꓡ꓾

ꓞꓲ; ꓟꓳ: ꓡꓰ ꓟ ꓞꓲ; ꓟꓳ: ꓐꓴ ꓔꓯ ꓧꓪ: ꓖꓳꓼ ꓓꓱ ꓐꓱ ꓶ ꓙꓲꓻ ꓖꓴ ꓙꓳ ꓠꓹ ꓟ ꓮ ꓡꓰ ꓫꓵ: ꓜ: ꓫꓵ: ꓔꓯ ꓖꓶ ꓠ: ꓗꓹ ꓡ꓾ ꓐꓯ ꓟ ꓕꓲ ꓒꓳ ꓗꓪ ꓐꓰ ꓢꓷ. ꓙ ꓟꓳ ꓙ ꓩꓴ ꓡ ꓥꓳ=
1. ꓞꓲ; ꓟꓳ: ꓡ, ꓟ ꓡꓰ ꓐꓰ ꓞꓳ ꓟꓳ: ꓐꓴ ꓠꓬ ꓧꓪ: ꓔꓯ ꓮ ꓘꓶ. ꓜ: ꓠꓲꓹ ꓟ: ꓫꓵ ꓟ ꓗꓷ ꓡ ꓡꓳ= ꓖꓳ ꓟ ꓑꓶ. ꓓꓴ ꓬꓲ. ꓪ ꓜ: ꓜꓼ ꓕꓯ ꓧꓪ: ꓮ ꓘꓶ. ꓟ: ꓜ: ꓥꓪ. ꓫꓳ. ꓡꓯꓹ ꓒꓯꓼ ꓡꓯ ꓫꓬ ꓦ ꓟ ꓬꓲ ꓓꓬ. ꓕꓱ ꓫꓵ ꓔꓯ ꓡꓰ ꓜ: ꓠꓲꓹ ꓫꓵ: ꓡꓳ= ꓕꓱ ꓡꓱ ꓫꓵ: ꓜ: ꓫꓵ: ꓑꓶ. ꓓꓴ ꓞꓳ ꓟꓳ: ꓐꓴ high blood pressure ꓠꓻ ꓫꓵ ꓠꓻ ꓢꓴ ꓮ ꓘꓶ. ꓟꓬ ꓡ ꓔꓬ ꓟ ꓥ ꓡꓳ= ꓖꓳ ꓟ ꓑꓶ. ꓓꓴ ꓞꓳ ꓟꓳ: ꓐꓴ ꓧꓪ: ꓜ: ꓠꓲꓹ ꓟ ꓫꓵ ꓗꓷ ꓡ ꓕꓯ ꓥꓪ. ꓮ ꓗ. ꓩꓴ ꓔꓯ ꓮ ꓟꓬꓹ ꓫꓵ: ꓬꓰ ꓢꓲ꓾ ꓬꓲ. ꓪ ꓜ: ꓠꓲꓹ ꓫꓵ ꓠ ꓚ. ꓢꓲ꓾ ꓖꓶ  ꓜ ꓪ ꓡꓰ ꓝꓲ= ꓞꓲ; ꓟꓳ: ꓡ ꓟ ꓡꓰ ꓐꓰ ꓞꓳ ꓟꓳ: ꓐꓴ ꓠꓬ ꓤ ꓠꓱ ꓤ ꓐꓴ ꓡꓰ ꓐꓰ ꓗꓷ ꓡ ꓔꓬ ꓡꓳ= ꓟꓬ ꓠꓬꓲ ꓠꓬ ꓜ: ꓖꓶ ꓜ: ꓫ. ꓡ ꓟ ꓥꓳ꓾ ꓕꓱ ꓟ ꓜ: ꓠꓲꓹ ꓟ: ꓫꓵ ꓖꓳ ꓟ ꓜ: ꓠꓲꓹ ꓟ ꓫꓵ: ꓕꓱ ꓡꓱ ꓬꓰ ꓢꓲ꓾ ꓟ: ꓜ: ꓔꓬ ꓟ ꓟꓶ ꓫꓵ ꓡ ꓠꓬ ꓬꓲ ꓪ ꓧꓪꓽ ꓖꓳꓼ ꓓꓱ ꓠꓬ ꓕꓲ ꓠꓬꓲ ꓖꓳ ꓐꓳ ꓕꓲ ꓠꓬꓲ ꓢꓯꓹ ꓑ ꓡ ꓡꓳ= ꓞꓲꓼ ꓟꓳ ꓡˍ ꓟ ꓑꓶ. ꓓꓴ ꓬꓲ ꓪ ꓛꓲ ꓛꓬ ꓠꓲꓹ ꓗꓪ ꓟ: ꓠꓲꓹ ꓫꓵꓻ ꓟ ꓠꓲꓹ ꓢꓲ꓾ ꓢ ꓟ꓾ ꓠꓲꓹ ꓟ ꓙꓬꓼ ꓢ ꓟ ꓕꓱ ꓡꓱ ꓗꓷ ꓡ ꓡꓳ= ꓖꓳ ꓟ ꓑꓶ. ꓓꓴ ꓞꓳ ꓟꓳꓽ ꓐꓴ ꓔꓯ ꓧꓪ: ꓖꓳꓼ ꓓꓱ ꓙꓲꓻ ꓖꓴ ꓙꓳˍ ꓟ ꓜ: ꓫꓵ: ꓔꓯ ꓮ ꓕꓯ ꓟꓬ ꓟꓲ ꓖꓶ ꓜ: ꓪ ꓡꓰ ꓠꓹ ꓟ ꓣꓳ ꓚꓵꓺ ꓡꓳ=
2.  ꓡꓹ ꓜꓶꓼ ꓮ ꓘꓶ. ꓐꓸꓹˍ ꓟ ꓜ: ꓫꓵꓽ ꓔꓯ ꓥˍ ꓟꓲ ꓮ ꓘꓶ. ꓕ ꓖꓶ ꓜ: ꓪ ꓡꓰ ꓝꓲ꓾ ꓟ: ꓐꓸꓹˍ ꓟ ꓜ: ꓫꓵꓽ ꓜ: ꓕꓯ ꓡꓲ. ꓢꓲ. ꓡ ꓟ ꓪꓴ. ꓠꓬ ꓡꓹ ꓜꓶꓼ ꓮ ꓘꓶ. ꓐꓸꓹˍ ꓟ ꓜꓽ ꓫꓵꓽ ꓔꓯ ꓖꓶ ꓜ: ꓕꓯ ꓠꓬ ꓟꓬ ꓠꓬꓲ ꓢꓲ ꓡ ꓥꓳ= ꓟ: ꓞꓲꓼ ꓮ ꓘꓶ. ꓐꓸꓹˍ ꓟ ꓑꓶ. ꓓꓴ ꓯꓬꓼ ꓟ ꓖˍ ꓟ ꓕꓱ ꓡꓱ ꓫꓵꓽ ꓗꓷ ꓡ ꓥꓳ= ꓢꓯꓼ ꓙꓳˍ ꓟ ꓣꓳ ꓞꓳ ꓡꓱ ꓐꓴ ꓯꓬꓼ ꓟ ꓖˍ ꓟ ꓠꓬ ꓟ: ꓛꓲ ꓡ ꓐꓯ ꓡꓲ. ꓞꓳ ꓟꓳꓽ ꓐꓴ ꓯꓬꓼ ꓟ ꓖˍ ꓟ ꓟꓶ ꓫꓵꓸꓼ ꓡ ꓐꓭ ꓠꓬ ꓦꓬꓼ  ꓠꓬꓲ ꓖꓴ ꓡꓰ ꓓꓴ ꓗꓪ ꓛꓲ ꓗꓷ ꓡ ꓥꓳ=
3. ꓕꓲ ꓢꓯꓽ ꓜ: ꓢꓲ꓾ ꓧꓪ: ꓖꓳꓼ ꓓꓱ ꓐꓱ ꓶ ꓙꓲꓻ ꓖꓴ ꓙꓳˍ ꓟ ꓜ: ꓫꓵꓽ ꓔꓯ ꓖꓶ ꓙ ꓪ ꓡꓯ ꓝꓲ꓾ ꓟꓬ ꓠꓬꓲ ꓖꓶ ꓜ: ꓠꓹ ꓟ ꓜ: ꓫꓵꓽ ꓠꓬ ꓮ ꓗ. ꓩꓴ ꓡꓰ ꓫꓬ ꓦ ꓟ ꓟ ꓜ: ꓫꓵꓽ ꓔꓯ ꓟꓬ ꓠꓬꓲ ꓖꓶ ꓜ: ꓪ ꓡꓰ ꓝꓲ꓾ ꓖꓳ ꓗꓪ ꓠꓬ ꓧꓪ: ꓖꓳꓼ ꓓꓱ ꓐꓱ ꓶ ꓙꓲꓻ ꓖꓴ ꓙꓳˍ ꓟ ꓧꓪ: ꓢꓯꓼ ꓐꓰ ꓠꓱ. ꓐꓯ ꓢꓯꓼ ꓮ ꓟꓬꓹ ꓫꓵ ꓐˍ ꓟ ꓪꓴ. ꓠꓬꓲ ꓥ ꓡꓳ= 
4. ꓢꓲ: ꓛꓬ ꓡꓳ ꓛꓬ ꓐꓰ ꓢꓶ: ꓢꓶ: ꓡꓳ ꓢꓶ: ꓔꓯ ꓥˍ ꓟꓲ ꓖꓶ ꓜ: ꓪ ꓡꓰ ꓝꓲ=  ꓕꓱ ꓗꓪ ꓕꓲ ꓫꓵ: ꓜ: ꓟꓳ ꓠ ꓗꓹ ꓟ ꓠꓬ ꓮ ꓘꓶ. ꓟꓲˍꓟ ꓢꓶ: ꓢꓶ: ꓔꓯ ꓠꓬ ꓕ ꓖꓶ ꓜ: ꓪ ꓡꓰ ꓝꓲ= ꓬꓲ. ꓟ ꓢꓶ: ꓜ: ꓟ ꓘꓴˍ ꓐꓯ ꓠꓬ ꓬꓲ ꓬꓲꓻ ꓫꓬ ꓖꓶ ꓢꓲ꓾ ꓖꓶ ꓜ: ꓪ ꓡꓰ ꓝꓲ꓾ ꓕꓱ ꓡꓱ ꓬꓰ ꓖꓶ ꓐꓯ ꓠꓬ ꓞꓳ ꓟꓳꓽ ꓐꓴ ꓧꓪ ꓖꓳꓼ ꓓꓱ ꓐꓱ ꓶ ꓟꓬ ꓠꓬꓲ ꓙꓲꓻ ꓖꓴ ꓙꓳ ꓡ ꓥꓳ= 
5. ꓜ: ꓕꓲ ꓜ: ꓜꓼ ꓕꓯ ꓬꓲ ꓬꓲꓻ ꓐ ꓠ ꓖꓶ ꓜ: ꓪ ꓡꓰ ꓝꓲ꓾ ꓞꓳ ꓟꓳ ꓐꓴ ꓧꓪ: ꓖꓳꓼ ꓓꓱ ꓟꓬ ꓠꓬꓲ ꓙꓲꓻ ꓖꓴ ꓔꓬ ꓢ ꓠꓹ ꓟ ꓐꓱ ꓶ ꓕꓲ ꓠꓬꓲ ꓕꓯ ꓮ ꓠꓬꓲ: ꓠꓳꓹ ꓠꓳꓼ ꓮ ꓔꓲꓹ ꓤ ꓓꓳ ꓪ ꓡꓰ ꓝꓲ꓾ ꓮ: ꓠꓬꓲ ꓠꓳꓹ ꓠꓳꓼ ꓟ ꓠꓲꓹ ꓫꓵꓽ ꓢꓴ ꓐꓴ ꓠꓬ ꓠꓯꓺ ꓞꓲꓼ ꓟ. ꓒ ꓟ. ꓟ ꓐꓴ ꓐꓰ ꓙ ꓡꓯꓹ ꓘꓳꓹ ꓢꓲ꓾ ꓢꓯꓹ ꓙꓳ ꓠꓯꓺ ꓞꓲꓼ ꓕꓲ ꓫꓵꓽ ꓫꓵꓽ ꓓꓳ ꓪ ꓡꓰ ꓝꓲ= ꓠꓬꓲ. ꓠꓬꓲ ꓥꓪ ꓐꓯ ꓟ. ꓖꓶ ꓟ ꓠꓬ ꓮ ꓕꓳ ꓶ ꓗꓪ ꓡꓰ ꓐꓯ ꓟ. ꓖꓶ ꓦ ꓟ ꓥ ꓡꓳ=

Add new comment

2 + 3 =