ꓟꓲ ꓠꓯ ꓗꓪ ꓢꓯꓸ ꓔꓬ ꓟ ꓚꓱꓹ

ꓠꓬꓲꓸ ꓠꓬꓲ ꓠꓬ ꓮ ꓫꓵꓽ ꓑꓶꓸ ꓓꓴ ꓟꓲ ꓠꓯ ꓗꓪ ꓢꓯꓸ ꓔꓬ ꓡ? ꓐꓯ ꓟ ꓗꓪ ꓐꓰ ꓢꓷꓸ ꓙ ꓟꓳ ꓙ ꓩꓴ ꓡ ꓥꓳ= ꓮ ꓫꓵꓽ ꓑꓶꓸ ꓓꓴ ꓢꓯꓸ ꓔꓬ ꓡ ꓐꓰ ꓠ ꓠꓬꓲ ꓕꓯ ꓬꓲ ꓚꓱꓹ ꓮ ꓟꓬꓹ ꓫꓵꓽ ꓗꓪ ꓐꓰ ꓒꓳꓹ ꓖꓶ ꓡ ꓥꓳ= ꓕꓲ ꓐꓱ ꓡꓲ ꓒꓳꓹ ꓖꓶ ꓡ ꓟ ꓠꓬ ꓗꓹ ꓛꓲ ꓓꓴ ꓝꓮꓲ ꓕꓲ ꓣꓳ ꓡꓲ ꓒꓳꓹ ꓖꓶ ꓡ ꓟ ꓠꓬ ꓠꓲꓹ ꓟ ꓫꓸ ꓓꓴ ꓕꓱ ꓡꓱ ꓫꓵꓽ ꓒꓳꓹ ꓖꓶ ꓡ ꓥꓳ=ꓖꓳ ꓡꓰ ꓐꓯ ꓥˍ ꓟꓲ ꓟꓲ ꓠꓯ ꓕꓱ ꓟ ꓗꓪ ꓬꓲ ꓬꓰ ꓢꓲ ꓙꓳ ꓙꓳ ꓢꓯꓸ ꓔꓬ ꓠꓲꓹ ꓫꓵ ꓢꓴ ꓐꓴ ꓠꓬꓥꓪ ꓟꓲ ꓠꓯ ꓗꓪ ꓮ ꓫꓵꓽ ꓑꓶꓸ ꓓꓴ ꓢꓯꓸ ꓔꓬ ꓥ ꓢꓷ ꓐꓯ ꓟ ꓬꓲ ꓚꓱꓹ ꓔꓯ ꓢꓷꓸ ꓠꓹ ꓟ ꓐꓱ ꓶ  ꓧꓪꓸ ꓠ ꓗꓹ ꓡꓳ= ꓥꓪ ꓮ ꓫꓵꓽ ꓪꓴꓸ ꓠꓬꓲ ꓟꓲ ꓠꓯ ꓗꓪ ꓢꓷꓸ ꓔꓬ ꓥ ꓢꓷ ꓥꓪ ꓐꓱ ꓶ ꓤꓶꓸꓹ ꓐꓯ ꓟ ꓠꓬ ꓮ ꓫꓵꓽ ꓥ ꓡ꓾  ꓢꓷꓸ ꓠꓲꓹ ꓙꓳ ꓒ ꓐꓴ ꓡꓰ ꓐꓯ ꓔꓽ ꓟ ꓐꓯ ꓖꓶ ꓕꓲ ꓟ ꓙꓳ ꓡꓳ꓾ ꓤꓶꓸꓹ ꓐꓯ ꓟ ꓠꓬ ꓮ ꓟꓴꓽ ꓟꓴꓸ ꓫꓬ ꓦ ꓟ ꓘꓳꓽ ꓤꓱꓸꓹ ꓡꓰ ꓐꓰ ꓗꓹ ꓡꓳ ꓐꓰ ꓐꓯ ꓔ ꓡꓳ= ꓟꓲ ꓠꓯ ꓞꓳ ꓤ ꓐꓯ ꓟ ꓠꓬ ꓧꓪꓸ ꓠꓲꓹ ꓫꓵꓽ ꓟ ꓐꓲ ꓠꓲꓹ ꓫꓵ ꓟ ꓟꓬꓱꓽ ꓓꓳꓽ ꓙꓳ ꓠꓲꓹ ꓫꓵꓽ ꓟ ꓢꓴ ꓕꓯ ꓢꓲ ꓢꓷꓸ ꓠꓲꓹ ꓫꓵ ꓟ ꓣꓳ ꓟꓲ ꓠꓯ ꓞꓳ ꓤ ꓐꓴ ꓠꓯꓸꓼ ꓗꓪ ꓙꓳ ꓚꓱꓼ ꓟ ꓥ ꓡꓳ=  ꓖꓳ ꓡꓰ ꓐꓯ ꓟ ꓥˍ ꓟꓲ ꓣꓳ ꓙ ꓟꓶ ꓪꓽ ꓡꓰ ꓟꓽ ꓒꓬꓱꓼ ꓡ ꓕꓯ ꓠꓲꓹ ꓟ ꓕ ꓫꓸ= ꓟꓲ ꓠꓯ ꓗꓪ ꓥꓪ ꓮ ꓫꓵꓽ ꓑꓶꓸ ꓓꓴ ꓢꓯꓸ ꓔꓬ ꓥ ꓢꓷ

ꓐꓰ ꓣꓳ ꓚꓲꓽ ꓛꓬ ꓠ ꓠꓬꓲ ꓢꓲ꓾ ꓣꓳ ꓠꓯꓸꓼ ꓗꓪ ꓧꓪꓽ ꓡꓰ ꓟ ꓝꓲꓸ ꓞꓳ ꓡꓰ ꓟ ꓝꓲꓸ ꓗꓹ ꓛꓲ ꓟ ꓝꓲꓸ ꓫꓸ ꓓꓴ ꓕꓳꓹ ꓜꓳꓽ ꓟ ꓝꓲꓸ ꓣꓳ ꓮ ꓡꓰ ꓫꓵ ꓤꓶꓸꓹ ꓔꓯ ꓠꓲꓹ ꓫꓵꓽ ꓡ? ꓣꓳ ꓪ ꓠꓲꓹ ꓫꓵ ꓟ ꓠꓬꓲ ꓮ ꓫꓵꓽ ꓥ ꓡ? ꓐꓯ ꓟ ꓮ ꓙꓵꓹ ꓔꓯ ꓕꓳ ꓶ ꓗꓪ ꓐꓳ ꓠꓬꓲ ꓠ ꓗꓹ ꓡꓳ=

ꓝꓮꓲ ꓟꓽ ꓞꓲ ꓣꓳ ꓕꓲ ꓠꓬꓲ ꓡꓲ ꓕꓲ ꓠꓬꓲ ꓟꓬꓱꓽ ꓬꓰ ꓗꓷ ꓟ ꓟꓬꓱꓽ ꓮ ꓙꓵꓹ ꓔꓯ ꓙ ꓟꓶ ꓠ ꓗꓹ ꓡꓳ= ꓕꓱ ꓡꓱ ꓙ ꓟꓶ ꓢꓲ꓾ ꓡ ꓠꓹ ꓟ ꓦꓬ ꓠꓬꓲ ꓗꓪ ꓥꓪ ꓐꓱ ꓶ ꓪꓴ ꓟꓴ ꓡ ꓓꓴ ꓚꓱꓹ ꓮ ꓫꓵꓽ ꓬꓰ ꓠꓯˍ ꓡ? ꓐꓯ ꓟ ꓮ ꓙꓵꓹ ꓔꓯ ꓓꓵ ꓙ ꓠꓬꓲ ꓠ ꓗꓹ ꓡꓳ= ꓕꓱ ꓡꓱ ꓓꓵ ꓙ ꓢꓲ꓾ ꓦꓬ ꓠꓬꓲ ꓫꓵꓽꓕꓲ ꓠꓬꓲ ꓡꓲ ꓕꓲ ꓠꓬꓲ ꓗꓪ ꓗꓹ ꓛꓲ ꓓꓴ ꓧꓪꓽ ꓡꓰ ꓓꓴ ꓣꓳ ꓐꓱ ꓶ ꓡ ꓠꓹ ꓟ ꓗꓪ ꓙꓲ ꓖꓴ ꓙꓳ ꓟ ꓟꓬꓱꓽ ꓕꓲ ꓫꓵ ꓡꓲ ꓕꓲ ꓫꓵ ꓬꓰ ꓐꓭ ꓠꓬ ꓟꓲ ꓠꓯ ꓗꓪ ꓢꓯꓸ ꓔꓬ ꓟ ꓚꓱꓹ ꓔꓯ ꓢꓷꓸ ꓡ ꓥꓳ=ꓣꓳ ꓟꓲ ꓠꓯ ꓞꓳ ꓤ ꓠꓯꓹꓼ ꓗꓪ ꓬꓲ ꓒꓵꓽ ꓙꓳ ꓟ ꓕꓲ ꓫꓵ ꓡꓲ ꓕꓲ ꓫꓵ ꓔꓯ ꓪ ꓠꓲꓹ ꓫꓵ ꓟ ꓧꓪꓼ ꓠꓲꓹ ꓫꓵ ꓟ ꓙꓳ ꓡꓳ= ꓪ ꓠꓲꓹ ꓫꓵꓽ ꓟ ꓑꓶꓸ ꓓꓴ ꓠꓬꓲ ꓟꓬꓱꓽ ꓬꓰ ꓢꓯꓼ ꓕꓵꓼ ꓔꓬ ꓟ ꓥ ꓡꓳ= ꓖꓳ ꓟ ꓑꓶꓸ ꓓꓴ ꓣꓳ ꓤꓶꓸꓹ ꓗꓪ ꓮ ꓕꓯ ꓥˍ ꓟꓲ  ꓢꓲ ꓠ ꓗꓹ ꓡꓳ=

ꓕꓯ ꓥꓳ ꓐꓯ ꓠꓬ ꓟꓲ ꓠꓯ ꓢꓷꓸ ꓠꓲꓹ ꓢꓷꓸ ꓠꓲꓹ ꓫꓵꓽ ꓢꓴ ꓕꓲ ꓣꓳ ꓠꓬ ꓬꓲ ꓡꓳ ꓗꓪ ꓙꓲ ꓮ ꓙꓵꓹ ꓔꓯ ꓡꓳ ꓩꓴ ꓗꓷ ꓢꓲ꓾ ꓕꓳꓽ ꓶ ꓢꓳ ꓠ ꓗꓹ ꓡꓳ= ꓢꓲ ꓡꓲ ꓗꓹ ꓛꓲ ꓟ ꓦꓲꓸꓹ ꓘꓴꓽ ꓔꓯ ꓫꓬ ꓠꓲꓹ ꓫꓵ ꓟ ꓮꓽ ꓐ ꓕꓲ ꓣꓳ ꓠꓬ ꓦꓲꓸꓹ ꓢꓲ ꓟ ꓔꓯ ꓠꓲꓹ ꓠꓵ ꓢꓲ꓾ ꓣꓳ ꓤ ꓣꓳ ꓠꓱ ꓐꓴ ꓔꓯ ꓬꓲ ꓙꓲ ꓖꓶ ꓠ ꓗꓹ ꓡꓳ= ꓟꓲ ꓠꓯ ꓗꓪ ꓢꓲ ꓠ ꓗꓹ ꓟ ꓡꓰ ꓐꓰ ꓡꓳ ꓩꓴ ꓠ ꓗꓹ ꓟ ꓕꓲ ꓐꓱ ꓟꓲ ꓙꓳ ꓡꓳ= ꓣꓳ ꓤꓶꓸꓹ ꓗꓪ ꓣꓳ ꓮ ꓘꓶꓸ ꓠꓲꓹ ꓫꓵ ꓟ ꓶꓸꓹ ꓤ ꓕꓲ ꓟ ꓠꓬ ꓮ ꓙꓵꓹ ꓢꓴ ꓠꓯˍ ꓗꓪ ꓙꓳ ꓐꓭ ꓥꓳ= ꓖꓳ ꓟ ꓔꓯ ꓪ ꓠ ꓟ ꓮ ꓟꓬ ꓗꓪ ꓛꓲ ꓢꓯꓼ ꓕꓵꓼ ꓠ ꓗꓹ ꓟ ꓔꓯ ꓫꓸ ꓫꓸ ꓟꓶ ꓟꓶ ꓧꓪꓸ ꓟꓽ ꓛꓲ꓾ ꓟꓳꓼ ꓮ ꓘꓶꓸ ꓣꓳꓽ ꓟ ꓗꓪ ꓞꓳ ꓤ ꓙꓰ ꓙ ꓖꓴ ꓔꓯ ꓡꓳꓸ ꓠꓬꓲ ꓡꓯ= ꓕꓲ ꓧꓶꓸ ꓤ ꓙꓰ ꓓꓲ ꓗꓹ ꓠꓲꓽ ꓙ ꓖꓴ ꓟꓽ ꓒꓬꓱꓽ ꓡ꓾ ꓮ ꓟꓬꓹ ꓧꓪ ꓙꓰ ꓕꓯ ꓢꓲ꓾ ꓙ ꓖꓴ ꓒꓬꓱꓽ ꓡ ꓟ ꓥ ꓡꓳ= ꓣꓳ ꓤꓶꓸꓹ ꓗꓪ ꓥ ꓟꓲ ꓕꓱ ꓟ ꓡꓰ ꓐꓰ ꓥ ꓡꓳ= ꓣꓳ ꓪ ꓠꓲꓹ ꓫꓵꓽ ꓟ ꓮ ꓙꓵꓹ ꓔꓯ ꓪ ꓠ ꓟ ꓐꓱ ꓶ ꓮ ꓟꓬꓹ ꓧꓪꓸ ꓢꓯꓼ ꓕꓵꓼ ꓚꓲ ꓟ ꓥ ꓡꓳ= ꓖꓳ ꓕꓯ ꓢꓲ꓾ ꓣꓳ ꓪ ꓠꓲꓹ ꓫꓵꓽ ꓟ ꓪ ꓡ ꓥꓳ= ꓕꓱ  ꓟ ꓠꓬ ꓣꓳ ꓟꓲ ꓠꓯ ꓗꓪ ꓢꓯꓼ ꓔꓬ ꓟ ꓬꓲ ꓚꓱꓹ ꓥ ꓡꓳ=