ꓟꓽ ꓙꓲˍ ꓟ ꓬꓲ ꓫꓱꓹꓔꓯ ꓫꓬꓹ ꓑꓱꓻ ꓠꓲꓹ ꓫꓵ ꓠꓬ

Monday, March 13, 2023

ꓣꓳ ꓠꓯꓼ ꓗꓪ ꓟꓽ ꓙꓲ_ ꓟ ꓬꓲ ꓫꓱꓹ ꓙꓳ ꓚꓰ_ ꓡꓳ= ꓟꓽ ꓙꓲ_ ꓐ ꓯ ꓟ ꓠꓬ ꓮ ꓫꓵ ꓥ ꓡ? ꓐꓯ ꓟ ꓔꓯ ꓮ ꓙꓵꓽ ꓢꓷꓸ ꓔ ꓡꓳ= ꓔꓯ ꓥꓳꓽ ꓐꓯ ꓠꓬ ꓠꓯꓼ ꓠꓯꓼ ꓟꓽ ꓔꓴ ꓟ ꓣꓳ ꓟꓯꓼ ꓛꓳꓽ ꓒꓯꓹ ꓐꓴ ꓐꓰ ꓕꓲ ꓪ ꓬꓲ ꓙꓵꓹ ꓔꓯ ꓮꓽ ꓔꓳ ꓖꓴ ꓡꓰ ꓝꓲ ꓟ ꓬꓲ ꓔ ꓖꓴ ꓗꓪ ꓬꓰ ꓔ ꓔꓬ ꓢꓲ Facebook ꓔꓯ ꓬꓲ ꓙꓵꓹ ꓖꓴ ꓡꓰ ꓝꓲ ꓟ ꓧꓪ ꓖꓳ ꓓꓱ ꓔꓬ ꓢ ꓠꓹ ꓟ ꓐꓱ ꓶ ꓡꓳ ꓗꓪ ꓓꓴ ꓟꓽ ꓬꓰ ꓟ ꓕꓱ ꓡꓱ ꓫꓵꓽ ꓥ ꓡꓳ=

ꓕꓱ ꓡꓱ ꓬꓰ_ ꓟ ꓠꓬ ꓟꓽ ꓙꓲ ꓟ ꓢꓷꓸ ꓔ ꓡꓳ꓾ꓣꓳ ꓤꓶꓸꓹ ꓐꓱ ꓶ ꓪꓴ ꓟꓴ ꓡ ꓚꓱꓹ ꓟꓽ ꓙꓳ ꓟ ꓔꓯ ꓢꓷꓸ ꓔ ꓡꓳ= ꓕꓱ ꓡꓱ ꓫꓵꓽ ꓔꓯ ꓟꓽ ꓬꓰ ꓬꓰ ꓕꓳꓽ ꓶ ꓢꓳ ꓢꓴ ꓠꓬ ꓕꓳꓽ ꓶ ꓔꓯ ꓙꓲꓸꓹ ꓙꓲꓸꓹ ꓢꓳ꓾ ꓧꓪꓽ ꓒꓴ ꓥꓳꓽ ꓢꓳ ꓟꓬꓱꓽ ꓬꓰ ꓢꓴ ꓐꓴ ꓥ ꓟꓲ ꓣꓳ ꓟꓬꓱꓽ ꓬꓰ ꓟ ꓗꓪ ꓣꓱꓽ ꓬꓯꓼ ꓟ ꓕꓳꓽ ꓶ ꓵ Facebook ꓗꓪ ꓐꓰ ꓣꓳ ꓐꓱ ꓶ ꓙꓲꓸꓹ ꓖꓴ ꓙꓳ ꓟ ꓕꓳꓽ ꓶ ꓔꓯ ꓵ ꓔꓬ ꓐꓭ ꓠꓬ ꓟꓽ ꓟꓶ ꓫꓵ ꓕꓯ ꓣꓳ ꓤꓶꓸꓹ ꓐꓱ ꓶ ꓙꓲꓸꓹ ꓖꓴ ꓙꓳ ꓟ ꓒꓬꓱꓼ ꓡ ꓟ ꓔꓯ ꓥ ꓟꓲ ꓢꓷꓸ ꓔ ꓡꓳ=

ꓢꓷꓸ ꓔ ꓢꓲ ꓮ ꓫꓵꓽ ꓪꓴ ꓠꓬꓲ ꓟꓽ ꓬꓰ ꓡ? ꓟꓽ ꓙꓲ ꓟ ꓬꓲ ꓫꓱꓹ ꓔꓯ ꓮ ꓫꓵꓽ ꓪꓴ ꓠꓬ ꓡꓳ ꓗꓷ ꓟꓽ ꓐ ꓡ ꓡ? ꓞꓳ ꓤ ꓐꓯ ꓟ ꓠꓬ ꓪꓴꓸ ꓠꓶꓸ ꓠꓻ ꓫꓸ ꓟ ꓟꓬꓱꓽ ꓬꓰ ꓠꓲꓹ ꓟꓽ ꓫꓵ꓾ ꓪꓴꓸ ꓠꓶꓸ ꓟꓽ ꓠꓸꓹ ꓫꓸ ꓟ ꓟꓬꓱꓽ ꓬꓰ ꓢꓲ ꓔꓬ ꓠꓲꓹ ꓫꓵ ꓡꓳ꓾ ꓦꓬꓼ ꓠꓬꓲ ꓖꓳꓸ ꓠꓲꓹ ꓫꓵ_ ꓡꓳ= ꓖꓳ ꓡꓱ ꓐꓯ ꓥ ꓟꓲ ꓕꓱ ꓡꓱ ꓦꓬꓼ ꓠꓬꓲ ꓔꓯ ꓖꓳꓸ ꓔꓬ ꓐꓯ ꓠꓬ ꓣꓳ ꓕꓲ ꓤꓶꓸꓹ ꓡꓱꓼ ꓗꓪ ꓪꓴꓽ ꓟꓵ ꓡ ꓓꓴ ꓬꓲ ꓚꓱꓹ ꓟꓽ ꓙꓳ ꓡ= ꓖꓳ ꓟ ꓪꓴꓸ ꓠꓬꓲ ꓟꓽ ꓙꓲ_ ꓟ ꓬꓲ ꓫꓱꓹ ꓔꓯ ꓡꓳ ꓩꓴ ꓗꓷ ꓢꓲ ꓙꓲ_ ꓟ ꓬꓲ ꓫꓱꓹ ꓔꓯ ꓛꓳ ꓙꓰ ꓡꓯ=

ꓓ ꓪꓴ ꓙꓲ_ ꓟ ꓬꓲ ꓫꓱꓹ ꓔꓯ ꓣꓱꓽ ꓙꓲ ꓟ ꓕꓲ ꓙꓵꓹ ꓗꓪ ꓮ ꓔꓲ ꓤ ꓠꓬ ꓫꓸ ꓐꓭ ꓥꓳ꓾ ꓖꓳ ꓡꓰ ꓐꓯ ꓥ ꓟꓲ ꓣꓳ ꓕꓲ ꓤꓶꓸꓹ ꓡꓱꓼ ꓐꓱ ꓶ ꓣꓱꓽ ꓬꓯꓼ_ ꓟ ꓪꓴꓸ ꓠꓬꓲ ꓢꓯꓼ ꓕꓵꓼ ꓠ ꓗꓹ ꓡꓳ= ꓖꓳ ꓡꓱ ꓙꓲ_ ꓟ ꓬꓲ ꓫꓱꓹ ꓔꓯ ꓣꓱꓽ ꓙꓲ_ ꓟ ꓕꓲ ꓙꓵꓹ ꓗꓪ ꓠꓲꓹ ꓟ ꓕꓽ ꓐꓬ ꓡꓰ ꓝꓲ= ꓠꓴ ꓠꓲꓹ ꓟ ꓐꓬ ꓡꓰ ꓐꓯ ꓠꓬ ꓙꓲ_ ꓟ ꓬꓲ ꓫꓱꓹ ꓔꓯ ꓕꓲ ꓤꓶꓸꓹ ꓡꓱꓼ ꓟꓽ ꓪ ꓡ=