ꓢꓲꓹ ꓜꓲꓸꓹ ꓕꓲ ꓜꓲꓸꓹ ꓑꓶ ꓓꓴ ꓢꓲꓹ ꓠꓯ ꓟꓵꓽ ꓔꓯ ꓝꓴꓲ ꓕꓽ ꓓꓲ꓾

ꓮꓽ ꓠꓱ ꓕꓯ ꓦꓲꓸꓹ ꓜꓶꓽ ꓜꓶꓽ ꓗꓪ ꓔꓬ ꓟ ꓤ ꓟꓶ ꓤ ꓕꓲ ꓣꓳ ꓬꓲ ꓤ ꓠꓬ ꓕꓳ ꓶ ꓢꓳꓸꓹ ꓙꓳ ꓦꓲꓸꓹ ꓗꓪ ꓟꓽ ꓙꓰ ꓐꓰ ꓐꓯ ꓡꓳ= ꓠꓴ ꓟꓽ ꓙꓰ ꓟꓽ ꓓ ꓐꓰ ꓐꓯ ꓢꓲ꓾ ꓙꓳ ꓦꓲꓸꓹ ꓗꓪ ꓙꓰ ꓝꓲ ꓡꓳ= ꓟꓽ ꓟꓶ ꓫꓵ ꓕꓯ ꓕꓳ ꓶ ꓟꓸ ꓟ ꓡꓰ ꓠꓴ ꓤ ꓠꓬ ꓕꓳ ꓶ ꓟꓽ ꓢꓳ ꓬꓲ ꓐ ꓗꓪ ꓙꓰ ꓚꓳ_ ꓡꓳ ꓐꓰ ꓐꓯ ꓩꓴ ꓡ ꓕꓯ ꓤ ꓠꓱ ꓤ ꓬꓲ ꓟꓹ ꓟ ꓠꓬ ꓮ ꓡꓰ ꓬꓰ ꓓꓴ ꓥ ꓢꓶ ꓐꓰ ꓐꓯ ꓢꓲ꓾ ꓙꓬ ꓫꓸ ꓔꓬ ꓡꓳ= ꓖꓳ ꓕꓯ ꓦꓲꓸꓹ ꓘꓴꓽ ꓗꓪ ꓡ ꓙꓰ ꓢꓲ꓾ ꓬꓲ ꓤ  ꓗꓬꓮꓪ- ꓗꓬꓮꓪ ꓐꓰ ꓫꓸ ꓪ ꓕꓱ ꓡꓯ ꓘꓳꓹ ꓡꓳ=

ꓥꓪ ꓤ ꓠꓴ ꓙꓳ ꓦꓲꓸꓹ ꓗꓪ ꓟꓽ ꓗꓹ ꓛꓲ ꓟ ꓪꓴꓸ ꓠꓬꓲ ꓕꓳ ꓶ ꓢꓳ ꓠꓲꓹ ꓟ ꓫꓵ ꓐꓰ ꓐꓯ ꓟ ꓮ ꓟ ꓑ ꓙ ꓗꓷ= ꓮ ꓫꓵꓽ ꓪꓴꓸ ꓠꓬꓲ ꓟꓽ ꓗꓹ ꓛꓲ ꓡ? ꓐꓰ ꓠ ꓠꓬꓲ ꓡꓳ= ꓟꓽ ꓗꓹ ꓛꓲ ꓫꓵꓽ ꓟꓽ ꓥ ꓐꓰ ꓒꓳꓹ ꓖꓶ ꓡꓳ= ꓬꓲ ꓟꓹ ꓟ ꓡꓰ  ꓥꓪ ꓤ ꓠꓴ ꓗꓹ ꓛꓲ ꓟ ꓠꓬ ꓮ ꓫꓵꓽ ꓥ ꓐꓰ ꓐꓯ ꓕꓯ ꓡꓳ ꓖꓪ ꓟ ꓕꓲ ꓙꓵꓹ ꓗꓪ ꓮ ꓘꓶꓸ ꓗꓹ ꓛꓲ ꓡꓳ ꓐꓰ ꓒꓳꓹ ꓖꓶ ꓡꓳ= ꓟꓽ ꓗꓹ ꓛꓲ ꓟ  ꓠꓬ ꓮ ꓫꓵ ꓥ꓾ ꓐꓰ ꓠ ꓠꓬꓲ ꓕꓯ ꓟꓮꓔꓧ ꓟꓸ ꓔ ꓟ ꓕꓲ ꓙꓵꓹ ꓗꓪ ꓟꓽ ꓗꓹ ꓛꓲ ꓐꓰ ꓒꓳꓹ ꓖꓶ ꓡꓳ=

ꓤ ꓠꓱ ꓤ ꓬꓲ ꓠꓬ ꓟꓮꓔꓧ ꓢꓳ ꓟ ꓕꓲ ꓙꓵꓹ ꓗꓪ ꓟꓸ ꓟ ꓡꓰ ꓮ ꓡꓰ ꓟꓸ ꓔ ꓥ ꓟꓲ ꓟꓽ ꓢꓷꓸ ꓔ ꓟ ꓪꓴꓸ ꓠꓬꓲ ꓥ ꓐꓭ꓾ ꓮ ꓡꓰ ꓔ ꓠꓬꓲ ꓬꓲ ꓟꓽ ꓢꓷꓸ ꓔ ꓐꓯ ꓠꓬ ꓟꓮꓔꓧ ꓟꓸ ꓔ ꓟ ꓕꓲ ꓙꓵꓹ ꓗꓪ ꓬꓲ ꓠ ꓠꓸꓹ ꓔꓬ ꓟ ꓑꓶ ꓓꓴ ꓮ ꓟꓶ ꓬꓲ ꓟꓮꓔꓧ ꓔꓯ ꓢꓷꓸ ꓟ ꓢ ꓙ ꓜꓲꓼ ꓟꓽ ꓢ ꓟ ꓥ ꓡꓳ=ꓬꓲ ꓟꓹ ꓟ ꓠꓬ ꓖꓳ ꓟ ꓔꓯ ꓢꓷꓸ ꓡꓰ ꓟ ꓑꓶ ꓓꓴ ꓮ ꓘꓶꓸ ꓓ_ ꓟ ꓟꓮꓔꓧ ꓟꓸ ꓟ ꓕꓲ ꓣꓳ ꓔꓯ ꓘꓴ ꓖꓶ ꓗꓷ ꓠꓬ ꓤ ꓠꓱ ꓤ ꓕꓳ ꓶ ꓢꓳ ꓠꓲꓹ ꓟꓽ ꓫꓵ_ ꓟ ꓠꓬ ꓬꓲ ꓕꓳ ꓶ ꓢꓳ ꓠꓲꓹ ꓫꓵꓽ ꓡꓰ ꓪ=

ꓕꓱ ꓟꓸ ꓟꓲ ꓗꓪ ꓐꓰ ꓣꓳ ꓔꓯ ꓮ ꓫꓵ ꓢꓷꓸ ꓡꓰ ꓓꓴ ꓖꓶ ꓡ? ꓕꓲ ꓖ ꓕꓲ ꓧꓪ ꓣꓳ ꓠꓯꓼ ꓗꓪ ꓫꓸ ꓓꓴ ꓕꓲ ꓫꓵꓽ ꓙꓳˍ ꓡ ꓕꓯ ꓫꓵꓽ ꓪꓴ ꓕꓲ ꓟ ꓡꓰ ꓐꓰ ꓡꓳꓸ ꓟꓳ ꓔꓬ ꓡꓳ= ꓢꓲꓹ ꓜꓲꓸꓹ ꓕꓲ ꓜꓲꓸꓹ ꓔꓯ ꓟꓽ ꓠꓵ ꓓꓲ ꓗꓼ ꓠꓲꓹ ꓢꓲ ꓠꓯ ꓟꓵꓽ ꓔꓯ ꓝꓴꓲ ꓕꓽ ꓓꓰ ꓪ ꓡꓰ ꓗꓹ ꓡꓳ=