ꓤ ꓠꓱ ꓤ ꓐꓴ ꓐꓱ ꓶ ꓮꓽ ꓐ ꓮ ꓟ ꓣꓱꓽ ꓢꓴ ꓐꓴ ꓙ ꓟꓶ ꓖꓶ ꓪ ꓡꓰ ꓝꓲ꓾

Monday, September 18, 2023

ꓠꓬꓲꓸ ꓠꓬꓲ ꓠꓬ ꓤ ꓠꓱ ꓤ ꓐꓴ ꓐꓱ ꓶ ꓮꓽ ꓐ ꓮ ꓟ ꓣꓱꓽ ꓢꓴ ꓐꓴ ꓙ ꓟꓶ ꓖꓶ ꓪ ꓡꓰ ꓝꓲ꓾ ꓐꓯ ꓟ ꓗꓪ ꓐꓰ ꓢꓷꓸ ꓙ ꓟꓳ ꓙ ꓩꓴ ꓡ ꓥꓳ= ꓤ ꓠꓱ ꓐꓴ ꓐꓱ ꓶ ꓐꓯ ꓟ ꓠꓬ 4 ꓘꓳꓼ ꓛꓲ ꓡꓳꓹ ꓟ ꓤ ꓠꓱ ꓤ ꓐꓴ ꓔꓯ ꓐꓯ ꓠꓲꓹ ꓫꓵꓼ ꓟ ꓥˍꓡꓳ= ꓬꓲꓸ ꓪ ꓐꓱ ꓶ ꓮ ꓘꓶꓸ ꓣꓳꓸꓹ ꓚꓵ ꓟ ꓪꓴꓸ ꓠꓬꓲ ꓮꓽ ꓐ ꓮ ꓟ ꓣꓱꓽ ꓢꓴ ꓐꓴ ꓕꓱ ꓟ ꓔꓯ ꓙ ꓟꓶ ꓖꓶ ꓐꓯ ꓠꓲꓹ ꓫꓵꓼ ꓟ ꓥ ꓡꓳ= ꓮꓽ ꓐ ꓮ ꓟ ꓠꓬꓲ ꓣꓳ ꓠꓯꓸꓼ ꓘꓴꓽ ꓗꓪ ꓤ ꓠꓱ ꓤ ꓐꓴ ꓔꓬ ꓡ ꓕꓯ ꓮ ꓫꓵꓽ ꓬꓰ ꓠꓹ ꓟ ꓟꓲ ꓟꓽ ꓢꓷꓸ ꓚꓳ ꓡꓳ ꓚꓳ ꓫꓵꓽ ꓗꓪ ꓮ ꓟ ꓔꓯ ꓬꓰ ꓙ ꓡꓯ ꓐꓰ ꓶꓸꓹ ꓓꓰ ꓓꓴ ꓟꓽ ꓢꓷꓸ ꓮ ꓟꓬꓹ ꓗꓪ ꓛꓲ ꓫꓸ ꓔ ꓟ ꓬꓲꓸ ꓙꓵꓽ ꓕꓲ ꓙꓵꓽ ꓟꓲ ꓥˍ ꓡꓳ=

ꓤ ꓠꓱ ꓟꓽ ꓦꓵꓸꓹ ꓕꓯ ꓠꓬ ꓠꓬꓲ ꓣꓳ ꓐꓱ ꓶ ꓜꓼ ꓡꓳ ꓖꓪ ꓡꓳꓼ ꓡꓳ= ꓖꓳ ꓡꓰ ꓐꓯ ꓥˍꓟꓲ ꓣꓳ ꓤ ꓠꓱ ꓔꓬ ꓡ ꓕꓯ ꓠꓬ ꓜꓼ ꓓꓴ ꓖꓪ ꓓꓴ ꓒꓴꓽ ꓮ ꓟꓬꓹ ꓣꓱꓽ ꓯꓬꓼ ꓡ ꓡꓳ= ꓮ ꓟꓬ ꓗꓪ ꓛꓲ ꓫꓸ ꓔ ꓥ ꓟꓲ ꓣꓳ ꓤ ꓣꓳ ꓠꓱ ꓐꓱ ꓶ ꓮꓽ ꓐ ꓮ ꓟ ꓣꓱꓽ ꓢꓴ ꓐꓴ ꓠꓬ ꓬꓰ ꓙ ꓖꓶ ꓔꓬ ꓟ ꓥ ꓡꓳ= ꓕꓯ ꓥꓳꓽ ꓐꓯ ꓠꓬ ꓤ ꓠꓱ ꓤ ꓠꓬꓲ ꓘꓳꓼ ꓛꓲ ꓡꓳ ꓡ ꓢꓲ꓾ ꓙ ꓖꓴ ꓫꓱꓼ ꓗꓴꓸ ꓡ ꓕꓯ ꓮꓽ ꓐ ꓮ ꓟ ꓣꓱꓽ ꓢꓴ ꓐꓴ ꓬꓲꓸ ꓪ ꓔꓯ ꓟꓬꓱꓽ ꓓꓳ ꓖꓶ ꓠ ꓗꓹ ꓡꓳ= ꓖꓳ ꓕꓯ ꓢꓲ꓾ ꓤ ꓠꓱ ꓤ ꓐꓴ ꓥˍ ꓟꓲ ꓗꓹ ꓛꓲ ꓡꓳ= ꓬꓲꓸ ꓪ ꓢꓯꓼ ꓕꓵꓼ ꓠꓲꓹ ꓟ ꓙꓳ ꓡ ꓥꓳ= ꓧꓪ ꓡꓰ ꓢꓴ ꓒꓬꓱꓼ ꓡ ꓥꓳ= ꓤ ꓠꓱ ꓤ ꓐꓴ ꓠꓬ ꓬꓲꓸ ꓪ ꓠꓯꓸꓼ ꓗꓪ ꓮꓽ ꓐ ꓮ ꓟ ꓣꓱꓽ ꓢꓴ ꓐꓴ ꓮ ꓕꓯ ꓟꓲ ꓔꓬ ꓡꓳ ꓐꓰ ꓓꓵ ꓙ ꓡ ꓥꓳ= ꓬꓲꓸ ꓪ ꓐꓱ ꓶ ꓮ ꓕꓯ ꓟꓲ ꓔꓬ ꓡꓳ ꓐꓰ ꓙ ꓟꓶ ꓡ ꓥꓳ=

ꓖꓳ ꓟ ꓡꓰ ꓐꓰ ꓟꓽ ꓞꓲ ꓠꓬꓲ ꓤ ꓠꓬꓲ ꓟ ꓐꓴ ꓕꓲ ꓣꓳ ꓚꓳ ꓕꓲ ꓣꓳ ꓠꓲꓹ ꓠꓵ ꓡꓯ ꓘꓳꓼ ꓠꓹ ꓟ ꓟꓸ ꓖꓶ ꓐꓶ ꓖꓶ ꓠ ꓗꓹ ꓡꓳ= ꓖꓳ ꓕꓯ ꓢꓲ꓾ ꓝꓮꓲ ꓕꓲ ꓣꓳ ꓔꓬ ꓡ ꓕꓯ ꓠꓲꓹ ꓠꓵ ꓢꓲ꓾ ꓬꓰ ꓙ ꓡ ꓥꓳ= ꓞꓳ ꓒꓴꓽ ꓡꓯ ꓘꓳꓼ ꓡ ꓥꓳ= ꓕꓲ ꓖ ꓕꓲ ꓧꓪ ꓚꓳ ꓡꓳ ꓚꓳ ꓫꓵꓽ ꓗꓪ ꓐꓯ ꓟ ꓓꓸꓸ ꓟ ꓤ ꓠꓱ ꓤ ꓕꓲ ꓣꓳ ꓡꓰ ꓐꓰ ꓟꓲ ꓡ ꓡꓳ= ꓮꓽ ꓐ ꓮ ꓟ ꓣꓱꓽ ꓐꓴ ꓡꓰ ꓙꓵˍ ꓕꓯ ꓖꓳ ꓟ ꓕ ꓬꓰ꓾ ꓕꓱ ꓟ ꓕ ꓬꓰ꓾ ꓖꓳ ꓗꓪ ꓕ ꓙꓰ ꓐꓰ ꓐꓯ ꓢꓲ꓾ ꓕꓱ ꓡꓱ ꓬꓰ ꓟ ꓟꓲ ꓙꓳ ꓡꓳ= ꓖꓳ ꓟ ꓐꓭ ꓓꓴ ꓞꓲ ꓣꓳ ꓟ ꓤ ꓠꓱ ꓤ ꓐꓴ ꓕꓯ ꓬꓲ ꓐ ꓗꓪ ꓙꓰ ꓝꓲ꓾ ꓡꓳ ꓖꓪ ꓝꓲ꓾ ꓖꓳ ꓕꓯ ꓢꓲ꓾ ꓬꓲꓸ ꓪ ꓪꓴꓸ ꓠꓶꓼ ꓟꓲ ꓙꓲˍ ꓡ ꓥꓳ=

ꓝꓮꓲ ꓕꓲ ꓫꓵꓽ ꓠꓬ ꓮꓽ ꓐ ꓮ ꓟ ꓟꓽ ꓠꓲꓹ ꓫꓵꓽ ꓟ ꓔꓯ ꓟꓽ ꓬꓰ ꓪ ꓠꓹ ꓟ ꓟꓸ ꓖꓶ= ꓕꓲ ꓖ ꓕꓲ ꓧꓪ ꓣꓳ ꓟꓽ ꓠꓲꓹ ꓫꓵꓽ ꓟ ꓔꓯ ꓬꓰ ꓡ ꓕꓯ ꓥˍ ꓟꓲ ꓣꓳ ꓤ ꓠꓱ ꓥ ꓟ ꓑꓶꓸ ꓓꓴ ꓖ ꓖꓶ ꓪ ꓡꓰ ꓝꓲ꓾ ꓝꓮꓲ ꓕꓲ ꓧꓪ ꓟꓽ ꓬꓰ ꓥꓳꓽ ꓠꓹ ꓟ ꓟꓸ ꓖꓶ= ꓕꓱ ꓡꓱ ꓬꓰ ꓠꓬ ꓬꓲꓸ ꓪ ꓟꓲ ꓢꓷꓸ ꓗꓴꓽ ꓡ ꓢꓲ꓾ ꓙꓰ ꓟ ꓚꓱꓸ ꓟ ꓙ ꓫꓱꓹ ꓡ ꓥꓳ= ꓮꓽ ꓐ ꓮ ꓟ ꓠꓬꓲ ꓤ ꓠꓬꓲ ꓟ ꓔꓯ ꓛꓳ ꓒꓴꓽ ꓡ ꓥꓳ= ꓮ ꓙꓵꓽ ꓢꓴ ꓔꓯ ꓫꓸ ꓟ=