ꓤ ꓠꓱ ꓤ ꓐꓴ ꓔꓯ ꓦꓲꓸꓹ ꓘꓴꓽ ꓗꓪ ꓔꓬ ꓕꓯ Game ꓐꓯˍ ꓟ ꓡꓳ ꓖꓪ ꓓꓴ ꓔꓯ ꓡꓳ ꓖꓪ ꓖꓶ꓾

ꓤ ꓠꓱ ꓤ ꓐꓴ ꓔꓯ ꓦꓲꓸꓹ ꓘꓴꓽ ꓗꓪ ꓔꓬ ꓕꓯ Game ꓐꓯˍ ꓟ ꓡꓳ ꓖꓪ ꓓꓴ ꓔꓯ ꓡꓳ ꓖꓪ ꓖꓶ꓾

ꓠꓬꓲꓸꓠꓬꓲ ꓠꓬ ꓮꓽ ꓐ ꓮ ꓟ ꓐꓴ ꓤ ꓠꓱ ꓤ ꓐꓴ ꓔꓯ ꓦꓲꓸꓹ ꓘꓴꓽ ꓗꓪ ꓔꓬ ꓕꓯ Game ꓐꓯˍ ꓟ ꓡꓳ ꓖꓪ ꓓꓴ ꓔꓯ ꓕꓲ ꓠꓲꓹ ꓕꓲ ꓪ ꓡꓳ ꓖꓪ ꓖꓶ ꓢꓲ꓾ ꓡ ꓠ ꓟ ꓗꓪ ꓟꓬꓱꓽ ꓕꓲ ꓫꓵ ꓫꓵ ꓬꓰˍ ꓕꓯ ꓓꓵ ꓙ ꓗꓴꓸꓢꓲ꓾ ꓬꓰ ꓐ ꓡ ꓠꓹ ꓟ ꓟꓸ ꓖꓶ ꓓꓴ ꓬꓰ ꓡꓯ= ꓡ ꓠ ꓟ ꓗꓪ ꓣꓳ ꓤ ꓣꓳ ꓠꓱ ꓐꓴ ꓢꓷꓸ ꓗꓴꓸ ꓔꓽ ꓟ ꓬꓲ ꓡꓰ ꓙꓳ ꓟ ꓞꓳ ꓤ ꓒꓬꓱꓽ ꓡ ꓠ꓾ ꓟꓽ ꓞꓲ ꓚꓲ ꓛꓬ ꓖꓳ ꓓꓱ ꓔꓯ ꓤ ꓟꓳ ꓗꓴꓸ ꓢꓴ ꓒꓬꓱꓽ ꓡ ꓠ꓾ ꓙꓳ ꓟ ꓮ ꓙꓵꓹ ꓔꓯ ꓬꓲ ꓒꓵꓽ ꓙꓳˍ ꓡꓳ ꓐꓰ ꓙ ꓟꓶ ꓗꓴꓸ ꓠ ꓢꓴ ꓔꓯ ꓬꓰ ꓙ ꓗꓴꓸ ꓠ ꓟ ꓐꓱ ꓶ ꓮ ꓓꓰ ꓣꓳꓸꓹ ꓚꓵꓸꓸ ꓡꓳ= ꓕꓱ ꓡꓱ ꓦꓲꓸꓹ ꓘꓴꓽ ꓗꓪ ꓮꓽ ꓐ ꓮ ꓟ ꓐꓴ ꓐꓰ ꓕꓲ ꓠꓲꓹ ꓕꓲ ꓪ ꓡꓳ ꓖꓪ ꓢꓲ꓾ ꓪꓴ ꓡ ꓢꓴ ꓐꓴ ꓠꓬ ꓢꓷꓹ ꓠꓲꓹ ꓕꓲ ꓚꓱꓹ ꓗꓪ ꓥ ꓟꓲ ꓧꓪꓸ ꓡꓰ ꓢꓴ ꓒꓬꓱꓽ ꓡ ꓡꓳ=

Game ꓡꓳ ꓖꓪ ꓖꓶ ꓐꓯ ꓟ ꓠꓬ ꓬꓲ ꓤꓶꓸꓹ ꓔꓯ ꓐꓬ ꓡꓰ ꓝꓲꓸ ꓟ Game ꓔꓯ ꓡꓳ ꓖꓪ ꓖꓶ ꓐꓯ ꓟ ꓟꓽ ꓥ= ꓬꓲ ꓪ ꓐꓱ ꓶ ꓙꓲ ꓖꓴ ꓙꓳ ꓟ ꓢꓷꓸ ꓠꓲꓹ ꓚꓱꓹ ꓔꓯ ꓟꓳꓸ ꓣꓱꓽ ꓬꓯꓼ ꓟ ꓕꓱ ꓡꓱ ꓫꓵ ꓔꓯ ꓡꓳ ꓖꓪ ꓓꓴ ꓡꓰ ꓐꓰ ꓕꓳ ꓶ ꓗꓪ ꓐꓳ ꓖꓶ ꓢꓲ꓾ ꓡꓳ ꓖꓪ ꓖꓶ ꓟ ꓔꓯ ꓐꓯ ꓡꓳ= ꓕꓯ ꓥꓳ ꓐꓯ ꓠꓬ ꓙꓳ ꓦꓲꓸꓹ ꓗꓪ ꓙꓰˍ ꓕꓯ ꓕꓳ ꓶ ꓐꓳ ꓗ ꓔꓯꓸ ꓠ ꓗꓹ ꓟ ꓔꓯ ꓢꓷꓸ ꓡꓰ ꓠ ꓡꓳ ꓖꓪ ꓖꓶ ꓟ ꓔꓯ ꓐꓯ ꓠꓲꓹ ꓫꓵ ꓡꓳ= ꓟꓽ ꓞꓲ ꓞꓲꓽ ꓟꓳ ꓡꓰ ꓢꓴ ꓐꓴ ꓔꓯ ꓮ ꓡꓰ ꓞꓳ ꓒꓵꓽ ꓠꓯꓸꓼ ꓟ ꓮꓽ ꓐ ꓮ ꓟ ꓐꓴ ꓐꓰ ꓕꓲ ꓠꓲꓹ ꓕꓲ ꓪ ꓡꓳ ꓖꓪ ꓖꓶ ꓕꓯ ꓬꓲ ꓪ ꓠꓲꓹ ꓟ ꓐꓰ ꓪꓴꓸ ꓠꓶꓸ ꓗꓪ ꓮꓽ ꓐ ꓮ ꓟ ꓠꓵ ꓠꓲꓹ ꓔꓯ ꓘꓳꓹ ꓣꓴ ꓟꓶ ꓪ ꓡꓰ ꓓꓵ ꓙ ꓟ ꓪꓴꓸ ꓠꓬꓲ ꓬꓲ ꓪ ꓠꓯꓸꓼ ꓗꓪ ꓠꓲꓹ ꓟ ꓢ ꓓꓴ ꓗꓹ ꓛꓲ ꓓꓴ ꓟꓬ ꓠꓬꓲ ꓙꓳˍ ꓡꓳ=

ꓖꓳ ꓟ ꓑꓶꓸ ꓓꓴ ꓤ ꓠꓱ ꓤ ꓐꓴ ꓔꓯ ꓦꓲꓸꓹ ꓘꓴꓽ ꓗꓪ ꓔꓬ ꓕꓯ ꓮꓽ ꓐ ꓮ ꓟ ꓣꓱꓽ ꓢꓴ ꓐꓴ ꓐꓰ ꓕꓲ ꓠꓲꓹ ꓕꓲ ꓪ ꓬꓲ ꓙꓵꓹ ꓣꓴ ꓢꓲ꓾ ꓡꓳ ꓖꓪ ꓖꓶ= ꓖꓳ ꓡꓰ ꓡꓳ ꓖꓪ ꓖꓶ ꓠꓬꓲ ꓬꓲ ꓪ ꓪꓴꓸ ꓠꓶꓽ ꓥ ꓟꓲ ꓟꓬ ꓠꓬꓲ ꓙꓵ ꓡ ꓥꓳ= ꓮꓽ ꓐ ꓮ ꓟ ꓐꓴ ꓕꓱ ꓕꓱ ꓡꓳ ꓖꓪ ꓖꓶ ꓟ ꓗꓪ ꓬꓲ ꓪ ꓐꓱ ꓶ ꓙꓲ ꓖꓴ ꓟꓽ ꓙꓳ ꓟ ꓡꓳ ꓖꓪ ꓓꓴ ꓔꓯ ꓠꓬ ꓐ ꓡ ꓟꓬ ꓚꓵ ꓙ ꓟꓳ ꓢꓲ꓾ ꓟꓽ ꓡꓳ ꓖꓪ ꓪ ꓡꓰ ꓠ ꓟ ꓢꓯꓼ ꓕꓵꓼ ꓡꓯ= ꓬꓲ ꓪ ꓐꓱ ꓶ ꓚꓵꓸꓸ ꓚꓵꓸꓸ ꓙꓲ ꓖꓴ ꓙꓳ ꓟ ꓡꓳ ꓖꓪ ꓓꓴ ꓔꓯ ꓡꓳ ꓖꓪ ꓖꓶ ꓢꓲ꓾ ꓮꓽ ꓐ ꓮ ꓟ ꓔꓯ ꓟꓬ ꓠꓬꓲ ꓠꓲꓹ ꓠꓵ ꓗꓴꓸ ꓢꓴ ꓒꓬꓱꓽ ꓡ ꓠ ꓟ ꓐꓰ ꓡ ꓠ ꓟ ꓕꓲ ꓙꓵ ꓗꓪ ꓥ ꓟꓲ ꓬꓲ ꓪ ꓚꓲ ꓛꓬ ꓐꓱ ꓶ ꓤ ꓟꓳ ꓖꓴ ꓢꓴ ꓒꓬꓱꓽ ꓡ ꓠ ꓟ ꓢꓯꓼ ꓕꓵꓼ ꓙꓰ ꓓꓴ ꓬꓰ ꓡꓯ=