ꓤ ꓠꓱ ꓤ ꓐꓴ ꓧꓪꓸ ꓡꓰ ꓓꓴ ꓔꓯ ꓘꓳꓹ ꓣꓴ ꓟꓶ ꓠꓹ ꓟ ꓐꓱ ꓶ ꓮꓽ ꓐꓽ ꓮ ꓟ ꓣꓱꓽ ꓢꓴ ꓐꓴ ꓮ ꓡꓰ ꓙ ꓖꓶ ꓠ ꓗꓹ ꓔ ꓥ ꓢꓷꓽ

Monday, January 16, 2023

ꓞꓲꓼ ꓣꓳ_ ꓟ ꓤ ꓠꓱ ꓤ ꓐꓴ ꓔꓯ ꓮꓽ ꓐꓽ ꓮ ꓟ ꓐꓴ ꓐꓰ ꓕꓲ ꓪꓼ ꓔꓬ ꓕꓯ ꓙꓲ_ ꓟ ꓫꓸ ꓪ ꓐꓰ ꓬꓲ ꓪ ꓠꓯꓼ ꓗꓪ ꓢꓯꓼ ꓪꓽ ꓪ_ ꓟ ꓫꓸ ꓪ ꓔꓯ ꓕꓱ ꓖꓶ= ꓠꓵ ꓠꓲꓹ ꓐꓰ ꓧꓪꓸ ꓡꓰ ꓓꓴ ꓠꓬ ꓦꓲꓸꓹ ꓘꓴꓽ ꓗꓪ ꓐꓰ ꓪꓴꓸ ꓔꓴ_ ꓟ ꓥ ꓡꓳ= ꓮꓽ ꓐꓽ ꓮ ꓟ ꓣꓱꓽ ꓢꓴ ꓐꓴ ꓤ ꓟꓳ ꓠ ꓔ ꓟ ꓠꓬ ꓢꓴ ꓤ ꓠꓱ ꓠꓽ ꓮ ꓫꓵꓽ ꓗꓪ ꓥ ꓟꓲ ꓓ_ ꓡꓳ꓾ ꓠꓴ ꓥ ꓟꓲ ꓖꓳ ꓡꓰ ꓗꓷ ꓠ ꓢꓯꓼ ꓕꓵꓼ ꓐꓰ ꓐꓯ_ ꓟ ꓮꓽ ꓐꓽ ꓮ ꓟ ꓣꓱꓽ ꓐꓴ ꓔꓯ ꓡꓳꓸ ꓟꓳ ꓐꓭ ꓥꓳ꓾ ꓕꓱ ꓡꓱ ꓕꓽ ꓐꓯ ꓪ ꓡꓰ ꓝꓲ= ꓤ ꓠꓱ ꓐꓴ ꓮ ꓙꓵꓽ ꓠꓯꓼ ꓗꓪ ꓠꓬ ꓕꓲ ꓣꓳ ꓕꓲ ꓫꓵꓽ ꓓ_ ꓟ ꓙꓳˍ ꓡꓳ=

ꓕꓲ ꓣꓳ ꓐꓰ ꓕꓲ ꓣꓳ ꓠꓬ ꓟꓽ ꓪ꓾ ꓔꓯ ꓥꓳꓽ ꓐꓯ ꓠꓬ ꓤ ꓠꓱ ꓕꓲ ꓣꓳ ꓠꓬ ꓟꓴ ꓖꓪ ꓖꓪ ꓟ ꓗꓪ ꓮ ꓘꓶꓸ ꓓ ꓥ ꓟꓲ ꓝꓮꓲ ꓕꓲ ꓣꓳ ꓠꓬ ꓟꓴ ꓖꓪ ꓖꓪ ꓟ ꓗꓪ ꓟꓽ ꓓ= ꓖꓳ ꓟ ꓡꓰ ꓐꓰ ꓤ ꓠꓱ ꓤ ꓕꓲ ꓣꓳ ꓠꓬ ꓕꓳ ꓶ ꓮ ꓘꓶꓸ ꓓ ꓥ ꓟꓲ ꓝꓮꓲ ꓕꓲ ꓣꓳ ꓠꓬ ꓕꓳ ꓶ ꓔꓯ ꓮ ꓘꓶꓸ ꓟꓽ ꓓ꓾ ꓖꓳ ꓟ ꓡꓰ ꓐꓰ ꓥꓳ꓾ꓕꓲ ꓐꓱ ꓠꓬ ꓧꓪꓸ ꓡꓰ ꓓꓴ ꓔꓯ ꓢ ꓢ ꓪ ꓟꓲ ꓕꓱ ꓐꓴ ꓠꓬ ꓗꓸ ꓠꓯꓸ ꓢꓲ ꓗꓪ ꓜꓰ ꓒꓲꓹ ꓔꓬ ꓡꓳ= ꓤ ꓠꓱ ꓕꓲ ꓣꓳ ꓐꓰ ꓕꓲ ꓣꓳ ꓟꓽ ꓫꓱꓹ ꓡꓯꓼ ꓘꓳ_ ꓟ ꓔꓶꓻ ꓙꓱꓼ ꓙꓳˍ ꓡꓳ= ꓮꓽ ꓐꓽ ꓮ ꓟ ꓒꓬꓱꓼ ꓠꓲꓹ ꓫꓵ_ ꓟ ꓡꓰ ꓟꓽ ꓒꓬꓱꓼ ꓡ ꓕꓯ ꓮꓽ ꓐꓽ ꓮ ꓟ ꓣꓱꓽ ꓢꓴ ꓐꓴ ꓠꓲꓹ ꓟ ꓕꓽ ꓩꓴ ꓪ ꓡꓰ ꓝꓲ= ꓮꓽ ꓐꓽ ꓮ ꓟ ꓣꓱꓽ ꓢꓴ ꓐꓴ ꓠꓬ ꓣꓳ ꓤ ꓠꓱ ꓐꓴ ꓔꓯ ꓙꓲ_ ꓟ ꓡꓰ ꓒꓬꓱꓼ ꓝꓲ ꓠꓲꓹ ꓫꓵ_ ꓡꓳ=

ꓮꓽ ꓐꓽ ꓮ ꓟ ꓣꓱꓽ ꓢꓴ ꓐꓴ ꓙꓲ_ ꓟ ꓬꓰ ꓕꓯ ꓢꓲ꓾ ꓤ ꓠꓱ ꓤ ꓐꓴ ꓥ ꓟꓲ ꓙꓲ_ ꓟ ꓬꓰ ꓡ ꓥꓳ= ꓟꓬ ꓠꓬꓲ ꓣꓳꓸ ꓚꓵ_ ꓟ ꓠꓬ ꓤ ꓠꓱ ꓤ ꓐꓴ ꓔꓯ ꓠꓵ ꓠꓲꓹ ꓮ ꓕꓯ ꓥ ꓟꓲ ꓖꓶ ꓪ ꓠꓹ ꓟ ꓢꓯꓼ ꓕꓵꓼ= ꓣꓳ ꓤ ꓠꓱ ꓔꓯ ꓬꓲ ꓙꓵꓹ ꓖꓶ ꓢꓲ꓾ ꓙꓲ_ ꓟ ꓚꓱꓹ ꓔꓯ ꓮ ꓕꓯ ꓥ ꓟꓲ ꓐꓯ ꓟꓸ ꓖꓶ= ꓤ ꓠꓱ ꓤ ꓐꓴ ꓧꓪꓸ ꓡꓰ ꓓꓴ ꓔꓯ ꓘꓳꓹ ꓣꓴ ꓟꓶ ꓠꓹ ꓟ ꓐꓱ ꓶ ꓮꓽ ꓐꓽ ꓮ ꓟ ꓣꓱꓽ ꓢꓴ ꓐꓴ ꓢꓯꓼ ꓕꓵꓽ ꓙ ꓠ ꓔ ꓡꓳ=