ꓤ ꓠꓱ ꓤ ꓐꓴ Tꓯ ꓢꓲ ꓶꓻ ꓤꓼ ꓔꓯ ꓟꓬ ꓠꓬꓲ ꓠꓲꓹ ꓠꓵ ꓡ?

ꓤ ꓠꓱ ꓤ ꓐꓴ Tꓯ ꓢꓲ ꓶꓻ ꓤꓼ ꓔꓯ ꓟꓬ ꓠꓬꓲ ꓠꓲꓹ ꓠꓵ ꓡ?

ꓕꓲ ꓠꓬꓲ ꓕꓯ ꓞꓳ ꓤ ꓕꓲ ꓣꓳ ꓠꓬ ꓟꓽ ꓟꓶ ꓫꓵ ꓕꓯ ꓪꓴꓸꓹ ꓦ ꓟ ꓟꓳ-ꓓꓳ ꓕꓲ ꓢꓶꓽ ꓔꓯ ꓶꓻ ꓤꓼ ꓕꓲ ꓟ ꓫꓬꓹ ꓑꓱ ꓔꓬ ꓡꓳ=  ꓬꓲꓸ ꓑ ꓕꓲ ꓗꓪ ꓡꓲ ꓘꓳꓼ ꓛꓲ ꓡꓳꓼ ꓟ ꓤ ꓠꓱ ꓤ ꓕꓲ ꓣꓳ ꓠꓬ ꓡꓳꓸꓹ ꓓꓰ ꓕꓲ ꓢꓶꓽ ꓔꓯꓹ ꓦ ꓢꓲ ꓟꓳ-ꓓꓳ ꓔꓯ ꓓꓶ ꓤꓰꓸꓹ ꓔꓬ ꓡꓳ= ꓖꓳ ꓟ ꓔꓯ ꓬꓲ ꓐꓹ ꓐꓽ ꓟꓳ ꓡꓰ ꓕꓯ ꓮ ꓘꓶꓸ ꓠꓲꓹ ꓢꓲꓼ ꓡ ꓟ ꓑꓶ ꓓꓴ ꓤ ꓠꓱ ꓤ ꓬꓲ ꓡꓯ ꓒꓯꓹ ꓔꓯ ꓣꓴ ꓢꓲ ꓮ ꓟꓬꓹ ꓕꓷꓹ ꓓꓶꓽ ꓩꓴ ꓡꓳ= ꓟꓽ ꓟꓶ ꓫꓵ ꓕꓯ ꓬꓲ ꓐꓹ ꓐꓽ ꓙ ꓟꓶ ꓛꓲ ꓡ ꓡꓳ= ꓬꓲ ꓡꓰ ꓬꓲ ꓤ ꓟꓶ ꓔꓯ ꓓꓶꓽ_ ꓟ ꓢꓲꓹ ꓗꓸ ꓠꓬ ꓖꓪ ꓟꓲ ꓢꓲꓹ ꓗꓸ ꓥ ꓟ ꓔꓯ ꓓꓵꓽ ꓙ ꓛꓲ ꓡ ꓡꓳ= ꓬꓲ ꓤ ꓟꓶ  ꓡꓯ ꓒꓯꓹ ꓥ ꓟꓲ ꓮ ꓙꓵꓽ ꓘꓱꓹ ꓡꓰ ꓪ=

ꓬꓲ ꓐꓹ ꓐꓽ ꓠꓬ ꓮ ꓘꓶꓸ ꓠꓲꓹ ꓟ ꓫꓸ ꓡꓰ ꓟ ꓪꓴꓸ ꓠꓬꓲ ꓠꓯꓺ ꓞꓲꓼ ꓦꓲ ꓗꓪ ꓠꓲꓹ ꓞ ꓧꓳ ꓙꓰ ꓡꓳ= ꓠꓯꓺ ꓞꓲꓼ ꓦꓲꓸꓹ ꓗꓪ ꓛꓲ ꓬꓰ ꓕꓯ ꓠꓯꓺ ꓞꓲꓼ ꓟꓸ ꓒꓽ ꓐꓴ ꓠꓬ ꓤ ꓠꓱ ꓤ ꓡꓯ ꓒꓯꓹ ꓔꓯ ꓕꓲ ꓦꓯꓼ ꓡꓱꓼ ꓠꓯꓺ ꓞꓲꓼ ꓫꓬꓹ ꓖꓶ ꓡꓳ= ꓖꓳ ꓡꓱ ꓐꓯ ꓥ ꓟꓲ ꓤ ꓠꓱ ꓤ ꓡꓯ ꓒꓯꓹ ꓠꓬ ꓛꓵꓽ ꓡꓰ ꓢꓲ ꓘꓱꓹ ꓡꓰ ꓖꓴ ꓟ ꓪꓴꓸ ꓠꓬ ꓮ ꓟꓬꓹ ꓗꓪ ꓛꓲ ꓠꓯꓺ ꓞꓲꓼ ꓫꓬꓹ ꓥ ꓟꓲ ꓟꓽ ꓓ ꓡꓰ ꓪ= ꓬꓲ ꓟꓶꓽ ꓗꓪ ꓠꓬ ꓡꓯ ꓒꓯꓹ ꓮ ꓙꓵ ꓓꓶꓸꓹ ꓠ ꓗꓷ ꓡꓰꓳ=

ꓟꓶ ꓤ ꓟ ꓡꓳ ꓕꓯ ꓤ ꓠꓱ ꓤ ꓡꓰ ꓬꓲ ꓐꓹ ꓐꓽ ꓔꓯ ꓕꓱ ꓡꓱ ꓠ ꓠꓬꓲ ꓡꓳ꓾ ꓮ ꓐ ꓥꓪ ꓡꓯ ꓒꓯꓹ ꓐꓰ ꓥꓪ ꓡꓯ ꓠꓬꓲ ꓠꓬ ꓝꓮꓲ ꓕꓲ ꓧꓪꓹ ꓣꓳ ꓡ ꓥ ꓢꓷ ꓐꓰ ꓠ ꓠꓬꓲ ꓕꓯ ꓬꓲ ꓐꓹ ꓐꓽ ꓠꓬ ꓮ ꓘꓶꓸ ꓠꓲꓹ ꓟ ꓫꓸ ꓡꓰ ꓢꓲ ꓥꓴꓸꓹ ꓔꓬ ꓡꓳ=  

ꓟꓶꓼ ꓘꓶꓼ ꓛꓲ ꓡ ꓕꓯ ꓤ ꓠꓱ ꓤ ꓐꓹ ꓐꓽ ꓠꓬ ꓦꓲꓸꓹ ꓘꓴꓽ ꓗꓪ ꓕꓲ ꓑ ꓡ ꓙꓰ ꓢꓲ꓾ ꓟꓳ-ꓓꓳ ꓔꓯ ꓮ ꓘꓶꓸ ꓠꓲꓹ ꓢꓲꓼ ꓢꓲ ꓛꓲꓸꓹ ꓒꓯꓹ ꓡꓰ ꓑꓲꓹ ꓟꓶ ꓗꓷ ꓡꓳ= ꓖꓳ ꓗꓪ ꓬꓲ ꓤ ꓟꓶ ꓡꓰ ꓮ ꓘꓶꓸ ꓠꓲꓹ ꓠꓵ ꓮ ꓐ ꓐꓰ ꓐꓳ ꓔ ꓟ ꓕꓳ ꓶ ꓔꓯ ꓬꓲ ꓐꓹ ꓐꓽ ꓡꓳꓸ ꓟꓳ ꓪ ꓡꓰꓳ= ꓖꓳ ꓕꓯ ꓬꓲ ꓐꓹ ꓐꓽ ꓠꓬ ꓥꓪ ꓮ ꓘꓶꓸ ꓥꓳꓽ ꓡꓰꓳ꓾ ꓖꓳ ꓡꓰ ꓐꓯ ꓥ ꓟꓲ ꓮ ꓟꓶ ꓥꓪ ꓟꓽ ꓖꓼ ꓟꓶꓳ ꓥꓪ ꓤ ꓟꓶ ꓡꓯ ꓒꓯꓹ ꓠꓬ ꓐꓬ ꓡꓳ ꓐꓰ ꓐꓯ ꓢꓲ꓾ꓓꓵꓽ ꓙ ꓛꓲ_ ꓡꓳ=