ꓦꓬ ꓠꓬꓲ ꓫꓵꓼ ꓗꓪ ꓗꓹ ꓛꓲ ꓡꓰ ꓝꓲ꓾

ꓮ ꓟꓶ ꓟ ꓤꓶꓸꓹ ꓗꓪ social media ꓗꓪ ꓥ ꓡ ꓐꓯ ꓡꓲꓽ ꓚꓳ ꓡꓳ ꓚꓳ ꓫꓵ ꓗꓪ ꓥ ꓡ ꓐꓯ ꓡꓲꓽ ꓞꓳ ꓡꓱ ꓐꓴ ꓟꓽ ꓗꓹ ꓛꓲ ꓔꓬ ꓟ ꓚꓱꓹ ꓔꓯ ꓮ ꓟꓬꓹ ꓛꓲ ꓑ ꓙ ꓪ ꓡꓳ= ꓕꓱ ꓡꓱ ꓟꓽ ꓗꓹ ꓛꓲ ꓔꓬ ꓟ ꓟꓲ ꓬꓲ ꓚꓱꓹ ꓕꓲ ꓫꓵ ꓫꓵ ꓑꓶꓸ ꓓꓴ ꓥˍ ꓐꓭ ꓥꓳ꓾ ꓢꓷꓸ ꓠꓲꓹ ꓚꓱꓹ ꓔꓯ ꓟꓳꓸ ꓟꓽ ꓞꓲ ꓧꓪꓸ ꓖꓳ ꓓꓱ ꓔꓬ ꓢ ꓓꓴ ꓚꓱꓹ ꓖꓳ ꓟ ꓡꓰ ꓐꓰ ꓟꓬꓱꓽ ꓬꓰ ꓚꓱꓹ ꓕꓱ ꓡꓱ ꓫꓵ ꓪꓴꓸ ꓠꓬꓲ ꓥ ꓐꓭ ꓥꓳ= ꓞꓳ ꓡꓱ ꓐꓴ ꓠꓯꓼ ꓗꓪ ꓔꓶꓻ ꓙꓱꓼ ꓟꓶ ꓬꓰ ꓔꓬ ꓡꓳ꓾ ꓞꓳ ꓤ ꓮ ꓟꓬꓹ ꓡꓰ ꓐꓯ ꓟ ꓡꓰ ꓐꓰ ꓳꓼ ꓟꓬ ꓠꓬ ꓮ ꓘꓶꓸ ꓒꓵꓽ ꓡ ꓟ ꓑꓶꓸ ꓓꓴ ꓮ ꓡꓰ ꓟ ꓥˍ ꓟꓲ ꓤꓶꓸꓹ ꓔꓯ ꓢ ꓢ ꓗꓹ ꓛꓲ ꓟꓽ ꓪ=

ꓝꓮꓲ ꓝꓸ ꓢꓲ꓾ ꓮ ꓫꓵꓽ ꓟꓬꓱꓽ ꓬꓰ ꓓꓴ ꓥ ꓢꓰ ꓐꓰ ꓙ ꓟꓶ ꓢꓲ꓾ ꓞꓳ ꓡꓱ ꓐꓴ ꓙ ꓖꓴ ꓔꓶꓸꓹ ꓙꓱꓼ ꓟꓶ ꓡꓰ ꓔꓬ ꓟ ꓥ ꓡꓳ= ꓖꓳ ꓡꓱ ꓐꓯ ꓥˍ ꓟꓲ ꓕꓽ ꓛꓬ ꓫꓸ꓾ ꓗꓹ ꓛꓲ ꓛꓲ ꓔꓬ ꓠ ꓟ ꓠꓬ ꓣꓳ ꓙ ꓟꓶ ꓪ ꓡꓰ ꓟꓽ ꓫꓸ ꓔ ꓦꓬ ꓠꓬꓲ ꓫꓵꓼ ꓕꓲ ꓠꓬꓲ ꓡꓲ ꓕꓲ ꓠꓬꓲ ꓗꓪ ꓗꓹ ꓛꓲ ꓟ ꓔꓯ ꓘꓳꓹ ꓣꓴ ꓐ ꓡ ꓠ ꓟ ꓠꓬ ꓣꓳ ꓠꓲꓹ ꓟ ꓔꓯ ꓫꓬ ꓫꓬ ꓡꓰ ꓗꓷ ꓡꓰ ꓝꓲ= ꓖꓳ ꓡꓰ ꓐꓯ ꓠꓬ ꓣꓳ ꓠꓲꓹ ꓟ ꓫꓬ ꓫꓬ ꓡꓰ ꓗꓷ ꓠꓹ ꓟ ꓐꓱ ꓶ ꓮ ꓫꓵꓽ ꓬꓰ ꓠ ꓗꓹ ꓡ? ꓚꓵ ꓚꓵ ꓗꓹ ꓛꓲ ꓠꓲꓹ ꓫꓵꓹ ꓐꓭ ꓠꓬ ꓥꓪ ꓡꓰ ꓐꓯ ꓟꓸ ꓖꓶ ꓡ ꓟ ꓬꓲ ꓚꓱꓹ ꓕꓲ ꓟ ꓡꓲꓽ ꓕꓲ ꓟ ꓔꓯ ꓬꓰ ꓪ ꓡꓰ ꓝꓲ= ꓓ ꓪꓴ ꓠꓬ ꓓꓵ ꓙ ꓫꓸ ꓓꓴ ꓬꓲ ꓚꓱꓹ ꓣꓳ ꓪꓴꓽ ꓠꓶꓼ ꓗꓪ ꓓꓵ ꓡ ꓕꓯ ꓠꓲꓹ ꓞꓸ ꓦ ꓟꓶ ꓗꓷ=

ꓕꓱ ꓡꓱ ꓙ ꓫꓸ ꓓꓴ ꓬꓲ ꓚꓱꓹ ꓮ ꓟꓬꓹ ꓣꓳ ꓠꓯꓼ ꓗꓪ ꓓꓵ ꓡ ꓕꓯ ꓖꓳ ꓓꓵ ꓙ ꓚꓱꓹ ꓮ ꓙꓵꓹ ꓔꓯ ꓟꓰ ꓡꓰ ꓗꓷ ꓢꓲ꓾ ꓣꓳ ꓐꓱ ꓶ ꓙꓲ ꓖꓴ ꓙꓳ ꓟ  ꓕꓳ ꓶ ꓵꓸꓹ ꓟ ꓣꓳ ꓬꓰ ꓠꓲꓹ ꓫꓵꓽ ꓟ ꓕꓱ ꓡꓱ ꓫꓵ ꓔꓯ ꓟꓬꓱꓽ ꓬꓰ ꓪ ꓡꓰ ꓝꓲ= ꓮ ꓫꓵꓽ ꓡꓲ ꓬꓰ ꓓꓴ ꓟꓽ ꓙꓳˍ ꓐꓯ ꓠꓬ ꓣꓳ ꓠꓲꓹ ꓟ ꓔꓬ ꓢ ꓠꓹ ꓟ ꓐꓱ ꓶ ꓪꓽ ꓘꓴꓽ ꓙ ꓫꓸ ꓓꓴ ꓚꓱꓹ ꓔꓯ ꓠꓴ ꓪꓴ ꓠꓶꓼ ꓗꓪ ꓕꓽ ꓗꓷ ꓔ= ꓬꓲꓼ ꓟꓶ ꓟꓽ ꓐꓳ ꓥˍ ꓟꓲ ꓣꓳ ꓠꓲꓹ ꓟ ꓔꓬ ꓟ  ꓢ ꓓꓴ ꓗꓷ ꓡ ꓟ ꓪꓴꓸ ꓠꓬꓲ ꓬꓲꓼ ꓟꓶ ꓐꓳ ꓠ ꓬꓲꓼ ꓟꓶ ꓪ ꓡꓰ ꓝꓲ= ꓬꓲꓼ ꓟꓶ ꓐꓯ ꓟ ꓠꓬ ꓙꓲˍꓟ ꓪꓴ ꓧꓶꓸ ꓠ ꓓꓴ ꓕꓲ ꓫꓵ ꓥ ꓡꓳ= ꓟꓽ ꓬꓲꓼ ꓟꓶ ꓢꓰ ꓕꓯ ꓪꓽ ꓘꓴꓽ ꓟꓴ ꓖꓪ ꓠꓸ ꓠ ꓢꓲ꓾ ꓬꓲꓼ ꓟꓶ ꓠꓬ ꓟꓬ ꓠꓬꓲ ꓙꓲˍ ꓡꓳ= ꓣꓳ ꓠꓲꓹ ꓟ ꓐꓰ ꓣꓳ ꓪꓴꓸ ꓠꓶꓼ ꓧꓪꓸ ꓖꓳ ꓓꓱ ꓔꓬ ꓢ ꓠ ꓟ ꓐꓱ ꓶ ꓕꓳ ꓶ ꓵꓸꓹ ꓟ ꓢꓯꓸ ꓒꓬꓱꓽ ꓡꓳꓸ ꓠꓬꓲˍꓟ ꓕꓱ ꓡꓱ ꓬꓰ ꓖꓶ=

ꓝꓮꓲ ꓕꓲ ꓫꓵ ꓠꓬ social media ꓔꓯ ꓥ ꓟꓲ ꓙ ꓟꓳ ꓢꓲ꓾ ꓣꓱꓽ ꓠ ꓟ ꓥꓳ= ꓮ ꓟꓶ ꓟ ꓣꓳ ꓤꓶꓸꓹ ꓗꓪ ꓠꓬ social media ꓟꓽ ꓣꓱꓽ ꓢꓴ ꓟ ꓔꓬ= social media  ꓕꓱ ꓟ ꓥˍ ꓟꓲ ꓣꓱꓽ ꓟ ꓗꓴꓸ ꓠꓬꓲ ꓟꓽ ꓗꓹ ꓛꓲ꓾ꓮ ꓕꓯ ꓥˍ ꓟꓲ ꓗꓹ ꓛꓲ ꓠꓲꓹ ꓫꓵꓽ ꓠꓬ social media  ꓔꓯ ꓥꓲ ꓟꓲ healthy ꓗꓷ ꓠꓹ ꓟ ꓣꓱꓽ ꓖꓴ ꓠ ꓗꓹ ꓡꓳ= ꓕꓲ ꓖ ꓕꓲ ꓧꓪꓽ ꓣꓳ ꓕꓲ ꓣꓳ ꓡꓰ ꓗꓹ ꓟ ꓛꓲ ꓕꓯ ꓣꓳ ꓟꓯꓼ ꓛꓳ ꓒꓯꓹ ꓐꓴ ꓐꓰ ꓫꓸ ꓪ ꓕꓱ ꓡꓯ ꓘꓳꓹ ꓜꓽ ꓠꓲꓹ ꓫꓵꓽ ꓟ ꓔꓯ ꓜ ꓙꓰ ꓠꓲꓹ ꓫꓵꓽ ꓟ ꓗꓪ ꓙꓰ ꓕꓱ ꓡꓱ ꓬꓰ ꓢꓲ꓾ ꓣꓳ ꓤꓶꓸꓹ ꓗꓪ ꓮ ꓕꓯ ꓥˍ ꓟꓲ ꓗꓹ ꓛꓲ ꓪ ꓡꓰ ꓝꓲ= ꓝꓮꓲ ꓕꓲ ꓫꓵ ꓠꓬ ꓧꓪꓸ ꓖꓳ ꓓꓱ ꓐꓱ ꓶ ꓙꓲ ꓖꓴ ꓙꓳ ꓟ ꓜ ꓫꓵ ꓜ ꓙꓰ ꓔꓯ ꓜ ꓪ ꓡꓰ ꓝꓲ꓾ ꓣꓳ ꓞꓳ ꓤ ꓕꓲ ꓣꓳ ꓠꓯꓼ ꓗꓪ ꓧꓪꓸ ꓖꓳ ꓓꓱ ꓔꓬ ꓢ ꓓꓴ ꓕꓱ ꓟ ꓥˍ ꓟꓲ ꓮ ꓓꓰ ꓣꓳꓸꓹ ꓚꓵ ꓡꓳ= ꓧꓪꓸ ꓖꓳ ꓓꓱ ꓔꓬ ꓢ ꓕꓯ ꓢꓲ꓾ ꓮ ꓫꓵꓽ ꓟꓬꓱꓽ ꓬꓰ ꓥ ꓟꓲ ꓟꓽ ꓞꓲ ꓠꓲꓹ ꓟ ꓗꓹ ꓛꓲ ꓓꓴ ꓙꓳˍ ꓡꓳ= ꓖꓳ ꓟ ꓑꓶꓸ ꓓꓴ ꓦꓬ ꓠꓬꓲ ꓫꓵꓼ ꓗꓪ ꓗꓹ ꓛꓲ ꓠ ꓟ ꓐꓱ ꓶ ꓮ ꓡꓰ ꓬꓰ ꓠ ꓔꓽ ꓟ ꓚꓱꓹ ꓔꓯ ꓢꓷꓸ ꓡꓰ ꓐꓭ ꓥꓳ ꓐꓰ ꓥꓪ ꓙꓲ ꓡꓳ=