ꓪꓳ ꓑ ꓡ:- ꓘꓪ ꓐꓰ ꓦꓯꓹ ꓟꓸ ꓟꓲꓽ

ꓮꓽ ꓠꓱ ꓕꓯ ꓫꓵꓸ ꓟꓲ ꓘꓴꓽ ꓗꓪ ꓦꓯꓹ ꓕꓲ ꓘꓹꓔꓬ ꓡꓳ= ꓫꓵꓸ ꓟꓲ ꓐꓰ ꓮ ꓘꓶꓸ ꓟꓽ ꓶ_ ꓟ ꓗꓪ ꓠꓬ ꓬꓲꓸꓹ ꓙꓬ ꓡꓳ ꓗꓸ ꓕꓲꓽ ꓟ ꓙꓳˍ ꓡꓳ= ꓖꓳ ꓗꓪ ꓠꓬ ꓪꓳ-ꓑ ꓡꓽ ꓘꓪꓼ ꓕꓲꓽ ꓘꓹ ꓔꓬ ꓡꓳ= ꓦꓯꓹ ꓐꓰ ꓳ-ꓑ ꓡꓽ ꓘꓪ ꓠꓬ ꓜ ꓓꓴ ꓧꓪ ꓢꓲ-ꓸ ꓜꓲꓸꓹ ꓡꓯꓽ ꓘꓳ ꓡꓰ ꓪ= ꓖꓳ ꓗꓪ ꓐꓰ ꓬꓲꓸ ꓠꓬꓲꓽ ꓪ ꓠꓬ ꓛꓳ ꓒꓯꓹ ꓘꓷ ꓡꓰ ꓪ= ꓕꓲ ꓣꓳ ꓐꓰ ꓕꓲ ꓣꓳ ꓜ ꓓꓴ ꓖꓶ ꓜ ꓡꓯꓼ ꓘꓳ ꓢꓲꓸ ꓔꓬ ꓗꓳꓸ ꓡꓰꓳ= ꓕꓲ ꓠꓬꓲ ꓙꓳ ꓕꓯ ꓪꓳ-ꓑ ꓡ ꓘꓪ ꓠꓬ ꓠꓸꓹ ꓓꓴꓽ ꓔꓳꓹ ꓜꓳ ꓔꓬ ꓡꓳ= ꓪꓳ-ꓑ ꓡ ꓘꓪ ꓠꓸꓹ_ ꓟ ꓔꓯ ꓦꓯꓹ ꓢꓷꓸ ꓡꓰ ꓠꓬꓲ ꓟꓵꓽ ꓗꓪ ꓙꓰ ꓢꓲꓸ ꓠꓯꓸꓹ ꓞꓲꓼ ꓧꓪ ꓗꓪ ꓙꓰ ꓡꓳ= ꓖꓳ ꓟ ꓡꓰ ꓐꓰ ꓦꓯꓹ ꓠꓸꓹ ꓓꓴ ꓔꓳꓹ ꓜꓳ ꓡ_ ꓥ ꓟꓲ ꓪꓳ-ꓑ ꓡ ꓘꓪ ꓡꓰ ꓠꓯꓸꓹ ꓞꓲꓼ ꓧꓪ ꓖꓶ ꓜ ꓡꓳ= ꓕꓲ ꓠꓬꓲ ꓛꓲ ꓡ ꓠꓬ ꓦꓯꓹ ꓡꓰ ꓥꓪ ꓟꓯꓼ ꓪꓳ-ꓑ ꓡ ꓘꓪ ꓠꓴ ꓔꓬ ꓖꓴ ꓠꓬ ꓮ ꓘꓶꓸ ꓙꓬ_ ꓟ ꓪꓴꓸ ꓠꓬꓲ ꓥꓪ ꓐꓰ ꓕꓲ ꓪ ꓔꓬ ꓓꓴ ꓬꓰ ꓡꓯ ꓐꓰ ꓐꓯ ꓡꓳ= ꓪꓳ-ꓑ ꓡ ꓘꓪ ꓥ ꓟꓲ (ꓥ ꓡꓯ) ꓐꓰ ꓐꓯ ꓡꓳ= ꓖꓳ ꓡꓰ ꓕꓲ ꓠꓲꓹ ꓕꓲ ꓪꓼ ꓔꓬ ꓕꓯ ꓪꓳ-ꓑ ꓡ ꓘꓪ ꓠꓬ ꓥꓪ ꓬꓲꓸꓹ ꓙꓬ ꓟ ꓙꓳ_  ꓟꓵꓽ ꓗꓪ ꓘꓴ ꓐꓰ ꓐꓯ ꓡꓳ= ꓬꓲꓸ ꓔꓬ ꓟ ꓬꓲꓸꓹ ꓙꓬ ꓗꓪ ꓔꓬ ꓠꓹ ꓟ ꓐꓱ ꓶ ꓦꓯꓹ ꓔꓯ ꓧꓳꓽ ꓙꓰ_ ꓡꓳ= ꓖꓳ ꓡꓱ ꓐꓯ ꓥ ꓟꓲ ꓪꓳ ꓑ ꓡ ꓘꓪ ꓔꓬ ꓟ ꓗꓪ ꓮꓘꓶꓸ ꓙꓬꓹ ꓟ ꓪꓴꓸ ꓠꓬꓲ ꓦꓯꓹ ꓠꓬ ꓔꓬ  ꓟ ꓘꓴꓽ ꓖꓳ ꓡꓱ ꓠꓬꓲ ꓦꓯꓹ ꓐꓰ ꓪꓳ ꓑ ꓡ ꓘꓪ ꓐꓴ ꓠꓬ ꓕꓲ ꓠꓲꓹ ꓕꓲ ꓪꓼ ꓔꓬ ꓟꓽ ꓙꓲ ꓟ ꓪꓴꓸ ꓠꓬꓲ ꓕꓲ ꓠꓲꓹ ꓕꓲ ꓪ ꓔꓬ ꓠꓹ ꓟ ꓐꓱ ꓶ ꓔꓬ ꓦꓲꓸꓹ ꓧꓪ ꓠ ꓟ ꓙꓰ_ ꓡꓳ= ꓖꓳ ꓕꓯ ꓪꓽ ꓜꓱꓽ ꓗꓪ ꓟ ꓡꓳ ꓗꓸ ꓤ ꓕꓲꓽ ꓟ ꓔꓯ ꓟꓳ ꓡꓰꓳ= ꓦꓯꓹ ꓠꓬ ꓪ ꓜꓱꓽ ꓗꓪ ꓪꓳ ꓑꓸ ꓡ ꓘꓪ ꓠꓬ ꓬꓲꓸꓹ ꓙꓬ ꓡꓳ ꓗꓸ ꓗꓪ ꓔꓬ ꓢꓲ-ꓸ ꓗꓹ ꓗꓹ ꓛꓲ ꓛꓲ ꓕꓲ ꓣꓳ ꓡꓰ ꓕꓲ ꓣꓳ ꓔꓬ ꓗꓷ ꓡꓳ=

Add new comment

12 + 3 =