ꓬꓲꓸ ꓖ ꓙꓳˍ ꓟ ꓠꓬ ꓦꓲꓸꓹ ꓘꓴꓽ ꓗꓪ ꓐꓰ ꓪꓴꓸ ꓔꓴˍ ꓟ ꓥ ꓡꓳ=

ꓠꓬꓲꓸ ꓠꓬꓲ ꓠꓬ ꓬꓲꓸ ꓖ ꓙꓳˍ ꓐꓯ ꓟ ꓚꓱꓹ ꓔꓯ ꓢꓷꓸ ꓙ ꓟꓳ ꓙ ꓩꓴ ꓡ ꓥꓳ= ꓬꓲꓸ ꓖ ꓙꓳˍ ꓟ ꓠꓬ ꓦꓲꓸꓹ ꓘꓴ: ꓗꓪ ꓐꓰ ꓪꓴꓸ ꓔꓴˍ ꓟ ꓥ ꓡꓳ= ꓣꓳ ꓞꓲꓼ ꓣꓳˍ ꓟ ꓕꓲ ꓙꓵꓹ ꓗꓪ ꓦꓲꓸꓹ ꓘꓴꓽ ꓗꓪ ꓔꓬ ꓕꓯ ꓣꓳ ꓬꓰ ꓠꓲꓹ ꓫꓵꓽ ꓟ ꓜ ꓠꓲꓹ ꓫꓵꓽ ꓟ ꓔꓯ ꓟꓽ ꓜ ꓪ ꓡꓰ ꓠꓬ ꓮ ꓘꓶꓸ ꓠꓲꓹ ꓖꓪ ꓟꓽ ꓫꓵ ꓡꓳ= ꓖꓳ ꓡꓰ ꓐꓯ ꓥˍ ꓟꓲ ꓞꓳ ꓟꓳ ꓐꓴ ꓠꓬ ꓞꓲꓼ ꓣꓳ ꓟ ꓪꓴꓸ ꓠꓬꓲ ꓥ ꓐꓭ ꓥꓳ ꓐꓰ ꓕꓱ ꓡꓱ ꓓꓵ ꓙ ꓡꓳ= ꓞꓲꓼ ꓪꓴ ꓡ ꓔꓯ ꓬꓲꓸ ꓖ ꓙꓳ ꓡ ꓥꓳ꓾ ꓙ ꓟꓶ ꓗꓴꓸ ꓡ ꓥꓳ ꓐꓰ ꓓꓵ ꓔꓬ ꓢꓴ ꓙꓳ ꓡꓳ= ꓖꓳ ꓡꓰ ꓠꓬ ꓟꓽ ꓥ꓾ ꓞꓲꓼ ꓣꓳ ꓟ ꓕꓲ ꓙꓵꓹ ꓗꓪ ꓦꓲꓸꓹ ꓘꓴꓽ ꓗꓪ ꓔꓬ ꓕꓯ ꓮꓽ ꓐ ꓮ ꓟ ꓣꓱꓽ ꓢꓴ ꓐꓴ ꓣꓳ ꓤ ꓠꓱ ꓔꓯ ꓬꓲꓸ ꓖ ꓙꓳ ꓠ ꓟꓸ ꓖꓶ ꓠꓹ ꓗꓹ ꓡꓳ=

ꓦꓲꓸꓹ ꓘꓴꓽ ꓗꓪ ꓔꓬ ꓕꓯ ꓮꓽ ꓐ ꓮ ꓟ ꓔꓯ ꓮ ꓡꓰ ꓞꓳ ꓒꓵꓽ ꓠꓹ ꓟ ꓢꓴ ꓔꓯ ꓮ ꓡꓰ ꓬꓰ ꓙ ꓠꓹ ꓟ ꓙꓲˍ ꓟ ꓠꓲꓹ ꓟ ꓙꓳ ꓠꓹ ꓗꓹ ꓟ ꓫꓸ ꓪ ꓔꓯ ꓙꓲ ꓙꓲ ꓕꓱ ꓗꓴꓸ ꓠꓹ ꓟ ꓢꓴ ꓔꓯ ꓞꓳ ꓒꓵꓽ ꓠꓹ ꓟ ꓟꓬꓱꓽ ꓕꓲ ꓫꓵꓽ ꓬꓰ ꓠꓬ ꓙ ꓟꓶ ꓢꓲ꓾ ꓬꓰ ꓗꓴꓸ ꓠꓹ ꓟ ꓕꓱ ꓡꓱ ꓫꓵ ꓔꓯ ꓮꓽ ꓐ ꓮ ꓟ ꓣꓱꓽ ꓢꓴ ꓐꓴ ꓟꓸ ꓖꓶ ꓠꓹ ꓟ ꓮ ꓓꓰꓽ ꓣꓳꓸꓹ ꓚꓵ ꓡꓳ= ꓕꓱ ꓟ ꓡꓰ ꓐꓰ ꓞꓲꓼ ꓣꓳ ꓟ ꓕꓲ ꓙꓵꓹ ꓗꓪ ꓟꓸ ꓖꓶ ꓐꓶ ꓖꓶ ꓐꓯ ꓠꓬ ꓞꓲꓼ ꓪꓴ ꓡ ꓢꓲ꓾ ꓢꓴ ꓟꓵꓽ ꓢꓴ ꓡꓳꓸꓸ ꓗꓪ ꓛꓲ ꓬꓰ ꓕꓯ ꓬꓲꓸ ꓖ ꓙꓳ ꓟ ꓛꓲ ꓛꓬ ꓔꓯ ꓙꓵꓽˍ ꓗꓴꓸ ꓢꓴ ꓕꓲ ꓣꓳ ꓒꓬꓱꓽ ꓡ ꓥꓳ=

ꓮ ꓫꓵꓽ ꓟꓵꓽ ꓗꓪ ꓮ ꓡꓰ ꓕꓲ ꓖ ꓗꓪ ꓥ ꓟꓲ ꓬꓲꓸ ꓖ ꓙꓳ ꓢꓴ ꓔꓯ ꓠꓬ ꓮ ꓘꓶꓸ ꓠꓲꓹ ꓠꓵ ꓡꓳ= ꓟꓽ ꓞꓲ ꓞꓳ ꓟꓳ ꓟꓲ ꓙꓬ ꓗꓪ ꓙꓰ ꓠꓬ ꓪꓴꓸ ꓓꓴ ꓟꓳꓼ ꓢꓲ꓾ ꓙꓰ꓾ ꓬꓲꓸ ꓖ ꓙꓳ ꓟ ꓐꓰ ꓡꓰꓽ ꓒꓲꓼ ꓠꓬ ꓫꓱꓽ ꓡꓯ ꓘꓳˍ ꓡꓳ= ꓖꓳ ꓟ ꓑꓶꓸ ꓓꓴ ꓠꓲꓹ ꓠꓵ ꓟ ꓮꓽ ꓐ ꓮ ꓟ ꓐꓴ ꓣꓳ ꓤ ꓣꓳ ꓠꓱ ꓐꓴ ꓬꓲꓸ ꓖ ꓙꓳ ꓠꓹ ꓟ ꓐꓱ ꓶ ꓞꓲꓼ ꓣꓳ ꓟ ꓕꓲ ꓙꓵꓹ ꓗꓪ ꓐꓰ ꓐꓹ ꓡ ꓟꓬ ꓛꓲ ꓟꓸ ꓖꓶ ꓐꓶ ꓖꓶ ꓓꓴ ꓬꓰ ꓡꓯ= ꓣꓳ ꓟꓲ ꓠꓯ ꓗꓪ ꓢꓯꓹ ꓔꓬ ꓟ ꓕꓲ ꓙꓵꓹ ꓗꓪ ꓬꓲꓸ ꓖ ꓙꓳ ꓟ ꓟꓲ ꓮ ꓓꓰ ꓣꓳꓸꓹ ꓚꓵ ꓟ ꓕꓲ ꓫꓵꓽ ꓥ ꓡꓳ=