ꓮꓸ ꓠꓯ., ꓕꓲ ꓟ ꓗꓪ ꓐꓰ ꓟꓳˍ ꓟ ꓢꓷꓸ ꓠꓲꓹ

ꓠꓲꓹ ꓠꓵ ꓟ ꓮꓽ ꓐ ꓮ ꓟ ꓬꓲ ꓤ ꓠꓬꓲ ꓐꓴꓳ꓾ ꓮ ꓙꓵꓽ ꓢꓴ ꓧꓪꓹ ꓧꓪ꓾ ꓠꓬꓲꓸ ꓠꓬꓲ ꓠꓬ ꓮꓸ ꓠꓯ., ꓕꓲ ꓟ ꓟꓳˍ ꓟ ꓢꓷꓸ ꓠꓲꓹ ꓐꓯ ꓟ ꓕꓲ ꓒꓳꓹ ꓗꓪ ꓐꓰ ꓢꓷꓸ ꓙ ꓟꓳ ꓙ ꓩꓴ ꓡ ꓥꓳ= ꓮ ꓠꓱ ꓕꓯ ꓮ ꓠꓯꓸꓸ ꓕꓲ ꓟ ꓔꓬ ꓡꓳ= ꓮ ꓠꓯꓸꓸ ꓠꓬ ꓬꓲꓸ ꓛꓲ ꓚꓬ ꓬꓲꓸ ꓥꓪ ꓠꓬ ꓟꓲ ꓠꓯ ꓗꓪ ꓐꓲ ꓡꓳˍ ꓬꓰ ꓢꓴ ꓐꓰ ꓗꓹ ꓛꓲ ꓓꓰˍ ꓡꓰ ꓟ ꓠ ꓥꓪ ꓕꓲ ꓣꓳ ꓡꓰ ꓥ ꓡꓳ ꓐꓰ ꓐꓯ ꓢꓲ꓾ ꓬꓲ ꓤꓶꓸꓹ ꓔꓯ ꓗꓹ ꓛꓲ ꓛꓲ ꓡꓰ ꓔꓬ ꓡꓳ= ꓕꓲ ꓠꓬꓲ ꓡꓳꓹ ꓕꓯ ꓡꓳꓸꓸ ꓗꓸ ꓤꓹ ꓤ ꓕꓲ ꓟ ꓗꓪ ꓬꓲꓸꓹ ꓙꓬ ꓠꓬꓹ ꓕꓲ ꓟ ꓔꓯ ꓡꓳꓸ ꓟꓳ ꓪ ꓡꓰꓳ=

 ꓖꓳ ꓓꓱ ꓕꓲ ꓖꓳ ꓓꓱ ꓡꓱꓸ ꓪꓽˍ ꓡꓰ ꓐꓰ ꓒꓴ ꓟ ꓔꓯ ꓟꓳ ꓕꓯ ꓥꓪ ꓠꓬ ꓮ ꓫꓵꓽ ꓑꓶꓸ ꓓꓴ ꓕꓲ ꓖꓳ ꓓꓱ ꓡꓱꓸ ꓠꓯ ꓔꓬ ꓥ ꓢꓰ ꓐꓰ ꓖꓳ ꓡꓰ ꓙ ꓟꓶ ꓡꓳ= ꓖꓳ ꓕꓯ ꓢꓲ꓾ ꓟꓲ ꓠꓯ ꓗꓪ ꓮ ꓘꓶꓸ ꓗꓹ ꓛꓲ ꓓꓰ ꓡꓰˍ ꓟ ꓠꓬ ꓬꓲꓸꓹ ꓙꓬ ꓠꓬꓹ ꓡꓰ ꓟꓽ ꓢꓰ ꓐꓰ ꓙ ꓟꓶ ꓡꓳ= ꓟꓽ ꓟꓶ ꓫꓵ ꓕꓯ ꓬꓲ ꓠꓬꓲ ꓫꓵꓽ ꓝꓲ ꓡꓯ ꓘꓳꓹ ꓡꓳ= ꓮ ꓠꓯꓸꓸ ꓡꓰ ꓐꓯ ꓟ ꓠꓬ ꓟꓲ ꓠꓯ ꓗꓪ ꓠꓵ ꓠ ꓮ ꓘꓶꓸ ꓗꓹ ꓛꓲ ꓓꓰꓸꓸ ꓡꓰ ꓟ ꓠꓬꓹ ꓥ ꓡꓳ ꓐꓰ ꓐꓯ ꓡꓳ= ꓝꓮꓲ ꓬꓲꓸꓹ ꓙꓬ ꓠꓬꓹ ꓥˍꓟꓲ ꓕꓲ ꓡꓱ ꓐꓯ ꓡꓳ꓾ ꓥꓪ ꓥˍ ꓟꓲ ꓧꓶꓸ ꓕꓯ ꓟ ꓕꓲ ꓙꓵꓽ ꓗꓪ ꓕꓱ ꓡꓱ ꓙ ꓟꓶ ꓫꓵ ꓥꓳ ꓐꓰ ꓐꓯ ꓖꓶ ꓡꓳ=

ꓕꓱ ꓟꓸ ꓟꓲ ꓗꓪ ꓐꓰ ꓣꓳ ꓮ ꓡꓰ ꓫꓵꓽ ꓔꓯ ꓡꓳꓸ ꓟꓳ ꓪ ꓓ ꓐꓯ ꓠꓬ ꓕꓲ ꓖ ꓕꓲ ꓧꓪ ꓣꓳ ꓠꓯꓸꓼ ꓗꓪ ꓙꓳ ꓟ ꓔꓯ ꓠꓲꓹ ꓘꓪ ꓠꓽ ꓫꓵꓽ ꓟ ꓢꓴ ꓠꓯꓼ ꓗꓪ ꓙꓳ ꓟ ꓔꓯ ꓪ ꓠꓲꓹ ꓫꓵꓽ ꓟ ꓮ ꓠꓯꓸꓸ ꓡꓰ ꓐꓰ ꓗꓷ ꓡꓰ ꓟ ꓕꓲ ꓙꓵꓽ ꓥˍ ꓟꓲ ꓙꓳ ꓡꓳ= ꓠꓲꓹ ꓠꓵ ꓟ ꓮꓽ ꓐ ꓮ ꓟ ꓐꓴꓳ꓾ ꓣꓳ ꓟꓲ ꓠꓯ ꓗꓪ ꓢꓯꓼ ꓔꓬ ꓟ ꓕꓲ ꓙꓵꓽ ꓕꓯ ꓠꓬ ꓟꓬ ꓠꓬꓲ ꓕꓱ ꓡꓱ ꓫꓵꓽ ꓮ ꓟꓬꓹ ꓙꓳ ꓡꓳ= ꓥꓪ ꓡꓰ ꓢꓯꓼ ꓖꓶ ꓠꓲꓹ ꓫꓵꓽ ꓟ ꓠꓬ ꓣꓳ ꓠꓯꓼ ꓗꓪ ꓙꓳ ꓟ ꓔꓯ ꓠꓲꓹ ꓘꓪ ꓫꓵꓽ= ꓣꓳ ꓖꓳ ꓓꓱ ꓠꓯꓸꓼ ꓗꓪ ꓙꓳ ꓟ ꓮ ꓙꓵꓽ ꓠꓬ  ꓠꓯꓹ ꓡ ꓐꓯ ꓡꓲ꓾ ꓒꓴ ꓡ ꓐꓯ ꓡꓲ꓾ ꓣꓳ ꓖꓳ ꓓꓱ ꓔꓯ ꓠꓲꓹ ꓘꓪ ꓫꓵꓽ ꓢꓲ꓾ ꓢꓯꓼ ꓔꓬ ꓐꓭ ꓠꓬ ꓟꓲ ꓠꓯ ꓗꓪ ꓗꓹ ꓛꓲ ꓓꓴ ꓡꓰ ꓥ ꓡꓳ= ꓣꓳ ꓖꓳ ꓓꓱ ꓠꓯꓸꓼ ꓗꓪ ꓙꓳ ꓟ ꓔꓯ ꓣꓳ ꓛꓲ ꓚꓬ ꓠꓲꓹ ꓠꓵ ꓕꓯ ꓢꓲ꓾ ꓢꓴ ꓥˍ ꓟꓲ ꓠꓲꓹ ꓠꓵ ꓡ ꓥꓳ꓾ ꓒꓴꓽ ꓗ ꓬꓰ ꓡ ꓥꓳ=     

ꓸꓼ