ꓮ ꓫꓵꓽ ꓟꓵ ꓗꓪ ꓛꓲ: ꓡꓰ ꓥ꓾ ꓟꓲ ꓮ ꓐꓽ ꓮ ꓟ ꓔꓯ ꓙ ꓟꓶ ꓪ ꓡꓰ ꓝꓲ=

ꓠꓴ ꓫꓸ ꓓꓴ ꓟꓶꓽ ꓓꓴ ꓔꓳꓹ ꓜꓳꓼ ꓕꓯ ꓮꓽ ꓐ ꓮ ꓟ ꓔꓯ ꓙ ꓟꓶꓼ ꓟ ꓡꓰ ꓐꓰ ꓠꓴ ꓙꓳ ꓢ ꓔꓬ ꓢ ꓡ ꓕꓯ ꓥˍ ꓟꓲ ꓠꓴ ꓮꓽ ꓐ ꓮ ꓟ ꓔꓯ ꓓꓵ ꓙ ꓛꓲ ꓪ ꓡꓰ ꓝꓲ= ꓠꓴ ꓫꓸ ꓓꓴ ꓔꓳꓹ ꓜꓳꓼ ꓔꓬ ꓕꓯ ꓮꓽ ꓐ ꓮ ꓟ ꓠꓬ ꓠꓴ ꓐꓱ ꓶ ꓮ ꓘꓶꓸ ꓡꓳꓸ ꓐꓲˍ ꓟ ꓜꓼ ꓕꓲ ꓜ ꓫꓬ ꓢꓲ꓾ ꓡꓳꓸꓸ ꓠꓬ ꓔ ꓡꓳ= ꓠꓴ ꓙꓳ ꓢ ꓔꓬ ꓢ ꓡ ꓕꓯ ꓠꓬ ꓠꓴ ꓟꓯꓼ ꓛꓳ ꓒꓯꓼ ꓐꓴ ꓐꓰ ꓔꓬ ꓖꓳꓸꓸ ꓙꓬ ꓡꓳ= ꓚꓵ ꓚꓵ ꓠꓴ ꓫꓸ ꓓꓴ ꓔꓳꓹ ꓜꓳꓼ ꓠꓬꓲ ꓠꓴ ꓔꓯ ꓙꓵꓹ ꓟ ꓠꓲꓹ ꓡꓰ ꓪ ꓢꓴ ꓠꓬ ꓠꓴ ꓔꓯ ꓬꓰ ꓙ ꓡ ꓥꓳ꓾ ꓠꓴ ꓠꓯꓼ ꓗꓪ ꓙꓳ ꓟ ꓒꓴꓽ ꓫꓵꓼ ꓔꓯ ꓠꓲꓹ ꓠꓵ ꓢꓴ ꓐꓴ ꓠꓬ ꓠꓴ ꓠꓯꓼ ꓗꓪ ꓒꓴꓽ ꓫꓵꓼ ꓟꓽ ꓙꓳ ꓐꓭ ꓠꓬ ꓠꓴ ꓔꓯ ꓟꓲ ꓡꓳꓸ ꓩꓴ ꓗꓷ ꓡ ꓡꓳ= ꓖꓳ ꓕꓯ ꓚꓵ ꓚꓵ ꓠꓲꓹ ꓠꓵ ꓫꓱꓼ ꓤ ꓢꓲ꓾ ꓘꓴꓽ ꓣꓴ ꓖꓶ ꓡ ꓢꓴ ꓠ ꓠꓴ ꓮꓽ ꓐ ꓮ ꓟ ꓡꓰ ꓥ ꓡꓳ=

ꓖꓳ ꓟ ꓑꓶꓸ ꓓꓴ ꓠꓴ ꓠꓯꓼ ꓗꓪ ꓙꓳ ꓢ ꓔꓬ ꓢ ꓡ ꓕꓯ ꓥˍ ꓟꓲ ꓠꓴ ꓔꓯ ꓦꓵꓸꓹ ꓖꓶ ꓡ ꓢꓴ ꓠꓴ ꓮꓽ ꓐ ꓮ ꓟ ꓔꓯ ꓟꓲ ꓙ ꓟꓶ ꓚꓲ ꓪ ꓡꓰ ꓝꓲ= ꓠꓴ ꓟꓯꓼ ꓛꓳ ꓒꓯꓹ ꓔꓯ ꓬꓲꓸ ꓙꓵꓽ ꓖꓶ ꓪ ꓡꓰ ꓠꓴ ꓦꓲꓸꓹ ꓘꓴꓽ ꓡ ꓞꓳ ꓮꓽ ꓐ ꓮ ꓟ ꓐꓴ ꓠꓬꓲ ꓤ ꓠꓬꓲ ꓟ ꓐꓴ ꓔꓯ ꓥˍ ꓟꓲ ꓬꓲ ꓙꓵꓽ ꓖꓶ ꓪ ꓡꓰ ꓝꓲ= ꓠꓴ ꓬꓲ ꓒ ꓗꓪ ꓜꓼ ꓜꓽ ꓔꓬ ꓔꓯ ꓠꓴ ꓐꓰ ꓕꓲ ꓠꓲꓹ ꓕꓲ ꓪ ꓜꓼ ꓜꓽ ꓠꓲꓹ ꓫꓵꓽ ꓟ ꓮꓽ ꓐ ꓮ ꓟ ꓔꓯ ꓓꓵ ꓙ ꓚꓲ ꓪ ꓡꓰ ꓝꓲ= ꓕꓯ ꓥꓳ ꓐꓯ ꓠꓬ ꓠꓴ ꓦꓲꓸꓹ ꓕꓵꓼ ꓗꓪ ꓕꓵꓼ ꓡꓰ ꓢꓲ꓾ ꓠꓴ ꓤ ꓠꓱ ꓤ ꓐꓴ ꓡꓰ ꓕꓲ ꓪ ꓟꓳ ꓡ ꓕꓯ ꓠꓴ ꓥ ꓟꓲ ꓠꓴ ꓤ ꓠꓱ ꓐꓴ ꓡꓰ ꓠꓴ ꓔꓯ ꓬꓰ ꓙ ꓡ ꓟ ꓬꓲ ꓙꓵꓽ ꓖꓶ ꓡ ꓟ ꓔꓯ ꓪ ꓠꓲꓹ ꓫꓵꓽ ꓐꓭ ꓥꓳ=

ꓠꓲꓹ ꓠꓵ ꓟ ꓞꓳ ꓡꓱ ꓐꓴ ꓮ ꓫꓵꓽ ꓟꓵꓽ ꓗꓪ ꓚꓲ ꓬꓰ ꓥˍ ꓟꓲ ꓠꓴ ꓔꓯ ꓦꓵꓸꓹ ꓖꓶ ꓡ ꓢꓴ ꓠꓴ ꓮꓽ ꓐ ꓮ ꓟ ꓔꓯ ꓕꓽ ꓟꓲ ꓡꓰ ꓝꓲ= ꓕꓲ ꓘꓳꓼ ꓡꓰ ꓕꓲ ꓘꓳꓼ ꓞꓲ ꓟꓳ ꓡ ꓔꓬ ꓟ ꓠꓴ ꓮꓽ ꓐ ꓮ ꓟ ꓔꓯ ꓫꓱꓹ ꓤ ꓪ ꓡꓰ ꓝꓲ= ꓮ ꓔꓲꓹ ꓤ ꓡꓰ ꓙꓳ ꓟ ꓬꓲ ꓙꓵꓽ ꓔꓯ ꓣꓴ ꓢꓲ꓾ ꓠꓴ ꓮꓽ ꓐ ꓮ ꓟ ꓐꓰ ꓦꓬ ꓠꓬꓲ ꓕꓯ ꓖꓳꓸꓸ ꓙꓰ ꓑ ꓡ ꓠꓹ ꓟ ꓢꓯꓼ ꓕꓵꓼ ꓪ ꓡꓰ ꓝꓲ= ꓬꓲ ꓪ ꓑ ꓕꓲ ꓗꓪ ꓔꓬ ꓢꓲ꓾ ꓬꓲ ꓪ ꓠꓲꓹ ꓢ ꓡꓰ ꓠꓹ ꓟ ꓬꓰ ꓖꓶ ꓪ ꓡꓰ ꓝꓲ= ꓠꓲꓹ ꓠꓵ ꓟ ꓞꓳ ꓡꓱ ꓤ ꓐꓴꓳ= ꓕꓲ ꓐꓱ ꓠꓬ ꓟꓲ ꓠꓯ ꓔꓯ ꓠꓬ ꓚꓬꓴꓼ ꓙ ꓠꓲꓹ ꓫꓵꓼ ꓡꓳ ꓢꓴ ꓔꓯ ꓠꓬ ꓬꓰ ꓙ ꓠꓲꓹ ꓫꓵꓽ ꓡꓳ= ꓖꓳ ꓡꓰ ꓐꓯ ꓥˍ ꓟꓲ ꓮ ꓟ ꓢꓲꓸ ꓗꓶꓸ ꓤꓶ ꓔꓬ ꓟ ꓔꓯ ꓠꓬ ꓟꓽ ꓟꓳ ꓔꓬ ꓡꓳ= ꓢꓴ ꓥꓳꓽ ꓟ ꓔꓯ ꓠꓬ ꓡꓳ ꓟꓳ ꓡꓳ꓾ ꓮꓽ ꓐ ꓮ ꓟ ꓥꓳꓽ ꓔꓬ ꓟ ꓔꓯ ꓠꓬ ꓟꓽ ꓡꓳꓸ ꓟꓳ ꓔꓬ= ꓟꓲ ꓠꓯ ꓗꓪ ꓣꓳꓸꓹ ꓚꓵ ꓓꓰ ꓡꓰ ꓟ ꓠꓬ ꓮꓽ ꓐ ꓮ ꓟ ꓠꓴ ꓠꓲꓹ ꓥ ꓡꓳ= ꓬꓲ ꓪ ꓔꓯ ꓬꓰ ꓙ ꓠꓬꓲ ꓙ ꓪ ꓡꓰ ꓠꓹ ꓟ ꓢꓯꓼ ꓕꓵꓼ ꓙꓰ ꓡꓯ=