ꓮ ꓫꓵꓽ ꓪꓴꓸ ꓠꓬꓲ ꓐꓳꓸꓸ ꓡ ꓟꓽ ꓓ ꓡ?

ꓮ ꓫꓵꓽ ꓪꓴꓸ ꓠꓬꓲ ꓐꓳꓸꓸ ꓡ ꓟꓽ ꓓ ꓡ?

ꓣꓳꓽ ꓡꓲ-ꓢꓴ ꓡꓲ ꓪ ꓐꓴ ꓠꓬ ꓐꓳ ꓓꓽ ꓟ ꓐꓯˍ ꓟ ꓮ ꓘꓶꓸ ꓟꓽ ꓙꓳ= ꓟꓬꓽ ꓠꓬꓲ ꓠꓬ ꓫꓸ ꓫꓵˍ ꓡꓰꓽ ꓥꓳ= ꓣꓳꓽ ꓗ- ꓔꓳ- ꓡꓲ ꓘꓴ ꓜꓲꓼ ꓞꓳ ꓢꓲ ꓤ ꓐꓣ ꓖꓳ ꓓꓱꓽ ꓔꓲꓸꓸ ꓘꓴ ꓜꓲꓼ ꓞꓳ ꓢꓲ ꓤ ꓔꓯ ꓔꓯꓸꓸ ꓠꓬꓲ ꓗꓷ ꓠꓬ-ꓸ ꓣꓳ ꓗ- ꓔꓳ - ꓡꓲꓗ ꓘꓴ ꓜꓲꓼ ꓞꓳ ꓢꓲ ꓤ ꓟꓬꓽ ꓠꓬꓲ ꓫꓸ ꓢꓴ ꓟꓬˍ ꓡꓳ-ꓸ ꓐꓰ ꓡꓳꓸ ꓟꓳˍ ꓡꓳ= ꓮ ꓫꓵꓽ ꓪꓴꓸ ꓠꓬꓲ ꓫꓸ ꓥꓸꓸ ꓐꓯˍ ꓟ ꓠꓬ ꓥꓪ ꓕꓱ ꓡꓱ ꓓꓵꓽ ꓙ ꓟꓶˍ ꓡꓳ=

1 ꓓꓽ ꓪꓴꓸ ꓟꓽ ꓢꓪꓸ ꓠꓬꓲ

ꓟꓵꓽ ꓗꓳ ꓓꓵ ꓓꓵ ꓗꓪ ꓞꓳꓹ ꓐꓳ ꓣꓱꓽ ꓢꓴ ꓔꓯ ꓡꓳꓸ ꓠꓬꓲ ꓗꓷˍ ꓠꓬ ꓞꓳ ꓐꓳ ꓒꓬꓱꓼ ꓔꓬ ꓢꓴ ꓐꓴ ꓠꓬ-ꓸ ꓬꓲꓼ ꓟꓬꓸꓸ ꓓꓽ ꓪꓴꓸ ꓘꓳˍ ꓡꓳ= ꓓꓽ ꓪꓴꓸ ꓫꓵꓽ ꓓꓵꓽ ꓙˍ ꓡꓳ= ꓣꓳꓽ ꓠꓬ ꓦꓲꓸꓹ ꓧ ꓕꓲꓽ ꓟ ꓐꓰ ꓜꓽ ꓓꓴ ꓓꓳ ꓓꓴ ꓙꓳˍ ꓠꓬ ꓓꓹ ꓳ-ꓸ ꓐꓰ ꓓꓵꓽ ꓙ ꓔꓬˍ ꓡꓳ=

2 ꓔꓽ ꓝꓲ ꓟꓽ ꓙꓳ (ꓬꓰ ꓟꓽ ꓑꓶꓸ)

ꓔꓽ ꓝꓲ ꓥˍ ꓟꓲ ꓮ ꓘꓶꓸ ꓬꓳꓸ ꓚꓲˍ ꓡꓳ= ꓔꓽ ꓝꓲ ꓟꓽ ꓙꓳˍ ꓠꓬ-ꓸ ꓮ ꓫꓵˍ ꓟꓲ ꓬꓰ ꓟꓽ ꓠ= ꓢꓴ ꓡꓰ ꓮ ꓔꓲꓸ ꓤ ꓚꓳꓹ ꓖꓶ ꓡˍ ꓠꓬ ꓙꓳꓸꓸ ꓗꓴ-ꓸ ꓞꓳ ꓪꓴꓽ ꓞꓳ ꓔꓲꓸꓸ ꓐꓴˍ ꓐꓰ ꓫꓸ ꓕꓱ ꓟꓽ ꓑꓶ-ꓸ ꓫꓸ ꓕꓱ ꓟꓽ ꓗꓴꓸ ꓕꓯˍ ꓠ ꓞꓳ ꓒꓬꓱꓼ ꓡ ꓟꓽ ꓓ= ꓣꓳꓽ ꓠꓬ-ꓸ ꓬꓲꓸ ꓚꓲ ꓪꓴꓽ ꓠ ꓗˍ ꓡꓳ= ꓣꓱꓽ ꓟꓽ ꓚꓳꓼ ꓗꓪ ꓙꓳꓸꓸ ꓟꓽ ꓛꓵ=

3 ꓢꓷꓸ ꓠꓲꓹ ꓟꓽ ꓙꓳ

ꓢꓷꓸ ꓠꓲꓹ ꓟꓽ ꓙꓳ ꓐꓯˍ ꓟ-ꓸ ꓮ ꓫꓵꓽ ꓔꓯ ꓐꓯˍ ꓡ? ꓕꓳꓽ ꓶ ꓛꓲꓸꓸ ꓔ ꓧꓪꓸ ꓔˍ ꓟ ꓔꓯ ꓐꓯˍ ꓡ? ꓢꓷꓹ ꓠꓲꓹ ꓐꓯˍ ꓟ ꓠꓬ ꓕꓳꓽ ꓶ ꓧꓪꓸ ꓔ ꓟ ꓔꓯ ꓡꓰ ꓐꓯˍ ꓟ ꓟꓽ ꓥ= ꓕꓲꓽ ꓐꓱ ꓙꓳˍ ꓟ ꓠꓬ ꓕꓳꓽ ꓶ ꓧꓪꓸ ꓔ ꓥˍ ꓟꓲ ꓢꓪꓸ ꓠꓬꓲ ꓟꓽ ꓗꓴ= ꓓꓵꓽ ꓙ ꓟꓽ ꓗꓴꓸ ꓫꓵꓽ ꓙꓳˍ ꓡꓳ= ꓢꓷꓸ ꓠꓲꓹ ꓐꓯˍ ꓟ ꓠꓬ ꓟꓲꓽ ꓕꓯ ꓢꓲ ꓐꓱ ꓶ-ꓸ ꓙ ꓗꓴˍ ꓟ-ꓸ ꓣꓳꓽ ꓔꓯ ꓜꓽ ꓖꓶꓽ ꓜꓽ ꓖꓶꓽ ꓓꓳ ꓘꓴˍ ꓟ ꓢꓷꓸ ꓠꓲꓹ ꓔꓯ ꓐꓯˍ ꓡꓳ= ꓚꓲꓸ ꓛꓬ ꓔꓶꓸꓸ ꓙꓱꓼ ꓔꓯ ꓮ ꓡꓲ ꓐꓰ ꓣꓴꓸꓹ ꓟꓶ ꓠꓹ ꓟ ꓔꓯ ꓢꓷˍ ꓟ ꓠꓬ ꓢꓷꓸ ꓠꓲꓹ ꓥꓳ=

4 ꓐꓴˍ ꓡꓳ

ꓞꓳ ꓐꓴ ꓐꓯˍ ꓟ ꓠꓬ ꓮ ꓕꓯˍ ꓟꓲ ꓙꓳ ꓜꓽ ꓡ ꓟꓽ ꓓ= ꓚꓲꓸ ꓛꓬ ꓢꓪꓸ ꓔˍ ꓟ ꓟꓬꓱꓽ ꓔꓯ ꓔꓰꓸꓸ ꓡꓰꓽ ꓬꓰ ꓠ ꓗ ꓡꓳ=

5 ꓕꓲꓽ ꓣꓳꓽ ꓛꓳꓽ ꓕꓲ ꓣꓳ ꓟꓽ ꓧꓳ ꓡꓯꓽ ꓘꓳ

ꓮ ꓙꓵꓽ ꓠꓬ ꓟꓸ ꓒ ꓡꓰꓽ ꓥꓳ= ꓢꓳꓸꓸ ꓤ ꓟꓽ ꓙꓳ-ꓸ ꓐꓰ ꓐꓯˍ ꓟ ꓥꓳꓽ ꓙꓱ ꓕꓲꓽ ꓡꓰ-ꓸ ꓣꓳꓽ ꓠꓬ ꓠꓲꓹ ꓧꓳꓹ ꓫꓵꓹ ꓡꓯ ꓘꓳˍ ꓟ ꓮ ꓘꓶꓸ ꓟꓽ ꓙꓳ= ꓕꓲꓽ ꓣꓳ ꓟ ꓐꓳꓸꓸ ꓡˍ ꓕꓯ-ꓸ ꓕꓲꓽ ꓐꓱ ꓠꓬ ꓟꓬꓸꓸ ꓔꓳˍ ꓡꓳ= ꓙꓳ ꓜ ꓢꓴ-ꓸ ꓐꓳꓸꓸ ꓡ ꓢꓴˍ ꓟꓲ ꓫꓸ ꓢꓴ ꓔꓯ ꓙ ꓖꓴ ꓟꓽ ꓟꓸ ꓖꓶꓽ= ꓫꓸ ꓢꓴ ꓐꓴ ꓙꓳ ꓜꓽ ꓡˍ ꓟ ꓔꓯ ꓙꓳꓸꓸ ꓔꓬ ꓗꓴˍ ꓡꓳ= ꓖꓳ ꓡꓰ ꓠꓬꓲ ꓓꓵꓽ ꓙ ꓠꓬꓲ ꓡꓯ= ꓕꓯꓽ ꓢꓲ ꓗꓪ ꓐꓳ ꓔˍ ꓟ ꓘꓴꓽ ꓗꓪ ꓚꓲꓸ ꓛꓬꓼ ꓠꓬ ꓮ ꓡꓲ ꓕꓲꓽ ꓙꓰꓽ ꓗꓪ ꓚꓬꓼ ꓡ? ꓐꓯˍ ꓟ ꓓꓵꓽ ꓙ ꓠꓬꓲ ꓢꓲ-ꓸ ꓫꓬꓹ ꓔꓱꓹ ꓙꓰ ꓡꓯ=