ꓶꓸꓹ ꓤ ꓟꓵ ꓗꓪ ꓢꓷꓸ ꓠꓲꓹ ꓢꓳ ꓔꓬ ꓟ ꓣꓳ ꓤ ꓣꓳ ꓠꓱ ꓐꓴ ꓔꓯ ꓮ ꓡꓰ ꓐꓰ ꓟꓸ ꓖꓶ ꓠ ꓗꓹ ꓡ?

ꓶꓸꓹ ꓤ ꓟꓵ ꓗꓪ ꓢꓷꓸ ꓠꓲꓹ ꓢꓳ ꓔꓬ ꓟ ꓣꓳ ꓤ ꓣꓳ ꓠꓱ ꓐꓴ ꓔꓯ ꓮ ꓡꓰ ꓐꓰ ꓟꓸ ꓖꓶ ꓠ ꓗꓹ ꓡ? ꓮ ꓟꓶ ꓟ ꓤꓶꓸꓹ ꓗꓪ ꓠꓬ ꓞꓲ ꓣꓳˍ ꓕꓯ ꓡꓰ ꓣꓳ ꓘꓹ ꓣꓳ ꓟꓵ ꓗꓪ ꓐꓰ ꓢꓴ ꓟꓵ ꓗꓪ ꓙꓰ ꓢꓲ꓾ ꓟꓲ ꓠꓯ ꓢꓷꓸ ꓠꓲꓹ ꓢꓳ ꓠꓹ ꓟ ꓐꓱ ꓶ ꓮꓽ ꓐ ꓮꓽ ꓟ ꓐꓴ ꓡꓰ ꓝꓲ ꓩꓴ ꓗꓷ ꓡꓳ= ꓕꓱ ꓡꓱ ꓮꓽ ꓐ ꓮꓽ ꓟ ꓐꓴ ꓐꓰ ꓧꓹ ꓡꓯ ꓘꓳ ꓢꓲ꓾ ꓶꓸꓹ ꓤ ꓟꓵ ꓗꓪ ꓢꓷꓸ ꓠꓲꓹ ꓢꓳ ꓔꓬ ꓟ ꓣꓳ ꓤ ꓣꓳ ꓠꓱ ꓐꓴ ꓔꓯ ꓮꓽ ꓡꓰ ꓐꓰ ꓟꓸ ꓖꓶ ꓠ ꓗꓹ ꓡ? ꓞꓲ ꓣꓳ ꓟ ꓕꓲ ꓙꓵꓽ ꓗꓪ ꓦꓲꓸꓹ ꓘꓴ ꓽ ꓗꓪ ꓮꓽ ꓐ ꓮ ꓟ ꓐꓴ ꓐꓰ ꓕꓲ ꓠꓲꓹ ꓕꓲ ꓪ ꓔꓬ ꓕꓯ ꓬꓲꓸ ꓪ ꓙ ꓟꓶ ꓟ ꓓꓵ ꓙ ꓚꓱꓹ ꓮ ꓙꓵꓽ ꓔꓯ ꓮꓽ ꓐ ꓮ ꓟ ꓣꓱꓽ ꓢꓴ ꓐꓴ ꓢꓷꓸ ꓠ ꓗꓹ ꓡꓳ= ꓕꓲ ꓠꓬꓲ ꓡꓲ ꓕꓲ ꓠꓬꓲ ꓜꓸꓹ ꓟ ꓜ ꓫꓵꓽ ꓜ ꓙꓰ ꓕꓱ ꓟ ꓥˍ ꓟꓲ ꓧꓪ ꓖꓳ ꓓꓱ ꓐꓱ ꓶ ꓙꓲ ꓖꓴ ꓙꓳ ꓙꓳ ꓜꓸꓹ ꓠ ꓟ ꓟꓸ ꓖꓶ ꓠ ꓗꓹ ꓡꓳ= ꓙꓲˍ ꓟ ꓚꓱꓹ ꓔꓯ ꓞꓳ ꓫꓱꓹ ꓐ ꓡ ꓠ ꓟ ꓐꓱ ꓶ ꓕꓳꓽ ꓶ ꓮ ꓟꓬꓹ ꓵꓸꓹ ꓠ ꓟ ꓟꓲ ꓟꓸ ꓖꓶ ꓠ ꓗꓹ ꓡꓳ= ꓣꓳ ꓤ ꓠꓱ ꓐꓰ ꓕꓲ ꓠꓲꓹ ꓕꓲ ꓪꓽ ꓔꓬ ꓟ ꓦꓬ ꓠꓬꓲ ꓗꓪ ꓣꓳ ꓤ ꓣꓳ ꓠꓱ ꓣꓳ ꓔꓯ ꓙꓵꓹ ꓡ ꓠ ꓟ ꓦ ꓡꓱꓽ ꓡ ꓠ ꓟ  ꓬꓲꓸ ꓚꓲꓽ ꓚꓬ ꓦ ꓡꓱꓽ ꓗꓴꓸ ꓠ ꓟ ꓬꓰ ꓠ ꓗꓹ ꓡꓳ= ꓖꓳ ꓕꓯ ꓢꓲ꓾ ꓶꓸꓹ ꓤ ꓟꓵ ꓗꓪ ꓬꓲꓸ ꓕꓲ ꓣꓳ ꓡꓰ ꓢꓷꓸ ꓠꓲꓹ ꓢꓳ ꓙꓰ ꓕꓯ ꓬꓲꓸ ꓚꓲꓽ ꓛꓬ ꓦ ꓡꓱꓽ ꓢꓲ꓾ ꓢꓯꓼ ꓕꓵꓼ ꓡ ꓥꓳ= ꓕꓲ ꓐꓱ ꓮꓽ ꓐ ꓮ ꓟ ꓣꓱꓽ ꓢꓴ ꓐꓴ ꓠꓬ ꓬꓲꓸ ꓪ ꓙ ꓟꓶ ꓪ ꓡꓰ ꓬꓰ ꓝꓲ ꓠꓲꓹ ꓫꓵꓹ ꓡꓳ= ꓕꓱ ꓟ ꓠꓬ ꓟꓽ ꓜꓳ꓾= ꓤ ꓠꓱ ꓤ ꓕꓲ ꓣꓳ ꓠꓯꓼ ꓘꓴꓽ ꓗꓪ ꓬꓲꓸ ꓪ ꓬꓰ ꓘꓴꓹ ꓟ ꓬꓰ ꓐ ꓡ ꓟ ꓟꓽ ꓬꓰ ꓗꓴꓹ ꓟ ꓔꓯ ꓢꓷꓸ ꓔ ꓡꓳ=

ꓶꓸꓹ ꓤ ꓟꓵ ꓗꓪ ꓕꓳꓽ ꓶ ꓢꓳ ꓢꓴ ꓠꓬ ꓫꓸ ꓓꓴ ꓕꓲ ꓫꓵꓽ ꓫꓵꓽ ꓕꓳꓹ ꓜꓳꓼ  ꓡ ꓔꓯ ꓬꓲꓸ ꓪ ꓚꓲꓽ ꓛꓬ ꓫꓵꓽ ꓪꓴ ꓕꓱ ꓟ ꓔꓯ ꓮ ꓡꓰ ꓐꓰ ꓬꓰ ꓠꓯꓼ ꓟ ꓢꓷꓸ ꓡ ꓡꓳ= ꓠꓱꓸ ꓐꓯꓼ ꓢꓴ ꓔꓯ ꓟꓽ ꓦ ꓡꓱꓽ ꓚꓲꓽ ꓛꓬ ꓢꓯꓼ ꓪ ꓔꓯ ꓡꓰ ꓦ ꓡꓱꓽ ꓘꓴꓸ ꓢꓴ ꓒꓬꓱꓼ ꓡ ꓥꓳ= ꓖꓳ ꓟ ꓡꓰ ꓐꓰ ꓟꓽ ꓞꓲ ꓙꓳ ꓦꓲꓸꓹ ꓗꓪ ꓟꓸ ꓔ ꓟ ꓢꓷꓸ ꓠꓲꓹ ꓡꓰ ꓟꓽ ꓞꓲ ꓚꓳ ꓡꓳ ꓡꓳ ꓗꓪ ꓟ ꓢꓷꓸ ꓫꓵꓽ ꓢꓷꓸ ꓙꓰ ꓮ ꓟꓬꓹ ꓔꓯ ꓥˍ ꓟꓲ ꓢꓷꓸ ꓡ ꓡꓳ= ꓕꓱ ꓡꓱ ꓶꓸꓹ ꓟꓵ ꓗꓪ ꓔꓬ ꓟ ꓦꓬ ꓠꓬꓲ ꓟꓶ ꓫꓵꓽ ꓡ ꓕꓯ ꓣꓳ ꓘꓹ ꓗꓪ ꓔꓬ ꓕꓯ ꓮ ꓡꓰ ꓫꓵꓽ ꓠꓬ ꓙꓲ ꓖꓴ ꓙꓳ ꓟ ꓟꓽ ꓙꓳ ꓟ ꓶꓸꓹ ꓤ ꓟꓵ ꓗꓪ ꓔꓬ ꓕꓯ ꓮ ꓡꓰ ꓫꓵꓽ ꓢꓷꓸ ꓠꓲꓹ ꓪ ꓟ ꓔꓯ ꓕꓯ ꓘꓴꓹ ꓡ ꓡꓳ= ꓬꓲꓸ ꓤꓶꓸꓹ ꓐꓱ ꓶ ꓔꓶꓸ ꓙꓱꓼ ꓕꓲ ꓟ ꓚꓬ ꓢꓲ꓾ ꓢꓯꓼ ꓕꓵꓼ ꓙꓰ ꓡ ꓥꓳ= ꓢꓴ ꓐꓰ ꓔꓯ ꓡꓯ ꓘꓳ ꓟ ꓟꓬꓱꓽ ꓬꓰ ꓔꓯ ꓡꓯ ꓘꓳ ꓟ ꓕꓱ ꓡꓱ ꓬꓰ ꓟ ꓠꓬ ꓙꓲˍ ꓟ ꓬꓲꓸ ꓚꓱꓹ ꓥ ꓡꓳ= ꓮ ꓡꓰ ꓫꓵꓽ ꓗꓪ ꓥˍ ꓟꓲ ꓙꓲˍ ꓟ ꓟꓽ ꓙꓲˍ ꓟ ꓠꓬ ꓙꓳ  ꓡꓳ= ꓮ ꓟꓶ ꓞꓲ ꓣꓳ ꓟ ꓕꓲ ꓙꓵꓽ ꓗꓪ ꓮꓽ ꓐ ꓮ ꓟ ꓐꓴ ꓐꓰ ꓕꓲ ꓪ ꓔꓬ ꓟꓽ ꓪ ꓟꓽ ꓦꓬ ꓠꓬꓲ ꓗꓪ ꓦꓲꓸꓹ ꓘꓴꓽ ꓗꓪ ꓡ ꓙꓰ ꓠꓲꓹ ꓫꓵꓽ ꓟ ꓟꓲ ꓙꓳ ꓡꓳ= ꓕꓯ ꓥꓳ ꓐꓯ ꓠꓬ ꓒꓵꓽ ꓣꓱꓽ ꓓꓴ ꓟꓽ ꓙꓳ ꓟ ꓕꓲ ꓙꓵꓽ ꓗꓪ ꓫꓸ ꓓꓴ ꓕꓳꓹ ꓜꓳꓼ ꓟ ꓕꓲ ꓙꓵꓽ ꓕꓯ ꓦꓲꓸꓹ ꓘꓴꓽ ꓗꓪ ꓢꓲ ꓙꓬ ꓟ ꓥ ꓡꓳ=

ꓶꓸꓹ ꓤ ꓟꓵ ꓗꓪ ꓢꓷꓸ ꓠꓲꓹ ꓢꓳ ꓔꓬ ꓢꓴ ꓐꓴ ꓠꓬ ꓕꓳꓽ ꓶ ꓥ ꓟꓲ ꓢꓳ ꓠ ꓡꓳ꓾ ꓠꓲꓹ ꓟ ꓥˍ ꓟꓲ ꓫꓸ ꓜꓸꓹ ꓓꓵ ꓖꓪ ꓓꓴ ꓙꓰ ꓙꓰ ꓡ ꓡ ꓮ ꓙꓵꓽ ꓬꓰ ꓠ ꓗꓹ ꓟ ꓪꓴꓸ ꓠꓬꓲ ꓗꓹ ꓟꓽ ꓛꓲ ꓓꓴ ꓕꓳꓽ ꓜꓳꓼ ꓡ ꓥꓳ= ꓤ ꓠꓱ ꓤ ꓠꓯꓼ ꓘꓴꓽ ꓗꓪ ꓔꓳꓹ ꓜꓳꓼ ꓡ ꓟ ꓫꓵꓽ ꓪꓴ ꓮ ꓙꓵꓹ ꓔꓯ ꓞꓳ ꓟꓳ ꓕꓲ ꓣꓳˍ ꓡꓰ ꓬꓰ ꓠ ꓗ ꓡ ꓡꓳ= ꓦꓲꓸꓹ ꓘꓴꓽ ꓗꓪ ꓔꓬ ꓕꓯ ꓠꓬ ꓕꓳꓹ ꓜꓳꓼ ꓡ ꓟ ꓫꓵꓽ ꓪꓴ ꓮꓽ ꓙꓵꓹ ꓕꓯ ꓮꓽ ꓐ ꓮ ꓟ ꓡꓰ ꓬꓰ ꓖꓶ ꓡꓳ= ꓖꓳ ꓡꓰ ꓐꓯ ꓥˍ ꓟꓲ ꓦꓲꓸꓹ ꓘꓴꓽ ꓗꓪ ꓔꓬ ꓟ ꓕꓲ ꓙꓵꓹ ꓗꓪ ꓕꓱ ꓡꓱ ꓫꓵ ꓫꓵꓽ ꓪꓴ ꓮ ꓙꓵꓹ ꓔꓯ ꓡꓲ ꓙꓰ ꓐ ꓠꓹ ꓟ ꓞꓲ ꓘꓴꓽ ꓠꓲꓹ ꓙꓳ ꓠ ꓟ ꓟꓸ ꓖꓶ ꓕꓯ ꓠꓬ ꓟꓽ ꓚꓵ=  ꓦꓲꓸꓹ ꓘꓴꓽ ꓗꓪ ꓔꓬ ꓟ ꓕꓲ ꓙꓵꓹ ꓗꓪ ꓢꓴ ꓔꓯ ꓠꓲꓹ ꓠꓵ ꓗꓴꓽ ꓠꓹ ꓟ ꓬꓰ ꓙ ꓗꓴꓸ ꓠꓹ ꓟ ꓞꓳ ꓒꓵ ꓗꓴꓸ ꓠꓹ ꓟ ꓟꓲ ꓟꓸ ꓖꓶ ꓠ ꓗꓹ ꓡꓳ= ꓮꓽ ꓐ ꓮꓽ ꓟ ꓣꓱꓽ ꓢꓴ ꓐꓴ ꓥˍ ꓟꓲ ꓥꓪ ꓤ ꓥꓪ ꓠꓱ ꓐꓴ ꓮ ꓫꓵꓽ ꓬꓰ ꓠꓯꓼ ꓥ ꓢꓱ ꓧꓪ ꓖꓳ ꓓꓱ ꓔꓬ ꓢ ꓥ ꓢꓰ ꓢꓷꓸ ꓠꓲꓹ ꓢꓯꓼ ꓕꓵꓼ ꓥ ꓢꓱ ꓕꓱ ꓡꓱ ꓐꓰ ꓢꓷꓸ ꓠꓲꓹ ꓫꓵꓽ ꓟ ꓦꓬ ꓠꓬꓲ ꓠꓬ ꓮ ꓟꓬꓹ ꓙꓳ ꓐꓭ ꓥꓳ= ꓮ ꓟꓶ ꓤꓶꓸꓹ ꓗꓪ ꓠꓬ Phone ꓮ ꓟꓬꓹ ꓙꓳ ꓡ ꓟ ꓪꓴꓸ ꓠꓬꓲ ꓬꓲ ꓙꓵꓽ ꓖꓶ ꓢꓲ꓾ ꓬꓲ ꓪ ꓕꓯ ꓑꓧꓳꓠꓰ ꓗꓪ ꓐꓰ ꓫꓸ ꓪ ꓕꓱ ꓖꓶ= ꓕꓱ ꓡꓱ ꓬꓰ ꓖꓶ ꓟ ꓠꓬ ꓬꓲ ꓪ ꓐꓱ ꓶ ꓢꓯꓼ ꓪ ꓟꓬ ꓠꓬꓲ ꓪ ꓡꓰ ꓝꓲ ꓟ ꓥ ꓡꓳ= ꓶꓸꓹ ꓤ ꓟꓵ ꓗꓪ ꓔꓬ ꓢꓲ꓾ ꓢꓷꓸ ꓠꓲꓹ ꓢꓳ ꓔꓬ ꓥˍ ꓟꓲ ꓬꓲ ꓪ ꓐꓰ ꓮ ꓕꓯ ꓥˍ ꓟꓲ ꓙ ꓡꓯ ꓘꓳ ꓠ ꓗꓹ ꓡꓳ= ꓬꓲ ꓪ ꓡꓰ ꓬꓰ ꓟ ꓟꓬꓱꓽ ꓮ ꓙꓵꓹ ꓔꓯ ꓟꓬꓱꓼ ꓓꓳꓽ ꓖꓶ ꓠ ꓗꓹ ꓡꓳ= ꓮꓽ ꓐ ꓮ ꓟ ꓣꓱꓽ ꓢꓴ ꓐꓴ ꓠꓬ ꓣꓳ ꓤ ꓣꓳ ꓠꓱ ꓔꓯ ꓮ ꓕꓯ ꓥˍ ꓟꓲ ꓠꓲꓹ ꓠꓵ ꓡꓳ ꓐꓯ ꓟ ꓔꓯ ꓢꓷꓸ ꓡꓰ ꓝꓲ ꓠꓹ ꓟ ꓐꓱ ꓶ ꓬꓰ ꓖꓶ ꓠ ꓗꓹ ꓡꓳ= ꓤ ꓠꓱ ꓤ ꓐꓰ ꓫꓸ ꓪ ꓕꓱ ꓕꓯ ꓠꓲꓹ ꓠꓵ ꓡꓳ ꓐꓯ ꓟ ꓫꓸ ꓪ ꓔꓯ ꓕꓱ ꓖꓶ ꓠ ꓗꓹ ꓡꓳ= ꓤ ꓠꓱ ꓤ ꓐꓴ ꓠꓬ ꓮꓽ ꓐ ꓮ ꓟ ꓗꓪ ꓐꓰ ꓟꓬꓱꓼ ꓓꓳꓽ ꓖꓶ ꓟ ꓢꓯꓼ ꓪ ꓖꓶ ꓡ ꓟ ꓔꓯ ꓮ ꓘꓶꓸ ꓠꓲꓹ ꓠꓵ ꓡꓳ= ꓬꓲ ꓪ ꓮ ꓫꓵꓽ ꓟꓬꓱꓽ ꓬꓰ ꓔꓬ ꓥˍ ꓟꓲ ꓬꓲꓸ ꓪ ꓑ ꓔꓲ ꓗꓪ ꓮꓽ ꓐ ꓮ ꓟ ꓔꓬ ꓡꓳ ꓐꓰ ꓙ ꓟꓶ ꓡꓰ ꓠꓹ ꓟ ꓢꓯꓼ ꓕꓵꓼ ꓙꓰ ꓡꓯ ꓐꓰ ꓮꓽ ꓐ ꓮ ꓟ ꓣꓱꓽ ꓢꓴ ꓐꓴ ꓔꓯ ꓢꓯꓼ ꓖꓶ ꓩꓴ ꓡ ꓥꓳ=