Happy Parents Day

ꓕꓲ ꓘꓳꓼ ꓡꓲ ꓕꓲ ꓘꓳꓼ 7 ꓦ ꓟ 26 ꓠꓬꓲ ꓕꓯ ꓗ‐ꓔꓳ‐ꓡꓲ ꓢ-ꓢꓶ-ꓠ ꓘꓴꓽ ꓗꓪ ꓮꓽ ꓐ ꓮ ꓟ ꓑꓮꓲ ꓦꓬ ꓠꓬꓲ ꓐꓰ ꓐꓯ ꓢꓲ꓾ ꓑꓮꓲ ꓬꓰ ꓔꓬ ꓟ ꓥ ꓡꓳ= ꓠꓬꓲꓸ ꓠꓬꓲ 7 ꓦ ꓟ 26 ꓠꓬꓲ ꓗꓪ ꓠꓬ St. Joachim ꓐꓰ St. Anne ꓑꓮꓲ ꓦꓬ ꓠꓬꓲ ꓥ ꓡꓳ= ꓠꓬꓲꓸ ꓠꓬꓲ ꓣꓳ ꓮꓽ ꓐ ꓮꓽ ꓟ ꓑꓮꓲ ꓔꓯ ꓬꓰ ꓔꓬ ꓟ ꓠꓬ ꓐꓽ ꓐ ꓟ ꓟ ꓠꓵ ꓠꓲꓹ ꓔꓯ ꓓꓵ ꓙ ꓢꓲ꓾ ꓠꓬꓲ ꓮꓽ ꓐ ꓮ ꓟ ꓔꓯ ꓫꓸ ꓟꓳ ꓐꓰ ꓐꓯ ꓠ ꓗꓹ ꓟ ꓥ ꓡꓳ= ꓮꓽ ꓐ ꓮ ꓟ ꓔꓯ ꓣꓳ ꓡꓰ ꓐꓯ ꓛꓬ ꓥꓳ ꓛꓬ ꓡꓰ ꓗꓷ ꓟ ꓬꓲꓹ ꓚꓱꓹ ꓕꓲ ꓫꓵ ꓡꓲ ꓕꓲ ꓫꓵ ꓗꓪ ꓐꓰ ꓬꓲ ꓛꓬ ꓥꓳ ꓛꓬ ꓗꓷ ꓟ ꓝꓴꓲꓸ ꓮ ꓙꓵꓹ ꓔꓯ ꓝꓴꓲꓸ ꓣꓷꓠꓸ ꓠꓹ ꓟ ꓬꓲ ꓙꓲ ꓟꓲ ꓥ ꓡꓳ=

ꓪꓴ-ꓢ ꓙꓵ ꓗ 10 ꓙꓵ ꓟ ꓗꓪ ꓮꓽ ꓐ ꓮ ꓟ ꓔꓯ ꓒꓵꓽ ꓖꓳ ꓡꓰ ꓠꓬ ꓠꓴ ꓶꓸꓹ ꓙꓳ ꓫꓱꓹ ꓙꓳ ꓢꓲ꓾ ꓟꓲ ꓠꓯ ꓗꓪ ꓟꓶ ꓤ ꓢꓯꓸ ꓔꓬ ꓪ ꓥꓳ ꓐꓰ ꓐꓯ ꓔ ꓟ ꓥ ꓡꓳ=ꓖꓳ ꓟ ꓑꓶꓸ ꓓꓴ ꓮꓽ ꓐ ꓮꓽ ꓟ ꓔꓯ ꓞꓳ ꓒꓵꓽ ꓟ ꓠꓬ ꓮ ꓘꓶꓸ ꓣꓳꓸꓹ ꓚꓵ ꓟ ꓔꓯ ꓢꓲꓽ ꓒ ꓬꓰ-ꓢꓴ ꓡꓰ ꓙꓵ ꓗ 10 ꓙꓵ ꓔꓯ ꓟꓳꓸ ꓢꓲ꓾ ꓟꓸ ꓖꓶ ꓔ ꓟ ꓥ ꓡꓳ= ꓣꓳ ꓢꓲ ꓫꓬ ꓕꓳ ꓶ ꓗꓪ ꓡꓳꓸ ꓠꓬꓲ ꓥˍ ꓟꓲ ꓮꓽ ꓐ ꓮ ꓟ ꓔꓯ ꓒꓵꓽ ꓠꓹ ꓟ ꓬꓲ ꓚꓱꓹ ꓮ ꓟꓬꓹ ꓫꓵꓽ ꓗꓪ ꓐꓰ ꓟꓸ ꓖꓶ ꓔ ꓟ ꓥ ꓡꓳ= ꓮꓽ ꓐ ꓮ ꓟ ꓔꓯ ꓞꓳ ꓒꓵꓽ ꓢꓴ ꓮꓽ ꓐ ꓮꓽ ꓟ ꓔꓯ ꓬꓰ ꓙ ꓢꓴ ꓐꓴ ꓠꓬ ꓤꓶꓸꓹ ꓫꓵ: ꓟꓬ ꓫꓵꓽ ꓢꓲ꓾ ꓮ ꓡꓰ ꓗꓪ ꓙꓰ ꓥˍ ꓟꓲ ꓮ ꓫꓵꓽ ꓟꓬꓱꓽ ꓬꓰ ꓥ ꓟꓲ ꓧꓪꓸ ꓡꓰ ꓓꓴ ꓔꓯ ꓘꓴꓽ ꓣꓴ ꓟꓶ ꓡꓳ= ꓟꓽ ꓞꓲ ꓶꓸꓹ ꓤ ꓫꓱꓹ ꓤ ꓮ ꓔꓯ ꓥ ꓟꓲ ꓣꓳ ꓠꓯꓼ ꓗꓪ ꓓ ꓡꓳ꓾ ꓐꓰ ꓣꓳ ꓢꓲ ꓫꓬ ꓕꓳ ꓶ ꓗꓪ ꓡꓳꓸ ꓟꓳ ꓪ ꓡꓳ= 
ꓣꓳ ꓤꓶꓸꓹ ꓗꓪ ꓣꓳ ꓮ ꓡꓰ ꓗꓷ ꓡꓰ ꓥ ꓟꓲ ꓠꓲꓹ ꓠꓵ ꓗꓴꓸ ꓢꓴ ꓠ, ꓮꓽ ꓐ ꓮꓽ ꓟ ꓥ ꓡꓳ= ꓣꓳ ꓮꓽ ꓐ ꓮꓽ ꓟ ꓠꓬ ꓬꓲ ꓪ ꓤꓶꓸꓹ ꓬꓲ ꓪ ꓢꓯꓼ ꓪ ꓬꓲ ꓪ ꓖꓳ ꓓꓱ ꓮ ꓙꓵꓹ ꓔꓯ ꓖꓶ ꓢꓲ꓾ ꓠꓬꓲ ꓣꓳ ꓐꓱ ꓶ ꓠꓲꓹ ꓠꓵ ꓟ ꓥ ꓡꓳ= ꓬꓲ ꓪ ꓟꓽ ꓜ ꓪ ꓡꓲꓼ ꓟꓽ ꓛꓲ ꓤ ꓠꓱ ꓤ ꓐꓴ ꓜ ꓪ ꓡꓰ ꓠꓬ ꓮ ꓘꓶꓸ ꓗꓹ ꓛꓲ ꓔꓬ ꓟ ꓥ ꓡꓳ꓾ ꓬꓲ ꓪ ꓟꓽ ꓖꓪ ꓪꓽ ꓡꓲ ꓟꓽ ꓛꓲ ꓤ ꓠꓱ ꓤ ꓐꓴ ꓐꓲ ꓐꓲ ꓖꓪ ꓪ ꓠꓬ ꓬꓲ ꓪ ꓠꓲꓹ ꓟ ꓗꓪ ꓮ ꓘꓶꓸ ꓗꓹ ꓛꓲ ꓔꓬ ꓟ ꓥ ꓡꓳ= ꓬꓲ ꓪ ꓫꓸ ꓔꓬ ꓥˍ ꓟꓲ ꓤ ꓠꓱ ꓤ ꓐꓴ ꓗꓹ ꓛꓲ ꓛꓲ ꓔꓬ ꓟ ꓔꓯ ꓡꓳꓸ ꓟꓳ ꓠꓬ ꓬꓲ ꓪ ꓟꓲ ꓗꓹ ꓛꓲ ꓟ ꓥ ꓡꓳ= ꓖꓳ ꓟ ꓑꓶꓸ ꓓꓴ ꓠꓬꓲꓸ ꓠꓬꓲ ꓮꓽ ꓐ ꓮꓽ ꓟ ꓑꓮꓲ ꓦꓬ ꓠꓬꓲ ꓗꓪ ꓣꓳ ꓮꓽ ꓐ ꓮꓽ ꓟ ꓟꓲ ꓠꓯ ꓗꓪ ꓢꓱꓽ ꓔꓬ ꓟ ꓕꓲ ꓙꓵꓹ ꓗꓪ ꓬꓲ ꓪ ꓐꓯ ꓘꓶꓸ ꓬꓲ ꓪ ꓡꓰ ꓟꓸ ꓖꓶ ꓡ ꓟ ꓫꓸ ꓪ ꓔꓯ ꓠ ꓡꓳ ꓘꓴꓽ ꓣꓴ ꓓꓴ ꓬꓰ ꓡꓯ= ꓬꓲ ꓪ ꓔꓯ ꓬꓰ ꓙ ꓓꓴ ꓬꓰ ꓡꓯ꓾ ꓞꓳ ꓒꓵꓽ ꓓꓴ ꓬꓰ ꓡꓯ꓾ ꓟꓬ ꓠꓬꓲ ꓣꓳꓸꓹ ꓚꓵ ꓟ ꓠꓬ ꓮꓽ ꓐ ꓮꓽ ꓟ ꓟꓬ ꓐꓲ ꓓꓴ ꓠ ꓕꓽ ꓬꓰ ꓪ ꓡꓰ ꓝꓲ= ꓮꓽ ꓐ ꓮꓽ ꓟ ꓟꓬ ꓐꓲ ꓕꓲ ꓜꓳꓸ ꓤ ꓠꓱ ꓫꓸ ꓤꓶꓸꓹ ꓕꓲ ꓤꓶꓸꓹ ꓐꓯ ꓟ ꓡꓰ ꓐꓰ ꓮꓽ ꓐ ꓮꓽ ꓟ ꓠꓲꓹ ꓟ ꓫꓸ ꓡꓰ ꓠ ꓬꓰ ꓢꓴ ꓮꓽ ꓐ ꓮꓽ ꓟ ꓟꓬ ꓐꓲ ꓓꓳꓽ ꓠ ꓬꓰ ꓢꓴ ꓐꓴ ꓠꓬ ꓶꓸꓹ ꓤ ꓫꓱꓹ ꓤ ꓟꓽ ꓟꓶ= ꓟꓽ ꓞꓲ ꓣꓳ ꓤꓶꓸꓹ ꓗꓪ ꓮ ꓕꓯ ꓥˍ ꓟꓲ ꓫꓸ ꓓꓴ ꓡꓰ ꓕꓳꓹ ꓜꓳꓼ ꓡ ꓥꓳ=
ꓖꓳ ꓟ ꓑꓶꓸ ꓓꓴ ꓠꓬꓲꓸ ꓠꓬꓲ ꓮꓽ ꓐ ꓮꓽ ꓟ ꓑꓯꓲ ꓗꓪ ꓣꓳ ꓮꓽ ꓐ ꓮꓽ ꓟ ꓐꓱ ꓶ ꓪꓽ ꓘꓴꓽ ꓙ ꓓꓴ ꓬꓰ ꓡꓯ= ꓬꓲ ꓪ ꓠꓲꓹ ꓟ ꓢ ꓡꓰ ꓠ ꓢꓯꓼ ꓕꓵ ꓡꓯ= ꓮꓽ ꓐ ꓮꓽ ꓟ ꓐꓴ ꓮ ꓕꓯ ꓥˍ ꓟꓲ ꓗꓹ ꓛꓲ ꓛꓲ ꓔꓬ ꓪ ꓝꓲ ꓐꓰ ꓐꓯ ꓢꓲ꓾ ꓥꓪ ꓡꓰ ꓢꓷꓸ ꓖꓶ ꓘꓶꓸ ꓕꓱ ꓗꓪ ꓠ ꓢꓲ ꓓꓴ ꓬꓰ ꓠꓲ ꓮ ꓙꓵꓹ ꓔꓯ ꓫꓸ ꓟꓳ=