WO. P M. MI:

ꓮ ꓠꓱ ꓕꓯ ꓪꓳꓸ ꓑ ꓕꓲꓽ ꓘ ꓟ ꓠꓬ ꓢꓶ ꓠꓯꓺ ꓟꓲ ꓗꓪ ꓦꓬ ꓘꓶꓽ ꓓꓳꓺ ꓙꓰ ꓕꓯ ꓪꓳꓸ ꓑ ꓠꓬꓲꓽ ꓟꓻ ꓠꓬ ꓬꓲꓸ ꓗꓴ ꓕꓲꓽ ꓘꓴ ꓗꓪ ꓞꓰ ꓓꓵꓽ ꓙꓰꓳ= ꓬꓲꓸ ꓕꓯꓽ ꓢꓲ ꓗꓪ ꓔꓬ ꓟ ꓪꓳꓸ ꓑ ꓐꓴ ꓠꓬ꓾ "ꓕꓱ ꓠꓬꓲꓽ ꓟ ꓟ ꓠꓬ ꓮ ꓡꓰ ꓥˍ ꓟꓲ ꓫꓵˍ ꓥꓳ= ꓬꓲꓸ ꓘꓴ ꓕꓱ ꓘꓶꓸ ꓛꓲ ꓠꓯꓸ ꓫꓵꓽ" ꓐꓰ ꓐꓯ ꓔꓬ ꓖꓴˍ ꓡꓳ= ꓬꓲꓸ ꓘꓴ ꓠꓯꓸꓼ ꓗꓪ ꓓꓵꓽ ꓙꓰ ꓟ꓾ ꓪꓳꓸ ꓑ ꓠꓬꓲꓽ ꓟ ꓥˍ ꓟꓲ꓾ ꓬꓲꓸ ꓕꓯꓽ ꓢꓲ ꓗꓪ ꓓꓯ ꓡ ꓠꓹ ꓟ ꓬꓲꓸ ꓙꓲꓻ ꓢꓯꓼ ꓕꓵꓼˍ ꓡꓳ= ꓛꓳꓸ ꓓꓯ ꓙꓰ ꓢꓰꓽ꓾ ꓢꓳꓺ ꓞꓰ ꓢꓰ ꓐꓰ ꓟꓽ ꓠꓽ ꓠꓽ ꓢꓯꓼ ꓕꓵꓼ ꓔꓬ ꓖꓴˍ ꓡꓳ= ꓬꓲꓸ ꓕꓯꓽ ꓢꓲ ꓗꓪ ꓔꓬ ꓟ ꓬꓲꓸ ꓛꓳꓽ ꓒꓯꓹ ꓪꓳꓸ ꓑ ꓐꓴ ꓥˍ ꓟꓲ꓾" ꓕꓱ ꓠꓬꓲꓽ ꓟ ꓟ ꓠꓬ ꓮ ꓡꓰ ꓥˍ ꓟꓲ ꓫꓵꓻˍ ꓥꓳ=" ꓐꓰ ꓐꓯ ꓔꓬ ꓖꓴˍ ꓡꓳ=

ꓬꓲꓸ ꓘꓴ ꓘꓴꓽ ꓗꓪ ꓔꓬ  ꓪꓳꓸ ꓑ ꓠꓬꓲꓽ ꓟ ꓟ ꓗꓪ ꓕꓲꓽ ꓟ ꓠꓬ ꓬꓲꓸ ꓕꓯꓽ ꓢꓲ ꓗꓪ ꓔꓬ ꓟ ꓪꓳꓸ ꓑ ꓐꓴ ꓐꓯ ꓘꓶꓽ ꓔꓯ ꓠ ꓠꓹ ꓢꓲ꓾ ꓟꓽ ꓢꓯꓼ ꓕꓵꓼ ꓕꓵꓼ ꓐꓰ ꓫꓵꓻ ꓠꓹ ꓟ ꓬꓰ ꓗꓷꓳ= ꓖꓳ ꓡꓱ ꓥˍ ꓟꓲ ꓝꓮꓲ ꓕꓲꓽ ꓟ ꓠꓬ ꓬꓲꓸ ꓛꓳ ꓒꓯ ꓪꓳꓸ ꓑ ꓐꓴ ꓐꓯ ꓔꓬ ꓟ ꓔꓯ ꓟꓽ ꓠ ꓠꓹ꓾ ꓢꓯꓼ ꓕꓵꓼ ꓢꓲ ꓓꓯ ꓙꓰˍ ꓡꓳ=

ꓪꓳꓸ ꓑ ꓖꓳ ꓟ ꓜꓲꓽ ꓜꓲꓽ ꓑꓰ ꓑꓰ ꓢꓯꓼ ꓕꓵꓼˍ ꓠꓬꓲ ꓬꓲ ꓟꓶꓽ ꓕꓯ ꓠꓬ ꓬꓲ ꓕꓯ ꓢꓲ ꓗꓪ ꓓꓯ ꓡꓳꓹ ꓬꓰꓳ= ꓖꓳ ꓕꓯ ꓬꓲ ꓕꓯꓽ ꓢꓲ ꓗꓪ ꓔꓬ ꓟ ꓪꓳꓸ ꓑ ꓐꓴ ꓡꓰ ꓬꓲ ꓔꓯ꓾ "ꓠꓴ꓾ ꓥꓪ ꓠꓴꓽ ꓘꓴ ꓢꓯꓼ ꓔꓯ ꓟꓽ ꓑ ꓙ ꓡ? ꓐꓰ ꓠ ꓠꓬꓲˍ ꓡꓳ= ꓬꓲ ꓡꓰ ꓬꓲ ꓛꓳꓽ ꓒꓯ ꓐꓴ ꓔꓯ꓾ ꓥꓪ ꓠꓬ ꓠꓸ ꓑ ꓟꓽ ꓙꓲꓻ ꓠꓬꓲ ꓟꓽ ꓑ ꓙ= ꓠꓴ ꓪ ꓥꓪ ꓔꓯ ꓢꓯꓼ ꓖꓶꓽ ꓔꓬ ꓫꓵꓽ ꓟꓽ ꓥ ꓡ?꓾ ꓐꓰ ꓒꓳ ꓖꓶꓽˍ ꓡꓳ=

ꓣꓳ ꓤꓶ ꓗꓪˍ ꓟꓲ ꓠꓱꓸ ꓐꓯꓼ ꓢꓴ ꓐꓯ ꓘꓶꓽ ꓗꓪ ꓐꓰ ꓬꓰ ꓟꓽ ꓒꓬꓱꓼ ꓡ ꓗꓷ ꓟ ꓟꓬꓱꓽ ꓮꓽ ꓟꓬꓹ ꓙꓳˍ ꓡꓳ ꓟꓽ ꓥ ꓡ= ꓣꓳꓽ ꓓꓵꓽ ꓙ ꓔ ꓥˍ ꓟꓲ ꓢꓴ ꓐꓯ ꓘꓶꓽ ꓔꓯ ꓠ ꓠꓹ ꓢꓲ꓾ ꓬꓰ ꓟꓽ ꓑꓶꓸ ꓑꓶꓸ ꓐꓰ ꓠꓽ ꓗꓷ ꓪ ꓡꓰ ꓫꓵꓽ ꓮ ꓟꓬ ꓙꓳˍ ꓡꓳ=

ꓖꓳ ꓡꓱ ꓠꓬꓲ ꓣꓳ ꓤꓶ ꓗꓪ ꓣꓳ ꓬꓰ ꓠ ꓔ ꓟ ꓟꓬꓱꓽ ꓔꓯ ꓑꓶꓸ ꓑꓶꓸ ꓡꓰꓽ ꓬꓰ ꓠꓹ ꓟ ꓬꓳꓸ ꓚꓵˍ ꓡꓳ= ꓟꓸ ꓟꓲꓽ ꓗꓪ ꓠꓸ ꓑꓳ ꓐꓳꓽˍ ꓟ ꓪꓳꓸ ꓑ ꓡꓰ ꓐꓰ ꓣꓳ ꓥˍ ꓟꓲ꓾ ꓣꓱꓽ ꓟꓽ ꓬꓯꓼ ꓟ ꓐꓯ ꓘꓶꓽ ꓔꓯ ꓠꓲꓹ ꓟ ꓠꓯꓸꓼ ꓗꓪ ꓟꓽ ꓓꓵꓽ ꓡꓰ ꓝꓲ ꓝꓲ ꓐꓰ ꓣꓳꓽ ꓢꓯꓼ ꓕꓵꓼ ꓙꓰˍ ꓥꓳ ꓐꓯ ꓠꓬ ꓣꓳꓽ ꓤꓶ ꓗꓪ ꓧꓪꓸ ꓡꓰ ꓟ ꓟꓶꓸ ꓥꓳ ꓪ=

Add new comment

6 + 3 =