ꓟꓲ ꓠꓯ ꓞꓳ ꓤ ꓐꓰ ꓟꓵꓽ ꓘꓳꓼ ꓚꓱꓹ

ꓟꓲ ꓠꓯ ꓗꓪ ꓟꓵꓽ ꓘꓳꓼ ꓒꓳꓹ _ ꓟ ꓑꓶ ꓓꓴ ꓟꓵꓽ ꓘꓳꓼ ꓚꓱꓹ ꓠꓬ ꓮ ꓘꓶꓸ ꓣꓳꓸ ꓚꓵ_ ꓟ ꓒꓬꓱꓼ ꓡ ꓥ ꓟꓲ ꓘꓴ ꓜꓲꓼ ꓞꓳ ꓗꓪ ꓟ ꓪꓴꓸ ꓓꓵ ꓣꓱꓽ ꓢꓴ ꓐꓴ ꓠꓬ ꓙꓲ- ꓢꓴ ꓢꓲ ꓤ ꓐꓴ ꓡꓰ ꓙꓻ ꓖꓶ ꓔ ꓟ ꓟꓵꓽ ꓘꓳꓼ ꓟꓽ ꓒꓳꓹ ꓡ ꓠ ꓢꓯꓼ ꓕꓵꓼ ꓟ ꓚꓱꓹ ꓗꓪ ꓚꓲ ꓛꓬ ꓢꓯꓼ ꓕꓵꓼ ꓟ ꓠꓲꓹ ꓟ ꓟꓽ ꓙꓳ= ꓕꓲ ꓧꓪꓹ ꓧꓪꓹ ꓕꓱ ꓡꓱ ꓢꓯꓼ ꓕꓵꓼ_ ꓟ ꓜꓴ ꓐꓴ ꓜꓲꓼ ꓓꓴ ꓙꓵꓹ ꓕꓯ ꓢꓲ ꓫꓸ ꓪ ꓕꓱ_ ꓟ꓾ ꓟꓵꓽ ꓘꓳꓼ ꓒꓳꓹ ꓡ_ ꓟ ꓙꓵꓹ ꓔꓯ ꓐꓯ_ ꓟ ꓙꓳ_ ꓡꓳ= ꓖꓳ ꓟ ꓑꓶ ꓓꓴ ꓘꓴ ꓜꓲꓼ ꓞꓳ ꓗꓪ ꓟ ꓪꓴꓸ ꓓꓵ ꓣꓱꓽ ꓢꓴ ꓐꓴ ꓠꓬ ꓕꓱ ꓟ ꓚꓱꓹ ꓔꓯ ꓟꓳꓸ ꓚꓵ ꓚꓵ ꓠꓲꓹ ꓟ ꓐ_ ꓟ ꓢꓯꓼ ꓕꓵꓼ_ ꓟ ꓐꓰ ꓐꓯ ꓟꓽ ꓓ ꓢꓰ꓾ ꓚꓵ ꓚꓵ ꓐꓯ ꓠꓬ ꓛꓲ ꓡ_ ꓟ ꓙꓵꓹ ꓗꓪ ꓟꓬ ꓠꓬꓲ ꓞꓲ ꓞꓹ ꓟ ꓟꓵꓽ ꓘꓳꓼ ꓒꓬꓱꓼ ꓡ ꓠꓹ ꓟ ꓐꓱ ꓶ ꓢꓯꓼ ꓕꓵꓼ ꓠꓹ ꓟ ꓠꓬ ꓗꓴꓷꓼ ꓙꓵꓽ ꓚꓱꓹ ꓠꓯꓼ ꓗꓪ ꓥ ꓟꓲ ꓮ ꓘꓶꓸ ꓣꓳꓸ ꓚꓵ_ ꓡꓳ= ꓖꓳ ꓟ ꓪꓴꓸ ꓠꓬꓲ ꓗꓴꓷꓼ ꓙꓵꓽ ꓢꓴ ꓥ ꓟꓲ ꓐ ꓠ ꓔ ꓡꓳ= ꓘꓴ ꓜꓲꓼ ꓞꓳ ꓗꓪ ꓪꓴꓸ ꓓꓵꓽ ꓣꓱꓽ ꓢꓴ ꓐꓴ ꓠꓬ ꓟꓬ ꓠꓬꓲ ꓘꓴ ꓜꓲꓼ ꓞꓳ ꓟꓬꓱꓽ ꓐꓱ ꓶ ꓡꓰ ꓠꓲꓹ ꓟ ꓠꓯꓼ ꓗꓪ ꓙꓳ_ ꓡꓳ= ꓘꓴ ꓜꓲꓼ ꓞꓳ ꓟꓬꓱꓽ ꓐꓯ_ ꓟ ꓠꓬ ꓘꓴ ꓜꓲꓼ ꓞꓳ ꓔꓯ ꓟꓬ ꓠꓬꓲ ꓞꓰ ꓞꓹ ꓠꓹ ꓟ ꓔꓶ ꓠꓹ ꓟ ꓐꓰ ꓖꓳ ꓟ ꓠꓯꓼ ꓗꓪ ꓣꓱꓽ ꓬꓯꓼ_ ꓟ ꓔꓯ ꓡꓰ ꓪꓴꓸ ꓓꓵ ꓚꓹ ꓢꓲ ꓬꓰ ꓠꓹ ꓟ ꓐꓱ ꓶ ꓟꓽ ꓥ= ꓟꓲ ꓠꓯ ꓕꓱ ꓟ ꓕꓯ ꓢꓲ ꓗꓪ ꓪꓴ-ꓢ ꓡꓰ ꓚꓰꓼ ꓔ ꓟ ꓠꓵ ꓠꓲꓹ ꓚꓱꓹ ꓔꓯ ꓟꓳꓸ ꓣꓳ ꓠꓬ ꓟꓳꓸ ꓖꓶ ꓠꓹ ꓟ꓾ ꓐꓯ ꓟꓸ ꓖꓶ ꓠꓹ ꓟ ꓥ ꓡꓳ= ꓟꓬ ꓠꓬꓲ ꓪꓴ-ꓢ ꓠꓵ ꓠꓲꓹ ꓚꓱꓹ ꓐꓯ_ ꓟ ꓠꓬ ꓟꓵꓽ ꓘꓳꓼ ꓟꓽ ꓐꓬ ꓡꓰ ꓠꓹ ꓟ ꓥ ꓡꓳ= ꓮ ꓡꓲꓳ ꓐꓯ ꓠꓬ ꓟꓵꓽ ꓘꓳꓼ ꓕꓱ ꓟ ꓔꓯ ꓠꓬ ꓪꓴ-ꓢ ꓡꓰ ꓚꓰꓼ ꓔ ꓟ ꓥ ꓡꓳ= ꓟꓲ ꓠꓯ ꓗꓪ ꓟ ꓢꓲꓹ ꓜꓲ ꓡꓳ ꓜꓲ ꓣꓳ ꓢꓯꓼ ꓦ_ ꓟ ꓮ ꓙꓵ ꓕꓱ ꓟ ꓠꓬ ꓪꓴ-ꓢ ꓡꓰ ꓚꓰꓼ ꓔ ꓟ ꓪꓴꓸ ꓠꓬꓲ ꓪꓴ-ꓢ ꓠꓵ ꓠꓲꓹ ꓗꓪ ꓐꓰ ꓥ ꓟ ꓪꓴꓸ ꓠꓬꓲ ꓕꓱ ꓟ ꓔꓯ ꓢꓴ ꓡꓰ ꓟꓳ ꓡꓰ ꓠ ꓟꓸ ꓖꓶ ꓠꓹ ꓟ ꓥꓳ= ꓟꓲ ꓠꓯ ꓕꓱ ꓟ ꓗꓪ ꓟꓵꓽ ꓮ ꓟꓬꓹ ꓔꓶꓸ ꓗꓪ ꓣꓳ ꓙꓳ ꓠ ꓗꓪ ꓛꓲ ꓟꓵꓽ ꓮ ꓟꓬꓹ ꓐꓬ ꓡꓰ_ ꓟ ꓮ ꓘꓶꓸ ꓙꓳ_ ꓟ ꓔꓯ ꓟꓳ ꓪ ꓡꓳ= ꓖꓳ ꓡꓱ ꓥ ꓟꓲ ꓞꓳ ꓤ ꓟꓬ ꓠꓬꓲ ꓠꓬ ꓕꓱ ꓟ ꓔꓯ ꓟꓽ ꓟꓳ꓾ ꓟꓳ ꓥ ꓟꓲ ꓕꓱ ꓟ ꓔꓯ ꓕꓲ ꓑꓹ ꓤ ꓡꓰ ꓟꓲ ꓡꓰ_ ꓟ꓾ ꓓꓵꓽ ꓙ ꓟꓽ ꓐ ꓡ ꓠꓹ ꓟ ꓕꓱ ꓡꓱ ꓗꓷ ꓡꓰ_ ꓟ ꓥꓳ= 1992 ꓘꓳꓼ ꓕꓯ ꓟꓵꓽ ꓘꓳꓼ ꓚꓱꓹ ꓔꓯ ꓟꓳꓸ ꓜꓲꓼ ꓓꓴ ꓠꓬꓲ ꓦꓬꓼ ꓬꓰ ꓗꓷꓳ= 1999 ꓘꓳꓼ ꓗꓪ ꓠꓬ ꓕꓱ ꓟ ꓔꓯ ꓝꓮꓲ ꓝꓸ ꓢꓲ ꓬꓰ ꓟ ꓟꓽ ꓙꓳ꓾ ꓟꓶꓽ ꓡꓰ ꓟ ꓥꓳ= ꓕꓱ ꓟ ꓠꓬ ꓟꓵꓽ ꓘꓳꓼ ꓚꓱꓹ ꓔꓯ ꓟꓳꓸ ꓮ ꓘꓶꓸ ꓠꓲꓹ ꓟ ꓧꓪꓸ ꓛꓲ_ ꓟ ꓟꓽ ꓙꓳ ꓢꓰ ꓟ ꓔꓯ ꓢꓷꓸ ꓡꓰ ꓝꓲ_ ꓟ ꓥꓳ= ꓠꓬꓲꓸ ꓠꓬꓲ ꓟꓲ ꓠꓯ ꓗꓪ ꓟꓵꓽ ꓘꓳꓼ ꓚꓱꓹ ꓔꓯ ꓟꓳꓸ ꓧꓶꓸ ꓕꓯ ꓕꓲ ꓞꓲꓼ ꓡꓰ ꓐꓰ ꓣꓳ ꓠꓯꓼ ꓗꓪ ꓪ ꓙꓵꓽ ꓪ ꓙꓳ ꓠꓹ ꓟ ꓐꓱ ꓶ ꓕꓱ ꓟ 3000 ꓘꓳꓼ ꓘꓴꓽ ꓗꓪ ꓣꓳ ꓝꓮꓲ ꓕꓲ ꓧꓪꓹ ꓓꓰ ꓠꓹ ꓟ ꓕꓱ ꓟ ꓠꓬ ꓢꓯꓼ ꓕꓵꓼ ꓠꓹ ꓟ ꓟꓬꓱꓽ ꓓ ꓟ ꓥ ꓡꓳ= ꓧꓶꓸ ꓕꓯ ꓕꓲ ꓞꓲꓼ ꓡꓰ ꓐꓰ ꓢꓲꓹ ꓜꓲ ꓡꓳ ꓜꓲ ꓐꓲ ꓞ ꓠꓹ ꓟ ꓚꓮꓣꓐꓳꓠ ꓟꓽ ꓟꓬ ꓡ ꓠꓹ ꓟ꓾ ꓠꓲꓔꓣꓳꓖꓰꓠ ꓟꓽ ꓟꓬ ꓡ ꓠꓹ ꓟ꓾ ꓬꓲꓻ ꓙꓬ ꓥ ꓟꓲ ꓫꓬ ꓡꓰ ꓠꓹ ꓟ꓾ ꓟꓲ ꓦꓲ ꓥ ꓟꓲ ꓫꓬ ꓡꓰ ꓠꓹ ꓟ ꓢꓯꓼ ꓕꓵꓼ ꓠꓹ ꓟ ꓐꓱ ꓶ ꓥ ꓡꓳ= ꓕꓱ ꓡꓱ ꓢꓯꓼ ꓕꓵꓼ ꓕꓯ ꓘꓴ ꓜꓲꓼ ꓞꓳ ꓠꓬ ꓞꓳ ꓡꓱ ꓜꓴ ꓐꓴ ꓢꓯꓼ ꓪ ꓔꓯ ꓣꓴ ꓢꓲ ꓢꓯꓼ ꓕꓵꓼ ꓠꓹ ꓟ ꓣꓳꓸ ꓚꓵ_ ꓡꓳ= ꓮ ꓡꓲꓳ ꓐꓯ ꓠꓬ ꓕꓱ ꓡꓱ ꓟꓵꓽ ꓘꓳꓼ ꓟꓽ ꓢꓲ ꓟꓽ ꓫꓬ ꓗꓷ ꓡꓰ_ ꓓꓴ ꓟ꓾ ꓟꓵꓽ ꓘꓳꓼ ꓒꓳꓹ ꓡꓰ_ ꓟ꓾ ꓟꓵꓽ ꓘꓳꓼ ꓐꓬ ꓡꓰ_ ꓟ ꓠꓬ ꓞꓳ ꓡꓱ ꓤꓻ ꓐꓴ ꓪꓴꓸ ꓠꓬꓲ ꓟꓬ ꓠꓬꓲ ꓒꓬꓱꓼ ꓡ_ ꓟ ꓪꓴꓸ ꓠꓬꓲ ꓬꓲꓸ ꓪ ꓢꓷꓸ ꓠ ꓗꓹ ꓡꓳ ꓟꓽ ꓥ ꓡ꓾?