ꓟꓵꓽ ꓘꓳꓼ ꓒꓳꓹ ꓡ ꓟ ꓐꓰ ꓫꓸ ꓕꓱ_ ꓟ( Dialogue with Environment)

ꓕꓱ ꓕꓲ ꓙꓵꓹ ꓟꓵꓽ ꓘꓳꓼ ꓐꓰ ꓒꓳꓹ ꓡ ꓟ ꓐꓰ ꓫꓸ ꓕꓱ ꓟ ꓙꓵꓹ ꓗꓪ ꓕꓳ-ꓩ ꓡꓰ ꓧꓪ ꓟꓰꓹ ꓢꓲ ꓐꓯ_ ꓟ ꓠꓯꓼ ꓗꓪ ꓟꓬ ꓠꓬꓲ ꓟꓳ ꓪ ꓓ_ ꓟ ꓠꓬ ꓕꓱ ꓡꓱ ꓫꓵꓽ ꓪꓴ ꓥ ꓠꓬ ꓐꓬ ꓡꓰ ꓓꓴ ꓕꓱ ꓟ ꓔꓯ ꓗꓳꓸ ꓙꓰ ꓐ ꓡ ꓠꓹ ꓟ ꓐꓱ ꓶ ꓠꓬ ꓗꓴꓷꓼ ꓙꓵꓽ ꓚꓱꓹ ꓠꓯꓼ ꓗꓪ ꓪꓴꓽ ꓡ ꓟꓴ ꓡ ꓠꓹ ꓟ ꓣꓳꓸ ꓚꓵ_ ꓡꓳ= ꓕꓱ ꓡꓱ ꓗꓴꓷꓼ ꓪꓴꓽ ꓟꓴ ꓡ ꓠꓹ ꓟ ꓙꓳ ꓡ ꓠꓹ ꓟ ꓐꓱ ꓶ ꓠꓬ ꓮ ꓫꓵꓽ ꓬꓰ ꓠ ꓗꓹ ꓡ? ꓗꓴꓷꓼ ꓙꓵꓽ ꓚꓱꓹ ꓠꓯꓼ ꓗꓪ ꓟ ꓞꓳ ꓪꓴꓽ ꓞꓳ ꓔꓲ ꓐꓴ ꓐꓰ ꓢꓷꓸ ꓠꓲꓹ ꓙꓳ ꓒꓽ ꓐꓴ ꓙꓼ ꓦꓲꓻ ꓓꓽ ꓟ ꓬꓰ ꓔꓬ ꓟ ꓡꓳ ꓑ ꓐꓴ ꓒꓴ ꓤ ꓫꓵꓺ ꓤ ꓚꓱꓹ ꓠꓯꓼ ꓗꓪ ꓟ ꓞꓳ ꓪꓴꓽ ꓞꓳ ꓔꓲ ꓐꓴ ꓘꓴ ꓜꓲꓼ ꓞꓳ ꓗꓪ ꓟ ꓪꓴꓸ ꓓꓵ ꓣꓱ ꓢꓴ ꓐꓴ ꓕꓲ ꓐꓱ ꓠꓬ ꓕꓳ-ꓩ ꓡꓰ ꓐꓯ_ ꓟ ꓔꓯ ꓘꓳꓹ ꓣꓴ ꓡꓳ= ꓖꓳ ꓡꓱ ꓥ ꓟꓲ ꓟꓵꓽ ꓘꓳꓼ ꓒꓳꓹ ꓡ ꓢꓲ ꓐꓬ ꓡꓰ ꓟ ꓚꓱꓹ ꓔꓯ ꓬꓲꓸ ꓓꓳꓽ ꓐꓯ_ ꓟ ꓠꓬ ꓞꓳ ꓤ ꓮ ꓟꓬꓹ ꓟꓽ ꓛꓲ_ ꓟ ꓠꓯꓼ ꓗꓪ ꓟꓬ ꓠꓬꓲ ꓐꓯ ꓔꓬ ꓢꓲ ꓞꓳ ꓤ ꓮ ꓟꓬꓹ ꓠꓬ ꓕꓱ ꓟ ꓔꓯ ꓢ ꓢꓹ ꓞ ꓞ ꓟꓰ ꓡꓰ ꓐ ꓡ_ ꓡꓳ= ꓠꓬꓲꓸ ꓠꓬꓲ ꓟꓳ-ꓓꓳ ꓙꓼ ꓗꓪ ꓣꓱꓽ ꓔꓬ ꓟ ꓧꓪꓽ-ꓞꓶ ꓕꓱ ꓟ ꓔꓯ ꓛꓴ ꓗꓷ_ ꓟ ꓬꓲꓻ ꓡꓴ ꓐꓱ ꓓꓽ ꓟ ꓗꓪ ꓙꓰ ꓚꓳ_ ꓟ ꓢꓽ-ꓒꓳ ꓡꓲ ꓓꓽ ꓟ ꓐꓬ ꓡꓰ ꓢꓲ꓾ ꓧꓪꓽ-ꓞꓶ ꓧꓳꓸ ꓡꓰ ꓢꓲ ꓛꓴ ꓗꓷ_ ꓟ ꓕꓱ ꓟ ꓥ ꓟꓲ ꓟꓲ ꓠꓯ ꓗꓪ ꓟ ꓟꓵꓽ ꓘꓳꓼ ꓚꓳ_ ꓟ ꓕꓱ ꓟ ꓔꓯ ꓐꓬ ꓡꓰ ꓝꓲ_ ꓟ ꓥꓳ= ꓕꓱ ꓡꓱ ꓟꓲ ꓠꓯ ꓔꓯ ꓐꓬ ꓡꓰ ꓝꓲ_ ꓟ ꓪꓴꓸ ꓠꓬꓲ ꓟꓵꓽ ꓘꓳꓼ ꓚꓳ_ ꓟ ꓟꓵꓽ ꓘꓳꓼ ꓒꓳꓹ ꓡ ꓟ ꓕꓱ ꓡꓱ ꓒꓬꓱꓼ ꓡ ꓟ ꓥ ꓡꓳ= ꓟꓵꓽ ꓘꓳꓼ ꓒꓳꓹ ꓡ ꓢꓲ ꓟꓵꓽ ꓘꓳꓼ ꓐꓬ ꓡꓰ ꓟ ꓠꓬ ꓬꓲꓸ ꓙꓵꓹ ꓮ ꓟꓬ ꓹ ꓘꓳꓼ ꓗꓷ ꓡꓰ ꓕꓯ ꓢꓲ ꓢꓷꓸ ꓡ ꓟ ꓪꓴꓸ ꓠꓬꓲ ꓞꓳ ꓤ ꓠꓬ ꓟꓳ ꓡꓰ ꓟꓽ ꓓ꓾ ꓠꓲꓹ ꓟ ꓗꓪ ꓥ ꓟꓲ ꓧꓪꓸ ꓛꓲ ꓡ ꓓꓴ ꓟꓽ ꓙꓳ ꓗꓷ ꓡꓰ ꓟ ꓥꓳ= ꓠꓬꓲꓸ ꓠꓬꓲ ꓟꓬꓱꓽ ꓟꓽ ꓙꓳ_ ꓟ ꓕꓲ ꓐꓱ ꓞꓳ ꓤ ꓔꓯ ꓞꓳ ꓜꓴ ꓠꓯꓼ ꓗꓪ ꓟꓽ ꓐ ꓪ ꓬꓲꓸ ꓐ ꓗꓪ ꓗꓷ ꓡꓰ ꓝꓲ_ ꓟ ꓠꓬꓲꓸ ꓞ_ ꓟ ꓞꓳ ꓫꓵꓽ ꓘꓶꓽ_ ꓟ ꓦꓲꓻ ꓟꓽ ꓙꓳ_ ꓟ ꓕꓱ ꓡꓱ ꓫꓵꓽ ꓪꓴ ꓔꓯ ꓡꓰ ꓞꓳ ꓤ ꓠꓬ ꓟꓬ ꓠꓬꓲ ꓟꓳ_ ꓡꓳ= ꓟꓲ ꓠꓯ ꓗꓪ ꓟ ꓢꓷꓸ ꓠꓲꓹ ꓠꓬ ꓞꓳ ꓤ ꓮ ꓟꓬꓹ ꓐꓱ ꓶ ꓙꓲ ꓖꓴ ꓙꓳ_ ꓟ ꓠ ꓥ ꓪ꓾ ꓠꓯꓺ ꓞꓲꓼ ꓕꓲ ꓒꓳꓹ ꓗꓪ ꓪꓴꓽ ꓡ ꓟꓴ ꓡ ꓠꓹ ꓟ ꓙꓻ ꓚꓱꓹ ꓕꓲ ꓒꓳꓹ ꓗꓪ ꓪꓴꓽ ꓡ ꓟꓴ ꓡ ꓠꓹ ꓟ ꓦꓲꓻ ꓫꓬꓹ ꓔ ꓟ ꓠꓯꓼ ꓗꓪ ꓟꓬ ꓠꓬꓲ ꓪꓴꓽ ꓟꓴ ꓡ ꓠꓹ ꓟ ꓠꓬꓲꓸ ꓠꓬꓲ ꓞꓳ ꓤ ꓐꓱ  ꓐꓲ ꓫꓴ_ ꓟ ꓕꓱ ꓡꓱ ꓟꓬ ꓠꓬꓲ ꓙꓳ ꓡ ꓟ ꓕꓱ ꓡꓱ ꓫꓵ ꓠꓬ ꓡꓳꓹ ꓬꓰ ꓟ 20-30 ꓘꓳꓼ ꓕꓯ ꓡꓰ ꓔꓬ ꓢ_ ꓟ ꓗꓴꓷꓼ ꓗꓪ ꓧꓶꓸ ꓕꓯ ꓡꓰ ꓙꓳ_ ꓟ ꓥꓳ= ꓙꓼ ꓗꓪ ꓐꓰ ꓓꓳ ꓡ ꓟ ꓶ ꓤ ꓶ ꓟꓰ ꓑꓶ ꓓꓴ ꓑꓶꓸ ꓛꓵꓽ ꓡꓳ ꓛꓵꓽ ꓟꓬ ꓡ ꓟ꓾ ꓢꓲꓹ ꓜꓲ ꓐꓰ ꓙꓱ ꓤ ꓟꓽ ꓛꓵ ꓟꓶꓽ ꓡꓰ ꓟ ꓢꓲꓹ ꓛꓵꓽ ꓟꓽ ꓙꓳ ꓡꓰ_ ꓟ ꓕꓱ ꓟ ꓔꓯ ꓠꓬ ꓞꓳ ꓤ ꓮ ꓟꓬꓹ ꓟꓳ ꓪ ꓟꓽ ꓓ ꓟ ꓥ ꓡꓳ= ꓖꓳ ꓡꓱ ꓥ ꓟꓲ ꓕꓱ ꓟ ꓠꓬ ꓣꓳ ꓐꓱ ꓶ ꓙꓬ ꓫꓸ ꓓꓴ ꓓꓽ ꓟ ꓕꓲ ꓟ ꓥ ꓡꓳ=