ꓪꓳꓽ ꓒꓬꓽ ꓘꓴꓸ ꓔꓶ ꓚꓱꓹ

ꓪꓳꓽ ꓒꓬꓽ ꓘꓴꓸ ꓔꓶ ꓚꓱꓹ

ꓮ ꓟꓶ ꓣꓳ ꓔꓳꓹ ꓜꓳꓽ ꓔꓬ ꓟ ꓠꓻ ꓫꓵꓽ ꓐꓰ ꓟꓵꓽ ꓘꓳꓼ ꓦꓬꓼ ꓠꓬꓲ ꓗꓪ ꓦꓲꓻ ꓢꓳꓸ ꓟꓸꓼ ꓗꓪ ꓓꓳ ꓙꓰ ꓟꓽ ꓓ ꓠ ꓗꓷ ꓡꓰꓳ=

ꓔꓶ ꓙꓵꓹ

ꓪꓳꓽ ꓒꓬꓽ ꓘꓴꓸ ꓔꓯ ꓟꓶꓽ ꓦ ꓦ ꓝꓲ ꓡꓳꓹ ꓬꓰ ꓔꓬ ꓟ 9 ꓦ ꓗꓪ ꓐꓰ 11 ꓦ ꓘꓴꓽ ꓗꓪ ꓔꓶ ꓐ ꓡˍ ꓡꓳ=

ꓔꓶ ꓚꓱꓹ 

ꓔꓶˍ ꓕꓯ ꓬꓲ ꓜꓲ ꓡꓲꓸ ꓤ ꓐꓱ ꓶ ꓔꓶ ꓖꓴ ꓢꓲꓹ ꓖꓶꓽ ꓤ ꓤ ꓫꓬꓹ ꓢꓲ ꓥˍ ꓟꓲ꓾ ꓖꓳ ꓡꓱ ꓟ ꓥ ꓠꓬ꓾ ꓔꓶ ꓓꓴ ꓬꓲ ꓟꓲꓺ ꓫꓬꓹ ꓗꓷ ꓢꓲ ꓬꓲ ꓫꓵꓸ ꓫꓵꓸ ꓢꓲ ꓠꓬꓲ ꓬꓲ ꓫꓵꓸ ꓗꓪ ꓐꓰ ꓬꓲ ꓜꓲ ꓡꓲꓸ ꓤ ꓣꓱꓻ ꓡ ꓗ ꓠꓯꓸ ꓬꓲꓸ ꓒꓬꓽ ꓡꓯꓸ ꓡꓲꓺ ꓒꓬꓽ ꓗꓪ ꓐꓰ ꓛꓳꓼ ꓒꓬꓽ ꓛꓲꓺ ꓓꓳ ꓡˍ ꓕꓯ ꓚꓵꓹ ꓔꓶ ꓐ ꓡˍ ꓡꓳ= ꓖꓳ ꓡꓱ ꓚꓵꓹ ꓔꓶˍ ꓕꓯ ꓕꓲ ꓜꓲ ꓐꓰ ꓕꓲ ꓜꓲ 1’ ꓗꓶꓹ ꓶꓽ ꓢꓲ ꓔꓶ ꓠ ꓔ ꓥ=

ꓬꓲ ꓘꓴꓸ ꓟꓽ ꓒꓬꓱꓼ ꓡ ꓟ

ꓕꓲ ꓖ ꓕꓲ ꓧꓪꓹ ꓔꓶ ꓔ ꓟ ꓪꓳꓽ ꓒꓬꓽ ꓘꓴꓸ ꓜꓲ ꓠꓬ ꓬꓲ ꓘꓴꓸ ꓟꓽ ꓒꓬꓱꓼ ꓡ ꓫꓵꓽ ꓙꓳ ꓗꓴˍ ꓡꓳ= ꓕꓱ ꓟ ꓠꓬ  ꓟꓵꓽ ꓘꓳꓼ ꓗꓪ ꓐꓰˍ ꓟꓲ ꓒꓬꓱꓼ ꓡ ꓗꓴˍ ꓡꓳ= ꓟꓽ ꓟꓺ ꓟ ꓬꓲ ꓫꓵꓸ ꓔꓶ ꓪ ꓡꓰ ꓟ ꓪꓴꓸ ꓠꓬꓲˍ ꓟꓲ ꓬꓲ ꓘꓴꓸ ꓟꓽ ꓒꓬꓱꓼ ꓡ ꓫꓵꓽ ꓙꓳˍ ꓥꓳ=

ꓪꓳꓽ ꓒꓬꓽ ꓘꓴꓸ ꓜꓲ ꓠꓬ ꓬꓲ ꓦꓬꓼ ꓠꓬꓲ 90 ꓠꓬꓲ ꓗꓪ ꓐꓰ 140 ꓠꓬꓲ꓾ ꓕꓲ ꓖ ꓕꓲ ꓝꓳꓽ ꓟ ꓠꓬ 160 ꓠꓬꓲ ꓗꓪ ꓛꓲꓺ ꓙꓳˍ ꓡꓳ= ꓬꓲ ꓦꓬꓼ ꓠꓬꓲ 160 ꓠꓬꓲ ꓗꓪ ꓛꓲꓺ ꓙꓳˍ ꓟ ꓬꓲ ꓜꓲ ꓝꓳꓽ ꓔꓯ ꓠꓬ ꓙꓬꓻ ꓟꓵꓽ ꓗꓪ ꓔꓶ ꓟꓬꓽˍ ꓡꓳ= ꓕꓱ ꓟ ꓔꓯ ꓡꓱꓻ ꓟꓵꓽ ꓗꓪ ꓔꓶ ꓪ ꓡꓰ ꓠꓬ ꓬꓲ ꓘꓴꓸ ꓟꓽ ꓒꓬꓱꓼ ꓡ= ꓔꓶˍ ꓟ ꓟꓳꓼ ꓡꓳꓼ ꓡꓰˍ ꓟꓲ ꓾ ꓔꓶ ꓟꓬ ꓡꓰ ꓢꓲ ꓙꓬꓻ ꓝꓲ ꓖꓴ ꓡꓰ ꓢꓲ ꓠꓬꓲ ꓛ ꓝꓲ ꓕꓯ ꓪꓴꓽ ꓡˍ ꓠꓬꓲ ꓬꓲ ꓘꓴꓸ ꓟꓽ ꓒꓬꓱꓼ ꓡꓺꓳ= ꓪꓳꓽ ꓒꓬꓽ ꓘꓴꓸ ꓔꓯ ꓐꓶ-ꓬꓲ ꓗꓴꓷꓼ ꓫꓴ꓾ ꓪ ꓚꓲ ꓟꓵꓽ ꓗꓪ ꓕꓲ ꓘꓳꓼ ꓡꓱꓸꓼ ꓔꓶ ꓒꓬꓱꓼ ꓡˍ ꓟꓲ ꓪ ꓓꓰꓺ ꓟꓵꓽ ꓐꓴ ꓗꓪ ꓠꓬ ꓙꓬꓺ ꓝꓲ ꓗꓪ ꓔꓶ ꓕꓯ ꓡꓰꓽ ꓔꓶ ꓒꓬꓱꓼ ꓡˍ ꓟ ꓥꓳ=

ꓬꓲ ꓘꓴꓸ ꓪꓴꓽ ꓡ ꓠ ꓫꓬꓹ ꓖꓶˍ ꓟ

ꓪꓳꓽ ꓒꓬꓽ ꓘꓴꓸ ꓜꓲ ꓔꓯ ꓠꓯꓼ ꓠꓯꓼ ꓔꓶ ꓖꓶ= 9 ꓦ ꓕꓯ ꓬꓲ ꓫꓵꓸ ꓫꓵꓸ ꓢꓲ ꓬꓲ ꓜꓲ ꓡꓲꓸ ꓤ ꓣꓱꓻ ꓡ ꓗ ꓠꓯꓸ ꓬꓲꓸ ꓜꓲ ꓗꓪ ꓬꓲ ꓒꓬꓽ ꓡꓲꓺ ꓒꓬꓽ ꓗꓪ ꓐꓰ ꓛꓳꓼ ꓒꓬꓽ ꓛꓲꓺ ꓙꓳ ꓡ ꓕꓯ ꓬꓲ ꓟꓲ ꓗꓪ ꓚꓵꓹ ꓔꓶ ꓖꓶ= ꓬꓲ ꓟꓲ ꓗꓪ ꓮꓸ ꓠꓬꓲꓽ ꓛꓲꓽ꓾ ꓩꓲꓸ-ꓛꓲꓻ ꓟꓵꓽ ꓛꓵꓽ ꓟꓬꓽ ꓟꓬꓽ ꓧꓳꓽ ꓖꓶ ꓠ ꓗꓹ ꓡꓳ=

ꓶꓼ ꓫˍ ꓟ

ꓪꓳꓽ ꓒꓬꓽ ꓘꓴꓸ ꓔꓯ ꓔꓶ ꓗꓷ ꓗ ꓠꓯꓸ 90 ꓠꓬꓲ ꓗꓪ ꓐꓰ 150 ꓠꓬꓲ ꓘꓴꓽ ꓗꓪ ꓬꓲ ꓘꓴꓸ ꓶꓼ ꓫ ꓐ ꓡˍ ꓡꓳ=

Add new comment

5 + 7 =