ꓮꓸ ꓒꓵꓽ ꓔꓶ ꓚꓱꓹ

ꓮ ꓒꓵꓽ ꓢꓶꓽ ꓔꓶ ꓚꓱꓹ (ꓫꓵꓺ ꓮꓸ ꓒꓵꓽ)

ꓮ ꓒꓵꓽ ꓢꓶꓽ ꓠꓬ ꓡꓴꓸ ꓡꓴꓸ ꓡꓰꓽ ꓗꓹ ꓟ ꓥ ꓢꓲ ꓬꓲ ꓧꓪꓽ ꓠꓬ ꓧꓪꓼ ꓧꓪꓼ ꓡꓰꓽ ꓗꓹ ꓡꓳ= ꓮ ꓒꓵꓽ ꓬꓲꓸ ꓪꓴꓸ ꓔꓶ ꓖꓴ ꓠꓬ ꓮ-ꓟꓰ-ꓣꓲ-ꓗ ꓗꓴꓷꓼ ꓐꓴ ꓗꓪ ꓥ ꓡꓳ=

ꓮ ꓒꓵꓽ ꓔꓯ ꓔꓶˍ ꓠꓬ ꓛꓳꓼ ꓦ꓾ ꓞꓲꓺ ꓦ ꓗꓰ ꓐꓰ ꓞꓲꓺ ꓠꓬꓲꓽ ꓦ ꓛꓲ ꓕꓯ ꓔꓶ ꓐ ꓡˍ ꓡꓳ=ꓔꓶ ꓕꓯ ꓒꓵꓽ ꓡꓴꓹ ꓔꓶˍ ꓟ ꓕꓲ ꓡꓰꓹꓼ ꓔꓶ ꓐ ꓡꓹ ꓡꓳ= ꓬꓲ ꓫꓵꓸ ꓗꓪ ꓐꓰ ꓬꓲ ꓜꓲ ꓡꓲꓸ ꓤ ꓫꓬꓹ ꓢꓲ ꓔꓶˍ ꓟ꓾ ꓟꓽ ꓥ ꓠꓬ ꓬꓲ ꓫꓵꓸ ꓔꓯ ꓔꓶ ꓟ ꓕꓱ ꓡꓱ ꓔꓶ ꓔꓬ ꓖꓴˍ ꓟ ꓥ ꓡꓳ=

ꓖꓳ ꓡꓱ ꓔꓶˍ ꓕꓯ ꓕꓲ ꓚꓬꓸ ꓐꓰ ꓕꓲ ꓚꓬꓸ 6’ ꓗꓶꓹ ꓢꓲ ꓔꓶ ꓠꓯꓹ ꓡꓳ= ꓬꓲꓸ ꓫꓵꓸ ꓧꓳꓽˍ ꓕꓯ ꓔꓶ ꓖꓴ ꓗꓪ ꓩꓲꓸ ꓛꓲꓻ ꓟꓵꓽ ꓛꓵꓽ ꓧꓳꓽ ꓗꓷ ꓢꓲ 4” ꓠꓯꓸ ꓟ ꓗꓪ ꓬꓲꓸ ꓫꓵꓸ 4 ꓢꓶꓽ ꓗꓪ ꓐꓰ 5 ꓢꓶꓽ ꓧꓳꓽ ꓗꓷ= ꓬꓲ ꓫꓵꓸ ꓗꓪ ꓐꓰ ꓬꓲ ꓜꓲ ꓓꓳ ꓡˍ ꓕꓯ ꓬꓲ ꓜꓲ ꓧˍ ꓟ ꓙꓲˍ ꓟ ꓔꓯ ꓤꓰꓻ ꓔ ꓢꓲ ꓬꓲ ꓜꓲ ꓣꓳˍ ꓟ ꓔꓯ ꓚꓵꓹ ꓦ ꓗꓷ= ꓝꓮꓲ ꓬꓲ ꓜꓲ ꓚꓺ ꓓꓯꓹ ꓓꓴ ꓬꓲꓸ ꓗꓹ ꓫꓬꓹ ꓖꓶ ꓠꓯꓹ ꓡꓳ=

ꓬꓲ ꓟꓲꓺ ꓓ ꓟ ꓫꓬꓹ ꓠꓬ ꓟꓲꓺ ꓛꓬ ꓙꓲˍ ꓟ꓾ ꓬꓲꓻ ꓙꓬ ꓟꓽ ꓐꓱ ꓓꓹ ꓟ ꓬꓲ ꓟꓲꓺ ꓗꓪ ꓜꓳꓽ ꓜꓳꓽ ꓘꓪꓺ ꓖꓶ ꓗꓷ ꓢꓲ ꓩꓲꓸ ꓛꓲꓻ ꓟꓵꓽ ꓛꓵꓽ ꓐꓴ ꓐꓰ ꓑꓯꓸ ꓗꓷ꓾ ꓫꓳꓽ ꓗꓷ= ꓓꓳ ꓡꓰ ꓠꓬ ꓕꓲ ꓖꓻ ꓐꓰ ꓕꓲ ꓖꓻ 3’ ꓛꓲ ꓗꓶꓹ ꓶꓽ ꓢꓲ ꓮ ꓒꓵꓽ ꓫꓵꓸ ꓔꓶ ꓖꓶ ꓠꓯꓹ ꓡꓳ= ꓶꓻ ꓡꓯꓼ ꓬꓰ ꓓꓴ ꓐꓱ ꓶ ꓕꓲ ꓰ-ꓗ ꓔꓶˍ ꓠꓬ ꓬꓲ ꓫꓵꓸ ꓕꓲꓽ ꓕꓱꓹ ꓣꓱꓽ ꓞꓹ ꓡꓳ= ꓬꓲ ꓜꓲ ꓣꓳ ꓓꓹ ꓕꓯ ꓢꓺ ꓧꓪꓹ ꓟꓳꓼ ꓫꓬꓹ ꓡꓲꓸ ꓖꓶ ꓠ ꓗꓹ ꓡꓳ=

ꓮꓸ ꓒꓵꓽ ꓜꓲ ꓠꓬ ꓬꓲ ꓙꓬ ꓢꓯꓼ ꓧꓳˍ ꓐꓯ ꓥ ꓟꓲ ꓬꓲ ꓚꓰꓺ ꓟꓽ ꓛꓵꓽ ꓡꓰ ꓠ ꓤ ꓟꓳ ꓠ ꓔ ꓡꓳ= ꓬꓲꓻ ꓙꓬ ꓖꓶꓽ ꓟꓬꓽ ꓡꓰ ꓕꓯ ꓠꓽ ꓬꓲ ꓒꓬꓽ ꓮ ꓘꓶꓸ ꓪꓸ ꓡˍ ꓥ ꓟꓲ ꓬꓲ ꓢꓶꓽ ꓮ ꓟꓬꓹ ꓟꓽ ꓓꓱꓼ ꓡ=ꓬꓲ ꓒꓬꓽ ꓮ ꓘꓶꓸ ꓟꓬꓽ ꓡ꓾ ꓪꓸ ꓡ ꓠꓬ ꓬꓲ ꓒꓬꓽ ꓕꓲ ꓐꓱ ꓔꓯ ꓓꓶ ꓦ ꓠ ꓗꓹ ꓡꓳ=

ꓮ ꓒꓵꓽ ꓠꓬ ꓔꓶ ꓗꓷ ꓢꓲ ꓦ ꓐ ꓢꓽ ꓟ꓾ ꓡꓲꓺ ꓟ ꓛꓲꓺ ꓙꓳ ꓡ ꓠꓬ ꓬꓲ ꓢꓶꓽ ꓧꓼ ꓓ ꓡꓺꓳ= ꓬꓲ ꓢꓶꓽ ꓧꓼˍ ꓕꓯ ꓬꓲ ꓢꓶꓽ ꓗꓪ ꓟ ꓬꓲꓸ ꓠ ꓗꓺ (ꓬꓲꓸ ꓝꓳꓹ ꓟꓶ) ꓔꓯ ꓬꓲ ꓜꓲ ꓚꓺ ꓗꓪ ꓐꓰ 1” ꓗꓶꓹ ꓶꓽ ꓢꓲ ꓧꓼ ꓠ ꓔ ꓡꓳ=