ꓮꓸ-ꓠꓳ-ꓢ-ꓡꓽ ꓔꓶ ꓚꓱꓹ

ꓬꓲ ꓓꓻ ꓫꓬꓹ ꓖꓶ ꓪˍ ꓟ ꓮꓸ-ꓠꓳ-ꓢ-ꓡꓽ ꓘꓴꓽ ꓗꓪ ꓬꓲ ꓜ ꓱˍ ꓟ ꓐꓰ ꓟꓴˍ ꓟ ꓐꓯ ꓢꓲ ꓠꓬꓲꓽ ꓙꓰꓽ ꓙꓳˍ ꓡꓳ= ꓬꓲ ꓜꓲ ꓟꓴˍ ꓟ ꓔꓯ ꓠꓬ ꓬꓲ ꓓ ꓞꓳꓹ ꓖꓶ ꓢꓲ ꓔꓶ ꓔꓬ ꓟ ꓥ ꓡꓳ= ꓬꓲ ꓢꓶꓽ ꓠꓬ ꓮ ꓘꓶꓸ ꓠꓲꓹ ꓛꓵꓡˍ ꓟ ꓐꓰ ꓮ ꓘꓶꓸ ꓟꓽ ꓠꓲꓹ ꓛꓵꓼ ꓟ꓾ ꓬꓲꓸ ꓫꓵꓽ ꓫꓵꓽ ꓐꓯ ꓢꓲ ꓙꓳˍ ꓟ ꓥꓳ= ꓬꓲ ꓟ ꓢꓶꓽ ꓠꓬ ꓬꓲ ꓒꓴ ꓒꓴ꓾ ꓬꓲ  ꓠꓯꓺ ꓠꓯꓺ ꓾ ꓬꓲ ꓫꓵꓽ ꓫꓵꓽ ꓐꓰ ꓒꓴ ꓫꓵꓽ ꓫꓵꓽˍ ꓟ ꓐꓯ ꓢꓲ ꓮ ꓟꓬꓹ ꓫꓵꓽ ꓙꓳˍ ꓡꓳ=

ꓮꓸ-ꓠꓳ-ꓢ-ꓡꓽ ꓠꓬ ꓟꓵꓽ ꓟꓽ ꓢꓲꓺ ꓢꓲꓺ ꓔꓶ ꓒꓬꓱꓼ ꓡˍ ꓡꓳ= ꓖꓳ ꓡꓱ ꓥˍ ꓟꓲ ꓬꓲ ꓟꓲꓺ ꓗꓪ ꓝꓱ ꓢꓯꓼ ꓮ ꓟꓬ ꓙꓳˍ ꓟ ꓟꓵꓽ ꓗꓪ ꓔꓶ ꓟꓽ ꓒꓬꓱꓼ ꓡ= ꓟꓵꓽ ꓘꓳꓼ ꓗꓪ ꓙꓬꓻ ꓢꓯꓼ ꓟꓬꓽˍ ꓠꓬ ꓬꓲꓸ ꓪꓰ ꓪꓰˍ ꓟ ꓐꓰ ꓬꓲ ꓢꓶꓽ ꓓꓱꓼ ꓠꓲˍ ꓡꓳ= ꓟꓶ ꓦ ꓮ ꓘꓶꓸ ꓟꓬꓽ ꓥ ꓠꓬ꓾ ꓞ ꓢꓯꓼ ꓟꓬꓽˍ ꓟꓲ ꓬꓲ ꓪꓰ ꓬꓲ ꓢꓶꓽ ꓞꓰꓹ ꓡꓳ=

ꓔꓶˍ ꓕꓯ ꓠꓱꓸ ꓐꓯꓼ ꓜꓽ ꓪꓳꓽ ꓡꓳ ꓪꓳꓽ ꓔꓶˍ ꓟ ꓡꓰ ꓐꓰ ꓬꓲꓻ ꓙꓬ ꓟꓽ ꓐꓱ ꓖꓴ ꓗꓪ ꓔꓶ ꓠꓯꓹ ꓡꓳ= ꓦꓲ ꓘꓴꓽ ꓗꓪ ꓜ ꓓꓴ ꓐꓱ ꓶ ꓔꓶ ꓠꓬ ꓫꓬꓹ ꓔ ꓟ ꓩꓲꓸ ꓛꓲꓻ ꓟꓵꓽ ꓛꓵꓽ ꓐꓴ ꓔꓯ ꓟꓽ ꓔꓶ ꓕꓯ ꓡꓰ ꓬꓲ ꓟꓲ ꓗꓪ ꓧꓳꓽ ꓖꓶ ꓠꓯꓹ ꓥ= ꓶꓻ ꓡꓯ ꓬꓰ ꓓꓴ ꓐꓱ ꓶ ꓠꓬ ꓕꓲ ꓰ-ꓗꓸ ꓐꓱ ꓶ ꓮ ꓸ ꓠꓬꓲꓽ ꓛꓰꓽ (5-10) ꓡꓳꓼ꓾ ꓴ-ꓡꓲ-ꓬ ꓩꓲꓸ ꓛꓲꓻ 100 kl꓾ ꓔꓲ-ꓢꓴ-ꓑ 50 kl꓾ ꓑꓳ-ꓔꓯꓸ-ꓫꓵ 25 kl ꓧꓳꓽ ꓖꓶ ꓠꓯꓹ ꓡꓳ=  ꓮ ꓸ ꓠꓬꓲꓽ ꓛꓰꓽ꓾ ꓔꓲ-ꓢꓴ-ꓑ꓾ ꓑꓳ-ꓔꓯꓸ-ꓫꓵ ꓐꓰ ꓴ-ꓡꓲ-ꓬ 50 kl ꓔꓯ ꓑꓯꓸ ꓗꓷ ꓢꓲ ꓮꓸ ꓠꓳ ꓟꓽ ꓔꓶ ꓗꓷ ꓕꓯ ꓬꓲ ꓟꓲꓺ ꓗꓪ ꓧꓳꓽ ꓗꓷ ꓢꓲ꓾ ꓤꓰꓻ ꓓꓹ ꓟ ꓴ-ꓡꓲ-ꓬ 50 kl ꓔꓯ ꓠꓬ ꓔꓶ ꓗꓷ ꓗꓸ ꓠꓯꓸ ꓟꓳꓼ ꓚꓵꓹ ꓦ ꓕꓯ꓾ ꓟꓳꓼ ꓫꓬꓹ ꓡꓲꓸˍ ꓕꓯ ꓧꓳꓽ ꓖꓶ ꓠꓯꓹ ꓡꓳ=

ꓬꓲ ꓫꓵꓸ ꓔꓶˍ ꓕꓯ ꓬꓲ ꓟꓲꓺ ꓗꓪ ꓬꓲꓻ ꓙꓬ ꓢꓯꓼ ꓟꓬꓽ ꓡꓰ ꓠꓬ ꓬꓲ ꓫꓵꓸ ꓛꓵꓽ ꓡꓰ ꓗꓴˍ ꓡꓳ= ꓮꓸ ꓠꓳ ꓔꓯ ꓟꓬꓽ ꓠꓬꓲ ꓠꓬ ꓕꓲ ꓚꓬꓸ ꓐꓰ ꓕꓲ ꓚꓬꓸ 3’ ꓗꓪ ꓛꓲꓺ ꓗꓶꓹ ꓢꓲ꓾ ꓕꓲ ꓜꓲ ꓐꓰ ꓕꓲ ꓜꓲ 9” ꓗꓪ ꓐꓰ 12” ꓗꓪ ꓛꓲꓺ ꓗꓶꓹ ꓢꓲ ꓔꓶ ꓖꓶ ꓠꓯꓹ ꓡꓳ=

ꓔꓶ ꓗꓷ ꓗꓸ ꓠꓯꓸ ꓬꓲ ꓜꓲ ꓣꓱꓻ ꓡ ꓢꓲ ꓠꓬꓲꓽ ꓠꓽ ꓙꓳ ꓡˍ ꓕꓯ 7' ꓛꓲꓺ ꓟꓴˍ ꓟꓲ꓾ ꓫꓵˍ ꓟ ꓟꓻ ꓘꓪꓽ ꓓ ꓟꓽ ꓥ ꓠꓬ꓾ ꓢꓲꓹ ꓓꓻ ꓗꓸ ꓔꓶ ꓠ ꓗꓹ ꓡꓳ= ꓢꓲꓹ ꓓꓻ(ꓟꓻ ꓘꓪꓽ) ꓠꓬ ꓮꓸ ꓠꓳ ꓚꓺ ꓔꓶꓸ ꓓꓯ ꓙꓰ ꓓꓴ ꓥ ꓡꓳ=

ꓮꓸ-ꓠꓳ-ꓢ-ꓡꓽ ꓝꓮꓲ ꓕꓲ ꓫꓵꓽ ꓔꓯ ꓠꓬ ꓕꓲ ꓚꓬꓸ ꓐꓰ ꓕꓲ ꓚꓬꓸ 1' ꓐꓶꓽ 2' ꓗꓪ ꓛꓲꓺ ꓗꓶꓹ ꓢꓲ꓾ ꓕꓲ ꓜꓲ ꓐꓰ ꓕꓲ ꓜꓲ 1' ꓗꓶꓹ ꓔꓶˍ ꓡꓳ= ꓟꓵꓽ ꓘꓳꓼ ꓙꓲˍ ꓟ ꓟꓵꓽ ꓗꓪ ꓕꓲ ꓘꓳꓼ ꓡꓱꓸꓼ ꓔꓶ ꓓꓹ ꓡꓳ=

ꓬꓲ ꓫꓵꓸ ꓗꓪ ꓐꓰ ꓬꓲ ꓜꓲ ꓣꓱꓻ ꓓꓳ ꓡˍ ꓕꓯ ꓬꓲ ꓜꓲ ꓕꓲ ꓚꓳꓺ ꓡꓳꓺ ꓗꓪ ꓟ ꓟꓳꓼ ꓐꓴ ꓔꓯ ꓫꓬꓹ ꓡꓲꓸ ꓠ ꓗꓹ ꓡꓳ= ꓬꓲ ꓜꓲ ꓪꓴꓽ ꓡ ꓗ ꓠꓯꓸ ꓟꓳꓼ ꓫꓬꓹ ꓡꓲꓸˍ ꓠꓬ ꓬꓰ ꓫꓸ ꓟ ꓪꓴꓸ ꓠꓬꓲ ꓠꓯꓼ ꓠꓯꓼ ꓫꓬꓹ ꓡꓲꓸ ꓠ ꓔ ꓥ= ꓮꓸ ꓠꓳ ꓜꓲ ꓬꓲ ꓚꓰꓺ ꓠꓬ Nitrogen ꓢꓯꓼ ꓚꓵꓹ ꓣꓴ ꓐ ꓡˍ ꓟ ꓐꓶ ꓓꓲꓻ ꓓꓹ ꓟ ꓪꓴꓸ ꓠꓬꓲ ꓬꓲ ꓚꓰꓺ ꓟꓽ ꓠꓻ ꓡꓰ ꓠ ꓤ ꓟꓳ ꓠ ꓔ ꓡꓳ=

ꓮꓸ ꓠꓳ ꓜꓲ ꓠꓬ ꓟꓵꓽ ꓙꓴꓺˍ ꓟ ꓗꓪ ꓔꓶ ꓒꓬꓱꓼ ꓡꓹ ꓐꓯ ꓥˍ ꓟꓲ ꓟꓵꓽ ꓘꓳꓼ ꓮ ꓘꓶꓸ ꓛ ꓡ ꓠꓬ ꓬꓲꓻ ꓙꓬ ꓧꓳꓽ ꓖꓶ ꓠꓯꓹ ꓥ= ꓟꓶꓽ ꓦ ꓟꓬꓽ ꓡˍ ꓕꓯ ꓬꓲꓻ ꓙꓬ ꓬꓲꓻ ꓓꓳ ꓙꓰ ꓖꓴ ꓫꓬꓹ ꓖꓶ ꓠꓯꓹ ꓡꓳ=

ꓬꓲ ꓪꓰ ꓪꓰ ꓗꓷ ꓢꓲ 7 ꓠꓬꓲ ꓗꓪ ꓐꓰ 10 ꓠꓬꓲ ꓙꓳ ꓡˍ ꓕꓯ ꓮꓸ ꓠꓳ ꓧꓼ ꓫ ꓓ ꓡꓻꓳ= ꓕꓲ ꓰ-ꓗꓸ ꓗꓪ ꓮꓸ ꓠꓳ ꓢꓶꓽ ꓬꓲ ꓓ ꓕꓲ ꓫꓬꓹ ꓥꓪꓽ ꓟꓶꓽ ꓗꓪ ꓐꓰ ꓠꓬꓲꓽ ꓫꓬꓹ ꓗꓪ ꓛꓲ ꓓꓳ ꓡˍ ꓡꓳ=

ꓬꓲ ꓫꓵꓸ ꓐꓱ ꓶ ꓠꓬ ꓬꓲꓸ ꓫꓵꓸ ꓫ ꓝꓲ ꓕꓯ ꓟꓶ ꓦ ꓟꓽ ꓦ ꓠꓬ ꓟꓬꓽ ꓠꓬꓲ ꓙꓲˍ ꓥ= ꓬꓲ ꓜꓲ ꓗꓪ ꓟ ꓬꓲ ꓢꓶꓽ ꓙꓴꓺ ꓡˍ ꓕꓯ ꓢꓲꓸ ꓡꓰꓽ ꓧꓼ ꓫ ꓓꓹ ꓟ ꓥ ꓡꓳ= ꓟꓶꓽ ꓦ ꓦ ꓝꓲ ꓕꓯ ꓬꓲ ꓫꓵꓸ ꓫ ꓠꓬ ꓮꓸ ꓠꓳ ꓟ ꓢꓶꓽ ꓣꓴ ꓓꓳ ꓗꓷ ꓢꓲ ꓙꓴꓺ ꓡꓰ ꓠ ꓟꓶ ꓞ ꓗꓪ ꓡꓱꓸ ꓗꓷ ꓢꓲ ꓡꓰꓽ ꓬꓲ ꓫꓵꓸ ꓫ ꓠꓯꓹ ꓡꓳ= ꓬꓲꓸ ꓫꓵꓸ ꓫˍ ꓕꓯ ꓐꓶꓽ ꓓꓲꓻ ꓓꓶꓽ ꓗꓴˍ ꓟ ꓪꓴꓸ ꓠꓬꓲ ꓢꓧꓲꓸ-ꓧꓴꓰ ꓒꓴ (ꓮ ꓪ ꓧꓶꓽ) ꓟꓽ ꓥ ꓠꓬ꓾ ꓗꓪꓺ ꓒꓴ (ꓘꓴꓽ ꓦ) ꓑꓯꓸ ꓗꓷ ꓢꓲ ꓫ ꓠ ꓔ ꓡꓳ=