ꓟꓬꓱ ꓓꓳꓽ ꓙꓳˍ ꓟ Aristotle ꓟꓸ ꓟꓲꓽ

ꓬꓲ ꓠꓬ ꓓꓵꓽ ꓙ ꓠꓲꓹ ꓔꓯ ꓟꓳꓸ ꓢꓷꓸ ꓠꓲꓹ ꓙꓳ ꓒꓽ(Philosopher) ꓥ ꓢꓲ꓾ ꓪ ꓔꓲ Alexander ꓟꓸ ꓒꓽˍ ꓟꓲ ꓥ ꓡꓳ= ꓬꓲꓸ ꓔꓯ ꓐꓸꓚꓸ 384 ꓕꓯ Greece ꓗꓴꓷꓼ Stagira ꓗꓪ ꓦꓵꓻ ꓔ ꓡꓳ=

ꓬꓲꓸ ꓐꓹ ꓐ ꓠꓬ Nicomachus ꓥ ꓡꓳ= ꓬꓲꓸ ꓐꓹ ꓐ Nicomachus ꓠꓬ ꓬꓲꓸ ꓔꓯ Aristotle ꓐꓰ ꓟꓬꓱ ꓖꓶˍ ꓡꓳ= Aristotle ꓐꓯˍ ꓟ ꓠꓬ “ꓙꓲꓻ ꓓꓰꓺ ꓡꓰˍ ꓟ ꓔꓶꓻ ꓙꓱꓼ” ꓐꓰ ꓐꓯˍ ꓟ ꓥ ꓡꓳ=ꓬꓲ ꓐꓹ ꓐ ꓠꓬ Macedon ꓪ ꓔꓲ Amyntas ꓬꓲꓸ ꓠꓻ ꓫꓬꓹ ꓒꓽ ꓥ ꓡꓳ=

ꓠꓻ ꓫꓬꓹ ꓒꓽ ꓬꓲꓸ ꓤ ꓥ ꓟ ꓕꓲ ꓡꓰꓹ ꓐꓰ ꓬꓲꓸ ꓠꓬ ꓬꓲꓸ ꓐꓹ ꓐ ꓬꓰ ꓔꓬꓹ ꓟꓬꓱꓽ ꓗꓪ ꓬꓰ ꓠ ꓗꓷ ꓡꓰꓳ= ꓖꓳ ꓡꓱ ꓥˍ ꓟꓲ ꓬꓲꓸ ꓠꓬ ꓠꓯꓻ ꓞꓲꓼ ꓚꓱꓹ ꓗꓪ ꓠꓲꓹ ꓟ ꓟꓽ ꓙꓳ=

ꓬꓲꓸ ꓞꓲꓼ 18 ꓘꓳꓼ ꓙꓳ ꓡˍ ꓕꓯ Plato’s Academy ꓢꓳꓺ ꓦꓲꓻ ꓗꓪ ꓢꓷꓸ ꓠꓲꓹ ꓢꓳ ꓣꓴ ꓠꓹ ꓟ Athens ꓗꓪ ꓚꓵꓸ ꓙꓰˍ ꓡꓳ= ꓬꓲꓸ ꓠꓬ ꓐꓸꓚꓸ 348-347 ꓕꓯ ꓡꓳ ꓒꓱ ꓕꓲ ꓟ ꓗꓪ ꓬꓲꓸ ꓘꓳꓼ 20 ꓘꓳꓼ ꓛꓲ ꓔꓬ ꓗꓷꓳ= ꓐꓸꓚꓸ 343 ꓘꓳꓼ ꓾ Hermias ꓫꓵꓻ ꓗꓷ ꓗꓸ ꓠꓯꓸ Macedon ꓗꓪ ꓟ Philip II ꓠꓬ ꓬꓲꓸ ꓤ Alexander ꓔꓯ ꓢꓷꓸ ꓠꓲꓹ ꓟꓸ ꓖꓶꓽ ꓠꓹ ꓟ ꓐꓱ ꓶ Aristotle ꓔꓯ ꓘꓴ ꓗꓷꓳ=

Aristotle ꓠꓬ Mecedon ꓪ ꓔꓲ ꓐꓴ ꓙꓵꓽ ꓪ ꓙꓳ ꓢꓴ ꓢꓳꓺ ꓤ ꓐꓴ ꓔꓯ ꓧꓳꓽ ꓪꓴꓸ ꓟꓴ ꓢꓴ ꓒꓬꓱꓼ ꓡ ꓗꓷꓳ= ꓕꓱ ꓗꓪ ꓬꓲꓸ ꓠꓬ Alexander ꓔꓯ ꓡꓰꓽ ꓟꓽ ꓛꓲꓺ ꓾ꓡ ꓠꓹ ꓟ ꓝꓲ ꓗꓪ ꓪ ꓔꓲ ꓒꓬꓱꓼ ꓡ ꓢꓴ Cassander ꓐꓰ Ptoleny ꓐꓴ ꓔꓯ ꓟꓸ ꓖꓶ ꓗꓷ ꓢꓴˍ ꓟꓲ ꓥ ꓡꓳ=

Alexander ꓔꓯ ꓟꓸ ꓖꓶ ꓢꓴ ꓕꓲ ꓣꓳ ꓥ ꓟ ꓪꓴꓸ ꓠꓬꓲ ꓾ ꓗꓴꓷꓼ ꓐꓶꓻ ꓓꓳ ꓕꓲꓽ ꓛꓱꓽ ꓔꓯ ꓓꓶꓽ ꓧꓪꓸ ꓡꓰ ꓠꓹ ꓟ ꓢꓯꓼ ꓖꓶ ꓗꓷꓳ=

ꓐꓸꓚꓸ 335 ꓘꓳꓼ ꓕꓯ ꓬꓲꓸ ꓠꓬ Athens ꓗꓪ ꓬꓲꓼ ꓡ ꓗꓷ ꓗꓸ ꓠꓯꓸ (12)ꓘꓳꓼ ꓡꓱꓸꓼ Lyceum ꓐꓰ ꓟꓬꓱ ꓔ ꓟ ꓢꓳꓺ ꓦꓲꓻ ꓔꓯ ꓫꓬꓹ ꓔꓶ ꓗꓷꓳ= Aristotle ꓠꓬ ꓬꓲ ꓢꓳꓺ ꓤ ꓐꓴ ꓔꓯ Astronomy꓾ Zoology꓾ Geography꓾ Geology꓾ Physics꓾ Anatomy ꓐꓰ ꓠꓱꓸꓼ ꓐꓯꓼ ꓢꓷꓸ ꓠꓲꓹ ꓚꓱꓹ ꓮ ꓟꓬꓹ ꓔꓯ ꓢꓳ ꓣꓴ ꓝꓲˍ ꓡꓳ=

Aristotle ꓠꓬ ꓕꓳꓽ ꓶꓽ 170 ꓑꓷꓠꓽ ꓐꓳ ꓗꓷ ꓢꓲ꓾ ꓖꓳ ꓟ ꓘꓴꓽ ꓗꓪ ꓟ 47 ꓑꓷꓠꓽ ꓠꓬ ꓬꓲꓸ ꓘꓳꓼ 2000 ꓘꓳꓼ ꓟꓽ ꓛꓲꓺ ꓓꓹ ꓟ ꓥ ꓡꓳ= Aristotle ꓠꓬ ꓞꓳ ꓡꓲꓽ ꓪ ꓚꓱꓹ꓾ psychology ꓾ ꓶꓻ ꓡꓯꓼ ꓬꓰ ꓚꓱꓹ ꓾ ꓙꓵꓻ ꓠꓲꓹ ꓚꓱꓹ꓾ ꓗꓴꓓꓼ ꓙꓵꓽ ꓚꓱꓹ ꓐꓰ ꓘꓶꓽ ꓐꓲꓺ ꓠ ꓫꓸ ꓕꓱ ꓚꓱꓹ ꓐꓴ ꓔꓯ ꓐꓳ ꓗꓷꓳ=

Aristotle ꓠꓬ ꓠꓬꓲꓽ ꓧꓪꓹ ꓡꓯꓽ ꓒꓯꓹ ꓝꓸ ꓗꓷꓳ= ꓓꓽ ꓪꓴꓸ ꓕꓯ ꓠꓬ Pythias ꓟꓬꓱ ꓔ ꓟ ꓤ ꓟꓶ ꓤ ꓐꓰ ꓥ ꓡꓳ= ꓬꓲꓸ ꓪ ꓠꓬꓲꓽ ꓫꓵꓸ ꓔꓯ ꓮ ꓟꓲꓽ ꓕꓲ ꓣꓳ ꓙꓳ ꓡ ꓗꓷꓳ= ꓝꓮꓲ ꓕꓲꓽ ꓧꓪꓹ ꓠꓬ Herpyllis Of Stageira ꓐꓰ ꓡꓯꓽ ꓒꓯꓹ ꓝꓸ ꓗꓷ ꓢꓲ ꓬꓲꓸ ꓪ ꓐꓴ ꓔꓯ ꓤ ꓕꓲꓽ ꓫꓵꓸ ꓦꓵꓻ ꓗꓷꓳ=

ꓬꓲꓸ ꓠꓬ ꓐꓸꓚꓸ 322 ꓕꓯ Euboea ꓗꓪ ꓫꓵꓻ ꓗꓷꓳ= ꓖꓳ ꓕꓯ ꓬꓲꓸ ꓞꓲꓼ ꓠꓬ 62 ꓘꓳꓼ ꓥ ꓡꓳ=

ꓬꓲꓸ ꓐꓯ ꓘꓶꓽ ꓠꓬ ꓾ “ꓟꓬꓱꓽ ꓘꓴꓽ ꓗꓪ ꓗꓹ ꓛꓲꓽˍ ꓟ ꓠꓬ ꓬꓰ ꓔꓬꓹ ꓟ ꓟꓬꓱꓽ ꓐꓱ ꓶ ꓜꓳꓽ ꓓꓰ ꓡꓰ ꓝꓲˍ ꓡꓳ=”

Add new comment

9 + 7 =