ꓟꓬꓱ ꓓꓳꓽ ꓙꓳˍ ꓟ William Shakespeare ꓚꓱꓹ

ꓬꓲꓸ ꓠꓬ ꓧꓪꓽ ꓒꓴ ꓫꓵꓽ ꓕꓳꓽ ꓶ ꓗꓪ ꓓˍ ꓟ ꓕꓳꓽ ꓶ ꓐꓳ ꓒ ꓥ ꓢꓲ꓾ ꓟꓬꓱ ꓓꓳꓽ ꓙꓳˍ ꓟ ꓞꓳ ꓢꓯꓸ ꓐꓬꓱꓽ ꓟꓸ ꓟꓲꓽ ꓐꓳ ꓢꓴ (dramatist) ꓕꓲ ꓣꓳ ꓐꓰ ꓢꓷꓸ ꓔ ꓟ ꓥ ꓡꓳ= ꓬꓲꓸ ꓔꓯ ꓠꓬ England ꓗꓴꓷꓼ ꓘꓶꓽ ꓪꓰꓺ ꓐꓳ ꓒꓽ(poet) ꓐꓰ ꓘꓴ ꓢꓲ꓾ Bard of Avon ꓐꓰˍ ꓟꓲ ꓘꓴˍ ꓟ ꓥ ꓡꓳ= ꓬꓲ ꓔꓯ 1564 ꓘꓳꓼ 4 ꓦ ꓟ 23 ꓠꓬꓲ ꓕꓯ ꓾ England ꓗꓴꓷꓼ ꓾ Warwickshire ꓗꓪ ꓟ Strarford-upon-Avon ꓗꓪ ꓦꓵꓻ ꓔ ꓟ ꓥ ꓡꓳ=

ꓬꓲꓸ ꓐꓹ ꓐ ꓟꓬꓱ ꓠꓬ John Shakespeare ꓥ ꓢꓲ꓾ ꓬꓲꓸ ꓟꓹ ꓟ ꓠꓬ Mary Arden ꓥ ꓡꓳ= ꓬꓲꓸ ꓐꓹ ꓐ ꓠꓬ ꓟꓬꓱ ꓓꓳꓽ ꓙꓳˍ ꓟ ꓶꓻ ꓡꓯꓼ ꓟꓬꓱꓽ ꓬꓰ ꓢꓴ ꓕꓲ ꓣꓳ ꓥ ꓢꓲ꓾ ꓬꓲꓸ ꓟꓹ ꓟ ꓠꓬ ꓖꓳ ꓗꓪ ꓟ ꓟꓲ ꓠꓯ ꓮ ꓟꓬꓹ ꓙꓳ ꓢꓴ ꓞꓳ ꓐꓳ ꓮꓸ ꓟꓲꓽ ꓕꓲ ꓣꓳ ꓥ ꓡꓳ= Shakespeare ꓠꓬ 3 ꓣꓳ ꓕꓲꓽ ꓣꓳ ꓟ ꓤꓽ ꓥ ꓡꓳ=

ꓬꓲꓸ ꓠꓬ 1564 ꓘꓳꓼ 4 ꓦ ꓟ 26 ꓠꓬꓲ ꓕꓯ ꓖꓳ ꓓꓱꓽ ꓔꓲꓹ ꓟꓶ ꓗꓷꓳ= Shakespeare ꓬꓲꓸ ꓤ ꓠꓱ ꓤ ꓤꓶꓻ ꓐꓰ ꓢꓷꓸ ꓠꓲꓹ ꓢꓳˍ ꓟ ꓦꓬꓼ ꓠꓬꓲ ꓔꓯ ꓮ ꓟꓬꓹ ꓟꓳꓸ ꓖꓶꓽ ꓔ ꓟ ꓟꓽ ꓙꓳ= ꓬꓲꓸ ꓠꓬ Strarford ꓗꓪ ꓙꓳˍ ꓟ King’s New School ꓗꓪ ꓕꓳꓽ ꓶ ꓵˍ ꓟ ꓐꓰ ꓐꓳˍ ꓟ ꓔꓯ ꓢꓳ ꓣꓴ ꓗꓷꓳ= ꓢꓷꓸ ꓠꓲꓹ ꓢꓳ ꓦꓲꓻ ꓮ ꓙꓵꓽ ꓠꓬ ꓫꓱꓸ ꓡꓯꓽ ꓘꓳ꓾ ꓪꓽ ꓡꓯ ꓘꓳꓹ ꓟ ꓥꓳꓽ ꓜꓯꓻ ꓚꓱꓹ( grammar) ꓔꓯ ꓡꓰꓽ ꓟꓸ ꓖꓶꓽˍ ꓟ ꓪꓴꓸ ꓠꓬꓲ꓾ ꓬꓲ ꓥˍ ꓟꓲ Latin ꓚꓺ ꓟꓲꓽ ꓕꓳꓽ ꓶꓽ ꓐꓳ ꓒ ꓐꓴ ꓔꓯ ꓟꓳꓸ ꓥꓳꓽ ꓜꓯꓻ ꓚꓱꓹ (grammar) ꓗꓪ ꓐꓰ ꓢꓷꓸ ꓠꓲꓹ ꓟꓶ ꓗꓷꓳ꓾ ꓐꓰ ꓚꓬꓹ ꓪ ꓓꓹ ꓡꓳ=

Shakespeare ꓠꓬ ꓬꓲꓸ ꓞꓲꓼ 18 ꓘꓳꓼ ꓙꓳ ꓡˍ ꓟ 1582 ꓘꓳꓼ ꓕꓯ꓾ Anne Hathaway ꓐꓰ ꓡꓯꓽ ꓒꓯꓹ ꓝꓸ ꓗꓷꓳ= ꓬꓲꓸ ꓠꓬ Shakespeare ꓕꓯꓽ ꓢꓲ 8 ꓘꓳꓼ ꓪꓴꓽˍ ꓡꓳ= ꓬꓲꓸ ꓪ ꓐꓴ ꓔꓯ Susanna Hall꓾ Hamnet Shakespeare꓾ ꓐꓰ Judith Quiney ꓐꓰ ꓟꓬꓱ ꓔ ꓟ ꓤ ꓠꓱ 3 ꓫꓵꓸ ꓙꓳˍ ꓡꓳ=

William Shakespeare ꓔꓯ England ꓗꓴꓷꓼ ꓘꓶꓽ ꓪꓰꓺ ꓐꓳ ꓒꓽ (poet) ꓐꓰ ‘Bard of Avon’ ꓐꓯ ꓢꓲ ꓓꓳ ꓟꓴˍ ꓔ ꓟ ꓥ ꓡꓳ= ꓬꓲꓸ ꓟꓬꓱꓽ ꓬꓰ ꓪꓴꓸ ꓔꓴˍ ꓟ ꓦꓬꓼ ꓠꓬꓲ ꓔꓯ ꓟꓽ ꓢꓷꓸ ꓐꓯˍ ꓥ ꓟꓲ꓾ 1592 ꓕꓯ ꓬꓲꓸ ꓐꓳ ꓔ ꓟ ꓞꓳ ꓢꓯꓸ ꓐꓬꓱꓽ ꓟꓸ ꓟꓲꓽ(play) ꓐꓴ ꓠꓽ ꓾ ꓢꓯꓸ ꓐꓬꓱꓽ ꓟꓸ ꓖꓶ ꓖꓴ ꓕꓯꓽ ꓢꓲ ꓗꓪ ꓓꓳ ꓡ ꓟ ꓔꓯ ꓟꓳꓸ ꓖꓶꓽ ꓔ ꓡꓳ= ꓢꓷꓸ ꓠꓲꓹ ꓙꓳ ꓢꓴ ꓐꓴ ꓠꓬ ꓾ 1585 ꓘꓳꓼ ꓗꓪ ꓐꓰ 1592 ꓘꓳꓼ ꓘꓴꓽ ꓗꓪ ꓟ ꓦꓬꓼ ꓠꓬꓲ ꓔꓯ ꓠꓬ Shakespeare ꓒꓲꓼ ꓬꓰ ꓟꓶꓽ ꓬꓰ ꓟ ꓦꓬꓼ ꓠꓬꓲ꓾ ꓐꓰ ꓐꓯ ꓔ ꓟ ꓙꓳˍ ꓡꓳ=

1592 ꓘꓳꓼ ꓕꓯ Shakespeare ꓬꓲꓸ ꓐꓳ ꓔ ꓟ ꓕꓳꓽ ꓶꓽ ꓐꓴ ꓠꓬ ꓣꓱꓽ ꓟꓽ ꓬꓯꓼ ꓐꓰ ꓾ ꓠꓯꓸ ꓐꓯꓼ ꓕꓳꓽ ꓶꓽ ꓐꓳ ꓒꓽ ꓕꓲ ꓣꓳ ꓡꓰ ꓐꓯ ꓖꓶꓽ ꓗꓷꓳ=ꓗꓸ ꓠꓯ ꓠꓬ ꓖꓳ ꓕꓲ ꓣꓳ ꓟ ꓡꓰ Shakespeare ꓟꓸ ꓟꓲꓽ ꓔꓯ ꓐꓳ ꓗꓷꓳ= Lord Chamber Company ꓠꓬ 1594 ꓘꓳꓼ ꓛꓲꓺ ꓕꓯ Shakespeare ꓐꓳ ꓔ ꓟ ꓟꓸ ꓟꓲꓽ ꓐꓴ ꓔꓯ ꓾ ꓞꓳ ꓢꓯꓸ ꓐꓬꓱꓽ ꓐꓱ ꓶ ꓣꓱꓽˍ ꓟ company ꓒꓬꓱꓼ ꓡ ꓗꓷꓳ= Shakespeare ꓥˍ ꓟꓲ Lord Chamber Company ꓞꓳ ꓢꓯꓸ ꓐꓬꓱꓽ ꓬꓰ ꓟꓳꓸ ꓖꓶˍ ꓟ ꓗꓪ ꓐ ꓢꓴ ꓕꓲ ꓣꓳ ꓒꓬꓱꓼ ꓡ ꓗꓷꓳ=

ꓪꓺ ꓔꓲꓸ ꓟ Elizabeth ꓫꓵꓻ ꓗꓷ ꓗꓸ ꓠꓯꓸ ꓪꓺ ꓔꓲ ꓫꓵꓼ James ꓠꓬ Company ꓔꓯ꓾ ꓪ ꓔꓲꓸ ꓔꓯ ꓟ ꓬꓰ ꓗꓷ ꓢꓲ꓾ ꓖꓳ ꓟ ꓔꓯ “THE KING’S MEN” ꓐꓰ ꓟꓬꓱ ꓖꓶˍ ꓡꓳ= 1598 ꓕꓯ꓾ William Shakespeare ꓟꓬꓱ ꓠꓬ ꓟꓬꓱꓽ ꓕꓳꓽ ꓶꓽ ꓒꓬꓽ ꓗꓪ ꓟ ꓬꓲꓸ ꓕꓲꓽ ꓟꓴ ꓗꓪ ꓓꓳ ꓡˍ ꓡꓳ= ꓬꓲꓸ ꓐꓳ ꓔ ꓟ ꓕꓳꓽ ꓶ ꓐꓴ ꓠꓬ ꓟꓵꓽ ꓗꓳꓹ ꓓꓵꓺ ꓓꓵꓺ ꓗꓪ ꓛꓲꓺ ꓟꓬꓱ ꓓꓳꓽ ꓙꓳ ꓡ ꓢꓲ꓾ ꓬꓲꓸ ꓠꓬ 1613 ꓘꓳꓼ ꓗꓪ ꓛꓲ ꓐꓳ ꓗꓷꓳ=

ꓬꓲꓸ ꓠꓬ ꓟꓸ ꓟꓲꓽ ꓕꓳꓽ ꓶꓽ 38 ꓟ꓾ sonnet 154 ꓟ꓾ ꓘꓶꓽ ꓪꓰꓺ (poem) 2 ꓚꓱꓹ ꓐꓴ ꓔꓯ ꓐꓳ ꓗꓷꓳ= ꓬꓲꓸ ꓬꓰ ꓔ ꓟ ꓟꓵꓽ ꓗꓪ ꓟꓽ ꓓ ꓟꓬꓱ ꓓꓳꓽ ꓙꓳˍ ꓟ ꓠꓬ Hamlet, Othello, Romeo and Juliet , Julius Caesar , Macbeth ꓐꓴ ꓥ ꓡꓳ= ꓬꓲꓸ ꓐꓳ ꓔ ꓟ ꓐꓳ ꓚꓱꓹ ꓐꓰ꓾ ꓓꓵꓽ ꓙ ꓚꓱꓹ ꓐꓴ ꓠꓬ ꓠꓱꓸ ꓐꓯꓸꓼ ꓢꓴ ꓐꓴ ꓐꓰ ꓟꓽ ꓪꓽ ꓡꓯ ꓘꓳ ꓟꓽ ꓫꓱꓸ ꓡꓯꓽ ꓘꓳ ꓟ ꓥ ꓡꓳ= ꓬꓲꓸ ꓠꓬ ꓬꓲꓸ ꓐꓳ ꓔ ꓟ ꓚꓺ ꓟꓲꓽ ꓟꓸ ꓟꓲꓽ ꓕꓳꓽ ꓶꓽ ꓗꓪ ꓫꓸ ꓕꓱ ꓘꓶꓽ ꓐꓴ ꓐꓳ ꓧꓳꓽ ꓢꓲ ꓠꓬꓲ꓾ꓮ ꓠꓱ ꓕꓯ ꓡꓰ ꓝꓸ ꓩꓴ ꓡˍ ꓟ ꓚꓱꓹ ꓔꓯ ꓡꓶꓸ ꓗꓷ ꓟ ꓥ ꓡꓳ=

ꓬꓲꓸ ꓠꓬ 1616 ꓘꓳꓼ 4 ꓦ ꓟ 23 ꓠꓬꓲ꓾ ꓬꓲꓸ ꓞꓲꓼ 52 ꓘꓳꓼ ꓕꓯ ꓾ ꓬꓲꓸ ꓦꓵꓻ ꓖꓴ ꓟꓵꓽ ꓗꓪ ꓫꓵꓻ ꓗꓷꓳ=

ꓬꓲꓸ ꓠꓬ ꓬꓲꓸ ꓠꓲꓹ ꓫꓵˍ ꓟ ꓕꓳꓽ ꓶꓽ ꓒꓬꓽ (will) ꓗꓪ ꓡꓯꓼ ꓟ ꓠꓬꓲꓸ ꓗꓷ ꓗꓸ ꓠꓯ ꓦ ꓐ ꓕꓲꓽ ꓟ ꓘꓴꓽ ꓗꓪ ꓫꓵꓻ ꓟ ꓥ ꓡꓳ= ꓬꓲꓸ ꓠꓲꓹ ꓫꓵˍ ꓟ ꓕꓳꓽ ꓶꓽ ꓗꓪ ꓠꓬ꓾ ꓬꓲꓸ ꓔꓯ ꓙꓳˍ ꓟ ꓦꓲꓻ ꓐꓰ ꓟꓲ ꓠꓯ ꓐꓱ ꓮ ꓟꓬꓹ ꓔꓯ ꓬꓲꓸ ꓮꓸ ꓟꓲꓽ ꓓꓽ ꓟ Susanna ꓔꓯ ꓖꓶꓽ ꓔꓲꓸ ꓬꓰˍ ꓥꓳ꓾ ꓐꓰ ꓐꓯ ꓔ ꓡꓳ=

Add new comment

1 + 3 =