ꓡꓲꓽ ꓒꓲꓼ ꓐꓰ ꓕꓳꓽ ꓶ

ꓕꓳ ꓶ ꓐꓰ ꓟꓲ- ꓠꓯ ꓶꓽ ꓞꓳ-ꓸ

ꓣꓦꓮ ꓡꓲ-ꓢꓴ ꓓꓳꓽ ꓠꓸꓸ ꓠꓹ ꓔꓬ ꓢꓴ ꓮꓽ ꓙꓵꓽ ꓢꓴ ꓧꓪꓸ ꓧꓪꓼ ꓥ ꓡꓽ? ꓠꓬꓲꓹ ꓠꓬꓲ ꓢꓷꓸ ꓙ ꓟꓳ ꓙ ꓠꓼ ꓟ ꓚꓱꓼ ꓗꓪ ꓠꓬ ꓕꓳꓽ ꓶ ꓐꓰ ꓞꓳ ꓫꓵꓽ ꓐꓯꓼ_ꓟ ꓚꓱꓹ ꓠꓯꓼ_ ꓗꓪ ꓕꓳ ꓶ ꓐꓳ ꓒꓽ ꓐꓴ ꓡꓰꓽ ꓐꓳ ꓖꓶꓽ ꓔꓸ ꓟ ꓔꓯꓹ ꓔꓱꓼ ꓕ ꓢꓲꓸ ꓢꓷꓸ ꓙ ꓟꓳ ꓙ_ ꓥꓳ=

ꓮꓸ-ꓠꓽ ꓕꓲꓽ ꓟ ꓠꓬ ꓮꓸꓔꓳꓸ ꓘꓰꓸ ꓔꓯꓸ ꓕꓳꓼ ꓟꓶ ꓡꓰ ꓐꓭ ꓠꓬ ꓬꓲꓸ ꓢꓯꓼ ꓟꓶ ꓢꓲꓼ ꓔꓷꓼ ꓙꓰ ꓡꓰ ꓥꓳ-ꓸ ꓝꓮꓲ ꓠꓱꓸ ꓐꓯꓼ ꓕꓲꓽ ꓟ ꓥꓼ_ꓟꓲ ꓖꓳ ꓟ ꓔꓯꓸ ꓕꓳꓼ ꓪ ꓡꓰ_ꓠꓬ ꓓꓽ ꓪꓴꓸ ꓟ ꓮꓸ-ꓠꓽ ꓡꓰ ꓐꓰ ꓗꓷ ꓡꓰ ꓥꓳ-ꓸ ꓕꓱ ꓟ ꓠꓬ ꓬꓲꓸ ꓕꓳꓼ ꓟꓶ_ꓟ ꓮꓸ ꓔꓳꓸ ꓥ ꓡꓳ-ꓸ ꓞꓼ ꓫꓵꓽ ꓥ_ꓡꓳ ꓐꓰ  ꓠꓱꓸ ꓐꓯꓼ ꓮꓸ-ꓠꓽ  ꓐꓴ ꓔꓯꓸ ꓢꓷꓸ ꓝꓲ ꓠꓼ_ ꓟ ꓐꓯ ꓟꓸ ꓓꓴ-ꓸ ꓢꓷꓸ ꓝꓲ ꓓꓴ ꓥꓳꓽ ꓟꓽ ꓙꓳ-ꓸ ꓬꓲꓸ ꓠꓯꓼ_ꓗꓪ ꓔꓳꓼ ꓜꓳꓽ ꓡꓹ ꓟ ꓔꓯ ꓗꓸ ꓠꓯꓸ ꓟ ꓤꓶ ꓔꓯꓸ ꓐꓯ ꓟꓸ ꓓꓴ ꓟꓽ ꓙꓳ-ꓸ ꓮꓽ ꓠꓱ ꓕꓯꓽ ꓗꓪ ꓐꓰ ꓠꓬꓲꓹ ꓠꓬꓲ  ꓗꓪ ꓛꓲ ꓮꓸ-ꓠꓽ ꓠꓬꓕꓲꓽ ꓡꓰꓼ ꓥꓳ=  ꓮꓸ ꓫꓵꓽ ꓪꓴꓸ ꓠꓬꓲ  ꓐꓯꓹ ꓠꓬ ꓬꓲꓸ ꓪꓽ ꓠꓯꓼ ꓗꓪ ꓫꓸ ꓕꓱ  ꓘꓶꓽ ꓐꓰ ꓕꓳꓽ ꓶ ꓟꓽ ꓙꓳ_ꓮ-ꓸ ꓬꓲꓸ ꓔꓵꓼ ꓔꓳꓹ ꓜꓳꓽ ꓡ ꓟ ꓔꓯ ꓢꓷꓸ ꓢꓲꓸ ꓠꓱꓸ ꓐꓯꓼ ꓔꓯꓸ ꓐꓯ ꓟꓸ ꓠꓼ ꓟ ꓟꓽ ꓢꓷꓸ-ꓸ

ꓖꓳ ꓡꓰ  ꓥꓼ_ ꓟꓲ ꓣꓳꓽ ꓡꓽ ꓞꓳ ꓠꓬ ꓕꓳꓽꓶ ꓙꓳ_ ꓡꓳ ꓫꓸ ꓕꓱ ꓘꓶꓽ ꓙꓳ ꓔꓬ ꓡꓳ-ꓸ ꓡꓽ ꓞꓳ ꓕꓲꓽ ꓣꓳ ꓒꓬꓱꓼ ꓡꓹ ꓟ ꓬꓲꓸ ꓙꓵ ꓗꓪ ꓐꓰ ꓐꓸ ꓐ ꓟꓸ ꓟ ꓐꓴ ꓡꓰ ꓕꓱ ꓟ ꓠꓬ ꓮꓸ ꓔꓳꓸ ꓥꓸꓹ ꓞꓸꓸ ꓗꓴ ꓔꓸ ꓟ ꓥꓳ-ꓸ ꓕꓱꓸꓸ ꓟ ꓠꓬ ꓟꓽ ꓢꓲ ꓫꓬ ꓟ ꓥꓳ ꓐꓰ ꓟꓸ ꓖꓶꓽ_ ꓟ ꓪꓴꓸ ꓠꓬꓲ ꓠꓴ ꓢꓓꓸ ꓢꓲꓼ ꓤ ꓟꓳ ꓙ ꓫꓱꓽ ꓔꓬ ꓟ  ꓥꓳ=

ꓐꓯ ꓠꓲꓹ ꓫꓵ ꓹ ꓟ ꓠꓬ ꓡꓽ ꓞꓳ ꓐꓴ ꓠꓯꓼ ꓗꓪ ꓕꓳꓽ ꓶ ꓐꓰ ꓫꓸ ꓕꓱꓸꓸ ꓥꓳ ꓙꓳ_ꓟ ꓪꓴꓸ ꓧꓶꓸ ꓕꓯꓽ ꓟ ꓤꓶ ꓗꓪ ꓔꓳꓼ ꓜꓳꓽ ꓡꓼ ꓟ ꓔꓯꓸ  ꓠꓬꓲꓹ ꓠꓬꓲ ꓟ ꓤꓶꓽ ꓐꓴ ꓢꓷꓸ ꓡꓰ_ꓟ ꓥ ꓡꓳ= ꓞꓳ ꓫꓵꓽ ꓘꓴꓽ ꓠꓯꓼ ꓗꓪ ꓙꓳ_ꓟ ꓕꓳꓽ ꓶꓽ ꓐꓰ ꓫꓸ ꓕꓱ ꓥꓳ ꓔꓯꓸ ꓟꓽ ꓟꓶꓽ ꓡꓰ ꓝꓲꓸꓹ ꓠꓼ ꓟ ꓠꓬ ꓤꓶ ꓥ ꓕꓽ ꓑꓳ ꓗꓪ_ꓟ ꓞꓳ ꓫꓵꓽ ꓐꓴ ꓣꓱꓽ ꓠ ꓗꓼ ꓡꓳ-ꓸ ꓠꓬꓲꓹ ꓠꓬꓲ ꓣꓳꓽ ꓡꓲ-ꓢꓴ ꓫꓵꓽ ꓗꓳꓹ ꓡꓳ ꓗꓪ ꓥꓼ ꓟꓲ ꓕꓳꓽ ꓶ ꓐꓰ ꓥꓳ ꓫꓵꓽ ꓙꓳ_ꓥꓳ-ꓸ ꓖꓳ ꓡꓰ ꓥꓼ_ ꓟꓲ ꓠꓬꓲꓹ ꓠꓬꓲ  ꓣꓳꓽ ꓤꓶ ꓦꓬꓼ ꓠꓬꓲ ꓗꓪ ꓠꓬ ꓣꓳꓽ ꓕꓳꓽ ꓶ ꓐꓰ ꓥꓳꓽ ꓔꓯꓸ ꓟꓽ ꓣꓱꓽ ꓢꓲꓸꓹ  ꓠꓱꓸ ꓐꓯꓼ ꓞꓳ ꓫꓵꓽ ꓥꓳꓽ ꓔꓯꓸ ꓟꓬꓽ ꓠꓬꓲ  ꓣꓱꓽ ꓡ ꓔꓬ ꓡꓳ-ꓸ ꓕꓱꓽ ꓟ ꓠꓬ ꓞꓳ ꓫꓵꓽ ꓟꓶꓽ ꓡꓰ ꓝꓲꓹ_ꓟ ꓚꓱꓸ ꓒꓬꓱꓼ ꓡ _ ꓡꓳ= ꓖꓳ ꓟ ꓪꓴꓸ ꓠꓬꓲ  ꓮ ꓡꓰ ꓕꓲꓽ ꓟꓵꓽ ꓗꓪ ꓔꓬ ꓢꓴ ꓥꓼ_ ꓟꓲ  ꓣꓳꓽ ꓕꓳꓽꓶ ꓐꓰ ꓥꓳ ꓔꓯꓸ ꓚꓬꓴ ꓙ ꓠ ꓗ ꓡꓳ= ꓕꓳꓽ ꓶꓽ ꓟꓶꓽ ꓡꓰ_ꓠꓬ ꓞꓳ ꓫꓵꓽ ꓥꓼ ꓟꓲ ꓟꓶꓽ ꓡꓰ ꓥꓳ=

#ꓡꓲ-ꓢꓴ ꓕꓳ ꓶ ꓢꓳ ꓓꓴ