ꓦꓺ ꓢꓯꓼ ꓧꓳꓽ ꓖꓶˍ ꓟ ꓚꓱꓹ ( Question & Answer)

ꓦꓺ ꓢꓯꓼ ꓧꓳꓽ ꓖꓶˍ ꓟ ꓔꓯ ꓰꓠꓖꓡꓲꓢꓧ ꓥꓳꓽ ꓗꓪ ꓚꓳꓸ ꓚꓳꓠꓝꓲꓣꓟꓮꓔꓲꓳꓠ ꓐꓰ ꓐꓯˍ ꓡꓳ= ꓬꓲ ꓟꓸ ꓟꓲ ꓠꓬ ꓤꓲ ꓞꓹ ꓝꓲˍ ꓟ ꓐꓯˍ ꓟ ꓬꓲ ꓟꓸ ꓟꓲꓽ ꓥˍ ꓡꓳ= ꓕꓱ ꓟ ꓠꓬ ꓙꓵ ꓠꓲꓹ ꓔꓯ ꓟꓬ ꓠꓬꓲ ꓤꓲ ꓞꓹ ꓝꓲˍ ꓟ ꓗꓷ ꓡꓰ ꓠꓹ ꓟ ꓐꓱ ꓶ ꓖꓶˍ ꓟ ꓕꓲꓽ ꓫꓵꓽ ꓥˍ ꓡꓳ= ꓘ-ꓕꓳ-ꓡꓲꓼ ꓘꓴ ꓜꓲꓼ ꓞꓳ꓾ ꓰꓮꓢꓔꓰꓣꓠ ꓳꓣꓔꓧꓳꓓꓳꓫ꓾ ꓳꓣꓣꓲꓰꓠꓔꓮꓡ ꓳꓣꓔꓧꓳꓓꓳꓫ꓾ ꓦꓺ ꓢꓯꓼ ꓧꓳꓽ ꓖꓶˍ ꓟ ꓔꓯ ꓢꓮꓚꓣꓮꓟꓰꓠꓔꓴ ꓐꓰ ꓕꓱ ꓡꓰ ꓘꓳꓹ ꓣꓴˍ ꓡꓳ= ꓢꓮꓚꓣꓮꓟꓰꓠꓔꓴ ꓐꓯꓹ ꓟ ꓠꓬ ꓣꓱꓽ ꓛꓲ ꓡꓯꓽ ꓫꓵ ꓐꓯꓹ ꓟꓶˍ ꓟ ꓔꓯ ꓐꓯ ꓠꓲꓹ ꓫꓵˍ ꓟ ꓥ ꓪ= ꓕꓱ ꓟ ꓦꓺ ꓢꓯ ꓧꓳꓽ ꓖꓶˍ ꓟ ꓔꓯ ꓐꓯꓹ ꓟꓶ ꓢꓴ ꓠꓬ ꓣꓱꓽ ꓛꓲꓽ ꓡꓯꓽ ꓫꓵ ꓚꓵ ꓚꓵ ꓐꓯꓹ ꓟꓶ ꓡ ꓓꓴ ꓥꓳ= ꓕꓱ ꓟ ꓣꓱꓽ ꓛꓲꓽ ꓡꓯꓽ ꓫꓵ ꓐꓯꓹ ꓟꓶ ꓢꓴ ꓠꓬ ꓚꓬꓴꓹ ꓙꓹ ꓟ ꓣꓱꓽ ꓛꓲꓽ ꓔꓯ ꓐꓯꓹ ꓟꓶ ꓝꓲˍ ꓟ꓾ ꓟꓬ ꓠꓬꓲ ꓤꓲ ꓞꓹ ꓝꓲˍ ꓟ ꓥˍ ꓡꓳ=

ꓰꓴꓣꓳꓑꓮ ꓐꓶꓽ ꓓꓳ ꓕꓲꓽ ꓛꓱꓽ ꓔꓯ ꓢꓲ ꓔꓬ ꓢꓴ ꓐꓴ ꓠꓬ ꓟꓬ ꓠꓬꓲ ꓐꓶꓽ ꓠꓬꓲ ꓗꓳ ꓓꓱꓽ ꓔꓲꓹ ꓓꓳ ꓕꓯ ꓦꓺ ꓢꓯꓼ ꓧꓳꓽ ꓖꓶˍ ꓟ ꓔꓯ ꓖꓶˍ ꓡꓳ= ꓖꓳ ꓡꓱ ꓥˍ ꓟꓲ ꓐꓶꓽ ꓓꓵꓽ ꓕꓲꓽ ꓛꓱꓽ ꓔꓯ ꓢꓲ ꓗꓪ ꓔꓬ ꓢꓴ ꓐꓴ ꓠꓬ ꓗꓳ ꓓꓱꓽ ꓔꓲꓹ ꓓꓳ ꓢꓴ ꓓꓵꓽ ꓙꓽ ꓗꓴꓸ ꓙ ꓜꓲꓼ ꓗꓴ ꓡ ꓕꓯꓽ ꓢꓲꓸ ꓦꓺ ꓢꓯꓼ ꓧꓳꓽ ꓖꓶˍ ꓟ ꓔꓯ ꓖꓶˍ ꓡꓳ= ꓖꓳ ꓡꓱ ꓥˍ ꓟꓲ ꓠ ꓓꓴ ꓑꓬꓽ ꓓꓴ ꓕꓲꓽ ꓕꓡꓹꓼ ꓔꓳꓹ ꓜꓳꓽ ꓡ ꓕꓯꓽ ꓠꓬ ꓔꓲ ꓒꓽ ꓐꓴ ꓡꓰ ꓖꓶ ꓢꓲꓸ ꓠ ꓓꓴ ꓑꓬꓽ ꓓꓴ ꓟꓽ ꓙꓳ ꓧꓪꓸ ꓧꓪꓼ ꓔꓬ ꓢꓴ ꓔꓯ ꓠꓬ ꓔꓲ ꓒꓽ ꓓꓽ ꓐꓴ ꓡꓰ ꓖꓶˍ ꓟ ꓙꓳˍ ꓡꓳ= ꓓꓵꓽ ꓙꓽ ꓗꓴꓸ ꓔ ꓟ ꓙꓽ ꓜꓲꓼ ꓗꓴꓸ ꓟ ꓔꓯ ꓥꓳꓽ ꓐꓯ ꓠꓬ 13 ꓘꓳꓼ 14 ꓘꓳꓼ ꓕꓲꓽ ꓙꓶ ꓗꓪ ꓚꓳꓸ ꓗꓽ ꓑꓳꓸ ꓔꓯ ꓢꓲꓸ ꓦꓺ ꓢꓯꓼ ꓡꓴꓽ ꓖꓶˍ ꓟ꓾ ꓦꓺ ꓢꓯꓼ ꓧꓳꓽ ꓖꓶˍ ꓟ ꓕꓱ ꓡꓰ ꓖꓶˍ ꓟ ꓔꓯ ꓡꓳꓸ ꓟꓳ ꓪ ꓓˍ ꓡꓳ=

ꓮꓠꓖꓡꓲꓚꓮꓠ ꓘꓴ ꓜꓲꓼ ꓞꓳ꓾ ꓡꓴꓔꓧꓰꓣꓰꓠ ꓘꓴ ꓜꓲꓼ ꓞꓳ꓾ꓟꓰꓔꓧꓳꓓꓲꓢꓔ ꓘꓴ ꓜꓲꓼ ꓞꓳ꓾ ꓐꓰ ꓣꓰꓝꓳꓣꓟꓰꓓ ꓘꓴ ꓜꓲꓼ ꓞꓳ ꓐꓴ ꓠꓯꓸꓼ ꓗꓪ ꓠꓬ ꓖꓳ ꓓꓱꓽ ꓔꓲꓹ ꓔ ꓟ ꓔꓯ ꓙꓵ ꓠꓲꓹ ꓠꓯꓸꓼ ꓗꓪ ꓟꓬ ꓠꓬꓲ ꓕꓶ ꓡꓰ ꓠ ꓐꓱ ꓶꓽ ꓐꓯ ꓢꓲꓸ ꓗꓳ ꓓꓱꓽ ꓔꓲꓹ ꓓꓳ ꓢꓴ ꓔꓯ ꓪꓽ ꓘꓴ ꓙꓵꓹ ꓕꓲꓽ ꓟ ꓬꓲ ꓢꓲꓸ ꓕꓱ ꓡꓰ ꓖꓶˍ ꓟ ꓙꓳ ꓐꓶ= ꓬꓲ ꓪꓽ ꓠꓬ ꓗꓳ ꓓꓱꓽ ꓔꓲꓹ ꓔ ꓟ ꓔꓯ ꓢꓮꓚꓣꓮꓟꓰꓠꓔꓴ ꓣꓱꓽ ꓛꓲ ꓡꓯꓽ ꓫꓵ ꓕꓱ ꓡꓰ ꓟꓽ ꓘꓳꓹ ꓣꓴ ꓥˍ ꓟꓲ ꓖꓳ ꓓꓱ ꓔꓲꓹ ꓔ ꓟ ꓔꓯ ꓟꓬ ꓠꓬꓲ ꓐꓲ ꓜꓲꓼ ꓡꓰ ꓠꓹ ꓟ ꓐꓱ ꓶ ꓖꓶˍ ꓟ ꓐꓰ ꓕꓱ ꓡꓰ ꓐꓯˍ ꓐꓶ=