Abraham Lincoln (ꓟꓬꓱ ꓓꓳꓽ ꓙꓳ ꓢꓴ ꓚꓱꓹ)

ꓬꓲꓸ ꓠꓬ American United State ꓗꓪ 16 ꓣꓳ ꓕꓲ ꓣꓳ ꓟ ꓗꓴꓷꓼ ꓙꓵꓽ ꓢꓲꓽ ꓒꓽ ꓥ ꓡꓳ= ꓬꓲ ꓔꓯ 1809 ꓘꓳꓼ 2 ꓦ ꓟ 12 ꓠꓬꓲ ꓕꓯꓽ ꓾ American ꓗꓴꓷꓼ꓾ Kentucky꓾ Hodgenville ꓒ ꓕꓲꓹ ꓗꓪ ꓟ Sinking Spring Farm ꓗꓪ ꓦꓵꓻ ꓔ ꓡꓳ=

ꓬꓲꓸ ꓐꓹ ꓐ ꓟꓬꓱ ꓠꓬ Thomas Lincoln ꓥ ꓢꓲ꓾ ꓬꓲꓸ ꓟꓹ ꓟ ꓔꓯ ꓠꓬ Nancy Hanks Lincoln ꓐꓰ ꓟꓬꓱ ꓔ ꓡꓳ=

ꓬꓲꓸ ꓐꓹ ꓐ ꓠꓬ ꓟꓬꓱꓽ ꓬꓰ ꓜꓽ ꓢꓴ ꓕꓲꓽ ꓣꓳ ꓥ ꓢꓲ꓾ ꓬꓲꓸ ꓕꓲꓽ ꓦꓲꓻ ꓢꓴ ꓠꓬ ꓮ ꓘꓶꓸ ꓫꓸ ꓡꓳ=

ꓬꓲꓸ ꓪ ꓠꓬ ꓕꓲꓽ ꓗꓶꓹ ꓤ ꓡꓰ ꓙꓳˍ ꓟ ꓢꓲꓹ ꓓꓱꓽ ꓐꓰ ꓫꓬꓹ ꓔ ꓟ ꓦꓲꓻ ꓤ ꓤ ꓗꓪ ꓔꓬꓹ ꓡꓳ=

Lincoln ꓮ ꓘꓶꓸ ꓣꓳꓺ ꓓˍ ꓕꓯ ꓡꓰ ꓬꓲꓸ ꓕꓲꓽ ꓦꓲꓻ ꓢꓴ ꓐꓴ ꓠꓬ꓾ Indiana ꓟꓵꓽ ꓗꓪ ꓚꓵꓸ ꓙꓰ ꓗꓸ ꓠꓯꓸ꓾ Illinois ꓗꓪ ꓡꓯꓼ ꓫꓵ ꓚꓵꓸ ꓙꓰˍ ꓡꓳ= ꓬꓲꓸ ꓠꓬ ꓟꓲ ꓠꓯ ꓢꓷꓸ ꓠꓲꓹ ꓔꓯ ꓕꓲꓽ ꓘꓳꓼˍ ꓡꓰ ꓢꓳ ꓗꓷˍ ꓥˍ ꓟꓲ꓾ ꓕꓳꓽ ꓶ ꓑꓷꓠꓽ ꓔꓯ ꓠꓽ ꓮ ꓘꓶꓸ ꓵ ꓠꓲꓹ ꓟ ꓙꓳ ꓢꓲ ꓾ ꓮ ꓡꓰ ꓐ ꓡ ꓮ ꓡꓰ ꓕꓳꓽ ꓶ ꓵ ꓢꓲ ꓢꓳꓺ ꓣꓴˍ ꓡꓳ=

ꓬꓲꓸ ꓞꓲꓼ 22 ꓘꓳꓼ ꓙꓳˍ ꓕꓯ ꓾ Lincoln ꓠꓬ ꓬꓲꓸ ꓫꓵꓽ ꓬꓲꓸ ꓙꓰꓽ ꓪꓴꓽ ꓖꓴ ꓗꓪ ꓟꓬꓱꓽ ꓬꓰ ꓠꓹ ꓟ ꓬꓲꓸ ꓦꓲꓻ ꓗꓪ ꓐꓰ ꓓꓳꓻ ꓡꓻ ꓳ= ꓖꓳ ꓗꓪ ꓟꓬꓱꓽ ꓬꓰ ꓔꓬꓹ ꓕꓯ ꓾ Honest Abe ꓐꓯˍ ꓟ ꓟꓬꓱ ꓟꓶ ꓗꓷꓳ= ꓕꓲꓽ ꓧꓪꓹ ꓙꓳˍ ꓕꓯ ꓪꓴꓽ ꓙ ꓢꓴ ꓕꓲ ꓣꓳ ꓔꓯ Pennies ꓒꓴꓻ ꓡꓲꓸ ꓖꓶꓽ ꓟꓬꓽ ꓡꓰ ꓠꓬꓲ꓾ ꓟꓶꓽ ꓘꓶꓽ ꓟꓰ ꓡ ꓢꓲ꓾ ꓟꓬꓱꓽ ꓠꓽ ꓗꓷˍ ꓕꓯ Lincoln ꓠꓬ 4 ꓕꓷꓹ (4 miles) ꓗꓪ ꓛꓲ ꓙ ꓖꓴ ꓫꓱꓽ ꓢꓲ꓾ ꓒꓴ ꓣꓴ ꓙꓰˍ ꓡꓳ=

1832 ꓕꓯ Lincoln ꓠꓬ Illinois ꓟꓵꓽ ꓙꓵꓽ ꓗ ꓫꓬꓹ ꓜꓴꓻ ꓗꓪ ꓐ ꓠꓹ ꓟ ꓐꓱ ꓶ ꓟꓯꓹ ꓢꓲꓺ ꓔꓯ ꓗꓷꓳ= ꓖꓳ ꓡꓱ ꓥˍ ꓟꓲ ꓬꓲꓸ ꓟꓽ ꓧꓪꓸ ꓡꓰ= ꓖꓳ ꓗ ꓠꓯ ꓬꓲ ꓠꓬ ꓟꓯꓼ ꓜꓴꓻ ꓗꓪ ꓟꓯꓼ ꓢꓲꓽ ꓒꓽ ꓬꓰ ꓗꓷꓳ=

1834 ꓕꓯ ꓾ Abraham Lincoln ꓠꓬ Whig Party ꓗꓪ ꓐ ꓢꓴ ꓕꓲꓽ ꓣꓳ ꓐꓯ ꓢꓲ꓾ Illinois ꓗꓴꓷꓼ ꓫꓴ ꓙꓵꓽ ꓗ ꓫꓬꓹ ꓜꓴ ꓗꓪ ꓢꓲꓺˍ ꓟ ꓟꓶ ꓗꓷꓳ= ꓖꓳ ꓗꓸ ꓠꓯꓸ ꓬꓲ ꓠꓬ ꓐꓯ ꓟꓴ ꓫꓬꓹ ꓟꓬꓱꓽ ꓬꓰ ꓪꓴꓸ ꓔꓴˍ ꓡꓳ=ꓐꓯ ꓟꓴ ꓫꓬꓹ ꓟ ꓟꓬꓱꓽ ꓬꓰ ꓢꓲ 1837 ꓕꓯ ꓬꓲ ꓠꓬ꓾ Illinois ꓟꓵꓽ Springfield ꓗꓪ ꓚꓵꓸ ꓗꓷ ꓢꓲ ꓾ ꓙꓵꓽ ꓗ ꓔꓯ ꓟꓳꓸ ꓚꓴꓽ ꓬꓲꓸ ꓖꓶˍ ꓟ John T. Stuart Company ꓗꓪ ꓟꓬꓱꓽ ꓬꓰ ꓪꓴꓸ ꓔꓴˍ ꓡꓳ=

ꓬꓲꓸ ꓞꓲꓼ 33 ꓘꓳꓼ ꓙꓳ ꓡꓹ ꓟ ꓾ 11 ꓦ 4 ꓠꓬꓲ 1842 ꓕꓯ Mary Todd ꓐꓰ ꓡꓯꓽ ꓒꓯꓹ ꓝꓸ ꓗꓷꓳ= ꓬꓲꓸ ꓔꓯ ꓤ ꓠꓱ 4 ꓫꓵꓸ ꓙꓳˍ ꓡꓳ= ꓬꓲ ꓪ ꓐꓴ ꓠꓬ꓾ Robert Lincoln, Edward Lincoln, Willie Lincoln, Tad Lincoln ꓐꓴ ꓥ ꓡꓳ=

1846 ꓕꓯ ꓬꓲ ꓔꓯ American ꓗꓴꓷꓼ ꓜꓴ ꓜꓲꓼ ꓔꓶꓸ ꓗꓪ ꓢꓲꓺˍ ꓟ ꓟꓶ ꓗꓷꓳ= 1860 ꓬꓲꓸ ꓞꓲꓼ 51 ꓘꓳꓼ ꓕꓯ ꓗꓴꓷꓼ ꓫꓵꓽ ꓜꓴ ꓙꓵꓽ ꓪ ꓔꓲꓸ ꓒꓬꓱꓼ ꓡ ꓗꓷꓳ= ꓖꓳ ꓕꓲ ꓝꓲꓸ ꓗꓪ ꓠꓬ American ꓗꓴꓷꓼ ꓗꓪ ꓮ ꓘꓶꓸ ꓫꓸ ꓔꓬ ꓟ ꓦꓬꓼ ꓠꓬꓲ ꓥ ꓡꓳ= American ꓗꓴꓷꓼ ꓖꓴ ꓪꓴꓸ ꓐꓰ ꓖꓴ ꓟꓶꓸ ꓠꓬ ꓗꓴꓷꓼ ꓘꓴꓽ ꓗꓪ ꓟ ꓙꓵꓽ ꓚꓱꓹ ꓐꓴ ꓔꓯ ꓟꓽ ꓠꓲꓹ ꓒꓴ ꓟ ꓪꓴꓸ ꓠꓬꓲ ꓥ ꓡꓳ=

ꓬꓲꓸ ꓪ ꓐꓴ ꓟꓽ ꓠꓲꓹ ꓒꓴ ꓟ ꓕꓲ ꓫꓵꓽ ꓠꓬ ꓚꓳꓺ ꓑ ꓣꓱꓽˍ ꓟ ꓤꓶꓻ ꓥ ꓡꓳ=  ꓖꓳ ꓡꓱ ꓥˍ ꓟꓲ ꓖꓴ ꓟꓶꓸ ꓕꓲ ꓛꓱꓽ ꓗꓪ ꓟ ꓟꓵꓽ ꓐꓴ ꓠꓬ ꓚꓳꓺ ꓑ ꓣꓱꓽˍ ꓟ ꓔꓯ ꓠꓲꓹ ꓫꓵˍ ꓡꓳ=ꓖꓴ ꓪꓴꓸ ꓕꓲ ꓛꓱꓽ ꓗꓪ ꓟ ꓟꓵꓽ ꓐꓴ ꓠꓬ ꓚꓳꓺ ꓑ ꓣꓱꓽˍ ꓟ ꓤꓶꓻ ꓔꓯ ꓟꓽ ꓠꓲꓹ ꓫꓵ= Abraham Lincoln ꓟꓲ ꓚꓳꓺ ꓑ ꓣꓱꓽˍ ꓟ ꓔꓯ ꓟꓽ ꓠꓲꓹ ꓫꓵ=

1960 ꓕꓯ ꓠꓬ republican ꓑ-ꓔꓲ ꓗꓪ ꓢꓽ ꓡ ꓙꓵꓽ ꓙꓵꓽ ꓪ ꓟꓲˍ ꓟꓶ ꓗꓷꓳ= ꓖꓳ ꓡꓱ ꓟꓶˍ ꓟ ꓠꓬ ꓖꓴ ꓪꓴꓸ ꓟꓵꓽ ꓐꓴ ꓗꓪ ꓐꓰ ꓬꓲꓸ ꓔꓯ ꓬꓰ ꓙˍ ꓟ ꓪꓴꓸ ꓠꓬꓲ ꓥ ꓡꓳ= ꓖꓳ ꓡꓱ ꓥˍ ꓟꓲ ꓖꓴ ꓟꓶꓽ ꓟꓵꓽ ꓗꓪ ꓐꓰ ꓠꓽ ꓬꓲ ꓔꓯ ꓟꓽ ꓔꓳꓹ ꓙ=

ꓢꓲꓽ ꓒ Abraham Lincoln ꓡꓰ ꓗꓴꓷꓼ ꓔꓯ ꓕꓲ ꓠꓲꓹ ꓕꓲ ꓪ ꓗꓷ ꓡꓰ ꓠ ꓓꓵꓽ ꓙ ꓞꓷꓹ ꓗꓷ ꓢꓲ꓾ 1861 ꓘꓳꓼ ꓕꓯ ꓠꓬ ꓗꓴꓷꓼ ꓘꓴꓽ ꓗꓪ ꓟꓯꓼ ꓓꓶꓽ ꓡꓯ ꓘꓳ ꓪꓴꓸ ꓔꓴ ꓡˍ ꓡꓳ= ꓟꓯꓼ ꓓꓶꓽ ꓡꓯ ꓘꓳꓹ ꓟ ꓠꓬ 4 ꓘꓳꓼ ꓛꓲ ꓥ ꓡꓳ=

1864 ꓘꓳꓼ ꓾ 1 ꓦ ꓟ 1 ꓠꓬꓲ ꓕꓯ ꓠꓬ Abraham Lincoln ꓠꓬ ꓖꓴ ꓟꓶꓸ ꓟꓵꓽ ꓗꓪ ꓟ ꓚꓳꓺ ꓑ ꓮ ꓙꓵꓽ ꓚꓳꓺ ꓑ ꓣꓱꓽˍ ꓟ ꓗꓪ ꓐꓰ ꓡꓲꓹ ꓗꓷ ꓝꓲˍ ꓟ ꓕꓳꓽ ꓶꓽ ꓒꓬꓽ ꓗꓪ ꓡꓯ-ꓟ ꓠꓬꓲꓸ ꓗꓷˍ ꓡꓳ=ꓬꓲꓸ ꓗꓴꓷꓼ ꓫꓵꓽ ꓜꓴ ꓙꓵꓽ ꓪ ꓔꓲ ꓒꓬꓱꓼ ꓡˍ ꓟˍ ꓡꓰ ꓐꓰ ꓾ ꓗꓴꓷꓼ ꓖꓴ ꓟꓶꓸ ꓗꓪ ꓟ ꓟꓵꓽ ꓐꓴ ꓠꓬ ꓗꓴꓷꓼ ꓫꓵꓽ ꓜꓴ ꓗꓪ ꓐꓰ ꓧꓹ ꓓꓳ ꓙꓰˍ ꓡꓳ= ꓐꓯ ꓠꓲꓹ ꓫꓵˍ ꓟ ꓠꓬ꓾ ꓖꓳ ꓡꓰ ꓫꓪꓸ ꓞꓷꓹ ꓗꓷ ꓗꓸ ꓠꓯꓸ ꓬꓲ ꓪ ꓐꓴ ꓠꓬ United State ꓗꓪ ꓐꓹ ꓟ ꓟꓵꓽ ꓒꓬꓱꓼ ꓠꓲꓹ ꓟꓽ ꓫꓵꓺ ꓳ=

ꓗꓴꓷꓼ ꓘꓴꓽ ꓗꓪ ꓟꓯꓼ ꓓꓶꓽ ꓡꓯ ꓘꓳꓹ ꓟ ꓠꓬ 1865 ꓾ 4 ꓦ 9 ꓠꓬꓲ ꓕꓯ ꓠꓽ ꓗꓷꓳ=ꓢꓲꓽ ꓒ Lincoln ꓠꓬ ꓗꓴꓷꓼ ꓔꓯ ꓕꓲ ꓠꓲꓹ ꓕꓲ ꓪ ꓗꓷ ꓡꓰ ꓝꓲ ꓠꓲꓹ ꓫꓵˍ ꓟ ꓥ ꓢꓲ꓾ ꓖꓴ ꓟꓶꓸ ꓟꓵꓽ ꓝꓮꓲꓸ ꓫꓬꓹ ꓟ ꓗꓪ ꓬꓰ ꓙ ꓗꓷꓳ=

ꓬꓲ ꓠꓬ American ꓚꓺ ꓟꓲꓽ ꓗꓪ ꓟꓽ ꓓ ꓪꓴꓽ ꓓꓰ ꓡꓰˍ ꓟ ꓢꓲꓽ ꓒ ꓕꓲ ꓣꓳ ꓥꓳ ꓐꓰ ꓑ ꓫꓬ ꓐꓴ ꓘꓳꓹ ꓣꓴˍ ꓟ ꓟꓶ ꓢꓴ ꓥꓳ= ꓗꓴꓷꓼ ꓘꓴꓽ ꓗꓪ ꓟꓯꓼ ꓓꓶꓽ ꓡꓯ ꓘꓳꓹ ꓟ ꓦꓬꓼ ꓠꓬꓲ ꓠꓯꓸꓼ ꓗꓪ ꓬꓲꓸ ꓙꓵꓽˍ ꓟ ꓐꓰ꓾ ꓡ ꓞꓳ ꓢꓲꓺ ꓡꓲꓺ ꓟ ꓙꓵꓽ ꓪ ꓔꓯ ꓗꓽ ꓕꓸ ꓦꓽ ꓖꓶꓽˍ ꓟ ꓠꓬ ꓾ ꓬꓲꓸ ꓔꓯ American ꓓꓽ ꓒ ꓒꓬꓱꓼ ꓡ ꓝꓲˍ ꓟ ꓥ ꓡꓳ=

ꓬꓲꓸ ꓒꓬꓱꓽ ꓟꓬꓻ ꓠꓬ American ꓒꓴꓻ Pennies ꓐꓰ 5-dollar ꓒꓴꓻ ꓒꓬꓽ ꓥ ꓡꓳ=

ꓬꓲ ꓠꓬ Rushmore ꓪꓽ ꓚꓲꓺ ꓗꓪ ꓐꓻˍ ꓟ ꓥ ꓢꓲ꓾ ꓬꓲꓸ ꓝꓲꓸ ꓟꓶ ꓓꓴ ꓠꓬ Washington DC ꓗꓪ ꓥ ꓡꓳ=

ꓗꓴꓷꓼ ꓘꓴꓽ ꓗꓪ ꓟꓯꓼ ꓓꓶꓽ ꓡꓯ ꓘꓳꓹ ꓟ ꓡꓳꓹ ꓬꓰ ꓗꓸ ꓠꓯꓸ ꓕꓲꓽ ꓠꓽ ꓟꓽ ꓛꓲ ꓡ ꓢꓰꓽ ꓕꓯ꓾ Lincoln ꓐꓰ ꓬꓲꓸ ꓦꓲꓻ ꓢꓲ ꓟ ꓐꓴ Washington DC ꓗꓪ ꓟ Ford ꓢꓯꓸ ꓐꓬꓱꓽ ꓟꓸ ꓖꓶꓽ ꓖꓴ ꓗꓪ ꓢꓯꓸ ꓐꓬꓱꓽ ꓡꓳꓸ ꓔꓬ ꓡꓳ= ꓖꓳ ꓕꓯ ꓬꓲꓸ ꓔꓯ John Wilkes Booth ꓐꓰ ꓟꓬꓱ ꓔ ꓟ ꓡ ꓞꓳ ꓕꓲ ꓣꓳ ꓬꓲꓸ ꓪꓴꓸ ꓓꓵꓺ ꓗꓪ ꓡꓽ-ꓛꓬꓴꓸ (ꓑꓳꓻ ) ꓐꓰ ꓐꓶꓻ ꓗꓷꓳ=

Abraham Lincoln ꓠꓬ 1865 ꓘꓳꓼ ꓠꓯꓼ ꓙꓵꓹ ꓕꓯ ꓫꓵꓻ ꓳ꓾ ꓬꓲꓸ ꓞꓲꓼ ꓠꓬ 56 ꓘꓳꓼ ꓥ ꓡꓳ=

ꓬꓲꓸ ꓠꓬ ꓢꓰꓼ ꓗꓷˍ ꓟ ꓟꓶ ꓢꓴ American ꓗꓪ ꓓꓽ ꓪꓴꓸ ꓟ ꓢꓲꓽ ꓒ ꓕꓲ ꓣꓳ ꓥ ꓡꓳ=

Add new comment

6 + 0 =