Capistrano ꓡꓳ ꓒꓱ ꓗꓪ ꓟ ꓙꓲꓻ ꓫꓬ ꓢꓴ John

Capistrano ꓡꓳ ꓒꓱ ꓗꓪ ꓟ ꓙꓲꓻ ꓫꓬ ꓢꓴ John (1386-1456)

Franciscan ꓔꓲꓺ ꓒꓽ ꓜꓴ ꓗꓪ ꓟꓬꓱꓻ ꓓꓳꓽ ꓙꓳˍ ꓟ ꓶꓼ ꓓꓳꓽ ꓫꓱꓹ ꓓꓳꓽ ꓚꓺ ꓢꓴ ꓕꓲ ꓣꓳ ꓥ ꓟ ꓙꓲꓻ ꓫꓬ ꓢꓴ St.John ꓔꓯ ꓲ-ꓔ-ꓡꓲ ꓗꓴꓷꓼ Capistrano ꓡꓳ ꓒꓱ ꓗꓪ 1386 ꓘꓳꓼ ꓕꓯ ꓦꓵꓻ ꓔ ꓡꓳ=ꓙꓵꓽ ꓗ ꓚꓱꓹ ꓗꓪ ꓐꓰ ꓟꓽ ꓞ ꓓꓹ ꓟ ꓙꓵꓽ ꓪꓴꓸ ꓛꓴꓽ ꓟꓶ ꓗꓷ ꓢꓲ ꓗꓸ ꓠꓯꓸ ꓬꓲꓸ ꓠꓬ Perugia ꓗꓪ ꓙꓵꓽ ꓠꓹ ꓟ ꓙꓵꓽ ꓪꓽ ꓟꓶ ꓗꓷꓳ=ꓖꓳ ꓗꓪ ꓐꓰ ꓒꓬꓱ ꓐꓲ ꓢꓲ꓾ ꓖꓴꓽ ꓙꓴꓽ ꓮꓽ ꓟꓬꓹ ꓙꓳˍ ꓟ ꓤ ꓟꓶ ꓤ ꓕꓲ ꓣꓳ ꓐꓰ ꓡꓯꓽ ꓒꓯꓹ ꓝ ꓗꓷꓳ=

1416 ꓘꓳꓼ ꓛꓲꓺ ꓡˍ ꓕꓯ Perugia ꓐꓰ Malatestas ꓠꓬꓲꓽ ꓗꓴꓸ ꓚꓸꓼ ꓗꓪ ꓢꓰꓼ ꓡꓯꓽ ꓘꓳˍ ꓟ ꓗꓪ ꓬꓲꓸ ꓔꓯ ꓐꓱ ꓠꓹ ꓟ ꓧꓳꓽ ꓔꓯꓹ ꓙꓰ ꓗꓷꓳ=

ꓖꓳ ꓗꓸ ꓠꓯꓸꓼ ꓬꓲꓸ ꓦꓲ ꓢꓲ ꓟ ꓐꓰ ꓧꓹ ꓡꓯꓽ ꓘꓳ ꓗꓷ ꓢꓲ ꓾ ꓬꓲꓸ ꓠꓬ Franciscan ꓔꓲꓺ ꓒ ꓜꓴ ꓗꓪ  ꓐꓻ ꓢꓴ ꓕꓲ ꓣꓳ ꓒꓬꓱꓼ ꓡꓻꓳ=ꓗꓳꓸ ꓗꓷ ꓟ ꓬꓲꓸ ꓤꓶ ꓔꓯ ꓝꓮꓲꓸ ꓕꓲ ꓧꓪꓹ ꓬꓲꓸ ꓫꓵꓼ ꓒꓬꓱꓼ ꓡ ꓝꓲ ꓠꓹ ꓟ Perugia ꓗꓴꓷꓼ ꓗꓪ ꓬꓲꓸ ꓛꓬ ꓗꓷ ꓟ ꓝꓴꓲꓸ ꓮꓽ ꓙꓵꓽ ꓔꓯ ꓐꓳ ꓢꓲ꓾ ꓬꓲꓸ ꓗꓶꓸ ꓝꓲꓸ ꓗꓪ ꓞꓳꓹ ꓔ ꓢꓲ ꓠꓬ꓾ꓮ-ꓟꓴ ꓕꓲ ꓟ ꓜꓲꓽ ꓢꓲ ꓙꓰ ꓙꓰ ꓡ ꓡ ꓬꓰ ꓗꓷꓳ= ꓚꓳ ꓑꓸ ꓕꓲꓽ ꓣꓳ ꓡꓰ ꓬꓰ ꓢꓲ Friar Miner ꓔꓲꓺ ꓒ ꓢꓳ ꓜꓳꓽ ꓗꓪ ꓓꓵꓽ ꓪ ꓠꓹ ꓟ ꓓꓰꓽ ꓗꓷꓳ=ꓖꓳ ꓕꓲ ꓙꓵꓹ ꓕꓯ ꓬꓲꓸ ꓠꓬ 30 ꓘꓳꓼ ꓙꓳˍ ꓥˍ ꓟꓲ꓾ ꓬꓲꓸ ꓪꓴꓸ ꓟ ꓢꓲꓽ ꓫꓬ ꓑ ꓑ ꓔꓯ ꓟꓽ ꓟꓶ ꓗꓷ ꓢꓰꓼ=

Friar Miner ꓔꓲꓺ ꓒ ꓢꓳ ꓜꓳꓽ ꓔꓯ ꓙꓵꓽ ꓢꓴ ꓔꓲꓺ ꓒ ꓠꓬ꓾ ꓙꓲꓻ ꓫꓬ ꓢꓴ John ꓬꓲꓸ ꓪꓴ-ꓢ ꓔꓯ ꓡꓯꓼ ꓙꓱˍ ꓟ ꓗꓪ ꓮ ꓡꓰ ꓪꓴꓽ ꓛꓲ ꓠꓲꓹ ꓟ ꓙꓳˍ ꓟ ꓐꓰ꓾ ꓬꓲꓸ ꓠꓲꓹ ꓟ ꓮ ꓡꓰ ꓪꓴ ꓒꓴˍ ꓟ ꓔꓯ ꓢꓷ ꓡꓰ ꓠꓹ ꓟ ꓬꓲꓸ ꓫꓵꓽ ꓬꓲꓸ ꓙꓰ ꓫꓵꓽ ꓠꓬꓲ ꓗꓷꓳ=ꓖꓳ ꓟ ꓔꓯ ꓙꓲꓻ ꓫꓬ ꓢꓴ John ꓠꓬ ꓙꓵꓻ ꓠꓲꓹ ꓐꓰ ꓙꓽ ꓣꓳˍ ꓟ ꓠꓲꓹ ꓟ ꓡꓰ ꓜꓲꓽ ꓗꓷꓳ=1420ꓘꓳꓼ ꓛꓲ ꓡˍ ꓕꓯ ꓬꓲꓸ ꓠꓬ ꓔꓲꓺ ꓒꓽ ꓙꓵꓽ ꓪ ꓟꓶ ꓡꓰꓳ=ꓖꓳ ꓗꓸ ꓠꓯꓸꓼ ꓬꓲꓸ ꓶꓼ ꓓꓳꓽ ꓫꓱꓹ ꓓꓳꓽ ꓚꓺ ꓒꓬꓱꓻ ꓙꓰˍ ꓟ  Italian꓾ Germany  ꓾Hungarian ꓗꓴꓷꓼ ꓗꓪ ꓟꓬꓱꓽ ꓓꓳ ꓙꓳ ꓡˍꓳ=

1456 ꓘꓳꓼ ꓕꓯ ꓔꓲꓺ ꓒꓽ ꓪꓺ ꓔꓲ ꓡꓰ ꓕꓵꓼ ꓪ ꓖꓶꓽˍ ꓟ ꓗꓪ ꓐꓰ꓾ Turks ꓞꓳ ꓫꓵꓽ ꓐꓴ ꓐꓰ  ꓢꓰꓼ ꓡꓯꓽ ꓘꓳ ꓔꓬꓹ ꓟ Crusade ꓟꓯꓼ ꓐꓴ ꓔꓯ ꓶꓼ ꓓꓳ ꓫꓱꓹ ꓓꓳꓽ ꓚꓺ ꓟꓸ ꓖꓶ ꓪ ꓡꓰꓳ=Turks ꓞꓳ ꓫꓵꓽ ꓐꓴ ꓠꓬ Belgrate  ꓡꓳ ꓒꓱ ꓕꓲꓽ  ꓚꓳꓺ  ꓡꓳꓺ ꓗꓪ ꓡꓳꓽ ꓔ ꓢꓲ꓾ Europe ꓕꓲꓽ ꓟ ꓡꓱꓸꓼ ꓔꓯ ꓢꓰꓼ ꓡꓯꓽ ꓘꓳ ꓠꓹ ꓟ ꓬꓰ ꓔꓬꓹ ꓟ ꓬꓲꓸ ꓙꓵꓹ ꓥ ꓡꓳ=ꓙꓲꓻ ꓫꓬ ꓢꓴ John ꓠꓬ 7 ꓪꓸ (ꓥ ꓠꓬ) 7 ꓟꓶꓽ ꓤ ꓡꓰꓽ ꓙꓳˍ ꓟ Crusade ꓟꓯꓼ ꓜꓴ ꓐꓴ ꓔꓯ ꓛꓳꓸ ꓡꓰˍ ꓟ ꓗꓪ ꓐꓰ ꓧꓪꓸ ꓡꓰ ꓠ ꓛꓲ ꓧꓳꓽ ꓪꓴꓸ ꓟꓴ ꓗꓷꓳ= ꓖꓳ ꓟ ꓗꓪ ꓐꓰ ꓦ ꓐ 3 ꓟ ꓡꓳꓹ ꓬꓰ ꓗꓸ ꓠꓯꓸꓼ ꓙꓲꓻ ꓫꓬ ꓢꓴ John ꓠꓬ ꓠꓻ ꓓꓽ ꓟ ꓟꓶ ꓡꓰ ꓢꓲ꓾ ꓫꓵꓻ ꓗꓷꓳ=