ꓐꓯ ꓒꓬˍ ꓢꓴ ꓔꓯ ꓕ ꓙꓳꓺ ꓠꓯ ꓟ (reflection)

ꓮ ꓙꓵꓽ ꓢꓴ ꓧꓪ. ꓧꓪ.꓾ ꓠꓬꓲ ꓠꓬꓲ ꓵ ꓠ, ꓟ ꓢꓲ ꓫꓬ ꓕꓳ ꓶ ꓠꓬ ꓡꓴ‐ꓘ ꓕꓳ ꓶ 11ꓽ 14‐23 ꓗꓪ ꓛꓲ ꓥꓳ꓿ ꓢꓲ ꓒ ꓬꓰ‐ꓢꓴ ꓠꓬ ꓠꓲꓽ ꓖꓼ ꓓꓳꓺ ꓖꓶ ꓕꓯ ꓕꓲꓽ ꓐꓱ ꓟ ꓠꓬ ꓬꓲ. ꓔꓯ ꓙꓲˍ ꓟ ꓟꓽ ꓟꓳ꓿ ꓢꓲ ꓒ ꓬꓰ‐ꓢꓴ ꓠꓬ ꓠꓲꓽ ꓪ ꓔꓲ ꓐꓲ‐ꓜꓲ‐ꓐꓷ ꓢꓯꓼ ꓗꓪ ꓐꓰ ꓠꓲꓽ ꓖꓼ ꓓꓳˍ ꓡꓳ ꓐꓰ ꓬꓲ. ꓔꓯ ꓐꓯ ꓡꓳ꓿

ꓬꓲ ꓤ ꓠꓬꓲ ꓤ ꓐꓴ‐ꓳ꓾ ꓢꓲ, ꓜꓲ ꓕꓲꓽ ꓜꓲ ꓐꓯ ꓟ  ꓮ ꓡꓰ ꓫꓵꓽ ꓢꓲ, ꓜꓲ ꓥ ꓐꓯ ꓟ ꓬꓲ. ꓢꓲꓽ ꓔꓯ ꓡꓳ. ꓠꓬꓲ ꓗꓷ ꓠꓬ ꓢꓷ. ꓓ ꓡꓳ꓿ ꓡ ꓞꓳ ꓕꓲꓽ ꓣꓳ ꓙꓲ ꓡ꓾ ꓟꓽ ꓙꓲ ꓡ ꓐꓯ ꓟ ꓠꓬ ꓬꓲ. ꓫ ꓪ ꓕꓱˍ ꓟ꓾ ꓬꓲ. ꓟꓬꓱꓽ ꓬꓰˍ ꓟ ꓙꓲ ꓟꓽ ꓙꓲ ꓐꓰ ꓟ ꓔꓯ ꓡꓳ. ꓢꓲ ꓢꓷ. ꓓ ꓡꓳ꓿ ꓟꓬ ꓠꓬꓲ ꓬꓲ. ꓛꓳ ꓫꓱ, ꓟ꓾ ꓬꓲ. ꓟꓬꓱꓽ ꓬꓰˍ ꓟ ꓗꓪ ꓐꓰ ꓣꓳꓽ ꓢꓷ. ꓪ ꓓ ꓡꓳ꓿ ꓕꓱ ꓐꓱ ꓟ ꓠꓬ ꓟꓷ, ꓠꓷ, ꓮ ꓘꓶ. ꓛꓵˍ ꓥ ꓟꓲ꓾ ꓬꓰ ꓟ ꓠꓬ ꓮ ꓘꓶ. ꓘꓪꓽˍ ꓡꓳ꓿ ꓫ ꓪ ꓕꓱˍ ꓟ ꓕꓲꓽ ꓙꓰ ꓬꓰˍ ꓟ ꓕꓲꓽ ꓙꓰ ꓐꓰ ꓓ ꓗꓴ. ꓡꓳ꓿

ꓠꓬꓲ. ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓠꓬ ꓢꓲ ꓒ ꓬꓰ‐ꓢꓴ ꓠꓬ ꓙꓲˍ ꓟ ꓟꓬꓰꓽ ꓬꓰ ꓡꓳ꓿ ꓠꓲꓽ ꓜꓲꓽ ꓓ ꓢꓴ ꓔꓯ ꓠꓲꓽ ꓖꓼ ꓓꓳꓺ ꓖꓶꓽˍ ꓡꓳ꓿ ꓕꓱ ꓟ ꓠꓬ ꓙꓲˍ ꓟ ꓟꓬꓱꓽ ꓥꓳ꓿ ꓠꓻ ꓢꓴ ꓒꓬ ꓢꓴ ꓔꓯ ꓠꓻ ꓫꓬ, ꓖꓶꓽˍ ꓟ꓾ ꓕꓱ ꓟ ꓥˍ ꓟꓲ ꓙꓲˍ ꓟ ꓟꓬꓱꓽ ꓥꓳ꓿ ꓖꓳ ꓡꓱ ꓐꓯ ꓥˍ ꓟꓲ ꓬꓰ‐ꓢꓴ ꓔꓯ ꓙꓲˍ ꓟ ꓟꓽ ꓟꓳ꓿

ꓢꓲ ꓒ ꓬꓰ‐ꓢꓴ ꓮ ꓫꓵꓽ ꓬꓰˍ ꓥ ꓟꓲ꓾ ꓙꓲˍ ꓟ ꓟꓽ ꓟꓳ ꓫꓵꓽ ꓙꓳˍ ꓡꓳ꓿ ꓖꓳ ꓡꓱ ꓥˍ ꓟꓲ ꓢꓲ ꓒ ꓬꓰ‐ꓢꓴ ꓠꓬ ꓠꓲ, ꓟ ꓟꓽ ꓙꓬꓺ ꓡꓰ ꓐꓰ ꓬꓲ. ꓬꓰ ꓜꓲ ꓙꓳˍ ꓟ ꓬꓲ. ꓬꓰ ꓙꓰ ꓡꓳ꓿

ꓣꓳ ꓔꓯꓺ ꓢꓳ ꓓꓴ ꓥꓳ꓿ ꓣꓳꓽ ꓤꓶ ꓗꓪ ꓕꓲꓽ ꓖ ꓕꓲꓽ ꓧꓪ, ꓠꓬ ꓙꓲˍ ꓟ ꓟꓬꓱꓽ ꓣꓳꓽ ꓬꓰ ꓥˍ ꓟꓲ꓾ ꓣꓳꓽ ꓔꓯ ꓬꓲ. ꓔꓱ, ꓟꓽ ꓟꓳ ꓫꓵ꓾ ꓙꓲˍ ꓟ ꓟꓽ ꓟꓳ ꓫꓵꓽ ꓮ ꓘꓶ. ꓙꓳ ꓡ ꓥꓳ꓿ ꓖꓳ ꓡꓱ ꓥˍ ꓟꓲ ꓠꓲ, ꓟ ꓕ ꓫ꓿ ꓬꓲ. ꓪ ꓟꓷ ꓠꓷ ꓘꓶꓽ ꓗꓪ ꓠꓴ ꓦꓲꓻ ꓔꓯ ꓕ ꓫꓬ,꓾ ꓪꓴ‐ꓢ ꓐꓯ ꓘꓶ ꓗꓪ ꓡꓰ ꓠꓴ ꓤꓶꓻ ꓦꓲꓻ ꓔꓯ ꓫꓬ꓿

ꓣꓳꓽ ꓥˍ ꓟꓲ ꓢꓴ ꓙꓲˍ ꓟ ꓬꓰˍ ꓕꓯ꓾ ꓣꓳꓽ ꓗ ꓛꓲ ꓠꓯ, ꓡꓳ꓿ ꓣꓳ ꓫꓵꓽ ꓧꓪꓽ ꓠꓯꓼ ꓟꓽ ꓧꓳ, ꓫꓵꓽ ꓢꓴ ꓐꓴ ꓠꓬ ꓬꓲ. ꓪ ꓙꓲˍ ꓟ ꓬꓰ ꓔꓬ, ꓔꓯ ꓣꓳꓽ ꓗ, ꓛꓲ ꓠꓯ ꓡꓳ꓿

ꓣꓳꓽ ꓮ ꓙꓵꓽ ꓠꓬ ꓕꓲꓽ ꓣꓳ ꓛꓳ ꓕꓲ ꓣꓳ ꓓꓵꓽ ꓙ ꓚꓱ, ꓟꓽ ꓪ ꓡꓯ ꓘꓳ, ꓥˍ ꓟꓲ ꓮ ꓟꓽ ꓥˍ ꓟꓲ ꓙꓲˍ ꓟ ꓬꓰ ꓔꓬ, ꓕꓯ ꓗ ꓛꓲ ꓠ ꓗ ꓡꓳ ꓟꓽ ꓥ ꓡ?꓿

ꓖꓳ ꓡꓱ ꓠꓬꓲ꓾ ꓠꓬꓲ. ꓠꓬꓲ ꓢꓯꓼ ꓪ ꓣꓴ ꓓꓴ ꓠꓬ ꓣꓳꓽ ꓬꓰˍ ꓟ ꓔꓯ ꓟꓽ ꓙꓲ ꓐꓯ ꓢꓴ ꓔꓯˍ ꓥ ꓟꓲ ꓠꓴ, ꓠꓲ, ꓟ ꓕ ꓗꓷ꓾ ꓢꓴ ꓙꓲˍ ꓟ ꓔꓯ ꓬꓰ ꓔꓬ, ꓟ ꓠꓴ ꓟꓳ ꓥˍ ꓟꓲ ꓟꓽ ꓐꓯ ꓒꓬ, ꓒꓬ, ꓐꓰ ꓗ ꓛꓲ꓿ ꓕꓱ ꓡꓱ ꓬꓰ ꓢꓴ ꓠꓬ ꓢꓲ ꓒ ꓠꓲ, ꓫꓵˍ ꓟ ꓤꓶ ꓒꓬꓱꓼ ꓡ ꓥꓳ꓿ ꓫ ꓟꓳ꓿