ꓒ-ꓡꓲ-ꓢꓷ ꓐꓴ ꓡꓰ ꓬꓰ-ꓢꓴ ꓔꓯ ꓫꓵꓽ ꓠꓬꓲˍ ꓟ

ꓠꓲꓹ ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓬꓲ ꓠꓬꓲ ꓟ ꓶꓼ ꓓꓳ ꓫꓱꓹ ꓓꓳ ꓕꓳꓽ ꓶ ꓠꓬ ꓟ-ꓘꓳ ꓕꓳꓽ ꓶ 12ꓽ13-17 ꓥ ꓡꓳ= ꓢꓲꓽ ꓫꓬ ꓕꓳ ꓶ ꓗꓪ ꓠꓬ ꓒ-ꓡꓲ-ꓢꓷ ꓐꓴ ꓐꓰ ꓔꓲꓺ ꓒ ꓪꓴꓸ ꓓꓵ ꓣꓱꓽ ꓢꓴ ꓐꓴ ꓡꓰ ꓢꓲꓺ ꓒ ꓬꓰ-ꓢꓴ ꓔꓯ ꓙꓰ ꓢꓲ ꓢꓲ-ꓢ ꓔꓯ ꓬꓲꓸ ꓘꓳꓸ ꓖꓶ ꓠꓯꓹ ꓥ꓾ ꓟꓽ ꓖꓶ ꓠꓯꓹ ꓥ ꓐꓯ ꓟ ꓔꓯ ꓠꓺ ꓠꓬꓲ ꓔꓬ ꓡꓳ= ꓬꓲ ꓪ ꓐꓴ ꓠꓬ ꓬꓰ-ꓢꓴ ꓬꓰ ꓚꓳ ꓬꓰ ꓛꓬ ꓗꓷ ꓟ꓾ ꓐꓯ ꓚꓳ ꓐꓯ ꓛꓬ ꓗꓷ ꓟ ꓔꓯ ꓡꓰꓽ ꓥꓳ ꓡꓳꓸ ꓔꓬ ꓟ ꓪꓴꓸ ꓠꓬꓲ ꓬꓰ-ꓢꓴ ꓔꓯ ꓫꓵꓽ ꓠꓬꓲ ꓢꓲ ꓕꓲ ꓙꓰꓽ ꓑꓶꓸ ꓝ ꓕꓲ ꓙꓰꓽ ꓠꓺ ꓠꓬꓲ ꓔꓬ ꓡꓳ=

ꓖꓳ ꓡꓱ ꓠꓬꓲ ꓬꓰ-ꓢꓴ ꓡꓰ ꓬꓲ ꓪ ꓔꓯ ꓒꓴ ꓕꓲ ꓒꓬꓸ ꓓꓰꓽ ꓗꓷ ꓢꓲ ꓒꓴ ꓕꓱ ꓟ ꓗꓪ ꓮ ꓟ ꓐꓬꓱꓽ ꓔꓳꓹ ꓠꓷꓼ ꓓꓹ ꓡ꓾ ꓐꓰ ꓠ ꓠꓬꓲˍ ꓡꓳ= ꓬꓲ ꓪ ꓐꓴˍ ꓟꓲ ꓢꓲ-ꓢ ꓐꓬꓱꓽ ꓓꓹ ꓡꓳ ꓐꓰ ꓒꓳꓹ ꓖꓶˍ ꓕꓯ꓾ ꓬꓰ-ꓢꓴ ꓡꓰ ꓢꓲ-ꓢ ꓔꓯ ꓟ ꓠꓬ ꓢꓲ-ꓢ ꓔꓯ ꓖꓶꓽ꓾ ꓪꓴ-ꓢ ꓔꓯ ꓟ ꓪꓴ-ꓢ ꓔꓯ ꓖꓶꓽ ꓐꓰ ꓐꓯ ꓖꓶˍ ꓡꓳ= ꓠꓬꓲꓸ ꓠꓬꓲ ꓟ ꓶꓼ ꓓꓳ ꓫꓱꓹ ꓓꓳ ꓕꓳ ꓶ ꓗꓪ ꓐꓰ ꓣꓳ ꓔꓯ ꓬꓲ ꓬꓰ ꓝꓲ ꓠꓲꓹ ꓫꓵˍ ꓟ ꓠꓬ꓾ ꓟꓲ ꓠꓯ ꓕꓱ ꓟ ꓗꓪ ꓣꓳ ꓬꓰˍ ꓔꓶꓻ ꓙꓱꓼ ꓠꓬ ꓬꓳꓸ ꓚꓰ ꓓꓰꓺ ꓡꓰˍ ꓟ ꓥꓳ꓾ ꓐꓯ ꓟ ꓔꓯ ꓟꓸ ꓖꓶ ꓡ ꓔꓬ ꓟ ꓥ ꓡꓳ=

ꓐꓯ ꓧꓪꓸ ꓘꓶꓽ ꓕꓲꓽ ꓘꓶꓽ ꓙꓳˍ ꓡꓳ ꓡꓯꓼ ꓗꓪ ꓓꓶꓽ ꓟ ꓫꓱꓸ ꓡꓯ ꓘꓳ ꓥˍ ꓟꓲ꓾ ꓬꓲꓸ ꓔꓶꓺ ꓙꓱꓽ ꓠꓬ ꓟꓽ ꓫꓱꓸ ꓡꓯ ꓘꓳ= ꓔꓯꓺ ꓥꓳ ꓣꓳꓽ ꓣꓳꓽ ꓗˍ ꓛꓲꓽ ꓕꓯ ꓓꓶꓽ ꓟ ꓡꓯꓼ ꓗꓪ ꓢꓯꓼ ꓐꓰ ꓢꓴ ꓔꓯ ꓫꓸ ꓚꓲꓸ ꓕꓯ ꓓꓶꓽ ꓟ ꓡꓯ ꓗꓪꓺ ꓢꓯꓼ ꓥˍ ꓟꓲ ꓫꓱꓸ ꓡꓯ ꓘꓳ ꓡꓳ= ꓖꓳ ꓡꓱ ꓥˍ ꓟꓲ ꓬꓲꓸ ꓔꓶꓺ ꓙꓱꓼ ꓠꓬ ꓟꓽ ꓫꓱꓸ ꓡꓯ ꓘꓳ= ꓕꓱ ꓟ ꓡꓰ ꓐꓰ ꓣꓳ ꓤꓶ ꓗꓪ ꓕꓲ ꓠꓬꓲ ꓡꓰ ꓕꓲꓽ ꓠꓬꓲ ꓛꓳ ꓫꓱꓽ ꓙꓰ ꓔꓬ ꓕꓯ꓾ ꓣꓳꓽ ꓬꓰ ꓔꓬꓹ ꓟ ꓠꓱꓸ ꓐꓯꓼ ꓢꓴ ꓐꓰ ꓫꓱꓸ ꓡꓯ ꓘꓳ ꓥˍ ꓟꓲ꓾ ꓣꓳꓽ ꓬꓰ ꓔꓬꓹ ꓟ ꓔꓶꓺ ꓙꓱꓽ ꓟꓽ ꓫꓱꓸ ꓡꓯ ꓘꓳ=

            ꓠꓬꓲꓸ ꓠꓬꓲꓸ ꓟꓸ ꓟꓲꓽ ꓗꓪˍ ꓟꓲ ꓒ-ꓡꓲ-ꓢꓲ ꓐꓴ ꓐꓰ ꓔꓲꓺ ꓒ ꓪꓴꓸ ꓓꓵ ꓣꓱꓽ ꓢꓴ ꓐꓴ ꓠꓬ ꓢꓲ ꓒ ꓬꓰ-ꓢꓴ ꓔꓯ ꓤꓹ ꓠꓬꓲꓹ ꓫꓵꓽ ꓠꓬꓲ ꓠꓹ ꓡˍ ꓡꓳ= ꓠꓱꓸ ꓐꓯ ꓑ ꓫꓬ ꓡ ꓞꓳ ꓐꓴ ꓠꓬ ꓢꓲ ꓒ ꓬꓰ-ꓢꓴ ꓔꓯ ꓠꓲꓹ ꓠꓵˍ ꓠꓬꓲ꓾ ꓢꓲ ꓒ ꓬꓰ-ꓢꓴ ꓐꓯ ꓘꓶꓽ ꓔꓯ ꓑꓹ ꓙ ꓠꓲꓹ ꓫꓵˍ ꓠꓬꓲ ꓡˍ ꓡꓳ=

            ꓣꓳꓽ ꓤꓶ ꓗꓪ ꓮ ꓡꓰ ꓥ ꓡ? ꓣꓳꓽ  ꓕꓲꓽ ꓠꓬꓲ ꓕꓲꓽ ꓠꓬꓲ ꓬꓰ ꓔꓬꓹ ꓟ ꓠꓬ꓾ ꓮ ꓫꓵꓽ ꓐꓶꓸ ꓓꓴ ꓥˍ ꓡ= ꓬꓲꓸ ꓬꓲ ꓢꓲ ꓙꓳ ꓡ? ꓬꓲꓸ ꓬꓲ ꓢꓲ ꓙꓳ ꓠꓬ ꓕꓱ ꓬꓲꓸ ꓬꓲ ꓢꓲ ꓟ ꓮ ꓫꓵꓽ ꓥ ꓡ?

            ꓙꓲ ꓫꓬꓹ ꓢꓴ ꓒꓳ ꓡꓳ ꓠꓬ ꓕꓱ ꓡꓰ ꓐꓯ ꓔ ꓡꓳ= ꓥꓪ ꓠꓬ ꓥꓪ ꓚꓲꓸ ꓛꓬ ꓚꓳꓽ ꓚꓲꓸ ꓛꓬ ꓮ ꓔꓳꓸ ꓛꓴ ꓐꓹ ꓡ ꓠꓹ ꓛꓲ ꓙꓵꓹ ꓠꓲꓹ ꓙꓳˍ ꓥ ꓟꓲ꓾ ꓠꓵ ꓠꓲꓹ ꓟꓽ ꓙꓳ ꓥꓳ ꓐꓯ ꓠꓬ ꓬꓲꓸ ꓖꓳꓽ ꓥꓳ= ꓪꓽ ꓙꓵ ꓔꓯ ꓡꓵꓹ  ꓘꓴ ꓠꓹ ꓛꓲ ꓙꓵꓹ ꓠꓲꓹ ꓙꓳ ꓥˍ ꓟꓲ ꓥꓪ ꓔꓯ ꓠꓵꓹ ꓠꓲꓹ ꓟꓽ ꓙꓳ ꓐꓯ ꓠꓬ ꓬꓲꓸ ꓖꓳꓽ ꓥꓳ ꓐꓰ ꓬꓲꓸ ꓐꓯ ꓔ ꓬꓰˍ ꓡꓳ= ꓬꓲꓸ ꓐꓱ ꓶ ꓠꓬ ꓠꓵꓹ ꓠꓲ  ꓕꓱ ꓟ ꓠꓬ ꓬꓮꓳꓸ ꓚꓲꓽ ꓓꓰ ꓡꓰ ꓟ ꓥꓳ=

            ꓣꓳꓽ ꓥˍ ꓟꓲ ꓣꓳꓽ ꓪꓽ ꓘꓴ ꓔꓬꓹ ꓟ꓾ ꓣꓳ ꓬꓰ ꓔꓬꓹ ꓟ ꓙꓲꓻ ꓟ ꓮ ꓙꓵꓽ ꓠꓬ ꓮ ꓫꓵꓽ ꓑꓶꓸ ꓓꓴ ꓬꓰ ꓔꓬ ꓡ? ꓠꓱꓸ ꓐꓯ ꓢꓴ ꓬꓰ ꓔꓬꓹ ꓟ ꓑꓶꓸ ꓓꓴ ꓥ ꓡ? ꓢꓴ ꓬꓰ ꓟ ꓑꓶꓸ ꓓꓴ ꓣꓳꓽ ꓔꓯ ꓐꓯ ꓡ ꓟ ꓙꓳꓸ ꓟ ꓑꓶꓸ ꓓꓴ ꓥ ꓡ? ꓕꓱ ꓟ ꓑꓶꓸ ꓓꓴ ꓥꓳ ꓐꓯ ꓕꓯ ꓠ꓾ ꓣꓳꓽ ꓥ ꓟꓲ ꓒ-ꓡꓰ-ꓢꓲ ꓐꓴ ꓡꓰ ꓐꓯ ꓒꓬꓱꓼ ꓬꓰ ꓥꓳ=

            ꓖꓳ ꓡꓱ ꓠꓬꓲ ꓣꓳꓽ ꓬꓰꓹ ꓟ ꓮ ꓙꓵꓽ ꓔꓯ ꓪꓴ-ꓢ ꓔꓯ ꓠꓲꓹ ꓠꓵ ꓟ ꓑꓶꓸ ꓓꓴ ꓬꓰ ꓡꓯ= ꓕꓱ ꓡꓱ ꓬꓰ ꓠꓬ ꓪꓴ-ꓢ ꓡꓰ ꓖꓶꓽ ꓡ ꓟ ꓶꓼ ꓤ ꓫꓱꓹ ꓤ ꓮ ꓡꓰ ꓥˍ ꓟꓲ ꓟꓶ ꓥꓳ=