ꓛꓳꓽ ꓒꓯꓹ ꓞꓲ ꓠꓬꓲ ꓣꓳ ꓔꓯ ꓢꓲꓸˍ ꓟ

ꓕꓲꓽ ꓟꓵꓽ ꓕꓲ ꓫꓰ ꓗꓪ ꓔꓬ ꓟ ꓮꓽ ꓐꓽ ꓮꓽ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳ ꓶ ꓠꓬ ꓡꓴ-ꓘ=6ꓽ12-16 ꓥ ꓡꓳ= ꓠꓬꓲꓸ ꓠꓬꓲ ꓠꓬ ꓢꓲꓺ ꓒ ꓬꓰ-ꓢꓴ ꓬꓲ ꓝꓲ ꓓꓴ ꓞꓲ ꓠꓬꓲꓽ ꓣꓳ ꓗꓪ ꓠꓬꓲꓽ ꓣꓳ ꓥ ꓟ ꓢꓲ-ꓟꓳ ꓐꓰ ꓬ-ꓗꓴ ꓬꓲ ꓮ ꓐꓲ ꓬꓴ-ꓔ ꓬꓲ ꓪ ꓠꓬꓲꓽ ꓫꓵꓸ ꓑꓮꓲꓽ ꓥ ꓡꓳ= ꓢꓲꓽ ꓫꓬ ꓕꓳ ꓶ ꓗꓪ ꓢꓲꓺ ꓒ ꓬꓰ-ꓢꓴ ꓠꓬ ꓟꓶꓽ ꓘꓶꓼ ꓝꓲ ꓛꓲꓺ ꓡ ꓕꓯ ꓪꓽ ꓚꓲ ꓗꓪ ꓓꓯ ꓢꓲ꓾ ꓕꓲ ꓦꓬꓽ ꓡꓱꓸꓼ ꓪ ꓘꓴˍ ꓡꓳ= ꓟꓲꓽ ꓕꓯꓽ ꓙꓲꓻ ꓡꓹ ꓕꓯ ꓠꓬ ꓝꓲ ꓓꓴ ꓐꓴ ꓔꓯ ꓜꓲꓼ ꓡꓳꓽ ꓡ ꓝꓲ ꓢꓲ ꓠꓬꓲ ꓬꓲ ꓪ ꓗꓪ ꓟ ꓞꓲ ꓠꓬꓲ ꓣꓳ ꓔꓯ ꓢꓲꓺˍ ꓟ ꓥ ꓡꓳ=

ꓢꓲꓺ ꓒ ꓬꓰ-ꓢꓴ ꓬꓲ ꓝꓲ ꓓꓴ ꓐꓯ ꓟ ꓠꓽ ꓮ ꓟꓶ ꓣꓳ ꓔꓯ ꓐꓯ ꓠꓬ ꓖꓳ ꓓꓱꓽ ꓔꓲꓹ ꓟꓶ ꓗꓷ ꓢꓴ ꓥ ꓕ ꓑꓳꓸꓼ ꓔꓯ ꓐꓯ ꓟ ꓥ ꓡꓳ= ꓕꓱ ꓟ ꓔꓯ ꓣꓳ ꓢꓷꓸ ꓔ ꓠ ꓗꓹ ꓡꓳ= ꓢꓲꓺ ꓒ ꓬꓰ-ꓢꓴ ꓬꓲ ꓝꓲ ꓓꓴ ꓥ ꓕ ꓑꓳꓸꓼ ꓠꓬ꓾ ꓔꓱꓹ ꓚꓵˍ ꓟ ꓝꓲ ꓓꓴ ꓮ ꓡꓰ ꓕꓲ ꓣꓳˍ ꓟꓲ ꓫꓸ ꓝꓲˍ ꓟ꓾ ꓫ ꓙꓵˍ ꓟ꓾ ꓠꓲꓹ ꓟ ꓫ ꓟ ꓔꓯ ꓔꓳꓹ ꓜꓳꓽ ꓢꓲ ꓠꓬꓲ ꓡꓳꓹ ꓬꓰˍ ꓕꓯ ꓥ ꓟꓲ ꓚꓲ ꓛꓬ ꓢꓯꓼ ꓟꓬ ꓔꓯ ꓖꓶ ꓗꓷˍ ꓗꓪ ꓛꓲ ꓢꓲꓺ ꓒ ꓬꓰ-ꓢꓴ ꓔꓯ ꓠꓲꓹ ꓠꓵ ꓗꓴꓸˍ ꓟ꓾ ꓣꓳ ꓐꓱ ꓶ ꓪꓴ-ꓢ ꓐꓱ ꓶ ꓡꓯꓼ ꓙꓱ ꓔ ꓟ ꓝꓲ ꓓꓴ ꓐꓴ ꓥ ꓡꓳ=

ꓖꓳ ꓟ ꓪꓴꓸ ꓠꓬꓲ ꓝꓲ ꓓꓴ ꓮ ꓡꓰ ꓕꓲ ꓣꓳˍ ꓟꓲ ꓢ ꓢꓹ ꓐꓰ ꓟꓽ ꓗꓳꓸ ꓙꓰ ꓐꓯ ꓟ ꓣꓳ ꓢꓷꓸ ꓔ ꓠ ꓗꓹ ꓡꓳ= ꓕꓱ ꓟ ꓕꓲ ꓡꓰꓹ ꓥꓳ꓾ ꓠꓬꓲꓸ ꓠꓬꓲ ꓣꓳ ꓪꓴ-ꓢ ꓦ ꓡꓱ ꓢꓴ ꓕꓲ ꓣꓳ ꓠꓬ꓾ ꓬꓰ-ꓢꓴꓳ꓾ ꓥꓪ ꓠꓴ ꓔꓯ ꓛꓳˍ ꓥꓳ ꓐꓰ ꓐꓯ ꓔꓬ ꓢꓴ ꓮ ꓙꓵꓽ ꓥˍ ꓟꓲ꓾ ꓣꓳ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓟ ꓣꓳ ꓤꓶꓻ ꓠꓯꓸꓼ ꓗꓪ ꓫ ꓙꓵ ꓟꓶꓽ ꓙꓵ ꓓꓴ ꓔꓳꓹ ꓜꓳꓽ ꓡ ꓔꓬ ꓡ꓾ ꓐꓯ ꓟ ꓔꓯ ꓣꓳ ꓢꓷꓸ ꓪˍ ꓡꓳ=

ꓖꓳ ꓡꓱ ꓐꓯ ꓥ ꓟꓲ ꓢꓲꓺ ꓒ ꓬꓰ-ꓢꓴ ꓡꓰ ꓐꓯ ꓔ ꓡꓳ= ꓮ ꓡꓰ ꓡꓴ ꓫꓵꓽ ꓝꓲ ꓓꓴ ꓐꓴ꓾ ꓥꓪ ꓔꓯ ꓛꓳ ꓢꓴ ꓥ ꓕ ꓑꓳꓸꓼ ꓠꓬ ꓚꓲꓸ ꓛꓬ ꓡꓯꓼ ꓐꓳ ꓔꓶꓸ ꓓꓴ ꓑꓱꓸ ꓔ ꓢꓲ ꓛꓳ ꓫꓱꓽ ꓠꓯꓹ ꓡꓳ꓾ ꓐꓰ ꓐꓯ ꓟ ꓠꓬ ꓢꓲꓺ ꓒ ꓬꓰ-ꓢꓴ ꓐꓱ ꓶ ꓠꓬ ꓣꓳ ꓫꓸ ꓙꓵ ꓟꓶ ꓙꓵ ꓪˍ ꓥꓳ= ꓣꓳ ꓠꓲꓹ ꓫ ꓟꓬ ꓫ ꓓꓴ ꓔꓳꓹ ꓜꓳꓽ ꓪˍ ꓥꓳ= ꓥ ꓠꓬ ꓢꓯꓼ ꓟꓬ ꓖꓶ ꓗꓷˍ ꓗꓪ ꓛꓲꓺ ꓣꓳ ꓔꓯ ꓠꓲꓹ ꓫ ꓟꓬ ꓫ ꓓꓴ ꓔꓳꓹ ꓜꓳꓽ ꓡꓹ ꓥ ꓟꓲ ꓕꓱ ꓟ ꓠꓽ ꓝꓲ ꓓꓴ ꓐꓴ ꓙꓻ ꓖꓴ ꓥ ꓡꓳ꓾ ꓐꓰ ꓓꓵꓽ ꓙ ꓔ ꓠ ꓗꓹ ꓡꓳ=

ꓖꓳ ꓟ ꓪꓴꓸ ꓠꓬꓲ ꓠꓬꓲꓸ ꓠꓬꓲ ꓢꓲꓺ ꓒ ꓬꓰ-ꓢꓴ ꓡꓰ ꓣꓳ ꓔꓯ ꓐꓯ ꓔꓬ ꓟ ꓠꓬ꓾ ꓥꓪ ꓔꓯ ꓛꓳ ꓠꓲꓹ ꓫꓵˍ ꓡ= ꓥꓪ ꓔꓯ ꓛꓳ ꓠꓲꓹ ꓫꓵˍ ꓠꓬ ꓥꓪ ꓐꓰ ꓫꓱꓸˍ ꓟ ꓕꓲ ꓣꓳ ꓬꓰ ꓡꓯ꓾ ꓐꓰ ꓢꓲꓺ ꓒ ꓬꓰ-ꓢꓴ ꓡꓰ ꓐꓯ ꓔꓬ ꓡꓳ= ꓢꓲꓺ ꓒ ꓬꓰ-ꓢꓴ ꓐꓰ ꓣꓳ ꓮ ꓡꓰ ꓫꓱꓸ ꓡꓯ ꓘꓳ ꓪˍ ꓡ ꓐꓯ ꓠꓬ ꓢꓲꓺ ꓒ ꓬꓰ-ꓢꓴ ꓡꓰ ꓐꓯ ꓡꓳ= ꓥꓪ ꓡꓯ ꓒꓯꓹ ꓐꓰ ꓛꓲ ꓒꓯꓹ ꓔꓯ ꓡꓳꓸ ꓠꓬꓲ= ꓥꓪ ꓔꓯ ꓢꓴ ꓔꓲꓺ ꓝꓲꓼ ꓡꓰ ꓕꓯꓼ ꓔ ꓟ ꓡꓯ ꓒꓯꓹ ꓠꓬꓲꓽ ꓒꓯꓹ ꓗꓪ ꓠꓻ ꓓꓴ ꓓꓴ ꓓꓹ ꓡꓳ=

ꓛꓲ ꓒꓯꓹ ꓗꓪˍ ꓟꓲ ꓠꓻ ꓓꓴ ꓓꓴ ꓓꓹ ꓟ ꓥ ꓡꓳ= ꓕꓱ ꓟ ꓡꓰꓽ ꓟꓽ ꓞꓲꓺ ꓥꓪ ꓙꓴꓽ ꓐꓬ ꓗꓪ ꓐꓰ ꓗꓸ ꓙ ꓙꓰ ꓢꓲ ꓠꓬꓲ ꓥꓪ ꓠꓲꓹ ꓟ ꓠꓯꓸꓼ ꓗꓪ ꓠꓻ ꓓꓴ ꓓꓴ ꓓꓹ ꓟ ꓥ ꓡꓳ= ꓠꓻ ꓓꓴ ꓕꓱ ꓟ ꓠꓴ ꓪ ꓔꓯ ꓙꓳˍ ꓡ꓾ ꓐꓰ ꓢꓲꓺ ꓒ ꓬꓰ-ꓢꓴ ꓡꓰ ꓣꓳ ꓔꓯ ꓠ ꓠꓬꓲ ꓔꓬ ꓟ ꓥ ꓡꓳ=

Add new comment

1 + 1 =