ꓬꓰ-ꓢꓴ ꓑꓶꓸ ꓓꓴ ꓬꓲ ꓗꓪꓺ ꓗꓪ ꓡꓰˍ ꓟ (ꓶꓼ ꓓꓳ ꓫꓱꓸ ꓓꓳ)

ꓠꓲ ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓬꓲꓸ ꓠꓬꓲꓸ ꓟ ꓢꓲꓽ ꓫꓬ ꓕꓳ ꓶ ꓗꓪ ꓢꓲꓺ ꓒ ꓬꓰ-ꓢꓴ ꓡꓰ ꓥꓪ ꓠꓬ ꓥꓪ ꓠꓬ ꓟꓲ ꓠꓯ ꓗꓪ ꓮ ꓔꓳꓸ ꓡꓳ ꓧꓳꓽˍ ꓐꓰ ꓡꓹ ꓟ ꓥ ꓡꓳ=ꓮ ꓡꓰ ꓗꓪˍ ꓟꓲ ꓐꓬꓻ ꓔꓴ ꓡ ꓕꓯ ꓠꓽ ꓥꓪ ꓠꓲꓹ ꓒꓴˍ ꓟ ꓥ ꓡꓳ꓾ ꓐꓰ ꓢꓲꓺ ꓒ ꓬꓰ-ꓢꓴ ꓡꓰ ꓣꓳ ꓔꓯ ꓐꓯ ꓟꓸ ꓖꓶ ꓡ ꓔꓬ ꓟ ꓥ ꓡꓳ= ꓬꓰ-ꓢꓴ ꓠꓬ ꓟꓲ ꓠꓯ ꓔꓯ ꓮ ꓕꓯ ꓟꓲ ꓠꓲꓹ ꓠꓵˍ ꓡꓳ= ꓖꓳ ꓡꓱ ꓥˍ ꓟꓲ ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳ ꓶ ꓗꓪ ꓮ ꓔꓳꓸ ꓡꓳ ꓧꓳꓽˍ ꓐꓰ ꓡꓹ ꓡꓳ ꓐꓯ ꓕꓯ ꓠꓽ ꓣꓳ ꓓꓵꓽ ꓙ ꓟꓶ ꓓꓴ ꓥꓳ=

ꓬꓰ-ꓢꓴ ꓡꓰ ꓣꓳ ꓔꓯ ꓮ ꓔꓳꓸ ꓡꓳ ꓧꓳꓽˍ ꓐꓰ ꓡꓹ ꓡꓳ꓾ ꓐꓰ ꓮ ꓫꓵꓽ ꓪꓴꓸ ꓠꓬꓲ ꓐꓯ ꓡ ꓐꓯ ꓠꓬ ꓣꓳ ꓠꓲꓹ ꓟ ꓠꓯꓸꓼ ꓗꓪ ꓝꓴꓲ ꓮ ꓟꓬꓹ ꓙꓳˍ ꓡꓳ= ꓣꓳ ꓠꓬ ꓕꓲ ꓠꓬꓲ ꓕꓲ ꓠꓬꓲ ꓝꓴꓲ ꓬꓰˍ ꓡꓳ= ꓟꓽ ꓧꓺ ꓟ ꓬꓰˍ ꓡꓳ꓾ ꓓꓵꓽ ꓙˍ ꓡꓳ= ꓢꓴ ꓔꓯ ꓗꓸ ꓡꓳ= ꓦꓯꓸ ꓠꓲꓹ ꓙꓵꓽˍ ꓡꓳ= ꓠꓲꓹ ꓟ ꓗꓪ ꓟꓽ ꓢꓲꓽ ꓟꓽ ꓫꓬ ꓟ ꓮ ꓟꓬꓹ ꓙꓳˍ ꓟ ꓪꓴꓸ ꓠꓬꓲ ꓢꓲꓺ ꓒ ꓬꓰ-ꓢꓴ ꓡꓰ ꓣꓳ ꓠꓲꓹ ꓟ ꓠꓯꓸꓼ ꓗꓪ ꓟ ꓟꓽ ꓢꓲꓽ ꓟꓽ ꓫꓬ ꓟ ꓝꓴꓲ ꓮ ꓙꓵꓽ ꓔꓯ ꓮ ꓔꓳꓸ ꓗꓪ ꓐꓰ ꓞꓲꓽ ꓫꓬ ꓡꓰ ꓠꓹ ꓟ ꓠꓵꓻ ꓠꓲꓹ ꓮ ꓔꓳꓸ ꓡꓰ ꓣꓳ ꓔꓯ ꓡꓳ ꓩꓴ ꓡꓹ ꓟ ꓥ ꓡꓳ꓾ ꓐꓰ ꓢꓷꓸ ꓠꓯꓹ ꓟ ꓥ ꓡꓳ=

ꓖꓳ ꓡꓱ ꓠꓬꓲ ꓬꓰ-ꓢꓴ ꓠꓬ ꓣꓳ ꓠꓯꓸꓼ ꓗꓪ ꓙꓵꓻ ꓠꓲꓹ ꓮ ꓔꓳꓸ ꓡꓰ ꓡꓳꓺ ꓧꓳꓽ ꓗꓷ ꓕꓯ ꓠꓽ ꓙꓵꓻ ꓠꓲꓹ ꓠꓬ ꓪꓴꓽ ꓡ ꓟꓬꓽ ꓡ ꓢꓲ ꓠꓬꓲ ꓣꓳ ꓠꓯꓸꓼ ꓗꓪ ꓓꓯꓹ ꓟ ꓟꓽ ꓧ ꓟ ꓝꓴꓲ ꓔꓯ ꓞꓲꓽ ꓫꓬ ꓡꓰ ꓝꓲˍ ꓡꓳ= ꓬꓲ ꓒꓵꓽ ꓒꓵꓽ ꓟ ꓫꓵꓺ ꓔꓯ ꓠꓬ ꓮ ꓔꓳ ꓛꓴ ꓠꓬꓲ ꓗꓷ ꓠꓬ ꓫꓵꓺ ꓚꓵ ꓚꓵ ꓥ ꓟꓽ ꓥ ꓟ ꓢꓷꓸ ꓪ ꓓꓹ ꓡꓳ= ꓫꓵꓺ ꓟꓽ ꓥ ꓕꓯ ꓠꓽ ꓮ ꓔꓳꓸ ꓗꓪ ꓐꓬꓻ ꓖꓴ ꓡꓰˍ ꓡꓳ= ꓫꓵꓺ ꓥ ꓕꓯ ꓠꓽ ꓮ ꓡꓰˍ ꓟꓲ ꓟꓽ ꓗꓷ ꓡꓰ=

ꓢꓲꓺ ꓒ ꓬꓰ-ꓢꓴ ꓡꓰ ꓣꓳꓽ ꓠꓯꓸꓼ ꓗꓪ ꓮ ꓔꓳꓸ ꓡꓳ ꓧꓳꓽ ꓗꓷ ꓕꓯ ꓠꓽ ꓣꓳ ꓠꓲꓹ ꓟ ꓠꓯꓸꓼ ꓗꓪ ꓓꓹ ꓟ ꓟꓽ ꓙꓲ ꓟ ꓝꓴꓲ ꓮ ꓙꓵꓽ ꓔꓯ ꓛꓴ ꓦ ꓗꓷˍ ꓡꓳ= ꓐꓬꓻ ꓝꓲˍ ꓟ ꓥ ꓡꓳ=