ꓫꓵꓽ ꓜꓲꓺ ꓠꓬꓲ ꓠꓻ ꓔꓬ ꓟ ꓤ ꓟꓶ ꓤ

ꓬꓰ‐ꓢꓴ ꓙꓲ‐ꓢꓴ ꓠꓯꓸꓼ ꓗꓪ ꓠꓲ, ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓬꓲ. ꓠꓬꓲ ꓗꓪ ꓦ ꓢꓯꓼ ꓣꓴ ꓠ, ꓟ ꓢꓲꓽ ꓫꓬ ꓕꓳꓽ ꓶ ꓝꓲ ꓠꓬ ꓟ‐ꓘꓳ ꓕꓳꓽ ꓶ 5ꓽ21‐43 ꓥ ꓡꓳ꓿ ꓢꓲꓽ ꓫꓬ ꓕꓳ ꓶ ꓗꓪ ꓜꓲꓼ ꓦꓲ ꓙꓵꓽ ꓢꓴ ꓗꓪ ꓟ ꓕꓲ ꓣꓳ ꓥ ꓟ ꓙꓱ‐ꓣꓴ ꓡꓰ ꓬꓲ ꓮ ꓟꓲꓽ ꓔꓯ ꓠꓻ ꓫꓬ, ꓖꓶ ꓠ, ꓟ ꓐꓯ ꓖꓶ ꓡˍ ꓠꓬꓲ ꓬꓰ‐ꓢꓴ ꓡꓰ ꓠꓻ ꓫꓬ ꓖꓶ ꓠ, ꓟ ꓙꓰˍ ꓡꓳ꓿ ꓖꓳ ꓡꓱ ꓙꓰ ꓔꓬ ꓕꓯ ꓑ ꓫꓬ ꓐꓴ ꓗꓳ ꓡꓳ ꓗꓪ ꓐꓰ ꓞꓲ ꓠꓬꓲꓽ ꓘꓳꓼ ꓛꓲꓺ ꓫꓵꓽ ꓜꓲꓺ ꓠꓬꓲ ꓠꓻ ꓔꓬ ꓟ ꓤ ꓟꓶ ꓤ ꓕꓲ ꓣꓳ ꓡꓰ ꓬꓰ‐ꓢꓴ ꓐꓴ ꓞꓶꓽ ꓟꓶ ꓔꓯ ꓕꓲꓺ ꓗꓷ ꓕꓯ ꓬꓲ ꓠꓻ ꓔꓬ ꓟ ꓓꓻ ꓡꓰ ꓟ ꓔꓯ ꓣꓳ ꓑ ꓙ ꓪˍ ꓟ ꓥ ꓡꓳ꓿

ꓢꓲꓺ ꓒ ꓬꓰ-ꓢꓴ ꓠꓬ ꓢꓷꓸ ꓡꓰ ꓓꓴ ꓟꓳꓸ ꓖꓶ ꓗꓷˍ ꓕ ꓑꓳꓸꓼ ꓠꓻ ꓫꓬꓹ ꓖꓶ ꓗꓷ ꓕ ꓑꓳꓸꓼ ꓬꓲ ꓡꓰ ꓮ ꓕꓯ ꓟꓲ ꓐꓯ ꓟ ꓠꓬ꓾ ꓠꓴ ꓙꓵꓻ ꓠꓲꓹ ꓠꓬ ꓠꓴ ꓔꓯ ꓚꓬꓴꓸ ꓙ ꓗꓷꓳ꓾ ꓠꓴ ꓙꓵꓻˍ ꓟ ꓪꓴꓸ ꓠꓬꓲ ꓠꓴ ꓠꓻ ꓠꓬ ꓓꓻ ꓡꓰꓳ꓾ ꓐꓰ ꓐꓯ ꓟ ꓐꓯ ꓘꓶꓽ ꓡꓰꓽ ꓥ ꓡꓳ=

ꓡ ꓞꓳ ꓮ ꓟꓬꓹ ꓥˍ ꓟꓲ ꓢꓲꓺ ꓒ ꓬꓰ-ꓢꓴ ꓠꓬ ꓠꓻ ꓮ ꓙꓵꓽ ꓔꓯ ꓫꓬꓹ ꓖꓶ ꓐ ꓢꓴ꓾ ꓫꓵꓻ ꓢꓴ ꓐꓴ ꓔꓯ ꓢꓯꓸ ꓬꓲꓼ ꓡ ꓝꓲ ꓢꓴ꓾ ꓛꓲ ꓫꓵꓻ ꓡꓯꓼ ꓫꓵꓻ ꓢꓴ ꓔꓯ ꓓꓻ ꓡꓰ ꓝꓲ ꓢꓴ꓾ ꓫꓵꓽ ꓜꓲꓺ ꓓꓳ ꓢꓲ ꓠꓻ ꓔꓬ ꓟ ꓔꓯ ꓫꓬꓹ ꓖꓶˍ ꓢꓴ꓾ ꓕꓱ ꓟꓬꓽ ꓙꓰꓽ ꓟ ꓢꓷꓸ ꓡꓰ ꓓꓴ꓾ ꓓꓵꓽ ꓙ ꓮ’ ꓡꓰ ꓓꓴ ꓟꓬꓱꓽ ꓬꓰ ꓟꓸ ꓖꓶˍ ꓟ ꓪꓴꓸ ꓠꓬꓲ ꓢꓲꓺ ꓒ ꓬꓰ-ꓢꓴ ꓗ ꓠꓯꓸ ꓛꓳ ꓢꓲ ꓢꓲꓺ ꓒ ꓡꓰ ꓟꓳꓸ ꓖꓶ ꓡˍ ꓟ ꓢꓷꓸ ꓡꓰ ꓓꓴ ꓓꓵꓽ ꓙ ꓮ’ ꓡꓰ ꓓꓴ ꓐꓴ ꓔꓯ ꓥꓳ ꓡꓳꓸ ꓔꓬ ꓡꓳ= ꓡꓳꓸ ꓠꓬ ꓔꓬ ꓡꓳ= ꓟꓸ ꓟꓲꓽ ꓚ ꓢꓴ ꓮ ꓟꓬꓹ ꓥ ꓟꓲ ꓣꓳ ꓐꓴ ꓠꓯꓸꓼ ꓗꓪ ꓪꓴꓽ ꓓꓰˍ ꓟ ꓙꓵꓻ ꓠꓲꓹ ꓙꓳˍ ꓠꓬ ꓚꓬꓴꓸ ꓙˍ ꓟ ꓣꓱꓽ ꓛꓰꓽ ꓟꓶ ꓥꓳ꓾ ꓐꓰ ꓐꓯ ꓑꓶ ꓔꓬ ꓡꓳ=

ꓞꓳ ꓤ ꓤꓶꓻ ꓗꓪ ꓞꓳ ꓤ ꓮ ꓟꓬꓹ ꓠꓬ ꓫꓸ ꓙꓵ ꓓꓴ꓾ ꓠꓲꓹ ꓫ ꓓꓴ꓾ ꓓꓵꓽ ꓙ ꓔ ꓟ ꓟꓽ ꓒꓬꓱꓼ ꓡ ꓟ ꓐꓰ ꓠꓲꓹ ꓟ ꓙꓬ ꓓꓴ ꓔꓳꓹ ꓜꓳꓽ ꓡˍ ꓕꓯ ꓬꓲ ꓪ ꓙꓵꓻ ꓠꓲꓹ ꓔꓯ ꓤ ꓠꓬꓲˍ ꓟ ꓥ ꓡꓳ꓾ ꓕꓱ ꓟ ꓠꓬ ꓣꓳ ꓙꓵꓻ ꓠꓲꓹ ꓮ ꓟꓬꓹ ꓙꓳ ꓟꓽ ꓙꓳ ꓫꓵꓽ ꓠꓬꓲˍ ꓟ ꓥ ꓡꓳ꓾ ꓐꓰ ꓐꓯ ꓢꓲ ꓠꓲꓹ ꓟ ꓗꓴ ꓔꓬ ꓖꓴˍ ꓡꓳ=

ꓢꓲꓽ ꓫꓬ ꓕꓳ ꓶ ꓗꓪ ꓑ ꓙ ꓪˍ ꓟ ꓡꓰ ꓫꓵꓽ ꓜꓲꓺ ꓓꓳ ꓠꓬꓲ ꓠꓻ ꓔꓬ ꓟ ꓤ ꓟꓶ ꓤ ꓬꓲ ꓙꓵꓻ ꓠꓲꓹ ꓠꓬ ꓚꓵꓺ ꓚꓵꓺ ꓣꓳ ꓠꓯꓸꓼ ꓗꓪ ꓙꓳ꓾ ꓟꓽ ꓙꓳ ꓛ ꓠꓬꓲ ꓠ ꓗꓹ ꓡꓳ= ꓬꓲ ꓙꓵꓻ ꓠꓲꓹ ꓠꓬ ꓞꓳ ꓠꓻ ꓕꓲ ꓣꓳ ꓡꓰ ꓠꓯ ꓞꓲꓼ ꓟꓸ ꓒ ꓟꓸ ꓟ ꓐꓴ ꓕꓯꓽ ꓢꓲ ꓗꓪ ꓗꓶ ꓔ ꓟ ꓙꓵꓻ ꓠꓲꓹ ꓡꓰ ꓐꓰ ꓥ ꓡꓳ= ꓥꓪ ꓠꓬ ꓬꓲ ꓐꓵ ꓞꓶꓽ ꓔꓯ ꓕꓲ ꓗꓷ ꓕꓲ ꓖˍ ꓠꓻ ꓕꓱ ꓟ ꓓꓻ ꓡꓰˍ ꓥꓳ꓾ ꓐꓰ ꓓꓵꓽ ꓙ ꓔ ꓕꓲ ꓖˍ ꓠꓻ ꓫꓬꓹ ꓖꓶ ꓟ ꓣꓱꓽ ꓛꓰꓽ ꓟꓶ ꓗꓷꓳ=

ꓣꓳ ꓐꓴ ꓥ ꓟꓲ ꓤ ꓟꓶ ꓤ ꓬꓲ ꓙꓵꓻ ꓠꓲꓹ ꓣꓳ ꓔꓯ ꓚꓵꓺ ꓚꓵꓺ ꓙꓳˍ ꓠꓬ ꓢꓲꓺ ꓒ ꓬꓰ-ꓢꓴ ꓬꓲ ꓫꓬꓹ ꓖꓶ ꓟ ꓢꓷꓸ ꓡꓰ ꓓꓴ ꓔꓯ ꓣꓳ ꓐꓴ ꓘꓳꓹ ꓣꓴ ꓟꓶˍ ꓥꓳ=