ꓜ ꓓꓴ ꓚꓲ. ꓢꓲ ꓪꓽ ꓘꓴ ꓠꓯ, ꓟ

 ꓠꓲ ꓠꓵ, ꓟ ꓬꓲꓼ ꓤ ꓠꓬꓲ ꓤ ꓐꓴ‐ꓳ꓾ ꓠꓬꓲ. ꓠꓬꓲ ꓟ ꓐꓱ ꓶ ꓦ ꓢꓯꓼ ꓪ ꓣꓴ ꓓꓴ ꓬꓰ ꓡꓯ꓿

ꓣꓳꓽ ꓮ ꓫꓵꓽ ꓑꓶ. ꓓꓴ ꓜ ꓚꓲ. ꓧꓪꓽ ꓚꓲ. ꓢꓲ ꓪꓽ ꓘꓴ ꓡ? ꓮ ꓟꓶ ꓣꓳ ꓜ ꓚꓲ. ꓚꓲ. ꓟ ꓦꓬꓼ ꓠꓬꓲ ꓗꓪ ꓓꓵꓽ ꓙ ꓢꓲ꓾ ꓦ ꓢꓯꓼ ꓪ ꓣꓴ ꓓꓴ ꓬꓰ ꓡꓯ꓿ ꓕꓲꓽ ꓧꓪ ꓙꓳ ꓠꓬ꓾ ꓢꓲ ꓒ ꓬꓰ‐ꓢꓴ ꓬꓲ. ꓛꓳ ꓒꓯ ꓐꓴ ꓠꓬ ꓠꓲꓽ ꓙꓲꓽ ꓢꓴ ꓔꓯ ꓖꓼ ꓓꓳ ꓠ, ꓟ ꓬꓰ ꓥˍ ꓟꓲ ꓖꓼ ꓓꓳ ꓟꓽ ꓐ ꓡ꓿ ꓢꓲ ꓒ ꓡꓰ ꓬꓲ. ꓪ ꓔꓯ ꓐꓯ ꓖꓶꓽ ꓡꓳ꓿ ꓕꓱ ꓡꓱ ꓫꓵꓽ ꓔꓯ ꓠꓽ ꓪꓽ ꓘꓴ ꓟ ꓐꓰ ꓜ ꓓꓴ ꓚꓲ. ꓢꓲ ꓡꓰ ꓖꓼ ꓓꓳ ꓐ ꓡ ꓡꓳ ꓐꓰ ꓒꓳ ꓖꓶꓽ ꓡꓳ (ꓟ‐ꓕꓲ 17ꓽ16‐21)꓿

ꓟꓲꓽ ꓠꓯ ꓕꓱ ꓟ ꓗꓪ ꓠꓬ ꓞꓳ ꓤ ꓐꓱ ꓶ ꓫ ꓓꓰ ꓡꓰ ꓟ ꓠꓬ ꓚꓲ. ꓛꓬꓽ ꓧꓪꓽ ꓖꓳ ꓓꓱꓽ ꓔꓯ ꓧꓪ. ꓠ, ꓟ ꓥꓳ꓿ ꓚꓲ. ꓛꓬ ꓫꓵꓽ ꓧꓪ ꓠꓲ, ꓠꓲꓽ ꓡꓶꓽ ꓔꓯ ꓧꓪ. ꓟꓽ ꓘꓴ ꓟ ꓑꓶ. ꓓꓴ  ꓛꓬꓼ ꓟꓵꓽ ꓗꓪ ꓙꓰ ꓔꓬ, ꓢꓴ ꓮ ꓟꓬ ꓙꓳ ꓡꓳ꓿ ꓚꓲ. ꓛꓬ ꓠꓲ, ꓡꓶ꓾ ꓫꓵꓽ ꓧꓪ ꓠꓯꓼ ꓠꓲ, ꓫꓵ ꓟ ꓔꓯ ꓧꓪ. ꓡꓰ ꓢꓴ ꓠꓬ ꓶ ꓙꓳ ꓫꓱ, ꓙꓳ ꓡꓳ꓿ ꓚꓲ. ꓛꓬ ꓫꓵꓽ ꓧꓪ ꓠꓯ ꓔꓯ ꓙꓵꓽ ꓧꓪ. ꓡꓰ ꓠ, ꓟ ꓠꓬ ꓬꓰ ꓠ ꓟ ꓕꓲꓽ ꓚꓱ, ꓡꓰ ꓙꓳ ꓡꓳ꓿ ꓜꓽ ꓓꓴ ꓚꓲ. ꓠꓯ ꓟ ꓥꓳ꓿

ꓣꓳꓽ ꓧꓪ ꓖꓳ ꓓꓱ ꓠꓬ ꓬꓲ. ꓪ ꓜꓲꓼ ꓙꓳˍ ꓟ ꓜꓽ ꓓꓴ ꓓꓳ ꓓꓴ ꓬꓲ. ꓟ ꓪ ꓕꓯ ꓠꓬ ꓣꓳꓽ ꓔꓯ ꓔꓬ, ꓟꓽ ꓠ ꓗꓪ ꓛꓲ ꓫ. ꓙꓵ ꓝꓲˍ ꓡꓳ꓿ ꓦꓬꓼ ꓟꓷꓼ ꓝꓲˍ ꓡꓳ꓿ ꓠꓲ, ꓟ ꓦꓶ ꓝꓲˍ ꓡꓳ꓿ ꓚꓲ. ꓛꓬ ꓫꓵꓽ ꓧꓪꓽ ꓥˍ ꓟꓲ ꓮ ꓘꓶ. ꓓꓰꓽ ꓡˍ ꓡꓳ꓿ ꓖꓳ ꓡꓳ ꓥˍ ꓟꓲ ꓣꓳꓽ ꓠꓬ ꓣꓳꓽ ꓧꓪꓽ ꓖꓳ ꓓꓱ ꓐꓯ ꓘꓶꓽ ꓔꓯ ꓟꓽ ꓠ ꓠ ꓐꓰ ꓜꓽ ꓓꓴ ꓟꓽ ꓜ ꓜ꓾ ꓚꓲ. ꓐ ꓡ ꓕꓯ ꓣꓳꓽ ꓠꓬ ꓣꓳꓽ ꓧꓪ ꓖꓳ ꓓꓱ ꓔꓯ. ꓧꓪ. ꓙꓰꓳ꓿ ꓣꓳꓽ ꓠꓬ ꓣꓳꓽ ꓧꓪ ꓖꓳ ꓓꓱ ꓠꓲ, ꓫꓵ ꓟ ꓡꓰ ꓟꓽ ꓛꓳ ꓛꓳ ꓐꓰ ꓜꓽ ꓓꓴ ꓚꓲ. ꓐ ꓡ ꓕꓯ ꓣꓳꓽ ꓠꓬ ꓣꓳꓽ ꓧꓪꓽ ꓖꓳ ꓓꓱ ꓔꓯ ꓧꓪ. ꓡꓰ ꓟ ꓥꓳ꓿

ꓠꓬꓲ. ꓠꓬꓲ ꓟ. ꓟꓲꓽ ꓥ ꓟ (ꓟ‐ꓕꓲ 9ꓽ14‐15) ꓗꓪ ꓟꓲ ꓢꓲ ꓒ ꓬꓰ‐ꓢꓴ ꓠꓬ ꓬꓲ. ꓝꓲ ꓓꓴ ꓐꓴ ꓠꓬ ꓬꓲ. ꓙꓵ ꓛꓲ ꓡˍ ꓕꓯ ꓜꓽ ꓓꓴ ꓚꓲ. ꓥꓳ꓾ ꓐꓰ ꓐꓯ ꓡꓳ꓿

ꓬꓲꓼ ꓤ ꓠꓬꓲ ꓤ ꓐꓴꓳ ꓮ ꓟꓶ ꓜ ꓓꓴ ꓚꓲ.ˍ ꓟ ꓦꓬꓼ ꓠꓬꓲ ꓗꓪ ꓜ ꓓꓴ ꓚꓲ. ꓡꓯ꓿ ꓪꓴ‐ꓢ ꓠꓲ, ꓫꓵˍ ꓟ ꓜꓽ ꓓꓴ ꓚꓲ. ꓟ ꓠꓬ ꓣꓳꓽ ꓜ ꓠ, ꓟ ꓗꓪ ꓕꓲꓽ ꓐꓱ ꓔꓯ ꓫꓺ ꓔ ꓢꓲ꓾ ꓞꓳ ꓫ ꓔꓯ ꓖꓶꓽ ꓠꓯ ꓟ꓾ ꓣꓳꓽ ꓜ ꓓꓴ ꓗꓪ ꓣꓱꓽ ꓠ ꓔ ꓟ ꓔꓯ ꓟꓽ ꓣꓱꓽ ꓣꓱꓽ ꓐꓰ ꓪ ꓙꓲ ꓣꓱꓽ ꓛ ꓢꓴ ꓔꓯ ꓖꓶꓽ ꓠ, ꓟ ꓪꓴ‐ꓢ ꓡꓰ ꓠꓲ, ꓫꓵˍ ꓟ ꓥꓳ꓿

ꓣꓳꓽ ꓠꓬ ꓣꓳꓽ ꓧꓪ ꓖꓳ ꓓꓱꓽ ꓔꓯ ꓜꓽ ꓓꓴ ꓚꓲ.ˍ ꓟ ꓗꓪ ꓧꓪ. ꓡꓰ ꓕꓯ ꓠꓱ. ꓐꓯ ꓝꓴꓲ. ꓔꓯ ꓥˍ ꓟꓲ ꓧꓪ. ꓡꓰ ꓢˍ ꓟ ꓥꓳ꓿ ꓮ ꓫꓵꓽ ꓥˍ ꓟꓲ ꓜꓽ ꓓꓴ ꓚꓲ. ꓟ ꓡꓰ ꓛ ꓟꓽ ꓫ꓿

ꓜꓽ ꓓꓴ ꓚꓲ. ꓟ ꓠꓬ ꓧꓪꓽ ꓖꓳ ꓓꓱ ꓤ ꓠꓬꓲ ꓫꓵꓽ ꓠꓬꓲ ꓟ ꓔꓯ ꓧꓪ. ꓡꓰ ꓟ ꓥ ꓢꓲ꓾ ꓪꓽ ꓘꓴˍ ꓟ ꓠꓬ ꓠꓲꓽ ꓢ‐ꓓꓯ ꓤ ꓠꓬꓲ ꓫꓵꓽ ꓠꓬꓲ ꓟ ꓔꓯ ꓧꓪ. ꓡꓰˍ ꓟ ꓥꓳ꓿

ꓠꓲꓽ ꓔꓯ ꓠꓬ ꓣꓳꓽ ꓢꓯꓼ ꓪ ꓗꓪ ꓐꓰ ꓧꓪ. ꓟꓽ ꓓ꓾ ꓪꓽ ꓘꓴ ꓟ ꓗꓪ ꓐꓰ ꓡꓰ ꓧꓪ. ꓡꓰ ꓓ ꓟ ꓥꓳ꓿ ꓖꓳ ꓡꓱ ꓠꓬꓲ ꓜ ꓓꓴ ꓚꓲ. ꓢꓲ ꓪꓽ ꓘꓴ ꓡꓯ ꓐꓰ ꓢꓲ ꓒ ꓐꓯ ꓟ ꓥꓳ꓿

ꓬꓲ ꓤ ꓠꓬꓲ ꓤ ꓐꓴ‐ꓳ ꓤ, ꓠꓬꓲ ꓟ ꓗꓪ ꓟꓽ ꓓꓴ ꓡꓰ ꓠ, ꓟ ꓪꓽ ꓘꓴ ꓢꓲ ꓔꓬ꓾ ꓚꓲ. ꓛꓬ ꓫꓵꓽ ꓧꓪ ꓠꓯꓼ ꓤ ꓠꓬꓲ ꓫꓵꓽ ꓠꓬꓲ ꓟ ꓗꓪ ꓟꓽ ꓓꓴ ꓡꓰ ꓠ, ꓟ ꓜ ꓚꓲ. ꓚꓲ. ꓡꓯ꓿

ꓮ ꓙꓵꓽ ꓢꓴ ꓔꓯ ꓪꓴ‐ꓢ ꓶ ꓤ ꓫꓱ, ꓤ ꓖꓶꓽ ꓝꓲ꓿