ꓞꓳ ꓒꓯꓹ ꓞꓲ ꓠꓬꓲ ꓣꓳꓽ ꓔꓯ ꓢꓲˍ ꓟ

ꓠꓲꓹ ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓬꓲꓸ ꓠꓬꓲ ꓗꓪ ꓣꓳ ꓑ ꓙ ꓪˍ ꓟ ꓢꓲꓽ ꓫꓬ ꓕꓳ ꓶ ꓠꓬ ꓡꓴ-ꓘ ꓕꓳ ꓶ 6ꓽ12-19 ꓥ ꓡꓳ= ꓢꓲꓽ ꓫꓬ ꓕꓳ ꓶ ꓗꓪ ꓠꓬ ꓢꓲꓺ ꓡꓲˍ ꓟ ꓢꓲꓺ ꓠꓯ ꓢꓲꓹ ꓐꓽ ꓗꓪ ꓙꓰ ꓢꓲ ꓕꓲ ꓦꓬꓽ ꓡꓱꓸꓼ ꓐꓹ ꓐ ꓪꓴ-ꓢ ꓔꓯ ꓪꓽ ꓘꓴˍ ꓟ ꓔꓯ ꓣꓳ ꓑ ꓙˍ ꓡꓳ= ꓖꓳ ꓡꓱ ꓪ ꓘꓴ ꓗꓷ ꓢꓲ ꓝꓮꓲ ꓕꓲ ꓠꓬꓲ ꓗꓪ ꓠꓬ ꓬꓲ ꓗ ꓠꓯꓸ ꓛꓳ ꓢꓴ ꓝꓲ ꓓꓴ ꓞꓲ ꓠꓬꓲꓽ ꓣꓳ ꓔꓯ ꓬꓲ ꓢꓲꓺˍ ꓡꓳ= ꓪꓽ ꓘꓴ ꓢꓲ ꓝꓲ ꓓꓴ ꓐꓴ ꓔꓯ ꓢꓲꓺˍ ꓟ ꓔꓯ ꓣꓳ ꓑ ꓙ ꓪˍ ꓡꓳ=

ꓝꓮꓲ ꓬꓲ ꓝꓲ ꓓꓴ ꓐꓴ ꓔꓯ ꓢꓲꓺ ꓗꓷ ꓗ ꓠꓯꓸ ꓬꓲ ꓠꓬ ꓠꓻ ꓔꓬ ꓒꓬꓽ ꓔꓬ ꓢꓴ ꓔꓯ ꓫꓬꓹ ꓖꓶˍ ꓟ ꓓꓵꓽ ꓙ ꓮ’ ꓓꓴ ꓟꓬꓱꓽ ꓮ ꓟꓬꓹ ꓬꓰˍ ꓟ ꓣꓳꓽ ꓑ ꓙˍ ꓡꓳ= ꓟꓸ ꓟꓲꓽ ꓕꓱ ꓟ ꓔꓯ ꓡꓳꓸ ꓠꓬꓲˍ ꓠꓬ ꓢꓲꓺ ꓒ ꓬꓰ-ꓢꓴ ꓠꓬ ꓬꓲ ꓤꓶꓻ ꓗꓪ ꓮ ꓕꓯˍ ꓟꓲ ꓐꓹ ꓐ ꓪꓴ-ꓢ ꓐꓰ ꓖꓪꓻ ꓙꓱ ꓢꓲ ꓠꓬꓲ꓾ ꓫ ꓕꓱ ꓢꓲ ꓠꓬꓲ ꓬꓰ ꓔꓬ ꓡꓳ꓾ ꓐꓯ ꓟ ꓢꓷ ꓪ ꓓꓹ ꓡꓳ=

ꓮ ꓫꓵꓽ ꓕꓲ ꓙꓰꓽˍ ꓟꓲ ꓬꓲ ꓟꓽ ꓖꓪꓻ ꓙꓱ꓾ ꓪꓽ ꓟꓽ ꓘꓴ ꓐꓰ ꓬꓲ ꓟꓽ ꓬꓰ= ꓮ ꓕꓯˍ ꓟꓲ ꓣꓳꓽ ꓬꓲ ꓔꓯ ꓪꓽ ꓘꓴ ꓔꓬ ꓟ ꓡꓰꓽ ꓟꓳˍ ꓡꓳ= ꓖꓳ ꓡꓱ ꓠꓬꓲ ꓒ-ꓡꓲ-ꓢꓷ ꓐꓴ꓾ ꓥ ꓠꓬ꓾ ꓠꓱꓸ ꓐꓯꓼ ꓢꓴ ꓡꓰ ꓬꓲ ꓔꓯ ꓗ ꓧꓪꓸ ꓕꓯ ꓮ ꓟꓶ ꓠꓴ ꓪ ꓟꓳ ꓔꓬ ꓟ ꓡꓰ ꓥꓪ ꓠꓬ ꓕꓲ ꓣꓳˍ ꓡꓰꓽ ꓟꓽ ꓥ꓾ ꓥꓪ ꓒ ꓕꓲ ꓗꓪ ꓐꓹ ꓐ ꓔꓬ ꓡꓳ꓾ ꓐꓰ ꓬꓲ ꓐꓯ ꓟ ꓥ ꓡꓳ=

ꓐꓹ ꓐ ꓠꓬ ꓬꓲ ꓒ ꓕꓲ ꓗꓪ ꓔꓬ ꓟ ꓑꓶꓸ ꓓꓴ ꓬꓲ ꓠꓬ ꓮ ꓫꓵꓽ ꓬꓰˍ ꓟꓲ ꓟꓽ ꓙꓳꓺ= ꓮ ꓫꓵꓽ ꓔꓯˍ ꓟꓲ ꓑꓶꓸ ꓑꓶꓸ ꓡꓰ ꓬꓰ ꓑꓶꓸ ꓢꓲ꓾ ꓔꓱꓹ ꓚꓵˍ ꓟ ꓬꓲ ꓬꓰ ꓐ ꓡꓹ ꓡꓳ꓾ ꓐꓯ ꓟ ꓔꓯ ꓬꓲ ꓡꓰ ꓐꓯ ꓔ ꓡꓳ=

ꓖꓳ ꓡꓱ ꓠꓬꓲ ꓣꓳ ꓘ-ꓣꓲ-ꓢ-ꓔꓴ ꓢꓲꓺ ꓤ ꓐꓴ ꓠꓬ ꓢꓲꓺ ꓒ ꓬꓰ-ꓢꓴ ꓔꓯ ꓔꓯꓺ ꓢꓳ ꓠ ꓗꓹ ꓡꓳ= ꓢꓲꓺ ꓒ ꓬꓰ-ꓢꓴ ꓠꓬ ꓪꓴ-ꓢ ꓥˍ ꓟꓲ ꓬꓲ ꓠꓬ ꓮ ꓕꓯˍ ꓟꓲ ꓪꓽ ꓘꓴ꓾ ꓮ ꓕꓯˍ ꓟꓲ ꓐꓹ ꓐ ꓪꓴ-ꓢ ꓔꓯ ꓖꓪꓻ ꓙꓱ ꓢꓲ ꓣꓱꓽ ꓬꓰˍ ꓟ ꓑꓶꓸ ꓓꓴ ꓬꓲ ꓠꓬ ꓮ ꓫꓵꓽˍ ꓟꓲ ꓬꓰ ꓐ ꓡ꓾ ꓠꓻ ꓢꓴ ꓒꓬꓽ ꓢꓴ ꓔꓯˍ ꓟꓲ ꓬꓲ ꓠꓻ ꓫꓬꓹ ꓐ ꓡꓹ ꓡꓳ=

ꓖꓳ ꓡꓱ ꓠꓬꓲ ꓢꓲꓺ ꓒ ꓬꓰ-ꓢꓴ ꓡꓰ ꓣꓳ ꓔꓯ ꓟꓸ ꓖꓶ ꓑꓱꓹ ꓖꓶ ꓔ ꓟ ꓙꓳˍ ꓡꓳ= ꓥꓪ ꓠꓬ ꓛꓱꓼ ꓡꓱꓼ ꓚ ꓥ ꓡꓳ= ꓠꓴ ꓪ ꓠꓬ ꓬꓲ ꓡꓯꓼ ꓗꓸ ꓥ ꓡꓳ= ꓠꓴ ꓪ ꓥꓪ ꓔꓯ ꓟꓽ ꓠꓷꓼ ꓓꓹ ꓠꓬ ꓠꓴ ꓪ ꓠꓬ ꓮ ꓫꓵꓽˍ ꓟꓲ ꓬꓰ ꓟꓽ ꓐ ꓡ= ꓬꓲ ꓢꓶꓽˍ ꓟꓲ ꓓꓱꓼ ꓟꓽ ꓐ ꓡ= ꓖꓳ ꓟ ꓡꓰꓽ ꓟ ꓞꓲ ꓠꓴ ꓪ ꓥꓪ ꓔꓯ ꓟꓽ ꓠꓷꓼ ꓞꓹ ꓕꓯ ꓠꓽ ꓠꓴ ꓪ ꓫꓵꓻˍ ꓥꓳ꓾ ꓐꓰ ꓐꓯ ꓔ ꓟ ꓡꓰ ꓐꓰ ꓣꓳ ꓠꓬ ꓢꓲꓺ ꓒ ꓬꓰ-ꓢꓴ ꓔꓯ ꓔꓯꓺ ꓢꓳ ꓢꓲ꓾ ꓮ ꓫꓵꓽ ꓬꓰˍ ꓥ ꓟꓲ ꓢꓲꓺ ꓒ ꓬꓰ-ꓢꓴ ꓔꓯ ꓖꓪꓻ ꓙꓱ ꓢꓲ꓾ ꓮ ꓡꓲ ꓫꓵꓽ ꓕꓲ ꓙꓰꓽ ꓬꓰˍ ꓥ ꓟꓲ ꓢꓲꓺ ꓒ ꓬꓰ-ꓢꓴ ꓔꓬ ꓗꓪ ꓚꓴꓽ ꓬꓲꓹ ꓓꓰꓽ ꓢꓲ ꓬꓰˍ ꓥꓳ ꓐꓯ ꓠꓬ ꓙꓲꓻˍ ꓟ ꓟꓬꓱꓽ꓾ ꓧꓸ ꓟ ꓟꓬꓱꓽ꓾ ꓧꓪꓸ ꓡꓰˍ ꓟ ꓟꓬꓱꓽ ꓬꓰ ꓐ ꓡꓹ ꓥꓳ꓾ ꓐꓯ ꓟ ꓠꓬꓲꓸ ꓠꓬꓲ ꓟꓸ ꓟꓲꓽ ꓗꓪ ꓐꓰ ꓣꓳ ꓔꓯ ꓢꓷꓸ ꓡꓰ ꓝꓲˍ ꓟ ꓥ ꓡꓳ=

ꓢꓲꓺ ꓒ ꓬꓰ-ꓢꓴˍ ꓟꓲ ꓮ ꓕꓯ ꓥ ꓟꓲ ꓐꓹ ꓐ ꓔꓬ ꓗꓪ ꓚꓴꓽ ꓬꓲꓹ ꓓꓰꓽ ꓢꓲ꓾ ꓮ ꓕꓯˍ ꓟꓲ ꓪꓽ ꓘꓴ ꓢꓲ꓾ ꓮ ꓕꓯˍ ꓟꓲ ꓐꓹ ꓐ ꓐꓰ ꓕꓲ ꓡꓰꓹꓼ ꓬꓰˍ ꓟ ꓑꓶꓸ ꓓꓴ ꓬꓲ ꓠꓬ ꓞꓳ ꓤ ꓮ ꓙꓵꓽ ꓔꓯ ꓚꓬꓴꓸˍ ꓟ ꓟꓬꓱꓽ ꓬꓰ ꓐ  ꓡˍ ꓡꓳ=

ꓠꓬꓲꓸ ꓠꓬꓲ ꓣꓳꓽ ꓘ-ꓣꓲ-ꓢ-ꓔꓴ ꓢꓲꓺ ꓤ ꓥˍ ꓟꓲ ꓮ ꓕꓯˍ ꓟꓲ ꓢꓲꓺ ꓒ ꓬꓰ-ꓢꓴ ꓔꓯ ꓠꓷꓼ ꓞꓹ ꓢꓲ ꓠꓬꓲ ꓛꓳ ꓫꓱꓽ ꓠꓹ ꓟ ꓬꓮꓳꓸ ꓚꓰꓽˍ ꓡꓳ= ꓮ ꓡꓲꓳ ꓐꓯ ꓠꓬ ꓢꓲꓺ ꓒ ꓬꓰ-ꓢꓴ ꓟꓽ ꓥ ꓠꓬ ꓣꓳ ꓠꓽ ꓮ ꓫꓵꓽˍ ꓟꓲ ꓬꓰ ꓟꓽ ꓐ ꓡ= ꓬꓰ-ꓢꓴ ꓣꓳ ꓤꓶꓻ ꓗꓪ ꓟꓽ ꓔꓬ꓾ ꓢꓲꓺ ꓒ ꓬꓰ-ꓢꓴ ꓣꓳ ꓐꓰ ꓕꓲ ꓪ ꓟꓬꓱꓽ ꓟꓽ ꓬꓰ ꓔꓬ ꓥꓳ ꓐꓯ ꓠꓬ ꓣꓳ ꓠꓬ ꓬꓲ ꓖꓳꓽ ꓥ ꓡꓳ=

ꓟꓴ ꓖꓪ ꓖꓼ ꓛꓳ ꓓꓴ ꓗꓪ ꓓꓹ ꓟ ꓡꓰ ꓐꓰ ꓪꓴ-ꓢ ꓡꓰ ꓬꓰˍ ꓟ ꓟꓽ ꓥ ꓠꓬ ꓢ ꓘꓪ ꓦꓴ ꓠꓬꓹ ꓢꓴˍ ꓟꓲ ꓬꓲ ꓖꓳꓽ ꓥꓳ= ꓟꓽ ꓬꓲꓼ ꓔ ꓔ ꓐꓰ ꓕꓲ ꓦꓬꓽ ꓡꓱꓸꓼ ꓡꓳꓸ ꓠꓬ ꓔꓬˍ ꓟꓲ ꓬꓲ ꓖꓳꓽ ꓥꓳ= ꓢꓲꓺ ꓒ ꓬꓰ-ꓢꓴ ꓟꓽ ꓬꓰ ꓙ ꓠꓬ ꓮ ꓡꓲ ꓕꓲ ꓫꓵꓽˍ ꓟꓲ ꓬꓲ ꓖꓳꓽ ꓥꓳ꓾ ꓐꓰ ꓐꓯ ꓔ ꓡꓳ=

ꓖꓳ ꓡꓱ ꓠꓬꓲ ꓣꓳ ꓤꓶꓻ ꓗꓪ ꓮ ꓫꓵꓽ ꓬꓰˍ ꓟꓲ ꓢꓲꓺ ꓒ ꓔꓯ ꓦ ꓡꓱ ꓗꓴꓸ ꓝꓲ= ꓥꓪ ꓠꓬ ꓥꓪ ꓢꓯꓼ ꓪ ꓥꓪ ꓓꓹ ꓡꓳ= ꓥꓪ ꓬꓰ ꓗꓴꓸˍ ꓡꓳ꓾ ꓥꓪ ꓬꓰ ꓑꓶꓸ ꓡꓳ ꓐꓯ ꓢꓲ ꓕꓽ ꓬꓰ= ꓣꓳ ꓠꓬ ꓮ ꓫꓵꓽˍ ꓟꓲ ꓟꓽ ꓢꓷꓸ= ꓮ ꓫꓵꓽˍ ꓟꓲ ꓬꓰ ꓐ ꓡ ꓢꓴ ꓟꓽ ꓥ=

ꓪꓴ-ꓢ ꓔꓯ ꓡꓰꓽ ꓦ ꓡꓱ ꓢꓲ ꓮ ꓡꓰ ꓢꓯꓼ ꓙꓳ ꓖꓳ ꓡꓱ ꓬꓰˍ ꓠꓬ ꓣꓳ ꓠꓬ ꓧꓪꓸ ꓡꓰˍ ꓟ ꓟꓶˍ ꓥꓳ= ꓢꓲꓺ ꓒ ꓬꓰ-ꓢꓴ ꓡꓰ ꓐꓰ ꓮ ꓫꓵꓽ ꓬꓰˍ ꓟꓲ ꓐꓹ ꓐ ꓪꓴ-ꓢ ꓔꓯ ꓖꓪꓻ ꓙꓱˍ ꓟ ꓡꓰ ꓐꓰ꓾ ꓣꓳ ꓥˍ ꓟꓲ ꓢꓲꓺ ꓒ ꓬꓰ-ꓢꓴ ꓔꓯ ꓪꓳ ꓫꓳꓸ ꓔ= ꓐꓹ ꓐ ꓪꓴ-ꓢ ꓔꓯ ꓪꓳ ꓫꓳꓸ ꓔ= ꓢꓲꓽ ꓫꓬ ꓟ ꓦ ꓔꓯ ꓪꓳ ꓫꓳꓸ ꓔ= ꓢꓯꓼ ꓪ ꓓꓰꓽ= ꓕꓱ ꓡꓱ ꓬꓰˍ ꓠꓬ ꓧꓪꓸ ꓡꓰˍ ꓟ ꓟꓶꓸ ꓥꓳ ꓐꓰ ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳ ꓶ ꓗꓪ ꓐꓰ ꓣꓳ ꓔꓯ ꓟꓸ ꓖꓶ ꓡˍ ꓟ ꓥ ꓡꓳ=