ꓟ-ꓕꓲ ꓔꓯ ꓘꓴˍ ꓟ

ꓠꓬꓲꓸ ꓠꓬꓲ ꓠꓬ ꓢꓲꓺ ꓒ ꓬꓰ-ꓢꓴ ꓬꓲ ꓝꓲ ꓓꓴ ꓞꓲꓺ ꓠꓬꓲꓽ ꓣꓳ ꓗꓪ ꓟ ꓕꓲꓽ ꓣꓳ ꓥ ꓟ ꓝꓲ ꓓꓴ ꓟ-ꓕꓲ ꓑꓮꓲꓽ ꓥ ꓡꓳ= ꓠꓬꓲꓸ ꓠꓬꓲ ꓟ ꓟꓸ ꓟꓲꓽ ꓗꓪ ꓐꓰ ꓣꓳ ꓑ ꓙ ꓪˍ ꓟ ꓥˍ ꓟꓲ ꓢꓲꓺ ꓒ ꓬꓰ-ꓢꓴ ꓠꓬ ꓟ-ꓕꓲ ꓔꓯ ꓘꓴˍ ꓟ ꓔꓯ ꓣꓳ ꓑ ꓙ ꓪˍ ꓡꓳ= ꓟ-ꓕꓲ ꓠꓬ ꓬꓲ ꓘꓳꓸ ꓖꓳ ꓖꓴ ꓗꓪ ꓠꓬꓲ ꓠꓸ ꓔꓬ ꓕꓯ ꓢꓲꓺ ꓒ ꓬꓰ-ꓢꓴ ꓡꓰ ꓥꓪ ꓔꓯ ꓛꓳ ꓡꓯ ꓐꓯ ꓢꓲ ꓬꓲ ꓔꓯ ꓘꓴˍ ꓕꓯ ꓬꓲ ꓠꓬ ꓙꓳˍ ꓟ ꓮ ꓙꓵꓽ ꓔꓯ ꓡꓳ ꓗꓷ ꓢꓲ ꓬꓰ-ꓢꓴ ꓔꓯ ꓛꓳ ꓙꓰˍ ꓟ ꓔꓯ ꓣꓳ ꓑ ꓙ ꓪˍ ꓟ ꓥ ꓡꓳ=

ꓟ-ꓕꓲ ꓠꓬ ꓬꓲ ꓪ ꓦꓬꓼ ꓠꓬꓲ ꓕꓯ ꓣꓳ-ꓟ ꓡ ꓞꓳ ꓐꓱ ꓶ ꓬꓲ ꓘꓳꓸ ꓖꓳ ꓖꓶ ꓢꓴ ꓥ ꓡꓳ= ꓖꓳ ꓟ ꓪꓴꓸ ꓠꓬꓲ ꓬꓴ-ꓔ ꓡ ꓞꓳ ꓐꓴ ꓠꓬ ꓬꓲ ꓔꓯ ꓮ ꓘꓶꓸ ꓠꓲꓹ ꓙꓳꓺˍ ꓟ ꓥ ꓡꓳ= ꓮ ꓡꓲꓳ ꓐꓯ ꓠꓬ ꓟ-ꓕꓲ ꓐꓴ ꓠꓬ ꓬꓴ-ꓔ ꓡ ꓞꓳ ꓐꓱ ꓶ ꓟꓽ ꓦꓰꓼ ꓞꓹ ꓞꓹ ꓐꓰ ꓣꓳ-ꓟ ꓡ ꓞꓳ ꓐꓱ ꓶ ꓟꓬꓱꓽ ꓬꓰ ꓖꓶˍ ꓟ ꓪꓴꓸ ꓠꓬꓲ ꓬꓴ-ꓔ ꓡ ꓞꓳ ꓮ ꓙꓵꓽ ꓠꓬ ꓟ-ꓕꓲ ꓐꓰ ꓬꓲˍ ꓡꓰ ꓐꓰ ꓬꓰ ꓔꓬ ꓟ ꓠꓱꓸ ꓐꓯꓼ ꓡ ꓞꓳ ꓬꓲ ꓘꓳꓸ ꓖꓳ ꓢꓴ꓾ ꓣꓳ-ꓟ ꓐꓱ ꓶ ꓟꓬꓱꓽ ꓬꓰ ꓔꓬ ꓢꓴ ꓮ ꓙꓵꓽ ꓔꓯ ꓮ ꓘꓶꓸ ꓠꓲꓹ ꓙꓳꓺˍ ꓟ ꓥ ꓡꓳ=ꓖꓳ ꓡꓱ ꓠꓬꓲ ꓑ ꓫꓬ ꓐꓴ ꓠꓬ ꓬꓲ ꓪ ꓐꓴ ꓔꓯ ꓟꓽ ꓫ ꓕꓱ꓾ ꓟꓽ ꓙ ꓡꓯ ꓘꓳ ꓟ ꓥ ꓡꓳ= ꓬꓲ ꓪ ꓐꓴ ꓔꓯ ꓡꓳꓺ ꓗꓷ ꓔ ꓟ ꓥ ꓡꓳ=

ꓮ ꓟꓶ ꓣꓳ ꓟꓬ-ꓟ ꓗꓴꓷꓼ ꓗꓪ ꓒꓬꓱꓼ ꓔꓬ ꓟ ꓫꓵꓽ ꓪꓴ ꓐꓰ ꓔꓯꓺˍ ꓥꓳ ꓐꓯ ꓠꓬ꓾ ꓮ ꓟꓶ ꓟꓵꓽ ꓙꓵꓽ ꓒ ꓟꓽ ꓙꓲꓻ ꓟ꓾ ꓗꓴꓷꓼ ꓔꓯ ꓙꓵꓽ ꓔꓬ ꓟ ꓟꓽ ꓙꓲꓻ ꓟ ꓔꓯ ꓬꓰ ꓙ ꓔꓬ ꓢꓴ ꓔꓯ ꓣꓳ ꓑ ꓫꓬ ꓡ ꓞꓳ ꓐꓴ ꓡꓰ ꓙꓳꓺˍ ꓟ ꓡꓰ ꓐꓰ ꓟ-ꓕꓲ ꓔꓯ ꓥˍ ꓟꓲ ꓬꓴ-ꓔ ꓡ ꓞꓳ ꓐꓴ ꓡꓰ ꓠꓲꓹ ꓙꓳꓺˍ ꓟ ꓥ ꓡꓳ=

ꓖꓳ ꓡꓱ ꓥˍ ꓟꓲ ꓢꓲꓺ ꓒ ꓬꓰ-ꓢꓴ ꓠꓬ ꓞꓳ ꓤ ꓕꓲ ꓣꓳ ꓔꓯ ꓮ ꓡꓰ ꓘꓶ ꓛꓲ ꓥꓶˍ ꓥ ꓟꓲ꓾ ꓬꓲ ꓠꓬ ꓮ ꓡꓰ ꓘꓶ ꓛꓲ ꓟꓽ ꓙꓲꓻ ꓟꓽ ꓔꓱꓹ ꓥ ꓟꓲ ꓬꓰ-ꓢꓴ ꓠꓬ ꓠꓲꓹ ꓟ ꓔꓯ ꓡꓳꓸ ꓢꓲ ꓘꓴˍ ꓟ ꓥ ꓡꓳ= ꓣꓳ ꓞꓳ ꓤ ꓠꓬ ꓕꓲ ꓣꓳ ꓛꓳ ꓕꓲ ꓣꓳ ꓟꓳ ꓡꓯ ꓘꓳꓹ ꓕꓯ꓾ ꓬꓲ ꓠꓬ ꓟꓽ ꓙꓲꓻ꓾ ꓬꓲ ꓠꓬ ꓙꓲꓻˍ ꓡꓳ꓾ ꓬꓲ ꓠꓬ ꓟꓲ ꓠꓯ ꓗꓪ ꓔꓬ ꓟꓽ ꓒꓵꓽ= ꓮ ꓘꓶꓸ ꓟꓽ ꓙꓲꓻ ꓟ ꓑꓶꓸ ꓓꓴ ꓫꓵꓻ ꓒꓵꓽˍ ꓡꓳ꓾ ꓐꓰ ꓓꓵꓽ ꓙ ꓔꓬ ꓥ ꓟꓲ ꓪꓴ-ꓢ ꓟꓬꓻ ꓢꓶꓽ ꓗꓪ꓾ ꓢꓲꓺ ꓒ ꓬꓰ-ꓢꓴ ꓟꓬꓻ ꓢꓶꓽ ꓗꓪ ꓠꓽ ꓞꓳ ꓤ ꓮ ꓙꓵꓽ ꓠꓬ ꓝꓴꓲꓸ ꓙꓳ ꓢꓴ ꓥ ꓢꓲ꓾ ꓞꓳ ꓤ ꓮ ꓙꓵꓽ ꓠꓬ ꓟꓽ ꓙꓲꓻ ꓟ ꓥ ꓢꓲ꓾ ꓙꓲꓻ ꓫꓬ ꓢꓴ ꓕꓲ ꓣꓳˍ ꓟꓲ ꓟꓽ ꓙꓳ=

ꓖꓳ ꓡꓱ ꓥˍ ꓟꓲ ꓬꓲ ꓠꓬ ꓠꓵꓻ ꓠꓲꓹ ꓥ ꓟ ꓑꓶꓸ ꓓꓴ ꓠꓵꓻ ꓠꓲꓹ ꓗꓪ ꓐꓰ ꓞꓳ ꓤ ꓥ ꓕ ꓑꓳꓸꓼ ꓠꓬ ꓙꓲˍ ꓟ ꓐꓰ ꓟꓽ ꓙꓲ ꓟ ꓠꓷꓼ ꓓꓹ ꓡꓳ꓾ ꓐꓰ ꓢꓷꓸ ꓟ ꓪꓴꓸ ꓠꓬꓲ ꓬꓲ ꓠꓬ ꓟꓽ ꓙꓲꓻ ꓟ ꓔꓯ ꓟꓽ ꓡꓳꓸ ꓡꓳꓸ ꓙꓲˍ ꓟ ꓔꓯ ꓡꓰꓽ ꓡꓳꓸ ꓢꓲ ꓘꓴˍ ꓟ ꓥ ꓡꓳ= ꓠꓬꓲꓸ ꓠꓬꓲ ꓟ-ꓕꓲ ꓔꓯ ꓥˍ ꓟꓲ ꓕꓱ ꓟ ꓡꓰ ꓐꓰ ꓥꓳ=ꓞꓳ ꓤ ꓮ ꓙꓵꓽ ꓬꓲ ꓔꓯ ꓡꓳꓺ ꓒꓰ ꓔ ꓥˍ ꓟꓲ ꓢꓲꓺ ꓒ ꓬꓰ-ꓢꓴ ꓠꓬ ꓬꓲ ꓠꓯꓸꓼ ꓗꓪ ꓙꓳˍ ꓟ ꓙꓲˍ ꓟ ꓔꓯ ꓡꓳꓸ ꓢꓲ ꓘꓴ ꓔ ꓟ ꓥ ꓡꓳ=

ꓮ ꓡꓲꓳ ꓐꓯ ꓠꓬ ꓟꓲ ꓠꓯ ꓗꓪ ꓞꓳ ꓤ ꓕꓲ ꓣꓳ ꓡꓰ ꓕꓲ ꓣꓳ ꓠꓬ ꓕꓲ ꓤꓶꓻ ꓡꓱꓸꓼ ꓟꓽ ꓙꓲꓻ ꓟ ꓕꓲ ꓣꓳˍ ꓟꓲ ꓟꓽ ꓙꓳ= ꓕꓲ ꓤꓶꓻ ꓡꓱꓸꓼ ꓛꓬ ꓡꓰ ꓓꓴ ꓟꓽ ꓙꓳ ꓙꓳ ꓐꓰ ꓙꓲꓻ ꓔꓬ ꓢꓴˍ ꓟꓲ ꓟꓽ ꓙꓳ= ꓙꓲꓻˍ ꓟ ꓐꓰ ꓟꓽ ꓙꓲꓻ ꓟ ꓠꓬꓲꓽ ꓫꓵꓽ ꓡꓱꓸꓼ ꓠꓬ ꓞꓳ ꓤ ꓔꓯ ꓠꓷꓼ ꓓꓹ ꓟ ꓑꓶꓸ ꓓꓴ ꓞꓳ ꓤ ꓮ ꓡꓰ ꓕꓲ ꓣꓳˍ ꓟꓲ ꓕꓲ ꓞꓲꓼ ꓙꓲꓻ ꓟꓽ ꓐ ꓡ= ꓮ ꓡꓰ ꓕꓲ ꓣꓳˍ ꓟꓲ ꓕꓲ ꓞꓲꓼ ꓥꓶˍ ꓟ ꓟꓽ ꓬꓰ=

ꓖꓳ ꓡꓱ ꓠꓬꓲ ꓢꓲꓺ ꓒ ꓬꓰ-ꓢꓴ ꓠꓬ ꓮ ꓡꓰ ꓕꓲ ꓣꓳ ꓔꓯ ꓡꓳꓸ ꓠꓬꓲˍ ꓥ ꓟꓲ ꓬꓲ ꓟꓬꓻ ꓢꓶꓽ ꓗꓪ ꓠꓬ ꓙꓲˍ ꓟ ꓔꓯ ꓡꓰꓽ ꓡꓳꓸ ꓠꓬꓲ ꓢꓲ ꓘꓳꓹ ꓣꓴˍ ꓡꓳ꓾ ꓠꓲꓹ ꓠꓵˍ ꓡꓳ ꓐꓯ ꓟ ꓠꓬꓲꓸ ꓠꓬꓲ ꓟꓸ ꓟꓲꓽ ꓗꓪ ꓐꓰ ꓣꓳ ꓔꓯ ꓟꓸ ꓖꓶ ꓡ ꓔꓬ ꓟ ꓥ ꓡꓳ=

ꓖꓳ ꓡꓱ ꓠꓬꓲ ꓣꓳ ꓤꓶꓻ ꓔꓯ ꓥˍ ꓟꓲ ꓝꓮꓲ ꓕꓲ ꓧꓪꓹ ꓓꓵꓽ ꓙ ꓠꓬꓲ ꓡꓯ= ꓣꓳ ꓠꓬ ꓟꓲ ꓠꓯ ꓕꓱ ꓟ ꓗꓪ ꓛꓳ ꓫꓱꓽ ꓔꓬ ꓕꓯ ꓣꓳ ꓚꓲ ꓛꓬ ꓔꓯ ꓠꓱꓸ ꓐꓯ ꓕꓯꓽ ꓢꓲ ꓬꓲ ꓕꓲꓸ ꓟꓴˍ ꓟ ꓡꓰ ꓐꓰ ꓚꓬꓹ ꓠꓬꓲ ꓗꓷ ꓡ?= ꓝꓮꓲ ꓣꓳ ꓠꓬ ꓟꓽ ꓙꓲꓻ ꓥˍ ꓟꓲ ꓠꓱꓸ ꓐꓯꓼ ꓢꓴ ꓔꓯ ꓐꓯ ꓟꓴ ꓞꓷꓹ ꓟ ꓟꓬꓱꓽ ꓬꓰ ꓗꓷ ꓡ꓾ ꓐꓯ ꓟ ꓓꓵꓽ ꓙ ꓠꓬꓲ ꓠ ꓔ ꓡꓳ=

ꓖꓳ ꓡꓱ ꓠꓬꓲ ꓠꓬꓲꓸ ꓠꓬꓲ ꓟꓸ ꓟꓲꓽ ꓗꓪ ꓐꓰ ꓣꓳ ꓔꓯ ꓟꓸ ꓖꓶ ꓡ ꓔꓬ ꓟ ꓠꓬ꓾ ꓢꓲꓺ ꓒ ꓬꓰ-ꓢꓴ ꓔꓯ ꓔꓯꓺ ꓢꓳ ꓠ ꓔ ꓟ ꓥ ꓡꓳ= ꓣꓳ ꓟꓳˍ ꓟ꓾ ꓣꓳ ꓔꓳꓹ ꓜꓳꓽ ꓪˍ ꓟ ꓞꓳ ꓤ ꓮ ꓡꓰ ꓘꓶꓸ ꓥꓶˍ ꓥ ꓟꓲ ꓬꓲ ꓔꓯ ꓠꓬ ꓙꓲꓻˍ ꓟ ꓙꓳˍ ꓡꓳ ꓐꓯ ꓟ ꓡꓳꓸ ꓠꓹ ꓟ ꓬꓮꓳꓸ ꓚꓰꓹ ꓡꓳ= ꓬꓲ ꓔꓯ ꓠꓬ ꓙꓲˍ ꓟ ꓙꓳˍ ꓢꓰꓽ ꓡꓳ= ꓔꓱꓹ ꓟ ꓙꓳˍ ꓢꓰꓽ ꓡꓳ= ꓟꓬꓽ ꓠꓬꓲ ꓬꓲ ꓔꓯ ꓮ ꓘꓶꓸ ꓐꓲˍ ꓟ ꓦ ꓕꓲ ꓟ ꓙꓳˍ ꓢꓰꓽ ꓡꓳ꓾ ꓐꓯ ꓟ ꓔꓯ ꓡꓳꓸ ꓢꓲ ꓠꓲꓹ ꓠꓵ ꓠꓹ ꓟ ꓣꓳ ꓢꓯꓼ ꓕꓵꓼ ꓠ ꓗꓹ ꓡꓳ=

ꓖꓳ ꓡꓱ ꓠꓬꓲ ꓢꓲꓺ ꓒ ꓬꓰ-ꓢꓴ ꓠꓬ ꓠꓬꓲꓸ ꓠꓬꓲ ꓣꓳ ꓔꓯ ꓙ ꓖꓴ ꓟꓸ ꓖꓶ ꓗꓷ ꓟ ꓥ ꓡꓳ= ꓝꓮꓲ ꓣꓳ ꓠꓬ ꓮ ꓫꓵꓽ ꓠꓲꓹ ꓠꓵ ꓟꓽ ꓒꓵ ꓥˍ ꓟꓲ ꓢꓲꓺ ꓒ ꓬꓰ-ꓢꓴ ꓠꓬ ꓣꓳ ꓔꓯ ꓘꓴ ꓔ ꓡꓳ= ꓣꓳ ꓝꓴꓲꓸ ꓔꓯ ꓟꓽ ꓡꓳꓸ ꓡꓳꓸ ꓟ-ꓕꓲ ꓔꓯ ꓫꓱꓸˍ ꓟ ꓣꓳ ꓥˍ ꓟꓲ ꓢꓲꓺ ꓒ ꓬꓰ-ꓢꓴ ꓡꓰ ꓣꓳ ꓔꓯ ꓢꓲꓺ ꓔ ꓟ ꓑꓶꓸ ꓓꓴ ꓮ ꓟꓶ ꓣꓳ ꓠꓬ ꓬꓰ-ꓢꓴ ꓔꓯ ꓢꓷꓸ ꓢꓴ ꓕꓲ ꓣꓳ ꓒꓬꓱꓼ ꓡꓺꓳ= ꓬꓲ ꓔꓯ ꓦ ꓡꓱ ꓔꓬ ꓓꓴ ꓒꓬꓱꓼ ꓡꓺꓳ= ꓗꓹ ꓛꓲꓽ ꓛꓲꓽ ꓡꓰꓽ ꓣꓳ ꓘꓳꓹ ꓣꓴ ꓪˍ ꓟ ꓡꓰ ꓐꓰ ꓠꓱꓸ ꓐꓯꓼ ꓢꓴ ꓔꓯ ꓥˍ ꓟꓲ ꓣꓳ ꓘꓳꓹ ꓣꓴ ꓠꓹ ꓟ ꓥ ꓡꓳ=

ꓖꓳ ꓡꓱ ꓠꓬꓲ ꓠꓬꓲꓸ ꓠꓬꓲ ꓑꓮꓲꓽ ꓗꓪ ꓐꓰ ꓣꓳ ꓔꓯ ꓪꓴ-ꓢ ꓡꓰ ꓖꓶ ꓡˍ ꓟ꓾ ꓪꓴ-ꓢ ꓡꓰ ꓣꓳ ꓔꓯ ꓐꓯ ꓟꓳꓸ ꓖꓶ ꓠꓲꓹ ꓫꓵˍ ꓟ ꓠꓬ꓾ ꓡ ꓞꓳ ꓮ ꓡꓰ ꓕꓲ ꓣꓳ ꓔꓯ ꓥ ꓟꓲ ꓕꓽ ꓐꓯ ꓞꓷꓹ= ꓧꓸ ꓟ ꓡꓰꓽ ꓬꓰ꓾ ꓙꓲꓻˍ ꓟ ꓡꓰꓽ ꓬꓰ꓾ ꓐꓰ ꓠꓬꓲꓸ ꓠꓬꓲ ꓟꓸ ꓟꓲꓽ ꓗꓪ ꓐꓰ ꓣꓳ ꓔꓯ ꓐꓯ ꓟꓳꓸ ꓖꓶ ꓠꓲꓹ ꓫꓵˍ ꓟ ꓥ ꓡꓳ=

Add new comment

7 + 6 =