ꓟ-ꓕꓲ ꓔꓯ ꓘꓴˍ ꓟ

ꓬꓲ ꓤ ꓠꓬꓲ ꓤ ꓐꓴ ꓠꓬꓲꓸ ꓠꓬꓲ ꓵꓸꓹ ꓠꓹ ꓟ ꓢꓲ ꓫꓬ ꓕꓳ ꓶ ꓠꓬ ꓟ-ꓕꓲ ꓕꓳ ꓶ 9ꓽ 9-13 ꓗꓪ ꓛꓲ ꓥ ꓡꓳ= ꓢꓲ ꓫꓬ ꓕꓳ ꓶ ꓗꓪ ꓢꓲꓽ ꓒ ꓬꓰ-ꓢꓴ ꓠꓬ ꓟ-ꓕꓲ ꓔꓯ ꓘꓴꓽ ꓢꓲ꓾ ꓠꓬꓲ ꓬꓲ ꓦꓲꓸꓹ ꓗꓪ ꓝꓴꓲꓸ ꓙꓳ ꓢꓴ ꓐꓰ ꓕꓲ ꓡꓲꓸ ꓜ ꓜꓽˍ ꓟ ꓟꓸ ꓟꓲ ꓥ ꓡꓳ= ꓢꓲ ꓫꓬ ꓕꓳ ꓶ ꓠꓬ ꓠꓱ ꓠꓱ ꓥ ꓡꓳ꓾ ꓖꓳ ꓡꓰ ꓐꓯ ꓥˍ ꓟꓲ ꓣꓳ ꓔꓯ ꓦ ꓢꓯꓼ ꓪ ꓮ ꓟꓬꓹ ꓖꓶ ꓔꓬ ꓡꓳ꓾ ꓢꓲꓽ ꓒ ꓬꓰ ꓢꓴ ꓠꓬ ꓕꓱ ꓡꓱ ꓐꓰ ꓙꓰ ꓔꓬ ꓕꓯ ꓟ-ꓕꓲ ꓔꓯ ꓝꓲꓸ ꓫ ꓖꓴ ꓗꓪ ꓠꓬꓲꓸ ꓠꓸ ꓔꓬ ꓟ ꓔꓯ ꓟꓳꓸꓹˍ ꓡꓳ= ꓬꓰ-ꓢꓴ ꓡꓰ ꓥꓪ ꓔꓯ ꓛꓳ ꓡꓯ꓾ ꓐꓰ ꓐꓯ ꓕꓯ ꓟ-ꓕꓲ ꓠꓬ ꓞꓸ ꓐꓰ ꓬꓰ-ꓢꓴ ꓔꓯ ꓛꓳ ꓙꓰ ꓡꓳ꓾ ꓢꓲꓽ ꓒ ꓬꓰ ꓢꓴ ꓠꓬ ꓬꓲ ꓦꓲꓸꓹ ꓗꓪ ꓙꓰ ꓢꓲ꓾ ꓠꓬꓲ ꓝꓴꓲꓸ ꓙꓳ ꓢꓴ ꓐꓴ ꓐꓰ ꓕꓲ ꓡꓲꓸ ꓜ ꓜꓽ ꓔꓬ ꓡꓳ= ꓖꓳ ꓟ ꓔꓯ ꓒ-ꓡꓲ-ꓢꓷ ꓐꓴ ꓟꓳꓸꓹ ꓠꓬ ꓓꓵ ꓙ ꓯ ꓡꓰ ꓡꓳ= ꓖꓳ ꓡꓰ ꓟ ꓑꓶꓸ ꓓꓴ ꓢꓲꓽ ꓒ ꓬꓰ -ꓢꓴ ꓔꓯ ꓝꓴꓲꓸ ꓧꓪꓸ ꓟ ꓟꓸ ꓟꓲ ꓥ ꓡꓳ= ꓬꓲ ꓤ ꓠꓬꓲ ꓤ ꓐꓴ ꓣꓳ ꓥ ꓟꓲ ꓟ-ꓕꓲ ꓡꓰ ꓐꓰ ꓚꓲꓸ ꓛꓬ ꓟꓬꓱꓽ ꓬꓰ ꓗꓴ ꓚꓲꓸ ꓛꓬ ꓟꓬꓱꓽ ꓬꓰ ꓔꓶꓸ ꓚꓲꓸ ꓛꓬ ꓔꓬ ꓖꓴ ꓗꓪ ꓡꓰ ꓕꓲ ꓠꓬꓲ ꓡꓲꓽ ꓕꓲ ꓠꓬꓲ ꓔꓬ ꓗꓴꓸ ꓡꓳ= ꓕꓱ ꓡꓱ ꓐꓰ ꓬꓯꓼ ꓠꓬꓲ ꓖꓳꓸꓸꓙꓬ ꓕꓯ ꓢꓲꓽ ꓒ ꓬꓰ-ꓢꓴ ꓡꓰ ꓣꓳ ꓔꓯ ꓘꓴꓽ ꓔꓬ ꓟ ꓔꓯ ꓟ ꓑ ꓙ ꓫꓵꓽ ꓬꓯꓼ ꓠꓬꓲ ꓟꓲ ꓙꓳ ꓡ ꓗꓴꓸ ꓡꓳ= ꓠꓬꓲꓸ ꓠꓬꓲ ꓢꓲ ꓫꓬ ꓕꓳꓽ ꓶ ꓗꓪ ꓟ-ꓕꓲ ꓠꓬ ꓢꓲꓽ ꓒ ꓬꓰ-ꓢꓴ ꓘꓴꓽ ꓕꓯ ꓞꓸ ꓐꓰ ꓬꓲ ꓠꓬ ꓖ ꓙꓰ ꓘꓴ ꓥ ꓟꓲ ꓣꓳ ꓠꓬ ꓢꓲꓽ ꓒ ꓬꓰ-ꓢꓴ ꓘꓴꓽ ꓟ ꓬꓯꓼ ꓠꓬꓲ ꓗꓪ ꓞꓸ ꓐꓰ ꓓꓴ ꓙꓰ ꓟꓽ ꓘꓴ ꓟ ꓞꓸ ꓐꓰ ꓬꓰ ꓟ ꓘꓴ ꓟ ꓬꓯꓼ ꓠꓬꓲ ꓮ ꓘꓶꓸ  ꓙꓳ ꓡ ꓗꓴꓸ ꓡꓳ꓾ꓕꓲ ꓚꓱꓹ ꓐꓯ ꓠꓬ ꓬꓲ ꓟꓬꓱꓽ ꓬꓰ ꓠꓹ ꓟ ꓪꓴ-ꓢ ꓟꓬꓱꓽ ꓬꓰ ꓠꓹ ꓟ ꓣꓳ ꓔꓯ ꓘꓴꓽ ꓡ ꓕꓯ ꓣꓳ ꓠꓬ ꓟꓽ ꓙ ꓖꓶ ꓔ ꓟꓽ ꓓꓵ ꓙ ꓔ ꓕꓯ ꓞꓸ ꓐꓰ ꓖ ꓙꓰ ꓟ ꓐ ꓡ?

ꓟ-ꓕꓲ ꓔꓯ ꓣꓳ ꓡꓳꓸ ꓠꓬꓲ ꓕꓯ ꓬꓲ ꓤꓶꓸꓹ ꓗꓪ ꓬꓲ ꓠꓬꓲ ꓝꓲꓸ ꓫ ꓢꓴ ꓥ ꓟ ꓑꓶꓸ ꓓꓴ ꓬꓲ ꓔꓯ ꓮ ꓟ ꓟꓲ ꓫꓸ ꓪ ꓕꓱ ꓠꓲꓹ ꓟ ꓫꓵ= ꓖꓳ ꓡꓰ ꓟ ꓑꓶꓸ ꓓꓴ ꓬꓲ ꓠꓬ ꓕꓲ ꓣꓳ ꓡꓰ ꓔꓬ ꓡꓳ= ꓕꓱ ꓡꓱ ꓫꓵ ꓬꓯꓼ ꓠꓬꓲ ꓗꓪ ꓐꓰ ꓬꓲ ꓠꓬ ꓡꓲꓽ ꓙꓰ ꓠꓲꓹ ꓫꓵ ꓡꓳ= ꓕꓲ ꓠꓬꓲ ꓙꓳ ꓠꓬꓲ ꓢꓲꓽ ꓒ ꓬꓰ-ꓢꓴ ꓬꓲ ꓔꓯ ꓘꓴꓽ ꓡ ꓕꓯ ꓞꓸ ꓐꓰ ꓖ ꓙꓰ ꓐ  ꓡ ꓡꓳ= ꓠꓬꓲꓸ ꓠꓬꓲ ꓠꓴ ꓐꓰ ꓥꓪ ꓕꓱ ꓡꓱ ꓐꓰ ꓟ-ꓕꓲ ꓡꓰ ꓐꓰ ꓚꓲꓸ ꓛꓬ ꓟꓬꓱꓽ ꓬꓰ ꓔꓬ ꓕꓯ ꓪꓴ-ꓢ ꓟꓬꓱꓽ ꓬꓰ ꓠꓹ ꓟ ꓐꓱ ꓶ ꓪꓴ-ꓢ ꓟꓬꓱꓽ ꓟꓯꓸꓹ ꓠꓹ ꓟ ꓐꓱ ꓶ ꓬꓲ ꓚꓱꓹ ꓓꓳꓸꓸ ꓡ ꓕꓯ ꓞꓸ ꓐꓰ ꓬꓰ ꓐ ꓡ ꓠꓹ ꓟ ꓙ ꓖꓶ ꓠ ꓗꓹ ꓡꓳ= ꓮ ꓡꓲꓳ ꓐꓯ ꓠꓬ ꓢꓲꓽ ꓒ ꓬꓰ-ꓢꓴ ꓘꓴꓽ ꓟ ꓬꓲ ꓝꓲꓸ ꓬꓲ ꓝꓲꓸ ꓡꓰ ꓙꓳ ꓡꓳ= ꓬꓲ ꓝꓲꓸ ꓙ ꓡꓰ ꓠꓬ ꓖ ꓟ ꓟꓶꓳ= ꓣꓳ ꓬꓰ ꓘꓴ ꓟ ꓕꓲ ꓑ ꓕꓯ ꓣꓳ ꓙꓰ ꓘꓴ ꓟ ꓕꓲ ꓑ ꓕꓯ ꓬꓲ ꓙꓵ ꓔꓯ ꓖꓶ ꓠꓹ ꓟ ꓠꓬꓲꓸ ꓠꓬꓲ ꓢꓲ ꓫꓬ ꓕꓳ ꓶ ꓗꓪ ꓐꓰ ꓣꓳ ꓔꓯ ꓟꓳꓸ ꓖꓶ ꓔ ꓡꓳ= ꓟ-ꓕꓲ ꓠꓬ ꓞꓸ ꓐꓰ ꓢꓲꓽ ꓒ ꓬꓰ-ꓢꓴ ꓔꓯ ꓖ ꓙꓰ ꓟ ꓡꓰ ꓐꓰ ꓣꓳ ꓥ ꓟꓲ ꓬꓲ ꓬꓯꓼ ꓠꓬꓲ ꓛꓲ ꓡ ꓕꓯ ꓢꓲꓽ ꓒ ꓬꓰ-ꓢꓴ ꓬꓲ ꓟꓬꓱꓽ ꓔꓯ ꓬꓰ ꓐ ꓡ ꓠ ꓟ ꓐꓱ ꓶ ꓙ ꓖꓶ ꓠ ꓗꓹ ꓡꓳ=

ꓝꓮꓲ ꓕꓲ ꓫꓵꓽ ꓠꓬ ꓢꓲꓽ ꓒ ꓬꓰ-ꓢꓴ ꓠꓬ ꓝꓴꓲꓸ ꓙꓳ ꓢꓴ ꓐꓴ ꓐꓰ ꓕꓲ ꓪ ꓜ ꓜꓽ ꓡꓳ= ꓝꓴꓲꓸ ꓙꓳ ꓢꓴ ꓠꓬ ꓢꓲꓽ ꓒ ꓬꓰ-ꓢꓴ ꓬꓲ ꓟꓲ ꓙꓬ ꓗꓪ ꓙꓰ ꓢꓲ ꓠꓬꓲ ꓢꓲꓽ ꓒ ꓬꓰ-ꓢꓴ ꓔꓯ ꓠꓲꓹ ꓠꓵ ꓟ ꓑꓶꓸ ꓓꓴ ꓢꓲꓽ ꓒ ꓬꓰ-ꓢꓴ ꓑ ꓕꓲ ꓗꓪ ꓡꓰ ꓔꓬ ꓖꓴ ꓡꓳ꓾ꓝꓴꓲꓸ ꓙꓳ ꓢꓴ ꓐꓰ ꓐꓯ ꓕꓯ ꓮ ꓟ ꓥ ꓟꓲ ꓝꓴꓲꓸ ꓙꓳ ꓢꓴ ꓥ ꓡꓳ= ꓝꓴꓲꓸ ꓙꓳ ꓢꓴ ꓛꓳ ꓒꓯ ꓠꓬ ꓢꓲꓽ ꓒ ꓬꓰ-ꓢꓴ ꓥꓳ꓾ ꓮ ꓫꓵꓽ ꓑꓶꓸ ꓓꓴ ꓥ ꓡ? ꓬꓲ ꓠꓬ ꓝꓴꓲꓸ ꓔꓯ ꓠꓲꓹ ꓜꓳꓽ ꓥ ꓟꓲ ꓝꓴꓲꓸ ꓙꓳ ꓢꓴ ꓔꓯ ꓠꓬ ꓟ ꓠꓲꓹ ꓜꓳꓽ= ꓝꓴꓲꓸ ꓔꓯ ꓠꓲꓹ ꓜꓳꓽ ꓥ ꓟꓲ ꓞꓳ ꓤ ꓔꓯ ꓠꓬ ꓟ ꓠꓲꓹ ꓜꓳꓽ= ꓖꓳ ꓡꓰ ꓠꓬꓲ ꓬꓲ ꓠꓬ ꓝꓲꓸ ꓫ ꓢꓴ ꓐꓰ ꓝꓴꓲꓸ ꓙꓳ ꓢꓴ ꓐꓴ ꓐꓰ ꓕꓲ ꓡꓲꓽ ꓔꓬ ꓡꓳ꓾ ꓐꓰ ꓣꓳ ꓔꓯ ꓐꓯ ꓖꓶ ꓡ ꓟ ꓠꓬ ꓣꓳ ꓠꓬ ꓝꓴꓲꓸ ꓙꓳ ꓢꓴ ꓥ ꓟ ꓑꓶꓸ ꓓꓴ ꓢꓲꓽ ꓒ ꓬꓰ-ꓢꓴ ꓠꓬ ꓣꓳ ꓛꓳ ꓒꓯ ꓥꓳ= ꓢꓲꓽ ꓒ ꓬꓰ-ꓢꓴ ꓬꓲ ꓮ ꓡꓰ ꓐꓯˍꓐꓯ ꓠꓬ ꓟꓽ ꓠꓸꓹ ꓔꓬ ꓟꓽ ꓒꓬꓽ ꓔꓬ ꓢꓴ ꓠꓬ ꓠꓯꓸꓸ ꓞꓲꓼ ꓟꓸ ꓒ ꓔꓯ ꓣꓱꓽ ꓟ ꓬꓯꓼ꓾ ꓐꓰ ꓐꓯ ꓡꓳ= ꓠꓸꓹꓔꓬ ꓒꓬꓽ ꓔꓬ ꓢꓴ ꓡꓰ ꓠꓯꓸꓸ ꓞꓲꓼ ꓟꓸ ꓒ ꓔꓯ ꓣꓱꓽ ꓬꓯꓼ ꓡꓳ= ꓕꓱ ꓟ ꓡꓰ ꓐꓰ ꓣꓳ ꓠꓬ ꓣꓳ ꓚꓲꓸ ꓛꓬ ꓣꓳ ꓙꓲ ꓫꓬ ꓡꓳ꓾ꓣꓳ ꓠꓬ ꓠꓱ ꓐꓯ ꓢꓲꓽ ꓟꓽ ꓞꓲ ꓒꓴꓽ ꓡꓳ꓾ ꓢꓯꓼ ꓕꓵꓼ ꓡꓳ ꓐꓰ ꓓꓵ ꓙ ꓔꓬ ꓕꓯ ꓣꓳ ꓠꓬ ꓢꓲꓽ ꓒ ꓬꓰ-ꓢꓴ ꓔꓯ ꓣꓱꓽ ꓟ ꓬꓯꓼ ꓳ= ꓣꓳ ꓠꓬ ꓣꓳ ꓚꓲꓸ ꓛꓬ ꓐꓶꓸ ꓢꓴ ꓒꓬꓱꓽ ꓡ ꓡꓳ= ꓣꓳ ꓠꓬ ꓣꓳ ꓐꓱ ꓶ ꓚꓬꓱꓽ ꓢꓲꓽ ꓒ ꓒꓬꓱꓽ ꓡ ꓡꓳ= ꓮ ꓫꓵꓽ ꓑꓶꓸ ꓓꓴ ꓥ ꓡ? ꓣꓳ ꓠꓬ ꓥꓪ ꓠꓬ ꓬꓰ ꓘꓴ ꓡꓳ꓾ ꓥꓪ ꓠꓬ ꓢꓯꓼ ꓙꓳ ꓡꓳ꓾ ꓥꓪ ꓠꓬ ꓓ ꓡꓳ꓾ꓐꓰ ꓓꓵ ꓙ ꓕꓯ ꓢꓲꓽ ꓒ ꓬꓰ-ꓢꓴ ꓔꓯ ꓣꓳ ꓣꓱꓽ ꓟ ꓬꓯꓼꓳ= ꓢꓲꓽ ꓒ ꓬꓰ-ꓢꓴ ꓠꓬ ꓣꓳ ꓐꓱ ꓶ ꓟꓽ ꓒꓬꓱꓽ ꓡꓳ꓾ ꓮ ꓫꓵꓽ ꓑꓶꓸ ꓓꓴ ꓥ ꓡ? ꓢꓲꓽ ꓒ ꓬꓰ ꓢꓴ ꓠꓬ ꓝꓴꓲꓸ ꓙꓳ ꓢꓴ ꓛꓳ ꓒꓯ ꓥ ꓡꓳ= ꓣꓳ ꓠꓬ ꓝꓴꓲꓸ ꓙꓳ ꓢꓴ ꓥ ꓡꓳ= ꓚꓬꓱꓽ ꓢꓲꓽ ꓒ ꓔꓯ ꓣꓱꓽ ꓬꓯꓼ ꓡꓳ꓾ꓚꓬꓱꓽ ꓢꓲꓽ ꓒ ꓗꓪ ꓐꓰ ꓟꓽ ꓥ ꓟꓲ ꓥꓪ ꓤꓶꓸꓹ ꓗꓪ ꓮ ꓫꓵꓽ ꓟꓲ ꓬꓰ ꓟꓽ ꓐ ꓡ ꓐꓰ ꓐꓯ ꓢꓲ꓾ ꓠꓬꓲ ꓢꓲꓽ ꓒ ꓛꓲ ꓕꓲ ꓗꓪ ꓙ ꓤꓳ ꓟ ꓡꓰ ꓐꓰ ꓟꓽ ꓙꓰ ꓕꓯ ꓣꓳ ꓠꓬ ꓕꓱ ꓟ ꓙ ꓖꓴ ꓗꓪ ꓟꓽ ꓙꓰ ꓔꓬꓳ꓾ ꓖꓳ ꓡꓰ ꓠꓬꓲ ꓠꓬꓲꓸ ꓠꓬꓲ ꓠꓵ ꓥꓪ ꓢꓯꓼ ꓕꓵꓼ ꓠꓹ ꓟ ꓠꓬ ꓚꓲꓸ ꓛꓬ ꓠꓬ ꓝꓴꓲꓸ ꓙꓳ ꓢꓴ ꓥꓳ ꓐꓰ ꓓꓵ ꓙ ꓢꓲ꓾ ꓠꓬꓲ ꓢꓲꓽ ꓒ ꓬꓰ-ꓢꓴ ꓔꓯ ꓮ ꓕꓯ ꓟꓲ ꓣꓱꓽ ꓞꓸ ꓡꓳ= ꓖꓳ ꓡꓰ ꓠꓬꓲ ꓢꓲꓽ ꓒ ꓬꓰ-ꓢꓴ ꓘꓴꓽ ꓡ ꓕꓯ ꓕꓲ ꓚꓱꓹ ꓐꓯ ꓠꓬ ꓪꓴ-ꓢ ꓟꓬꓱꓽ ꓬꓰ ꓠ ꓟ ꓬꓲ ꓙꓵꓹ ꓚꓲ ꓡ ꓕꓯ ꓣꓳ ꓞꓸ ꓐꓰ ꓙꓰ ꓐꓹ ꓡ ꓠꓹ ꓟ ꓐꓱ ꓶ ꓙ ꓖꓶ ꓔ ꓓꓴ ꓬꓰ ꓡꓯ=