ꓠꓲꓹ ꓗꓴ ꓟꓬ ꓗꓴ ꓢꓴ ꓖꓶ ꓙ ꓟꓳˍ ꓟ

ꓣꓳ ꓟꓲ ꓠꓯ ꓕꓱ ꓟ ꓗꓪ ꓛꓳ ꓫꓱꓽ ꓔꓬ ꓕꓯ ꓮ ꓘꓶꓸ ꓬꓳꓸ ꓚꓵˍ ꓟ ꓠꓬ ꓮ ꓫꓵꓽ ꓥ ꓡ ꓐꓯ ꓠꓬ ꓣꓳ ꓠꓬ ꓮ ꓡꓲ ꓗꓪ ꓐꓰ ꓡˍ? ꓮ ꓡꓲ ꓗꓪ ꓙꓰ ꓔꓬ ꓡ? ꓮ ꓫꓵꓽ ꓑꓶꓸ ꓓꓴ ꓟꓲ ꓠꓯ ꓕꓱ ꓟ ꓗꓪ ꓔꓬ ꓡ ꓐꓯ ꓟ ꓔꓯ ꓔꓲꓺ ꓔꓲꓺ ꓢꓲꓽ ꓢꓲꓽ ꓡꓰꓽ ꓢꓷꓸ ꓠꓹ ꓟ ꓥ ꓡꓳ= ꓕꓱ ꓟ ꓔꓯ ꓣꓳꓽ ꓟꓽ ꓢꓷꓸ ꓕꓯ ꓠꓽ ꓣꓳ ꓟꓲ ꓠꓯ ꓕꓱ ꓟ ꓗꓪ ꓞꓳ ꓙꓳ ꓔꓬ ꓟ ꓬꓲ ꓬꓲ ꓢꓲꓺ ꓟꓽ ꓙꓳ= ꓬꓲ ꓔꓶꓺ ꓙꓱꓼ ꓟꓽ ꓙꓳ= ꓠꓲꓹ ꓟ ꓠꓯꓸꓼ ꓗꓪ ꓕꓲ ꓙꓰꓽ ꓙꓰꓽ ꓣꓱꓽ ꓞꓹ ꓟˍ ꓡꓰ ꓗꓹ ꓡꓳ= ꓠꓬꓲꓸ ꓠꓬꓲ ꓬꓳ-ꓦ ꓕꓳ ꓶ 16ꓽ5-11 ꓗꓪ ꓢꓲꓺ ꓒ ꓬꓰ-ꓢꓴ ꓡꓰ ꓬꓲ ꓝꓲ ꓓꓴ ꓐꓴ ꓔꓯ ꓕꓱ ꓡꓱ ꓐꓯ ꓡꓳ= ꓥꓪ ꓠꓬ ꓥꓪ ꓐꓹ ꓐ ꓔꓯ ꓙꓰˍ ꓥꓳ= ꓥꓪ ꓔꓯ ꓝꓲ ꓩꓴ ꓡ ꓢꓴ ꓔꓬ ꓗꓪ ꓥꓪ ꓙꓰˍ ꓥꓳ=

ꓢꓲꓺ ꓒ ꓬꓰ-ꓢꓴ ꓠꓬ ꓟꓲ ꓠꓯ ꓕꓱ ꓟ ꓗꓪ ꓬꓲ ꓮ ꓫꓵꓽ ꓑꓶꓸ ꓓꓴ ꓡˍ ꓟ ꓬꓲ ꓢꓷꓸˍ ꓡꓳ= ꓟꓲ ꓠꓯ ꓕꓱ ꓟ ꓗꓪ ꓬꓲ ꓛꓲꓺ ꓡ ꓟ ꓠꓬ ꓮ ꓡꓲ ꓗꓪ ꓐꓰ ꓡˍ ꓟ꓾ ꓮ ꓫꓵꓽ ꓑꓶꓸ ꓓꓴ ꓡˍ ꓟ꓾ ꓮ ꓡꓲ ꓗꓪ ꓙꓰ ꓓꓴ ꓥ ꓟ ꓔꓯ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓬꓲ ꓓꓵꓽ ꓙˍ ꓡꓳ= ꓬꓲ ꓠꓬ ꓟꓴꓽ ꓗꓪ ꓗꓪ ꓟ ꓐꓹ ꓐ ꓗꓪ ꓐꓰ ꓡˍ ꓡꓳ= ꓟꓲ ꓠꓯ ꓕꓱ ꓟ ꓗꓪ ꓠꓬ ꓪꓴ-ꓢ ꓟꓬꓱꓽ ꓟꓯꓻ ꓠꓹ ꓟ꓾ ꓟꓲ ꓠꓯ ꓔꓯ ꓚꓬꓴꓸ ꓠꓹ ꓟ꓾ ꓟꓲ ꓠꓯ ꓔꓯ ꓪꓴ-ꓢ ꓔꓯ ꓖꓴ ꓟꓳꓸ ꓖꓶ ꓠꓹ ꓟ ꓬꓲ ꓡꓹ ꓡꓳ= ꓟꓬꓱꓽ ꓕꓱ ꓟ ꓬꓰ ꓖꓴ ꓡꓰˍ ꓠꓬ ꓐꓹ ꓐ ꓔꓬ ꓗꓪ ꓬꓲ ꓙꓰ ꓪˍ ꓥꓳ꓾ ꓐꓯ ꓟ ꓬꓲ ꓢꓷꓸˍ ꓡꓳ= ꓖꓳ ꓡꓱ ꓠꓬꓲ ꓬꓲ ꓕꓱ ꓟ ꓔꓯ ꓐꓯ ꓟ ꓥ ꓡꓳ=

ꓣꓳ ꓥ ꓟꓲ ꓮ ꓡꓲ ꓗꓪ ꓐꓰ ꓡꓹ ꓡ ꓐꓯ ꓟ ꓔꓯ ꓓꓵꓽ ꓙ ꓠꓬꓲ ꓡꓯ= ꓣꓳ ꓠꓬ ꓢꓲꓺ ꓒ ꓬꓰ-ꓢꓴ ꓡꓰ ꓐꓰ ꓟꓴꓽ ꓗꓪ ꓗꓪ ꓐꓰ ꓔꓱꓹ ꓔꓱꓹ ꓟꓽ ꓬꓯꓼ ꓡ ꓥˍ ꓟꓲ꓾ ꓣꓳ ꓠꓬ ꓐꓹ ꓐ ꓡꓰ ꓚꓰꓼ ꓔ ꓟ ꓟꓶˍ ꓟ꓾ ꓐꓹ ꓐ ꓪꓴ-ꓢ ꓡꓰ ꓫꓬꓹ ꓚꓰꓼ ꓔ ꓟ ꓞꓳ ꓤ ꓥ ꓡꓳ= ꓐꓹ ꓐ ꓗꓪ ꓐꓰ ꓡˍ ꓟ ꓥ ꓡꓳ= ꓬꓲ ꓡꓰ ꓣꓳ ꓟꓲ ꓠꓯ ꓕꓱ ꓟ ꓗꓪ ꓔꓬ ꓕꓯ ꓮ ꓫꓵꓽ ꓑꓶꓸ ꓓꓴ ꓔꓬ ꓝꓲˍ ꓡ ꓐꓯ ꓠꓬ ꓕꓲ ꓞꓲꓼ ꓕꓲ ꓑ ꓢꓲꓺ ꓡꓲ ꓟ ꓢꓯꓼ ꓟꓬ ꓟꓶ ꓠꓹ ꓟ ꓟꓲ ꓠꓯ ꓕꓱ ꓟ ꓗꓪ ꓔꓱꓹ ꓜꓳꓽˍ ꓟ ꓗꓪ ꓙ ꓫꓱꓽ ꓠꓹ ꓟ ꓬꓲ ꓡꓰ ꓣꓳ ꓔꓯ ꓔꓬ ꓝꓲˍ ꓟ ꓥ ꓡꓳ= ꓕꓱ ꓟ ꓠꓬ ꓬꓲ ꓔꓶꓺ ꓙꓱꓼ ꓥ ꓡꓳ= ꓟꓲ ꓠꓯ ꓕꓱ ꓟ ꓗꓪ ꓬꓲ ꓔꓯ ꓠꓲꓹ ꓠꓵ ꓢꓲ ꓬꓲ ꓠꓲꓹ ꓡꓶꓽ ꓛꓳ ꓐ ꓡ ꓠꓹ ꓟ꓾ ꓬꓲ ꓔꓯ ꓫꓱꓸ ꓖꓶ ꓠꓹ ꓟ ꓣꓳ ꓔꓯ ꓔꓬ ꓝꓲˍ ꓟ ꓥ ꓡꓳ= ꓕꓲ ꓠꓬꓲ ꓙꓳˍ ꓠꓬ ꓣꓳ ꓬꓲ ꓔꓬ ꓗꓪ ꓙꓰ ꓪˍ ꓥꓳ= ꓕꓲ ꓠꓬꓲ ꓙꓳˍ ꓕꓯ ꓣꓳ ꓬꓲꓼ ꓙꓰ ꓪˍ ꓥꓳ= ꓟꓲ ꓠꓯ ꓕꓱ ꓟ ꓠꓬ ꓕꓲ ꓞꓲꓼ ꓕꓲ ꓑ ꓣꓳ ꓔꓬ ꓖꓴ ꓟꓽ ꓥ꓾ ꓐꓯ ꓟ ꓠꓬꓲꓸ ꓠꓬꓲ ꓟꓸ ꓟꓲꓽ ꓗꓪ ꓐꓰ ꓣꓳ ꓔꓯ ꓝꓮꓲ ꓕꓲ ꓧꓪꓹ ꓐꓯ ꓟꓸ ꓖꓶ ꓡ ꓔꓬ ꓟ ꓥ ꓡꓳ=

ꓖꓳ ꓡꓱ ꓠꓬꓲ ꓣꓳ ꓟꓲ ꓠꓯ ꓕꓱ ꓟ ꓗꓪ ꓛꓳ ꓫꓱꓽ ꓔꓬ ꓕꓯ ꓮ ꓕꓯ ꓟꓲ ꓠꓲꓹ ꓟ ꓠꓯꓸꓼ ꓗꓪ ꓗꓶ ꓔ ꓡꓯ= ꓮ ꓡꓲ ꓫꓵꓽ ꓠꓲꓹ ꓫꓸ ꓟꓬ ꓫꓸ ꓓꓴ ꓔꓳꓹ ꓜꓳꓽˍ ꓥ ꓟꓲ꓾ ꓣꓳ ꓠꓬ ꓕꓲ ꓑꓹ ꓤ ꓥ ꓡꓳ= ꓮ ꓡꓲ ꓫꓵꓽ ꓗꓹ ꓛꓲꓽ ꓓꓴ ꓔꓳꓹ ꓜꓳꓽˍ ꓥ ꓟꓲ ꓣꓳ ꓠꓬ ꓕꓲ ꓑꓹ ꓤ ꓥ ꓡꓳ ꓐꓯ ꓟ ꓔꓯ ꓓꓵꓽ ꓙ ꓠꓬꓲ ꓠꓹ ꓟ ꓣꓳ ꓔꓯ ꓟꓸ ꓖꓶ ꓡˍ ꓟ ꓥ ꓡꓳ= ꓝꓮꓲ ꓕꓲ ꓫꓵꓽ ꓠꓬ ꓢꓲꓺ ꓒ ꓬꓰ-ꓢꓴ ꓡꓰ ꓐꓯ ꓟ ꓠꓬ꓾ ꓥꓪ ꓕꓱ ꓡꓱ ꓐꓯ ꓕꓯ ꓠꓽ ꓠꓴ ꓪ ꓠꓲꓹ ꓟ ꓫꓸ ꓔꓬ ꓟꓽ ꓥ ꓡ= ꓥꓪ ꓠꓬ ꓙꓰ ꓓꓴ ꓥꓳ= ꓥꓪ ꓟꓽ ꓙꓰ ꓕꓯ ꓠꓽ ꓢꓲꓽ ꓫꓬ ꓟ ꓦ ꓔꓯ ꓝꓲ ꓩꓴ ꓡ ꓟꓽ ꓠ꓾ ꓐꓰ ꓬꓲ ꓡꓰ ꓐꓯ ꓡꓳ= ꓬꓲ ꓡꓰ ꓕꓱ ꓡꓱ ꓐꓯ ꓟ ꓠꓬ ꓬꓲ ꓠꓬ ꓬꓲ ꓧꓪꓽ ꓖꓳ ꓓꓱꓽ ꓬꓲ ꓫꓵꓽ ꓧꓪꓽ ꓠꓯ ꓕꓲ ꓟ ꓡꓱꓸꓼ ꓟꓲ ꓠꓯ ꓕꓱ ꓟ ꓗꓪ ꓬꓲ ꓝꓲ ꓓꓴ ꓐꓴ ꓐꓰ ꓔꓬ ꓡꓳ= ꓖꓳ ꓡꓱ ꓥ ꓟꓲ ꓠꓱꓸ ꓐꓯ ꓗꓪ ꓔꓬ ꓢꓴ ꓐꓴ ꓠꓬ ꓢꓲꓺ ꓒ ꓬꓰ-ꓢꓴ ꓔꓯ ꓟꓳ ꓪ ꓟꓽ ꓓ= ꓮ ꓡꓲꓳ ꓐꓯ ꓠꓬ ꓬꓲ ꓠꓬ ꓬꓲ ꓖꓳ ꓓꓱꓽ ꓐꓰ ꓦꓻ ꓐꓰ ꓮ ꓙꓵꓽ ꓠꓬ ꓖꓳ ꓕꓲ ꓘꓴ ꓗꓪ ꓔꓬ ꓟ ꓑꓶꓸ ꓓꓴ ꓥ ꓡꓳ=

ꓖꓳ ꓡꓱ ꓠꓬꓲ ꓬꓲ ꓠꓬ ꓟꓴꓽ ꓗꓪ ꓗꓪ ꓓꓯꓻ ꓙꓰ ꓢꓲ ꓢꓲꓽ ꓫꓬ ꓟ ꓦ ꓔꓯ ꓝꓲ ꓩꓴꓻ ꓗꓷ ꓗ ꓠꓯꓸ ꓠꓬ ꓟꓵꓽ ꓗꓳꓹ ꓓꓵ ꓓꓵ ꓗꓪ ꓬꓲ ꓔꓯ ꓙꓵꓻ ꓢꓴ ꓮ ꓙꓵꓽ ꓐꓰ ꓕꓲ ꓠꓲꓹ ꓕꓲ ꓪ ꓗꓷ ꓡꓰꓳ= ꓬꓲ ꓠꓬ ꓮ ꓡꓲ ꓥˍ ꓟꓲ ꓟꓴꓽ ꓗꓪ ꓗꓪ ꓓꓯ ꓙꓰ ꓠꓹ ꓟ ꓥꓳ= ꓖꓳ ꓡꓱ ꓢꓲ ꓢꓲꓽ ꓫꓬ ꓟ ꓦ ꓔꓯ ꓝꓲ ꓩꓴꓻ ꓡ ꓠꓸ ꓡꓳ꓾ ꓐꓰ ꓬꓲ ꓡꓰ ꓐꓯ ꓡꓳ= ꓖꓳ ꓡꓱ ꓠꓬꓲ ꓣꓳ ꓟꓲ ꓠꓯ ꓕꓱ ꓟ ꓗꓪ ꓛꓳ ꓫꓱꓽ ꓔꓬ ꓕꓯ ꓢꓲꓺ ꓒ ꓬꓰ-ꓢꓴ ꓠꓬ ꓣꓳ ꓬꓲ ꓔꓯ ꓒꓬꓱꓽ ꓔꓳꓹ ꓟꓬ ꓔꓳꓹ ꓟꓳ ꓪ ꓟꓽ ꓓ ꓥˍ ꓟꓲ ꓢꓲꓽ ꓫꓬ ꓟ ꓦ ꓗꓪ ꓐꓰ ꓬꓲ ꓠꓬ ꓣꓳ ꓐꓰ ꓕꓲ ꓠꓲꓹ ꓕꓲ ꓪ ꓔꓬ ꓡꓳ꓾ ꓐꓯ ꓟ ꓠꓬꓲꓸ ꓠꓬꓲ ꓟꓸ ꓟꓲꓽ ꓗꓪ ꓐꓰ ꓣꓳ ꓔꓯ ꓟꓸ ꓖꓶ ꓡ ꓔꓬ ꓡꓳ=

Add new comment

20 + 0 =