ꓡꓳ ꓒꓱ ꓢ ꓟ ꓔꓯ ꓕꓼˍ ꓟ

ꓣꓳ ꓟꓲ ꓠꓯ ꓞꓳ ꓤ ꓐꓴ ꓠꓯꓸꓼ ꓗꓪ ꓐꓯ ꓘꓶꓽ ꓕꓲ ꓟ ꓙꓳˍ ꓡꓳ= ꓕꓱ ꓟ ꓠꓬ ꓞꓳ ꓤ ꓕꓲ ꓣꓳ ꓫꓵꓻ ꓝꓲ ꓟꓽ ꓞꓲꓺ ꓡ ꓕꓯ ꓡꓰ ꓫꓵꓻˍ ꓕꓯ꓾ ꓥ ꓠꓬ ꓢꓶꓹ ꓜꓲ ꓗꓪ ꓐꓰ ꓞꓰ ꓫꓵꓻˍ ꓕꓯ꓾ ꓟꓲ ꓛꓬ ꓘꓪꓼ ꓬꓰ ꓢꓲ ꓫꓵꓻ ꓟ꓾ ꓬꓲꓻ ꓙꓬ ꓔꓲꓹ ꓫꓵꓻ ꓟ꓾ ꓥ ꓠꓬ ꓕꓲ ꓫꓵꓽ ꓫꓵꓽ ꓟꓳ-ꓓꓳ꓾ ꓢꓮꓲ-ꓗꓯ ꓡꓱꓸ ꓙꓰ ꓢꓲ ꓫꓵꓻ ꓟ ꓔꓯ ꓟꓳꓻˍ ꓕꓯ ꓣꓳ ꓠꓬ꓾ ꓳ ꓕꓱ ꓟ ꓠꓬ ꓬꓲ ꓠꓽ ꓠꓺ ꓖꓼ ꓟꓽ ꓧ= ꓖꓳ ꓟ ꓡꓰꓽ ꓟꓽ ꓞꓲꓺ ꓬꓲ ꓠꓬ ꓬꓲ ꓝꓴꓲꓸ ꓑꓶꓸ ꓓꓴ ꓬꓲ ꓫꓵꓻ ꓡꓳ꓾ ꓐꓰ ꓐꓯ ꓗꓴꓸˍ ꓟ ꓙꓳˍ ꓡꓳ= ꓕꓰ ꓡꓰ ꓓꓵꓽ ꓙ ꓗꓴꓸˍ ꓟ ꓙꓳˍ ꓡꓳ= ꓕꓰ ꓡꓰ ꓐꓰ ꓘꓳꓹ ꓣꓴ ꓔ ꓢꓴ ꓙꓳˍ ꓡꓳ=

ꓖꓳ ꓡꓱ ꓥ ꓟꓲ ꓠꓬꓲꓸ ꓠꓬꓲ ꓣꓳ ꓵꓻ ꓪ ꓟ ꓟ-ꓕꓲ 11ꓽ20-24 ꓗꓪ ꓢꓲꓺ ꓒ ꓬꓰ-ꓢꓴ ꓮ ꓡꓰ ꓐꓯ ꓔ ꓐꓯ ꓠꓬꓕꓱ ꓡꓱ ꓫꓵꓽ ꓟꓳꓻ ꓕꓯ ꓠꓴ ꓕꓱ ꓡꓱ ꓕꓽ ꓓꓵꓽ ꓙ꓾ ꓐꓰ ꓐꓯ ꓔ ꓟ ꓟꓳˍ ꓡꓳ= ꓮ ꓡꓲꓳ ꓐꓯ ꓠꓬ ꓢꓲꓺ ꓒ ꓬꓰ-ꓢꓴ ꓠꓬ ꓐꓱ-ꓢꓰ-ꓓ ꓡꓳ ꓒꓱ ꓐꓱ ꓶ ꓠꓲꓹ ꓟ ꓫꓸ ꓡꓳ= ꓮ ꓡꓲꓳ ꓐꓯ ꓠꓬ ꓐꓱ-ꓢꓰ-ꓓ ꓗꓪ ꓢꓲꓺ ꓒ ꓬꓰ-ꓢꓴ ꓡꓰ ꓓꓵꓽ ꓙ ꓟꓶ ꓓꓴ꓾ ꓓꓵꓽ ꓙ ꓮ' ꓡꓰ ꓓꓴ ꓟꓬꓱꓽ ꓮ ꓟꓬꓹ ꓬꓰ ꓗꓷ ꓥˍ ꓟꓲ ꓖꓳ ꓗꓪ ꓔꓬ ꓟ ꓑ ꓫꓬ ꓐꓴ ꓠꓬ ꓪꓴ-ꓢ ꓔꓯ ꓟꓽ ꓙꓵꓻ= ꓖꓳ ꓡꓱ ꓠꓬꓲ ꓬꓰ-ꓢꓴ ꓡꓰ ꓢꓳ-ꓓꓳ ꓐꓰ ꓖꓳ-ꓟꓳ-ꓣ ꓢꓶꓸ ꓟꓽ ꓞꓲꓺ ꓠꓴ ꓪ ꓠꓬ ꓫꓸ ꓙꓵˍ ꓥꓳ꓾ ꓐꓰ ꓐꓯ ꓡꓳ= ꓮ ꓫꓵꓽ ꓑꓶꓸ ꓓꓴ ꓥ ꓡ=

ꓢꓳ-ꓓꓳ ꓐꓰ ꓖꓳ-ꓟꓳ-ꓣ ꓡꓳ ꓒꓱ ꓠꓬ ꓪꓴ-ꓢ ꓔꓯ ꓟꓽ ꓙꓵꓻ= ꓪꓴ-ꓢ ꓟꓲ ꓙꓬ ꓗꓪ ꓮ ꓘꓶꓸ ꓥꓶˍ ꓟ ꓝꓴꓲꓸ ꓓ ꓟ ꓬꓰ ꓗꓷ ꓟ ꓑꓶꓸ ꓓꓴ ꓡꓳ ꓒꓱ ꓗꓪ ꓮ ꓔꓳꓸ ꓔꓯ ꓦ ꓗꓷ ꓢꓲ ꓕꓲ ꓡꓳ ꓒꓱ ꓡꓱꓸꓼ ꓔꓯ ꓛꓴ ꓦ ꓗꓷ ꓟ ꓔꓯ ꓘꓶꓽ ꓫꓵꓽ ꓡꓵꓺ ꓗꓪ ꓣꓳ ꓵ ꓪ ꓡꓳ= ꓢꓳ-ꓓꓳ ꓗꓪ ꓟ ꓑꓫꓬ ꓐꓴ ꓢꓶꓸ ꓟꓽ ꓞꓲꓺ ꓐꓱ-ꓢꓰ-ꓓ ꓑ ꓫꓬ ꓐꓴ ꓠꓬ ꓟꓬꓽ ꓠꓬꓲ ꓫ ꓙꓵꓻ ꓪ ꓥꓳ꓾ ꓐꓰ ꓐꓯ ꓔ ꓡꓳ=

ꓣꓳ ꓓꓵꓽ ꓙ ꓠꓬꓲˍ ꓕꓯ ꓣꓳ ꓤꓶꓻ ꓗꓪ ꓥˍ ꓟꓲ ꓮ ꓟꓶ ꓣꓳ ꓡꓳ-ꓟꓲꓽ ꓟꓵꓽ ꓗꓪ ꓡꓳꓸ ꓠꓬꓲˍ ꓥ ꓟꓲ ꓕꓱ ꓡꓰ ꓟꓳˍ ꓡꓳ= ꓞꓳ ꓤ ꓐꓴ ꓕꓲ ꓠꓬꓲ ꓕꓲ ꓠꓬꓲ ꓫꓵꓻ ꓔꓬ ꓡꓳ= ꓞꓳ ꓤ ꓐꓴ ꓕꓲ ꓠꓬꓲ ꓕꓲ ꓠꓬꓲ ꓢꓴ ꓡꓰ ꓢꓰꓼ ꓡ ꓟ ꓗꓪ ꓐꓰ ꓫꓵꓻ ꓔꓬ ꓖꓴˍ ꓡꓳ= ꓖꓳ ꓡꓱ ꓠꓬꓲ ꓣꓳ ꓠꓬ ꓕꓱ ꓟ ꓠꓬ ꓬꓲ ꓪ ꓝꓴꓲꓸ ꓗꓪ ꓐꓰ ꓫꓵꓻˍ ꓟ ꓥꓳ ꓐꓰ ꓓꓵꓽ ꓙˍ ꓡ= ꓮ ꓡꓲꓳ ꓐꓯ ꓠꓬ ꓠꓬꓲꓸ ꓠꓬꓲ ꓢꓲꓺ ꓒ ꓬꓰ-ꓢꓴ ꓡꓰ ꓣꓳ ꓠꓬ ꓠꓲꓹ ꓟ ꓡꓶꓸ ꓢꓲ ꓢꓲꓺ ꓒ ꓬꓰ-ꓢꓴ ꓔꓯ ꓟꓽ ꓙꓵꓻ ꓕꓯ ꓠꓽ꓾ ꓣꓳ ꓠꓬ ꓓꓵꓽ ꓙ ꓒꓳꓹ ꓬꓲꓼ ꓡ ꓢꓲ ꓣꓳ ꓠꓬ ꓟꓽ ꓙꓲꓻ ꓟ ꓗꓪ ꓐꓰ ꓚꓱꓹ ꓬꓲꓼ ꓡ ꓢꓲ ꓠꓬꓲ ꓪꓴ-ꓢ ꓟꓲꓽ ꓙꓬ ꓗꓪ ꓟꓽ ꓙꓰ ꓕꓯ ꓠꓽ ꓣꓳ ꓠꓬ ꓕꓱ ꓟ ꓢꓲꓸ ꓟꓽ ꓞꓲꓺ ꓥꓶˍ ꓟ ꓟꓶˍ ꓥꓳ꓾ ꓐꓰ ꓣꓳ ꓔꓯ ꓐꓯ ꓖꓶ ꓡ ꓔꓬ ꓟ ꓥ ꓡꓳ=

ꓖꓳ ꓡꓱ ꓠꓬꓲ ꓣꓳ ꓕꓲ ꓠꓬꓲ ꓕꓲ ꓠꓬꓲ ꓛꓳ ꓫꓱꓽ ꓔꓬ ꓕꓯ ꓠꓲꓹ ꓟ ꓠꓬ ꓮ ꓡꓲ ꓔꓯ ꓟꓳꓸ ꓙꓰ ꓔꓬ ꓡ= ꓣꓳ ꓠꓲꓹ ꓟ ꓠꓬ ꓮ ꓡꓲ ꓟ ꓔꓯ ꓠꓲꓹ ꓥꓳꓺ ꓔꓬ ꓡ ꓐꓯ ꓟ ꓓꓵꓽ ꓙ ꓠꓬꓲ ꓡꓯ= ꓝꓴꓲꓸ ꓔꓯ ꓠꓲꓹ ꓥꓳ ꓔꓬ ꓡ꓾ ꓥ ꓠꓬ꓾ ꓟꓽ ꓙꓲꓻ ꓟ ꓙ ꓖꓴ ꓟꓽ ꓙꓲꓻ ꓟ ꓚꓱꓹ ꓔꓯ ꓮ ꓕꓯ ꓟꓲ ꓓꓵꓽ ꓠꓲꓹ ꓫꓵˍ ꓡ꓾ ꓙꓰ ꓠꓲꓹ ꓫꓵˍ ꓡ ꓐꓯ ꓟ ꓔꓯ ꓓꓵꓽ ꓙ ꓠꓬꓲ ꓡꓯ= ꓖꓳ ꓡꓱ ꓠꓬꓲ ꓣꓳ ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ ꓔꓯ ꓓꓵꓽ ꓙ ꓠꓬꓲ ꓢꓲ ꓠꓬꓲ ꓠꓱꓸ ꓐꓯ ꓢꓴ ꓫꓵꓻ ꓔꓬ ꓟ ꓠꓬ ꓬꓲ ꓪ ꓝꓴꓲꓸ ꓪꓴꓸ ꓠꓬꓲ ꓥ ꓡꓳ꓾ ꓐꓰ ꓟꓽ ꓓꓵ ꓙ ꓢꓲ꓾ ꓣꓳ ꓥ ꓟꓲ ꓣꓳ ꓐꓱ ꓶ꓾ ꓣꓳ ꓚꓱꓹ꓾ ꓣꓳ ꓤꓶꓻ ꓚꓱꓹ ꓐꓱ ꓶˍ ꓡꓰꓽ ꓓꓵꓽ ꓙ ꓢꓲ ꓪꓴ-ꓢ ꓔꓯ ꓮ ꓕꓯ ꓟꓲ ꓪꓳ ꓔ ꓢꓲ꓾ ꓪꓴ-ꓢ ꓐꓰ ꓣꓳ ꓠꓬꓲꓽ ꓗꓴꓸ ꓚꓸꓼ ꓗꓪ ꓮ ꓡꓲ ꓐꓰ ꓙ ꓡꓯ ꓘꓳ ꓟꓶˍ ꓟ꓾ ꓮ ꓡꓲ ꓐꓰ ꓛꓳ ꓫꓱꓽ ꓔꓬ ꓟ ꓔꓯ ꓡꓰꓽ ꓠꓲꓹ ꓟ ꓠꓯꓸꓼ ꓗꓪ ꓗꓷ ꓔ ꓢꓲ ꓛꓳ ꓫꓱꓽ ꓙꓰ ꓡꓯ=

ꓢꓲꓺ ꓒ ꓬꓰ-ꓢꓴ ꓠꓬ ꓣꓳ ꓔꓯ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓓꓵꓽ ꓙ ꓮ' ꓓꓴ ꓓꓵꓽ ꓙ ꓟꓶ ꓓꓴ ꓮ ꓟꓬꓹ ꓬꓰ ꓖꓶ ꓔꓬ ꓡꓳ= ꓕꓱ ꓟ ꓔꓯ ꓣꓳ ꓟꓽ ꓙꓵꓻ ꓕꓯ꓾ ꓕꓱ ꓟ ꓔꓯ ꓣꓳ ꓟꓽ ꓟꓳꓻ ꓕꓯ ꓣꓳ ꓥ ꓟꓲ ꓠꓬꓲꓸ ꓠꓬꓲ ꓢꓲꓺ ꓒ ꓬꓰ-ꓢꓴ ꓠꓬ ꓐꓱ-ꓢꓰ-ꓓ ꓗꓪ ꓟ ꓑ ꓫꓬ ꓐꓴ ꓔꓯ ꓐꓯ ꓟ ꓡꓰ ꓐꓰ ꓣꓳ ꓔꓯ ꓥˍ ꓟꓲ ꓐꓯ ꓖꓶ ꓡˍ ꓥꓳ= ꓮ ꓡꓲꓳ ꓐꓯ ꓠꓬ ꓢꓲꓺ ꓒ ꓬꓰ-ꓢꓴ ꓠꓬ ꓣꓳ ꓔꓯ ꓢꓯꓼ ꓟꓬ ꓬꓲ ꓫꓵꓼ ꓖꓶˍ ꓟ꓾ ꓙꓰ ꓘꓴ ꓡ ꓘꓴˍ ꓟ ꓣꓱꓽ ꓛꓰꓽ꓾ ꓣꓱꓽ ꓬꓰ ꓘꓴˍ ꓟ ꓣꓱꓽ ꓛꓰꓽ꓾ ꓕꓱ ꓟ ꓮ ꓙꓵꓽ ꓠꓬ ꓮ ꓔꓳꓺ ꓔꓳꓺ ꓒꓬꓱꓼ ꓡˍ ꓟ ꓟꓽ ꓥ= ꓬꓲ ꓡꓰ ꓖꓶꓽ ꓔ ꓟ ꓣꓱꓽ ꓛꓰꓽ ꓥ ꓡꓳ= ꓖꓳ ꓡꓱ ꓠꓬꓲ ꓕꓱ ꓟ ꓔꓯ ꓣꓳꓽ ꓮ ꓡꓲ ꓐꓰ ꓒꓵꓽ ꓗ ꓚꓰˍ ꓡ= ꓕꓱ ꓟ ꓔꓯ ꓣꓳ ꓮ ꓡꓲ ꓐꓰ ꓚꓱꓹ ꓖꓶˍ ꓡ ꓐꓯ ꓟ ꓔꓯ ꓣꓳ ꓓꓵꓽ ꓙ ꓠꓬꓲ ꓓꓴ ꓥ ꓡꓳ=

ꓖꓳ ꓡꓱ ꓠꓬꓲ ꓣꓳ ꓠꓬ ꓪꓴ-ꓢ ꓣꓱꓽ ꓛꓰꓽ ꓮ ꓟꓬꓹ ꓘꓳ ꓣꓴ ꓟꓶˍ ꓟ ꓥ ꓠꓬꓲ ꓣꓳ ꓠꓬ ꓕꓱ ꓟ ꓔꓯ ꓒꓵꓽ ꓗ ꓚꓰ ꓢꓲ ꓣꓳ ꓐꓰ ꓪꓴ-ꓢ ꓟꓲꓽ ꓙꓬ ꓗꓪ ꓡꓰꓽ ꓟꓬꓽ ꓠꓬꓲ ꓢꓯꓼ ꓕꓵꓼ ꓙꓰ ꓡꓯ= ꓠꓱꓸ ꓐꓯ ꓢꓴ ꓔꓯ ꓟꓽ ꓡꓳꓸ ꓡꓳꓸ꓾ ꓠꓱꓸ ꓐꓯ ꓢꓴ ꓬꓰ ꓔꓬ ꓟ ꓔꓯ ꓟꓽ ꓡꓳꓸ ꓡꓳꓸ ꓠꓱꓸ ꓐꓯ ꓢꓴ꓾ ꓠꓱꓸ ꓐꓯ ꓢꓴ ꓟꓽ ꓙꓲꓻ ꓟ ꓬꓰ ꓔꓬ ꓟ ꓔꓯ ꓟꓬꓽ ꓠꓬꓲ ꓟꓽ ꓓꓵꓽ ꓙ ꓙ꓾ ꓣꓳ ꓠꓬ ꓣꓳ ꓠꓲꓹ ꓟ ꓠꓯꓸꓼ ꓗꓪ ꓐꓰ ꓓꓵꓽ ꓙ ꓒꓳꓹ ꓬꓲꓼ ꓡ ꓢꓲ ꓢꓲꓺ ꓒ ꓬꓰ-ꓢꓴ ꓔꓬ ꓗꓪ ꓙꓰˍ ꓥꓳ꓾ ꓐꓯ ꓠꓬ ꓠꓬꓲꓸ ꓠꓬꓲ ꓢꓲꓺ ꓒ ꓬꓰ-ꓢꓴ ꓡꓰ ꓣꓳ ꓔꓯ ꓶꓼ ꓥꓳꓽ ꓙꓱꓽ ꓖꓶꓽ ꓡˍ ꓥꓳ ꓐꓯ ꓟ ꓔꓯ ꓐꓯ ꓟꓳꓸ ꓖꓶ ꓠꓲꓹ ꓫꓵˍ ꓡꓳ=