ꓠꓴ ꓪ ꓠꓲꓹ ꓟ ꓫꓸ ꓟ ꓠꓬ ꓗꓹ ꓛꓲꓽ ꓓꓴ ꓒꓬꓱꓼ ꓡˍ ꓥꓳ

Thursday, May 26, 2022

ꓬꓳ-ꓦ 16ꓽ20 ꓗꓪ ꓥꓪ ꓔꓱꓹ ꓔꓱꓹꓼ ꓠꓴ ꓪꓽ ꓔꓯ ꓐꓯ ꓖꓶˍ ꓠꓬꓲ꓾ ꓠꓴ ꓪꓽ ꓠꓬ ꓮꓸ ꓛꓬ ꓙꓱ ꓢꓲ ꓥꓴˍ ꓥꓳ꓿ ꓖꓳ ꓡꓱ ꓥ ꓟꓲ ꓟꓲ ꓠꓯ ꓠꓽ ꓗꓹ ꓛꓲˍ ꓥꓳ꓿ ꓠꓴ ꓪꓽ ꓠꓬ ꓠꓲꓹ ꓟ ꓫˍ ꓥꓳ꓿ ꓖꓳ ꓡꓱ ꓥ ꓟꓲ ꓠꓴ ꓪꓽ ꓠꓲꓹ ꓟ ꓫˍ ꓟ ꓠꓬ ꓗꓹ ꓛꓲ ꓓꓴ ꓒꓬꓱꓼ ꓡ ꓥꓳ꓾ ꓐꓰ ꓐꓯ ꓔ ꓡꓳ=

ꓟꓲ ꓠꓯ ꓐꓰ ꓬꓲ ꓪ ꓤ ꓠꓱ ꓐꓴ ꓗꓹ ꓛꓲꓽ ꓢꓲ ꓪꓽ ꓫꓱ ꓔꓬ ꓕꓯ꓾ ꓗꓹ ꓛꓲꓽ ꓢꓲ ꓧꓶꓼ ꓔꓬ ꓕꓯ ꓪꓴ-ꓢ ꓤ ꓠꓱ ꓣꓱꓽ ꓢꓴ ꓐꓴ ꓠꓬ ꓠꓲꓹ ꓟ ꓫ ꓠꓬꓲ ꓥꓴꓻ ꓔꓬ ꓪˍ ꓥꓳ= ꓟꓲ ꓠꓯ ꓤ ꓠꓱ ꓐꓴ ꓙꓳ ꓢ ꓔꓬ ꓢ ꓔꓬ ꓕꓯ ꓪꓴ-ꓢ ꓤ ꓮ ꓟꓲꓽ ꓐꓴ ꓠꓬ ꓫ ꓙꓵꓻ ꓠꓬꓲ ꓢꓯꓼ ꓕꓵꓼ ꓔꓬ ꓪˍ ꓥꓳ= ꓫꓸ ꓟ ꓚꓱꓹ ꓗꓪ ꓙ ꓫꓱꓽ ꓔꓬ ꓪˍ ꓟ ꓟꓴꓽ ꓗꓪ ꓗꓴꓷꓼ ꓙ ꓖꓴ ꓫꓱꓽ ꓔꓬ ꓢꓴ ꓐꓴ ꓐꓱ ꓶ ꓮ ꓘꓶꓸ ꓪꓴꓽ ꓧꓶ ꓢꓲ ꓫꓸ ꓙꓵꓻ ꓓꓴ ꓔꓳꓹ ꓜꓳꓽ ꓔꓬ ꓪˍ ꓥꓳ= ꓟꓽ ꓙꓲꓻ ꓟ ꓚꓱꓹ ꓣꓱꓽ ꓢꓴ꓾ ꓠꓲꓹ ꓦꓯꓸ ꓢꓴ꓾ ꓠꓲꓹ ꓟ ꓟꓽ ꓙꓲꓻ ꓢꓴ꓾ ꓢꓴ ꓔꓯ ꓮ ꓔꓳꓺ ꓔꓳꓺ ꓬꓰ ꓢꓴ ꓐꓴ ꓗꓹ ꓛꓲꓽ ꓔꓬ ꓕꓯ ꓪꓴ-ꓢ ꓬꓲ ꓤ ꓬꓲ ꓠꓱ ꓐꓴ ꓠꓬ ꓠꓵꓻ ꓠꓲꓹ ꓐꓰ ꓖꓼ ꓖꓶ ꓠꓲꓹ ꓔꓯ ꓪꓳꓺ ꓫꓳꓸ ꓔꓬ ꓪˍ ꓟ ꓠꓬ ꓮ ꓘꓶꓸ ꓠꓲꓹ ꓟ ꓫ ꓓꓴ ꓙꓳˍ ꓡꓳ=ꓥ ꓡꓳ꓾ ꓟꓲ ꓠꓯ ꓗꓪ ꓠꓬ ꓟꓽ ꓙꓲꓻ ꓟ ꓚꓱꓹ ꓣꓱꓽ ꓢꓴ ꓟꓽ ꓔꓱꓹ ꓟ ꓚꓱꓹ ꓣꓱꓽ ꓢꓴ ꓐꓴ ꓠꓬ ꓙꓳ ꓢ ꓔꓬ ꓢ ꓢꓲ ꓠꓬꓲ꓾ ꓔꓱꓹ ꓚꓵˍ ꓟ ꓚꓱꓹ ꓗꓪ ꓚꓺ ꓔꓬ ꓢꓴ꓾ ꓙꓲꓻ ꓟ ꓬꓰ ꓔꓬ ꓢꓴ ꓐꓴ ꓠꓬ ꓮ ꓘꓶꓸ ꓫꓸ ꓔꓬ ꓟ ꓣꓳ ꓟꓳˍ ꓡꓳ=

ꓝꓮꓲ ꓠꓬ ꓣꓳ ꓦ ꓡꓱ ꓐꓳ ꓔꓬ ꓟ ꓪꓴꓸ ꓓꓵꓺ ꓣꓱꓽ ꓢꓴ ꓐꓴ꓾ ꓣꓳ ꓔꓯ ꓧꓳꓽ ꓣꓱꓽ ꓢꓴ ꓐꓴ ꓠꓬ ꓙꓳꓺˍ ꓟ ꓑꓶꓸ ꓓꓴ ꓟꓽ ꓙꓲꓻ ꓟꓽ ꓔꓱꓹ ꓟ ꓔꓳꓹ ꓜꓳꓽ ꓡˍ ꓕꓯ ꓐꓯ ꓟꓽ ꓑꓶꓸ ꓟ ꓠꓬ ꓪꓴ-ꓢ ꓤ ꓮ ꓟꓲꓽ ꓥ ꓟ ꓙꓲ-ꓢꓴ ꓢꓲꓺ ꓤ ꓐꓴ ꓐꓱ ꓶ ꓠꓲꓹ ꓟ ꓢꓯꓼ ꓪ꓾ ꓥꓳꓺ ꓡꓳꓸ ꓓꓴ ꓢꓯꓼ ꓐꓽ ꓡꓰ ꓓꓴ ꓒꓬꓱꓼ ꓡˍ ꓡꓳ= ꓖꓳ ꓡꓱ ꓥˍ ꓟꓲ ꓬꓰ-ꓢꓴ ꓡꓰ ꓐꓯ ꓔꓲꓸ ꓬꓰ ꓟ “ꓕꓲ ꓠꓬꓲ ꓗꓪ ꓠꓬ ꓠꓴ ꓪ ꓠꓲꓹ ꓫꓸˍ ꓟ ꓠꓬ ꓗꓹ ꓛꓲ ꓓꓴ ꓒꓬꓱꓼ ꓡˍ ꓥꓳ” ꓐꓰ ꓐꓯ ꓔ ꓟ ꓔꓯ ꓠꓲꓹ ꓟ ꓗꓪ ꓗꓷ ꓔ ꓠꓯꓹ ꓡꓳ=