ꓠꓲꓽ ꓜꓶꓽ ꓞꓹ ꓓꓴ ꓔꓯ ꓫꓬ ꓡꓰ ꓝꓲˍ ꓟ

ꓐꓯ ꓧꓪꓸ ꓘꓶꓽ ꓙꓳˍ ꓡꓳ= ꓐꓵꓽ ꓞꓶꓽ ꓠꓯ ꓓ ꓠꓬ ꓞꓲꓽ ꓫꓬꓹ ꓢˍ ꓡꓳ= ꓓꓵꓽ ꓙ ꓚꓱ ꓠꓯꓺ ꓓˍ ꓠꓽ ꓮ ꓘꓶꓸ ꓞꓲꓽ ꓫꓬ ꓫꓸ ꓡꓳ ꓐꓰ ꓐꓯ ꓘꓶꓽ ꓙꓳˍ ꓡꓳ= ꓠꓴ ꓓꓵꓽ ꓙ ꓚꓱ ꓠꓯꓺ ꓓ ꓕꓯ ꓠꓽ ꓮ ꓘꓶꓸ ꓫꓬꓹ ꓔꓱ ꓫꓸ ꓡꓳ=

            ꓠꓬꓲꓸ ꓠꓬꓲ ꓟꓸ ꓟꓲꓽ ꓘꓴꓽ ꓗꓪ ꓢꓲ ꓒ ꓬꓰ-ꓢꓴ ꓠꓬ ꓠꓲꓽ ꓢ ꓓꓯ ꓔꓯ ꓖꓼ ꓓꓳ ꓩꓴ ꓖꓶꓽ ꓡꓳ= ꓠꓻ ꓢꓴ ꓔꓯ ꓓ ꓡꓰ ꓝꓲ ꓡꓳ= ꓖꓳ ꓡꓱ ꓥˍ ꓟꓲ ꓓꓵꓽ ꓙ ꓚꓱ꓾ ꓙꓵꓹ ꓚꓱ ꓖꓳꓼ ꓓˍ ꓟ ꓒ-ꓡꓰ-ꓢꓲ ꓐꓴ ꓠꓬ ꓢꓲ ꓒ ꓬꓰ-ꓢꓴ ꓬꓰ ꓟ ꓔꓯ ꓬꓲꓸ ꓔꓱ ꓟꓳ ꓟꓽ ꓘꓴ= ꓬꓲꓸ ꓪ ꓢꓷꓸ ꓔ ꓟ ꓢꓷꓸ ꓠꓲꓹ ꓠꓬ ꓢꓲ ꓒ ꓬꓰ-ꓢꓴ ꓔꓯ ꓟꓽ ꓟꓳ ꓡꓰ ꓝꓲ= ꓟꓳ ꓟꓽ ꓘꓴ ꓗꓷ ꓡꓰ ꓝꓲˍ ꓡꓳ= ꓟꓬꓺ ꓔꓷ ꓡꓰ ꓝꓲˍ ꓡꓳ=

            ꓣꓳ ꓤꓶ ꓗꓪˍ ꓟꓲ ꓣꓳꓽ ꓢꓷꓸ ꓔ ꓟ ꓢꓷꓸ ꓠꓲꓹ ꓠꓬ ꓣꓳꓽ ꓔꓯ ꓟꓬꓺ ꓔꓶꓺ ꓡꓰ ꓝꓲ ꓡ ? ꓐꓰ ꓓꓵꓽ ꓙ ꓠꓬꓲ ꓡꓯ= ꓣꓳꓽ ꓠꓬ ꓢꓴ ꓕꓯꓽ ꓢꓲ ꓗꓪ ꓗꓴꓸ ꓡꓳ꓾ ꓑꓶꓸ ꓡꓳ꓾ ꓓˍ ꓡꓳ ꓐꓯ ꓟ ꓔꓯ ꓡꓰ ꓡꓳꓸ ꓢꓲ꓾ ꓢꓴ ꓔꓯ ꓟꓳ ꓟꓽ ꓟꓵꓼ ꓚꓬ ꓗꓷꓳ? ꓢꓴ ꓔꓯ ꓐꓯ ꓗ ꓗꓷꓳ? ꓐꓯ ꓟ ꓓꓵꓽ ꓙ ꓠꓬꓲ ꓡꓯ=

            ꓔꓱꓹ ꓔꓱ ꓐꓯ ꓠꓬ ꓣꓳꓽ ꓢꓷꓸ ꓟ ꓮ ꓙꓵꓽ꓾ ꓣꓳꓽ  ꓬꓰ ꓗꓴꓸ ꓟ ꓮ ꓙꓵꓽ ꓠꓬ ꓢꓲ ꓒ ꓬꓰ-ꓢꓴ ꓔꓯ ꓪ ꓙꓲ ꓢꓷꓸ ꓗꓴꓸ ꓠꓹ ꓟ ꓒꓬꓱꓼ ꓡ ꓓꓴ ꓥ ꓡꓳ= ꓟꓽ ꓥ ꓐꓯ ꓠꓬ ꓣꓳꓽ ꓢꓷ ꓟ ꓮ ꓙꓵꓽ ꓠꓬ ꓬꓲꓸ ꓖꓳꓽ ꓥꓳ=

            ꓝꓮꓲꓸ ꓕꓲꓽ ꓫꓵꓽ ꓟ ꓠꓬ꓾ ꓣꓳꓽ ꓠꓯꓺ ꓗꓪ ꓓꓯ ꓟ ꓟꓽ ꓙꓲ ꓟ ꓟꓽ ꓔꓱ ꓟ ꓔꓯ ꓣꓴꓹ ꓩꓴ ꓗꓷ ꓖꓶꓽ ꓠꓹ ꓟ ꓢꓲ ꓒ ꓬꓰ-ꓢꓴ ꓔꓯ ꓓꓰꓽ ꓠꓹ ꓟ ꓬꓮꓳꓸ ꓚꓲꓽ ꓡꓳ= ꓕꓲꓽ ꓖ ꓕꓲꓽ ꓔꓳꓼ ꓗꓪ ꓣꓳꓽ ꓠꓬ ꓣꓳꓽ ꓟꓽ ꓔꓱ ꓟ ꓔꓯ ꓟꓳ ꓟꓽ ꓘꓴ ꓘꓴ ꓓ ꓗꓴꓸ ꓡꓳ= ꓖꓳ ꓡꓱ ꓠꓬꓲ ꓕꓱ ꓟ ꓔꓯ ꓟꓳ ꓘꓴ ꓠꓹ ꓟ ꓪꓴ-ꓢ ꓔꓯ ꓶ ꓓꓰꓽ ꓙꓰ ꓡꓯ=