ꓡꓳ ꓒꓱ ꓢ ꓟ ꓔꓯ ꓕꓼˍ ꓟ

ꓢꓷꓸ ꓠꓲꓹ ꓙꓳ ꓒ ꓕꓲ ꓣꓳ ꓡꓰ ꓕꓱ ꓡꓱ ꓐꓯ ꓠꓬꓲˍ ꓡꓳ= ꓢꓶꓹ ꓗ ꓕꓯ ꓢꓲ ꓗꓪ ꓥꓳꓽ ꓔꓬ ꓟ ꓠꓬꓹ ꓤ ꓢꓶꓹ ꓘꓳ ꓡꓰ ꓟ ꓔꓯ ꓟꓽ ꓙꓳ= ꓮ ꓡꓰꓳ ꓐꓯ ꓠꓬ ꓬꓲꓸ ꓠꓬ ꓢꓶ ꓗ ꓔꓯ ꓦ ꓡꓱ ꓔꓬꓹ ꓫꓵꓽ ꓟ ꓥ ꓥ ꓐꓰ ꓬꓲꓸ ꓓꓵꓼ ꓡꓯ ꓔꓯ ꓦ ꓡꓱˍ ꓡꓳ= ꓢꓶꓹ ꓗ ꓖꓳ ꓟ ꓘꓳ ꓡꓰ ꓥˍ ꓟꓲ ꓬꓲꓸ ꓠꓬ ꓟꓽ ꓞꓰ ꓡꓰ= ꓬꓲꓸ ꓠꓬ ꓐꓬꓱꓺ ꓬꓰ ꓘꓴˍ ꓡꓳ=

ꓠꓬꓲꓸ ꓠꓬꓲ ꓟꓸ ꓟꓲꓽ ꓗꓪˍ ꓟꓲ ꓢꓲ ꓒ ꓬꓰ-ꓢꓴ ꓠꓬ ꓪꓴ-ꓢ ꓔꓯ ꓡꓰ ꓦ ꓡꓱ ꓠꓹ ꓟ ꓠꓬ ꓓꓵꓺ ꓡꓯꓼ ꓔꓯ ꓫꓱꓸ ꓟ ꓪꓴ-ꓢ ꓔꓯ ꓡꓰ ꓦ ꓡꓱ ꓠꓹ ꓟ ꓥꓳ= ꓬꓲꓸ ꓡꓰ ꓮ ꓫꓵꓽ ꓓꓵꓽ ꓙ ꓮ’ ꓓꓴ ꓟꓬꓱꓽ  ꓬꓰ ꓖꓶꓽ ꓥˍ ꓟꓲ ꓠꓲꓹ ꓟ ꓩꓴ ꓔꓬꓹ ꓟ ꓐ-ꓢꓲ-ꓓ ꓘ ꓔꓯ ꓙꓱꓽˍ ꓡꓳ= ꓮ ꓟꓶ ꓠꓴ ꓪ ꓗꓳ ꓡꓳ ꓗꓪ ꓥꓪ ꓬꓰ ꓟ ꓟꓬꓱꓽ ꓢꓲ-ꓓꓳ ꓘ ꓗꓪ ꓬꓰ ꓕꓯ ꓠ ꓬꓲꓸ ꓪ ꓠꓬ ꓓꓵꓽ ꓙ ꓒꓳ ꓬꓲꓼ ꓡ ꓥꓳ ꓐꓯ ꓡꓳ=

ꓣꓳꓽ ꓥˍ ꓟꓲ ꓕꓲꓽ ꓠꓬꓲ ꓡꓰ ꓕꓲꓽ ꓠꓬꓲ ꓪꓴ-ꓢ ꓖꓶꓽ ꓡ ꓟ ꓣꓱꓽ ꓛꓰ ꓔꓯ ꓟꓽ ꓓꓵꓽ ꓙ꓾ ꓫꓸ ꓟꓳ ꓟ ꓗꓴꓸ꓾ ꓟꓳ ꓟꓽ ꓗꓴꓸ ꓥꓳ ꓐꓯ ꓠꓬ ꓠꓬꓲꓸ ꓠꓬꓲꓸ ꓢꓲ ꓒ ꓬꓰ-ꓢꓴ ꓣꓳꓽ ꓔꓯ ꓓꓵꓽ ꓙ ꓮ ꓡꓰˍ ꓥꓳ= ꓢꓲ ꓒ ꓬꓰ-ꓢꓴ ꓠꓬ ꓒꓬꓱꓽ ꓔꓳ ꓟꓬꓺ ꓔꓳ ꓟꓽ ꓟꓳꓸ ꓖꓶꓽ ꓡˍ ꓥˍ ꓟꓲ ꓬꓲꓸ ꓠꓬ ꓣꓳꓽ ꓔꓯ ꓵꓺ ꓖꓴ ꓟꓽ ꓓ ꓟ ꓣꓱꓽ ꓛꓰ ꓕꓲꓽ ꓠꓬꓲ ꓕꓲꓽ ꓠꓬꓲ ꓖꓶꓼ ꓔꓬ ꓡꓳ= ꓕꓱ ꓟ ꓐꓱ ꓶ ꓬꓲꓸ ꓔꓯ ꓫꓸ ꓟꓳ ꓠꓹ ꓗˍ ꓡꓳ=

ꓕꓱ ꓟ ꓡꓰ ꓟꓽ ꓛꓲ ꓬꓲꓸ ꓡꓰ ꓣꓳꓽ ꓔꓯ ꓖꓶꓽ ꓡˍ ꓟ ꓡꓯꓼ ꓫꓴ ꓓꓽ ꓟ ꓟ ꓠꓬ ꓕꓲꓽ ꓞꓲꓼ ꓕꓲꓽ ꓑ ꓢꓯꓼ ꓟꓬꓺ ꓥˍ ꓡꓳ= ꓕꓱ ꓟ ꓕꓯꓽ ꓢꓲ ꓪꓴꓽ ꓫꓵꓽ ꓡꓯꓼ ꓫꓵ ꓟꓽ ꓙꓳ= ꓕꓱ ꓟ ꓔꓯ ꓒꓵꓽ ꓗ ꓚꓰ= ꓣꓳꓽ ꓠꓬ ꓟꓲꓺ ꓠꓯꓺ ꓗꓪ ꓕꓲꓽ ꓑ ꓤ ꓥ ꓡꓳ= ꓕꓲꓽ ꓠꓬꓲ ꓙꓳ ꓠꓬ ꓕꓱ ꓗꓪ ꓐꓰ ꓓꓳꓺ ꓙꓰ ꓪꓸ ꓥꓳ= ꓖꓳ ꓡꓱ ꓠꓬꓲ ꓓꓵꓺ ꓡꓯꓼ ꓔꓯ ꓫꓱˍ ꓟ ꓪꓴ-ꓢ ꓔꓯ ꓡꓰ ꓦ ꓡꓱ ꓡꓯ= ꓢꓶ ꓗꓸ ꓔꓯ ꓫꓱꓸ ꓟ ꓣꓳꓽ ꓖꓴꓽ ꓙꓴꓽ ꓔꓯ ꓕ ꓦ ꓡꓱ ꓐꓰ ꓠꓬꓲꓸ ꓠꓬꓲꓸ ꓟꓸ ꓟꓲꓽ ꓗꓪ ꓐꓰ ꓣꓳꓽ ꓔꓯ ꓐꓯ ꓖꓶꓽ ꓡˍ ꓡꓳ=