ꓢꓲ ꓡꓰ ꓡꓰ ꓐꓰ ꓟꓬꓱꓽ ꓬꓰ ꓠꓯ ꓟ (reflection)

Monday, March 20, 2023

ꓬꓲꓼ ꓤ ꓠꓬꓲ ꓤ ꓐꓴ‐ꓳ ꓠꓬꓲ. ꓠꓬꓲ. ꓠꓬ ꓙꓲ ꓫꓬ ꓢꓴ ꓬꓳ‐ꓢꓷ ꓑꓮꓲꓽ ꓥ ꓡꓳ꓿ ꓢꓲ ꓒ ꓬꓰ‐ꓢꓴ ꓔꓯ ꓠꓬꓲ ꓡꓳ. ꓗꓪ ꓫꓵꓼ ꓢꓴ꓾ ꓢꓲ ꓫꓬ ꓟ‐ꓣꓲ‐ꓬ ꓔꓯ ꓗꓪꓽ ꓫꓵꓼ ꓢꓴ ꓙꓲ ꓫꓬ ꓢꓴ ꓬꓳ‐ꓢꓷ ꓑꓮꓲꓽ ꓥ ꓡꓳ꓿

ꓬꓳ‐ꓢꓷ ꓠꓬ ꓙꓲˍ ꓟ ꓐ, ꓐ ꓕꓲꓽ ꓣꓳ ꓥ ꓡꓳ꓿ ꓬꓲ. ꓠꓬ ꓢꓲ ꓒ ꓬꓰ‐ꓢꓴ ꓐꓰ ꓬꓲ. ꓟ, ꓟ ꓢꓲ ꓫꓬ ꓟ‐ꓣꓲ‐ꓬ ꓔꓯ ꓠꓬꓲ ꓡꓳ. ꓗꓪꓽ ꓫꓵꓼ ꓗꓳ. ꓡ ꓡꓳ꓿

ꓘꓴ ꓜꓲꓼ ꓞꓳ ꓗꓪ ꓐꓰ ꓬꓲ. ꓔꓯ ꓠꓬ ꓢilent Worker ꓐꓯ ꓢꓲ ꓘꓴˍ ꓡꓳ꓿ ꓬꓲ. ꓠꓬ ꓢꓲ ꓡꓰ ꓡꓰ ꓐꓰ ꓟꓬꓱꓽ ꓬꓰ ꓢꓴ ꓥ ꓡꓳ꓿ ꓢꓲ ꓫꓬ ꓕꓳ ꓶ ꓗꓪ ꓬꓲ. ꓠꓬ ꓫ ꓪ ꓕꓲꓽ ꓘꓶꓽˍ ꓟꓲ ꓟꓽ ꓕꓱ꓾ ꓖꓳ ꓡꓱ ꓐꓯ ꓥˍ ꓟꓲ ꓬꓲ. ꓠꓬ ꓐ, ꓐ ꓕꓲꓽ ꓣꓳ ꓬꓰ ꓜꓲꓼ ꓙꓳˍ ꓟ ꓟꓬꓱꓽ ꓮ ꓙꓵꓽ ꓢꓲ ꓡꓰ ꓡꓰ ꓐꓰ ꓬꓰ ꓗꓷꓳ꓿

ꓪꓴ‐ꓢ ꓠꓬ ꓢꓲ ꓫꓬ ꓢꓴ ꓥ ꓟ꓾ ꓦ ꓡꓱ ꓒꓴˍ ꓟ ꓬꓳ‐ꓢꓷ ꓔꓯ ꓬꓲ. ꓤ ꓢꓲ ꓒ ꓬꓰ‐ꓢꓴ ꓔꓯ ꓠꓬꓲ ꓡꓳ. ꓠ, ꓟ ꓢꓲꓺ ꓔ ꓟ ꓥꓳ꓿ ꓬꓳ‐ꓢꓷ ꓠꓬ ꓢꓲꓽ ꓫꓬ, ꓡꓳ꓿ ꓔꓱ, ꓙꓳ ꓡꓳ꓿

ꓠꓲ, ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴ‐ꓳ꓾ ꓐ, ꓐ ꓣꓱꓽ ꓢꓴ ꓐꓴ ꓔꓯꓺ ꓢꓳ ꓓꓴ ꓠꓬ ꓙꓲ ꓫꓬ ꓢꓴ ꓬꓳ‐ꓢꓷ ꓥꓳ꓿ ꓬꓲ. ꓠꓬ ꓫ ꓪ ꓮ ꓘꓶ. ꓟꓽ ꓕꓱ꓿ ꓟꓬꓱꓽ ꓬꓰˍ ꓟ ꓗꓪ ꓐꓰ ꓟꓳ. ꓖꓶꓽ ꓡꓳ꓿ ꓠꓲ, ꓟ ꓗꓪ ꓐꓰ ꓟꓳ. ꓖꓶꓽ ꓡꓳ꓿

ꓣꓳꓽ ꓐ, ꓐ ꓣꓱꓽ ꓢꓴ ꓐꓴ ꓥˍ ꓟꓲ ꓦꓲꓻ ꓘꓴ ꓗꓪ ꓬꓲ. ꓙꓵꓽ ꓬꓰ ꓠ, ꓟ ꓟꓽ ꓥ ꓐꓯ ꓟ ꓙꓲ ꓫꓬ ꓢꓴ ꓬꓳ‐ꓢꓷ ꓡꓰ ꓣꓳꓽ ꓔꓯ ꓟꓳ. ꓖꓶꓽ ꓡ ꓟ ꓥꓳ꓿ ꓦꓲꓻ ꓘꓴ ꓗꓪ ꓟꓬꓱꓽ ꓢꓯꓼ ꓕꓵꓼ ꓠꓯ, ꓟ꓾ ꓚꓲ. ꓛꓬ ꓦꓲ ꓘꓴ ꓔꓯ ꓠꓬꓲ ꓡꓳ. ꓗꓪꓽ ꓫꓵꓼ ꓠꓯˍ ꓟ꓾ ꓬꓳ‐ꓢꓷ ꓡꓰ ꓣꓳꓽ ꓔꓯ ꓔꓯꓺ ꓢꓳ ꓓꓴ ꓗꓷ ꓔꓲ. ꓖꓶꓽ ꓟ ꓥ ꓡꓳ꓿

ꓠꓬꓲ. ꓠꓬꓲ ꓙꓲ ꓫꓬ ꓢꓴ ꓬꓳ‐ꓢꓷ ꓑꓮꓲꓽ ꓗꓪ ꓣꓳꓽ ꓐꓴ ꓢꓲ ꓡꓰ ꓡꓰ ꓐꓰ ꓟꓬꓱꓽ ꓬꓰ ꓗꓴ. ꓠꓯˍ ꓟ꓾ ꓟꓬꓱꓺ ꓓꓳꓽ ꓟꓽ ꓧꓪ ꓧꓪ ꓐꓰ ꓟꓬꓱꓽ ꓬꓰ ꓗꓴ. ꓠꓯˍ ꓟ꓾ ꓠꓵ ꓠꓲ, ꓡꓰ ꓟꓬꓱꓽ ꓬꓰ ꓗꓴ. ꓠꓯˍ ꓟ ꓣꓳ ꓢꓯꓼ ꓕꓵꓼ ꓙꓰ ꓡꓯ꓿