ꓢꓲ ꓫꓬ ꓟ-ꓡꓲ-ꓬ ꓦꓵꓸꓹ ꓦꓬꓼ ꓠꓬꓲ ꓑꓮꓲ

ꓠꓲꓹ ꓠꓵ ꓟ ꓬꓲ ꓤ ꓠꓬꓲ ꓤ ꓐꓴꓳ꓾ ꓣꓳ ꓘꓴꓽ ꓜꓲ ꓞꓳ ꓘꓴꓽ ꓗꓪ ꓦꓵꓸꓹ ꓦꓬ ꓠꓬꓲ ꓑꓮꓲ ꓬꓰ ꓟ 3 ꓫꓵ ꓡꓰ ꓙꓳ ꓡꓳ= ꓬꓲꓸ ꓪꓴꓽ ꓕꓲ ꓫꓵ ꓟ ꓠꓬ ꓢꓲꓽ ꓒ ꓬꓰ-ꓢꓴ ꓦꓵꓸꓹꓦꓬ ꓠꓬꓲ ꓑꓮꓲ ꓔꓯ ꓣꓳ ꓬꓰ ꓡꓳ= ꓝꓮꓲ ꓕꓲ ꓟ ꓠꓬ ꓖꓳ ꓓꓱ ꓔꓲꓹ ꓒ ꓬꓳ-ꓦ ꓬꓲ ꓦꓵꓸꓹ ꓦꓬ ꓠꓬꓲ ꓔꓯ ꓥˍ ꓟꓲ ꓣꓳ ꓘꓴꓽ ꓜꓲ ꓞꓳ ꓘꓴꓽ ꓗꓪ ꓐꓰ ꓬꓲ ꓔꓯ ꓫꓱꓹ ꓖꓶ ꓓꓴ ꓪꓴ-ꓢ ꓔꓯ ꓓꓳꓽ ꓟꓳꓼ ꓓꓴ ꓐꓰ ꓐꓯ ꓢꓲ꓾ ꓠꓬꓲ ꓫꓵꓽ ꓕꓱ ꓡꓱ ꓙꓳ ꓡꓳ= ꓖꓳ ꓓꓱ ꓔꓲꓹ ꓒ ꓬꓳ-ꓦ ꓔꓯ ꓠꓬ ꓬꓲ ꓠꓬ  ꓟꓷꓽ ꓠꓷꓹ ꓝꓸ ꓒ ꓐꓴ ꓘꓴꓽ ꓠꓯꓸꓼ ꓗꓪ ꓟ ꓪꓴ ꓓꓰ ꓡꓰˍ ꓟ ꓟꓸ ꓒ ꓥ ꓟ ꓑꓶꓸ ꓓꓴ ꓬꓲꓸ ꓔꓯ ꓫꓱꓹ ꓖꓶˍ ꓟ ꓬꓲꓸ ꓔꓯ ꓓꓳ ꓟꓳꓽ ꓢꓲ꓾ ꓠꓬꓲ ꓬꓲ ꓗꓪ ꓐꓰ ꓪꓴ-ꓢ ꓔꓯ ꓫꓱꓹ ꓖꓶ ꓟ ꓕꓱ ꓡꓱ ꓬꓰ ꓠꓹ ꓟ ꓐꓱ ꓶ ꓬꓲ ꓦꓵꓸꓹ ꓦꓬ ꓠꓬꓲ ꓔꓯ ꓥˍ ꓟꓲ ꓣꓳ ꓑꓮꓲ ꓕꓱ ꓡꓱ ꓬꓰ ꓟ ꓥ ꓡꓳ=

ꓝꓮꓲ ꓕꓲ ꓟ ꓟ ꓠꓬ ꓠꓬꓲꓸ ꓠꓬꓲ ꓣꓳ ꓢꓲ ꓫꓬ ꓟ-ꓡꓲ-ꓬ ꓦꓵꓸꓹ ꓦꓬ ꓠꓬꓲ ꓑꓮꓲ ꓔꓯ ꓣꓳ ꓬꓰ ꓔꓬ ꓡꓳ= ꓮ ꓫꓵꓽ ꓑꓶ ꓓꓴ ꓥ꓾ ꓐꓯ ꓠꓬ꓾ ꓬꓲ ꓠꓬ ꓪꓴ-ꓢ ꓬꓲ ꓟꓹ ꓟ ꓬꓰ ꓒꓴꓽ ꓟ ꓑꓶꓸ ꓓꓴ ꓬꓲꓸ ꓦꓵꓸꓹ ꓦꓬ ꓠꓬꓲ ꓑꓮꓲ ꓔꓯ ꓥˍ ꓟꓲ ꓣꓳ ꓬꓰ ꓖꓶ ꓡꓳ= ꓣꓳ ꓦꓵꓸꓹ ꓦꓬ ꓠꓬꓲ ꓑꓮꓲ ꓬꓰ ꓕꓯ ꓠꓬ ꓣꓳ ꓪꓴ-ꓢ ꓔꓯ ꓫꓸ ꓟꓳ ꓟ ꓝꓮꓲ ꓮꓽ ꓐ ꓮ ꓟ ꓔꓯ ꓫꓸ ꓟꓳ ꓟ ꓕꓱ ꓡꓱ ꓐꓰ ꓬꓰ ꓡꓳ= ꓪꓴ-ꓢ ꓣꓱꓽ ꓛꓵ ꓣꓳ ꓔꓯ ꓖꓶ ꓡ ꓟ ꓐꓱ ꓶ ꓣꓳ ꓬꓲꓸ ꓔꓯ ꓫꓱꓹ ꓖꓶ ꓟ ꓥ ꓡꓳ= ꓕꓱ ꓟ ꓡꓰ ꓐꓰ ꓢꓲ ꓫꓬ ꓟ-ꓡꓲ-ꓬ ꓦꓵꓸꓹ ꓦꓬ ꓠꓬꓲ ꓔꓯ ꓣꓳ ꓬꓰ ꓟ ꓠꓬ ꓬꓲ ꓠꓬ ꓤ ꓟꓶ ꓤ ꓮ ꓙꓵꓽ ꓟ ꓗꓪ ꓪꓴꓽ ꓓꓰ ꓡꓰˍ ꓟ ꓤ ꓟꓶ ꓤ ꓥ ꓡꓳ= ꓟꓲ ꓠꓯ ꓕꓱ ꓟ ꓗꓪ ꓬꓲ ꓡꓰ ꓐꓰ ꓢꓲ ꓫꓬ ꓢꓴ ꓟꓽ ꓙꓳ꓾ ꓮ ꓫꓵꓽ ꓑꓶꓸ ꓓꓴ ꓥ꓾ ꓐꓯ ꓠꓬ꓾ ꓬꓲ ꓠꓬ ꓪꓴ-ꓢ ꓬꓲꓸ ꓮ ꓟ ꓬꓰ ꓒꓴꓽ ꓟ ꓤ ꓟꓶ ꓤ ꓥ ꓡꓳ=

ꓟꓲ ꓠꓯ ꓕꓱ ꓟ ꓗꓪ ꓒꓴꓽ ꓓꓰ ꓡꓰ ꓟ ꓪꓴ-ꓢ ꓬꓲ ꓮ ꓟ ꓥ ꓡꓳ= ꓮ ꓡꓰꓳ ꓐꓯ ꓠꓬ ꓘꓶꓼ ꓫꓵꓽ ꓫꓵꓽ ꓗꓪ ꓟ ꓘꓶꓼ ꓫꓵꓽ ꓢꓲꓼ ꓘꓶꓼ ꓠꓬ ꓢꓲ ꓫꓬ ꓟ-ꓡꓲ-ꓬ ꓥ ꓡꓳ= ꓮ ꓠꓱ ꓕꓯ ꓘꓶꓼ ꓫꓵꓽ ꓡꓴ ꓗꓪ ꓘꓶꓼ ꓫꓵꓽ ꓢꓲꓼ ꓘꓶꓼ ꓐꓯ ꓟ  ꓠꓬ ꓕꓱ ꓡꓱ ꓐꓰ ꓪꓴ-ꓢ ꓬꓲ ꓙꓵꓽ ꓗ ꓗꓷ ꓔ ꓟ ꓢꓲꓼ ꓘꓶꓼ ꓔꓯ ꓘꓶꓼ ꓫꓵꓽ ꓢꓲꓼ ꓘꓶꓼ ꓐꓰ ꓐꓯ ꓡꓳ꓾ ꓘꓶꓼ ꓫꓵꓽ ꓢꓲꓼ ꓘꓶꓼ ꓗꓪ ꓪꓴ-ꓢ ꓔꓬ ꓡꓳ= ꓠꓬꓲꓸ ꓠꓬꓲ ꓘꓶꓼ ꓫꓵꓽ ꓫꓵꓽ ꓗꓪ ꓘꓶꓼ ꓫꓵꓽ ꓢꓲꓼ ꓘꓶꓽ ꓠꓬ ꓢꓲ ꓫꓬ ꓟ-ꓡꓲ-ꓬ ꓥˍ ꓡꓳ= ꓬꓲ ꓠꓲꓹ ꓟ ꓠꓯꓼ ꓗꓪ ꓬꓲ ꓖꓳ ꓓꓱ ꓠꓯꓼ ꓗꓪ ꓢꓲꓽ ꓒ ꓬꓰ-ꓢꓴ ꓔꓬ ꓡ ꓢꓲ꓾ ꓠꓬꓲ ꓢꓲꓽ ꓒ ꓬꓰ-ꓢꓴ ꓠꓬ ꓪꓴ-ꓢ ꓥ ꓟꓲ ꓮ ꓫꓵꓽ ꓬꓰ ꓟꓽ ꓗꓴꓸ ꓟ ꓤ ꓠꓱ ꓤ ꓕꓲ ꓣꓳ ꓡꓰ ꓐꓰ ꓞꓳ ꓤ ꓕꓲ ꓣꓳ ꓡꓰ ꓐꓰ ꓢꓲ ꓫꓬ ꓟ-ꓡꓲ-ꓬ ꓡꓯ ꓒꓯꓼ ꓗꓪ ꓪꓴ ꓡ ꓡꓳ=

ꓢꓲ ꓫꓬ ꓟ-ꓡꓲ-ꓬ ꓠꓬ ꓣꓳ ꓐꓱ ꓶ ꓮ ꓕꓯ ꓟꓲ ꓪꓽ ꓘꓴꓽ ꓙ ꓖꓶ ꓔꓬ ꓡꓳ꓾ ꓣꓳ ꓮ ꓟꓶ ꓟꓲ ꓠꓯ ꓕꓱ ꓟ ꓗꓪ ꓥ ꓟꓲ ꓢꓲ ꓫꓬ ꓟ-ꓡꓲ-ꓬ ꓓꓳꓸꓸ ꓡ ꓢꓲꓽ ꓠꓬꓲ ꓢꓲꓽ ꓒ ꓬꓰ-ꓢꓴ ꓔꓯ ꓙꓵꓽ ꓠꓹ ꓟ ꓐꓱ ꓶ ꓢꓲꓽ ꓒ ꓬꓰ-ꓢꓴ ꓒ ꓔꓲ ꓗꓪ ꓙꓰ ꓢꓲ꓾ ꓠꓬꓲ ꓚꓲꓽ ꓛꓬ ꓝꓴꓲꓸ ꓐꓱ ꓶ ꓠꓲꓹ ꓥꓳꓽ ꓠꓹ ꓟ ꓐꓱ ꓶ ꓬꓲ ꓠꓬ ꓕꓲ ꓒ ꓕꓲ ꓒ ꓟꓲ ꓠꓯ ꓗꓪ ꓓꓳꓸꓸ ꓡ ꓢꓲ꓾ ꓠꓬꓲ ꓣꓳ ꓔꓯ ꓬꓲ ꓠꓬꓲꓸꓹ ꓖꓶ ꓡ ꓫꓵꓽ ꓮ ꓟꓬꓹ ꓙꓳ ꓡꓳ= ꓐꓯ ꓠꓲꓹ ꓫꓵꓽ ꓟ ꓠꓬ ꓢꓲꓽ ꓫꓬ ꓟ-ꓡꓲ-ꓬ ꓠꓬ ꓣꓳ ꓮ ꓟ ꓥ ꓡꓳ= ꓠꓬꓲꓸ ꓠꓬꓲꓸ ꓗꓹ ꓛꓲ ꓡꓯ꓾ ꓬꓲꓸ ꓔꓯ ꓣꓳ ꓟꓬꓱꓽ ꓓꓳ ꓖꓶ ꓡꓯ꓾ ꓣꓳ ꓔꓯ ꓪꓽ ꓘꓴꓽ ꓙ ꓠꓹ ꓟ ꓓꓰꓸꓸ ꓡꓯ= ꓣꓳ ꓮ ꓡꓰ ꓫꓵꓽ ꓬꓰ ꓥ ꓟꓲ ꓪꓴ-ꓢ ꓠꓬ ꓥꓪ ꓒ ꓕꓲ ꓗꓪ ꓔꓬ ꓡꓳ ꓐꓰ ꓙꓵꓽ ꓢꓲ꓾ ꓪꓴ-ꓢ ꓟꓸ ꓟ ꓠꓬ ꓥꓪ ꓟꓸ ꓟ ꓥꓳ ꓐꓰ ꓙꓵꓽ ꓢꓲ꓾ ꓠꓬꓲ ꓞꓳ ꓙꓳ ꓙꓰ ꓡꓯ ꓐꓰ ꓮ ꓙꓵꓽ ꓢꓴ ꓔꓯ ꓢꓯꓼ ꓖꓶ ꓩꓴ ꓡ ꓥꓳ ꓫꓸ ꓟꓳ=