ꓤ ꓖꓴ ꓤ ꓟꓶ ꓒꓰ ꓡꓯꓽ ꓘꓳ ꓟꓽ ꓓ ꓟ

 ꓒ-ꓡꓲ-ꓢꓷ ꓐꓴ ꓬꓲ ꓔꓯ ꓡ ꓢꓲ꓾ ꓬꓲ ꓔꓯ ꓤꓹ ꓠꓬꓲ ꓠꓹ ꓟ꓾ ꓡ ꓞꓳ ꓠꓬ ꓮ ꓡꓲ ꓫꓵꓽ ꓑꓶ ꓓꓴ ꓥ_ ꓟꓲ꓾ ꓬꓲ ꓤ ꓟꓶ ꓔꓯ ꓡꓳꓺ ꓗꓷ_ ꓠꓬ ꓓ_ ꓡꓺꓽ꓾ ꓟꓽ ꓓ ꓡꓺꓽ꓾ ꓐꓯ_ ꓡꓳ꓿ ꓬꓲ ꓠꓬ ꓕꓱ ꓡꓱ ꓒꓳꓹ ꓖꓶ_ ꓡꓳ꓾ ꓬꓲ ꓪꓴꓸ ꓕꓯ ꓞꓳ ꓤ ꓔꓯ ꓚꓰꓼ ꓢꓴ ꓠꓬ ꓞꓳ ꓑ ꓤ_ ꓐꓰ ꓤ ꓟꓶ ꓤ ꓔꓯ ꓚꓰꓼ ꓔ ꓢꓲ꓾ ꓬꓲ ꓪ ꓔꓯ ꓕꓱ ꓡꓱ ꓐꓯ_ ꓡꓳ꓾ ꓕꓱ ꓟ ꓪꓴꓸ ꓠꓬꓲ ꓡ ꓞꓳ ꓕꓲ ꓣꓳ ꓠꓬ ꓬꓲ ꓮ ꓐꓽ ꓮ ꓟ_ ꓐꓰ ꓧꓹ ꓗꓷ ꓢꓲ꓾ ꓬꓲ ꓤ ꓟꓶ ꓔꓯ ꓠꓷꓼ ꓡꓰ_ ꓥꓳ꓿ ꓖꓳ ꓡꓱ ꓢꓲ ꓬꓲ ꓪ ꓠꓬꓲꓽ ꓟ ꓠꓬ ꓕꓲ ꓧꓪꓽ_ ꓡꓰꓽ ꓒꓬꓱꓼ ꓬꓰ_ ꓥꓳ꓾ ꓐꓯ_ ꓡꓳ꓾ ꓐꓰ ꓐꓳ ꓔ_ ꓟ ꓔꓯ ꓠꓴ ꓪ ꓟꓽ ꓵ ꓠꓬꓲ ꓡꓺꓽ꓿ ꓬꓲ ꓪ ꓠꓽ ꓝꓮꓲ ꓠꓬꓲꓽ ꓣꓳ ꓟꓽ ꓥ꓾ ꓕꓲ ꓧꓪꓽ_ ꓡꓰꓽ ꓥ ꓡꓳ꓿ ꓖꓳ ꓡꓱ ꓠꓬꓲ ꓪꓴ-ꓢ ꓡꓰ ꓚꓱꓺ ꓔ_ ꓟ ꓠꓬ ꓞꓳ ꓤ ꓡꓰ ꓕꓽ ꓧꓹ ꓗꓷ ꓝꓲ꓾ ꓐꓯ_ ꓡꓳ꓿ ꓬꓲ ꓪ ꓡꓰ꓾ ꓖꓳ ꓡꓱ ꓥ ꓠꓬ ꓤ ꓟꓶ ꓡꓳ ꓗꓷ_ ꓕꓯ ꓤ ꓟꓶ ꓡꓳꓺ ꓗꓷ_ ꓟ ꓕꓳ ꓶ ꓖꓶ ꓠ ꓗ_ ꓡꓳ꓾ ꓐꓰ꓾ ꓟꓳ-ꓫꓲ ꓮ ꓫꓵ ꓪꓴ ꓠꓬꓲ ꓕꓵꓼ ꓪ ꓖꓶ_ ꓡꓳꓺꓽ꓾ ꓐꓯ_ ꓡꓳ꓿ ꓬꓰ-ꓢꓴ ꓡꓰ꓾ ꓠꓴ ꓪ ꓠꓲꓹ ꓟ ꓩꓴ_ ꓟ ꓑꓶ ꓓꓴ꓾ ꓟꓳ-ꓫꓲ ꓠꓽ ꓠꓴ ꓪ ꓤ ꓟꓶ ꓡꓳ ꓗꓷ_ ꓟ ꓔꓯ ꓓꓽ ꓔꓳꓹ_ ꓡꓳ꓿ ꓬꓲ ꓪꓴꓸ ꓕꓯ ꓠꓽ ꓖꓳ ꓡꓱ ꓟꓽ ꓥ꓿ ꓥꓪ ꓠꓴ ꓪ ꓔꓯ ꓐꓯ ꓖꓶ_ ꓠꓬꓲ꓾ ꓮ ꓟ ꓥ_ ꓟꓲ ꓟꓽ ꓢꓲꓽ ꓟꓽ ꓫꓬ ꓟ ꓪꓴꓸ ꓠꓬꓲ ꓟꓽ ꓥ ꓕꓯ ꓠꓽ꓾ ꓬꓲ ꓤ ꓟꓶ ꓔꓯ ꓡꓳꓺ ꓗꓷ ꓢꓲ ꓠꓱꓸ ꓐꓯꓼ ꓕꓲ ꓣꓳ ꓫꓺ_ ꓠꓬ꓾ ꓦꓬꓽ ꓛꓳꓽ ꓧꓪ_ ꓟ ꓝꓴꓲ ꓬꓰ_ ꓟ ꓥ ꓡꓳ꓿ ꓹꓡꓳꓺ ꓗꓷ ꓟ ꓤ ꓟꓶ ꓤ ꓖꓳ ꓟ ꓔꓯ ꓫꓺ ꓢꓴ_ ꓟꓲ꓾ ꓦꓬꓽ ꓛꓳ ꓧꓪ_ ꓟ ꓝꓴꓲ ꓬꓰ_ ꓟ ꓥ ꓡꓳ꓾ ꓐꓯ_ ꓡꓳ]꓿ ꓖꓳ ꓡꓱ ꓠꓬ ꓛꓳ ꓒꓯ ꓐꓴ ꓡꓰ ꓬꓲ ꓔꓯ꓾ ꓞꓳ ꓑ ꓤ_ ꓐꓰ ꓬꓲ ꓤ ꓟꓶ ꓠꓬ ꓮꓽ ꓢꓳ ꓐꓯ_ ꓟ_ ꓡꓰ ꓐꓰ ꓥ ꓕꓯ ꓠꓽ꓾ ꓟꓽ ꓧꓪ ꓟ ꓙꓲ_ ꓡꓳ꓾ ꓐꓯ_ ꓡꓳ꓿ ꓬꓲ ꓠꓽ ꓬꓲ ꓪ ꓔꓯ꓾ ꓐꓯ ꓘꓶ ꓕꓱ ꓟ ꓠꓬ ꓡ ꓞꓳ ꓥ ꓕ ꓑꓳ ꓘꓳ ꓣꓴ ꓐ ꓡ_ ꓡꓳ ꓟꓽ ꓥ꓾ ꓮ ꓟ ꓔꓯ ꓖꓶꓽ ꓔ_ ꓠꓬ ꓮ ꓟ_ ꓡꓰ ꓘꓳ ꓣꓴ ꓐ ꓡ_ ꓡꓳ꓿ ꓮ ꓡꓲꓳ ꓐꓯ ꓠꓬ ꓬꓲ ꓮ ꓟ ꓤ ꓘꓶꓻ ꓗꓪ ꓐꓰ ꓦꓵꓻ_ ꓕꓯ ꓡꓰ ꓟ ꓞꓳ ꓠꓸ_ ꓟꓲ ꓙꓳ_ ꓡꓳ꓿ ꓞꓳ ꓤ ꓡꓰ ꓠꓸ ꓔ_ ꓟ ꓞꓳ ꓠꓸ_ ꓟꓲ ꓙꓳ_ ꓡꓳ꓿ ꓪꓴ-ꓢ ꓗꓴꓷ ꓐꓱ ꓶ ꓚꓲ ꓛꓬ ꓔꓯ ꓠꓸ ꓗꓷ ꓟ ꓞꓳ ꓠꓸ_ ꓟꓲ ꓙꓳ_ ꓡꓳ꓿ ꓘꓳ ꓣꓴ ꓐ ꓡ ꓢꓴ ꓠꓬ ꓘꓳ ꓣꓴ ꓝꓲ꓾ ꓐꓯ_ ꓡꓳ꓿
 
 
 
 
 
 
 

Add new comment

13 + 7 =