ꓪꓴ‐ꓢ ꓶꓽ ꓓꓳ ꓫꓱ, ꓓꓳꓽ (Reflection)

ꓬꓰ-ꓡꓲ-ꓟꓲ 18ꓽ1-6 ꓟ-ꓕꓲ 13ꓽ47-53

ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳ ꓶꓽ ꓗꓪ ꓠꓬ ꓢꓲꓺ ꓒ ꓬꓰ-ꓢꓴ ꓡꓰ ꓟꓴꓽ ꓗꓪ ꓗꓴꓷꓼ ꓠꓬ ꓮ ꓡꓲ ꓗꓹ ꓟ ꓔꓯ ꓔꓯꓺ ꓥꓳꓽ ꓣꓱꓽ ꓢꓲ ꓐꓯ ꓟꓸ ꓖꓶ ꓡ ꓔꓬ ꓡꓳ= ꓟꓴꓽ ꓗꓪ ꓗꓴꓷꓼ ꓠꓬ ꓥꓪꓸ ꓓꓳꓽ ꓢꓲ ꓠꓬꓲ ꓥꓪꓸ ꓑꓱ ꓗꓪ ꓥꓪꓸ ꓐꓲ ꓡꓰ ꓢꓲ ꓠꓬꓲ ꓥꓪꓸ ꓑꓱꓸ ꓔꓯ ꓗ ꓢ ꓗꓪ ꓚꓵꓹ ꓓꓯꓻ ꓡ ꓢꓲ ꓠꓬꓲ ꓖꓳ ꓗꓪ ꓧꓸ ꓟ ꓐꓰ ꓟꓽ ꓧ ꓟ꓾ ꓙꓲˍ ꓟ ꓐꓰ ꓟꓽ ꓙꓲꓻ ꓟ ꓮ ꓙꓵꓽ ꓐꓲ ꓓꓹ ꓡꓳ= ꓖꓳ ꓟ ꓗꓪ ꓐꓰ ꓙꓲˍ ꓟ ꓔꓯ ꓠꓬ ꓣꓴ ꓒꓯꓼ ꓝꓲ ꓗꓪ ꓧꓳꓽ ꓔ ꓢꓲ ꓠꓬꓲ ꓟꓽ ꓙꓲꓻ ꓟ ꓔꓯ ꓠꓬ ꓠꓱ ꓫꓳꓸ ꓟ ꓗꓪ ꓡꓳꓺ ꓗꓷˍ ꓡꓳ꓾ ꓐꓰ ꓢꓲꓺ ꓒ ꓬꓰ-ꓢꓴ ꓡꓰ ꓔꓯꓺ ꓥꓳ ꓐꓯ ꓟꓸ ꓖꓶ ꓡˍ ꓡꓳ= ꓕꓱ ꓟ ꓠꓬ ꓟꓲꓺ ꓠꓯ ꓕꓱ ꓟ ꓡꓳꓹ ꓬꓰˍ ꓕꓯ ꓠꓬ ꓙꓲꓻ ꓢꓴ ꓠꓬ ꓟꓴꓽ ꓗꓪ ꓗꓪ ꓓꓯ ꓙꓰ ꓢꓲ ꓠꓬꓲ ꓟꓽ ꓙꓲꓻ ꓢꓴ ꓔꓯ ꓠꓬ ꓟꓴꓽ ꓗꓪ ꓝꓲ ꓓꓴ ꓡꓰ ꓮ ꓔꓳꓸ ꓛꓬꓼ ꓟꓵꓽ ꓗꓪ ꓡꓳ ꓧꓳꓽ ꓗꓷˍ ꓥ꓾ ꓐꓯ ꓟ ꓔꓯ ꓐꓯ ꓬꓯꓼˍ ꓟ ꓥ ꓡꓳ= ꓠꓲꓹ ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓔꓯꓺ ꓥꓳꓽ ꓕꓱ ꓟ ꓔꓯ ꓢꓲꓺ ꓒ ꓬꓰ-ꓢꓴ ꓡꓰ ꓐꓯ ꓔꓬ ꓟ ꓠꓬ ꓢꓲꓺ ꓒ ꓬꓰ-ꓢꓴ ꓤꓶꓻ ꓦꓬꓼ ꓠꓬꓲ ꓗꓪ ꓠꓬ ꓥꓪꓸ ꓓꓳꓽ ꓢꓴ ꓥꓪꓸ ꓒ ꓢꓴ ꓮ ꓟꓬꓹ ꓙꓳˍ ꓟ ꓑꓶꓸ ꓓꓴ ꓟꓴꓽ ꓗꓪ ꓗꓴꓷꓼ ꓠꓬ ꓮ ꓡꓲ ꓗꓹ ꓟ ꓔꓯ ꓬꓲ ꓪ ꓙꓽ ꓜꓲꓼ ꓡꓰ ꓠꓹ ꓟ꓾ ꓟꓴꓽ ꓗꓪ ꓗꓴꓷꓼ ꓗꓪ ꓠꓬ ꓙꓲꓻ ꓢꓴ ꓡꓰꓽ ꓛꓲꓺ ꓬꓰ ꓐ ꓡˍ ꓟ꓾ ꓟꓽ ꓙꓲꓻ ꓢꓴ ꓔꓯ ꓠꓬ ꓛꓬꓼ ꓟꓵꓽ ꓗꓪ ꓡꓳ ꓩꓴ ꓗꓷˍ ꓟ ꓔꓯ ꓢꓲꓺ ꓒ ꓬꓰ-ꓢꓴ ꓡꓰ ꓔꓯꓺ ꓥꓳꓽ ꓣꓱꓽ ꓢꓲ ꓐꓯ ꓟꓸ ꓖꓶ ꓡ ꓔꓬ ꓟ ꓥ ꓡꓳ= ꓣꓳ ꓔꓯ ꓠꓬ ꓢꓲꓺ ꓒ ꓬꓰ-ꓢꓴ ꓡꓰ ꓮ ꓫꓵꓽ ꓐꓯ ꓟ ꓖꓶ ꓡ ꓔꓬ ꓡ? ꓠꓲꓹ ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓣꓳ ꓠꓬ ꓢꓲꓺ ꓒ ꓬꓰ-ꓢꓴ ꓤꓡꓻ ꓕꓯ ꓟ ꓡ ꓞꓳ ꓔꓯ ꓟꓽ ꓫꓱꓸ= ꓣꓳ ꓠꓬ ꓪꓴ-ꓢ ꓔꓯ ꓢꓷꓸˍ ꓟ꓾ ꓐꓹ ꓐ ꓪꓴ-ꓢ꓾ ꓮ ꓐꓲ ꓪꓴ-ꓢ꓾ ꓢꓲꓽ-ꓫꓬ-ꓟ-ꓦ ꓪꓴ-ꓢ ꓔꓯ ꓢꓷꓸˍ ꓟ ꓪꓴ-ꓢ ꓦ ꓡꓱ ꓢꓴ ꓥ ꓡꓳ= ꓘ-ꓣꓲ-ꓢ-ꓔꓴ ꓢꓲꓺ ꓤ ꓐꓴ ꓥ ꓡꓳ= ꓖꓳ ꓡꓱ ꓐꓯ ꓥ ꓟꓲ ꓣꓳ ꓠꓬ ꓪ ꓜꓲ ꓟꓽ ꓧ ꓟ ꓔꓯ ꓡꓰꓽ ꓬꓰ ꓔꓬ ꓟ ꓟꓬꓽ ꓠꓬꓲ ꓥ ꓡꓳ=

ꓧˍ ꓟ ꓔꓯ ꓣꓳ ꓟꓽ ꓬꓰ ꓪ ꓡꓰ= ꓧˍ ꓟ ꓪꓴ-ꓢ ꓐꓯ ꓘꓶꓽ꓾ ꓧˍ ꓟ ꓪꓴ-ꓢ ꓡꓰ ꓣꓳ ꓔꓯ ꓟꓸ ꓖꓶ ꓔ ꓟ ꓟꓸ ꓟꓲꓽ ꓔꓯ ꓣꓳ ꓮ ꓟꓬꓹ ꓢꓷꓸˍ ꓥ ꓟꓲ ꓣꓳ ꓠꓬ ꓟꓽ ꓙꓲꓻ ꓟ ꓔꓯ ꓡꓰꓽ ꓬꓰ ꓔꓬ ꓥꓳ ꓐꓯ ꓠꓬ ꓣꓳ ꓥ ꓟꓲ ꓡꓳꓹ ꓬꓰˍ ꓟ ꓕꓲ ꓠꓬꓲ ꓕꓯ ꓠꓬ ꓛꓬꓼ ꓟꓵꓽ ꓮ ꓔꓳꓸ ꓗꓪ ꓡꓳ ꓧꓳꓽ ꓗꓷˍ ꓟ ꓟꓶˍ ꓥꓳ꓾ ꓐꓰ ꓢꓲꓺ ꓒ ꓬꓰ-ꓢꓴ ꓡꓰ ꓣꓳ ꓔꓯ ꓙ ꓟꓳ ꓘꓶꓽ ꓖꓶ ꓔꓬ ꓟ ꓥ ꓡꓳ= ꓖꓳ ꓡꓱ ꓠꓬꓲ ꓠꓲꓹ ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓣꓳ ꓟꓲ ꓠꓯ ꓞꓳ ꓤ ꓐꓴ ꓠꓬ ꓮ ꓫꓵꓽ ꓪꓴꓸ ꓠꓬꓲ ꓟꓽ ꓙꓲꓻ ꓟ꓾ ꓟꓽ ꓧ ꓟ ꓔꓯ ꓡꓰꓽ ꓣꓳ ꓬꓰ ꓪ ꓡꓰˍ ꓡ= ꓣꓳ ꓬꓰ ꓠꓲꓹ ꓫꓵˍ ꓟ ꓪꓴꓸ ꓠꓬꓲ ꓬꓰ ꓔꓬ ꓟ ꓥ ꓡ= ꓕꓱ ꓟ ꓔꓯ ꓮ ꓡꓲ ꓕꓲ ꓣꓳ ꓔꓯˍ ꓟꓲ ꓣꓳ ꓠꓺ ꓠꓬꓲ ꓗꓷ ꓠꓬ ꓙꓲꓻˍ ꓟ ꓔꓯ ꓡꓰꓽ ꓬꓰ ꓠꓲꓹ ꓫꓵˍ ꓡꓳ= ꓖꓳ ꓡꓱ ꓥˍ ꓟꓲ ꓟꓽ ꓙꓲꓻ ꓟ ꓔꓯ ꓬꓰ ꓪ ꓡꓰˍ ꓟ ꓥ ꓡꓳ= ꓥꓪ ꓟꓽ ꓙꓲꓻ ꓟ ꓥꓪ ꓬꓰ ꓠꓲꓹ ꓫꓵˍ ꓠꓬꓲ ꓬꓰ ꓔꓬ ꓟ ꓟꓽ ꓥ= ꓖꓳ ꓡꓱ ꓐꓯ ꓥ ꓟꓲ ꓟꓽ ꓙꓲꓻ ꓟ ꓠꓬ ꓥꓪ ꓔꓯ ꓚꓵꓹ ꓞꓹ ꓠꓬꓲ ꓥꓪ ꓔꓯ ꓥꓳꓺ ꓞꓹ ꓟ ꓪꓴꓸ ꓠꓬꓲ ꓟꓽ ꓙꓲꓻ ꓟ ꓔꓯ ꓥꓪ ꓬꓰ ꓪ ꓡꓰ ꓟ ꓑꓶꓸ ꓓꓴ ꓠꓬꓲ ꓡꓳꓹ ꓬꓰˍ ꓟ ꓕꓲ ꓠꓬꓲ ꓗꓪ ꓠꓬ ꓟꓽ ꓙꓲꓻ ꓟ ꓖꓳ ꓗꓪ ꓟꓽ ꓓꓵꓽ ꓡꓰ ꓠꓹ ꓟ ꓣꓳ ꓪꓴ-ꓢ ꓔꓬ ꓗꓪ ꓚꓱꓹ ꓬꓲꓼ ꓡ ꓠꓹ ꓟ ꓪꓴ-ꓢ ꓡꓰ ꓣꓳ ꓔꓯ ꓘꓴ ꓔꓬ ꓡꓳ= ꓢꓲꓺ ꓒ ꓬꓰ-ꓢꓴ ꓡꓰ ꓠꓴ ꓪ ꓔꓯ ꓞꓳꓹ ꓞꓹ ꓟ ꓮ ꓙꓵꓽ꓾ ꓠꓴ ꓪ ꓔꓯ ꓚꓵꓹ ꓞꓹ ꓟ ꓮ ꓙꓵꓽ꓾ ꓟꓽ ꓙꓲꓻ ꓟ꓾ ꓟꓽ ꓧ ꓟ ꓬꓲ ꓫꓱꓹ꓾ ꓥ ꓠꓬ꓾ ꓝꓴꓲꓸ ꓬꓰ ꓪ ꓡꓰ ꓟ ꓮ ꓙꓵꓽ ꓗꓪ ꓐꓰ ꓠꓴ ꓪ ꓔꓯ ꓥꓪ ꓒꓶꓻ ꓩꓴ ꓗꓷˍ ꓥꓳ= ꓥꓪ ꓠꓴ ꓪ ꓔꓯ ꓡꓲꓹ ꓙꓰ ꓝꓲˍ ꓥꓳ= ꓟꓽ ꓙꓲꓻ ꓫꓬ ꓟ ꓠꓻ ꓓꓴ ꓑ ꓔꓯ ꓓ ꓡꓰ ꓝꓲ ꓢꓲ ꓠꓬꓲ ꓙꓲˍ ꓟ ꓧˍ ꓟ ꓔꓯ ꓠꓴ ꓪ ꓬꓰ ꓐ ꓡ ꓠꓹ ꓟ ꓠꓴ ꓪ ꓠꓲꓹ ꓟ ꓥꓪ ꓔꓯ ꓖꓶ ꓡꓯ꓾ ꓐꓰ ꓢꓲꓺ ꓒ ꓬꓰ-ꓢꓴ ꓣꓳ ꓔꓯ ꓓꓰꓽ ꓔꓬ ꓡꓳ= ꓖꓳ ꓡꓱ ꓠꓬꓲ ꓢꓲꓺ ꓒ ꓬꓰ-ꓢꓴ ꓔꓬ ꓗꓪ ꓣꓳ ꓙꓰꓽ ꓢꓲ ꓠꓬꓲ ꓣꓳ ꓔꓯ ꓙꓳˍ ꓟ ꓮ ꓙꓵꓽ ꓪꓴ-ꓢ ꓔꓯ ꓡꓯꓼ ꓙꓱ ꓗꓷ= ꓢꓲꓺ ꓒ ꓬꓰ-ꓢꓴ ꓔꓯ ꓣꓳ ꓕꓲ ꓖꓳ ꓓꓱꓽ ꓕꓲ ꓶ ꓟꓬ ꓡꓱꓸꓼ ꓡꓯꓼ ꓙꓱ ꓢꓲ ꓠꓬꓲ ꓦ ꓡꓱ ꓐꓳ ꓢꓲ ꓬꓰ ꓔꓬ ꓥꓳ ꓐꓯ ꓠꓬ ꓡꓳꓹ ꓬꓰˍ ꓟ ꓕꓲ ꓠꓬꓲ ꓗꓪ ꓠꓬ ꓣꓳ ꓥˍ ꓟꓲ ꓙꓲˍ ꓟ ꓟꓴꓽ ꓗꓪ ꓗꓴꓷꓼ ꓗꓪ ꓓꓵꓽ ꓙꓰ ꓪ ꓡꓰ ꓢꓲ ꓠꓬꓲ ꓟꓽ ꓙꓲꓻ ꓟ ꓗꓪ ꓐꓰ ꓡꓲꓹ ꓗꓷ ꓐ ꓡˍ ꓥꓳ꓾ ꓐꓰ ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳ ꓡ ꓗꓪ ꓐꓰ ꓣꓳ ꓔꓯ ꓦ ꓢꓯꓼ ꓪ ꓖꓶ ꓔꓬ ꓟ ꓥ ꓡꓳ=