ꓥꓪˍ ꓐꓰ ꓐꓹ ꓐ ꓠꓬ ꓕꓲ ꓣꓳˍ ꓡꓰꓽ ꓥ ꓡꓳ꓾

ꓬꓳ-ꓦ ꓕꓳꓽ ꓶ 10ꓽ22-30

ꓣꓳ ꓟꓲ ꓠꓯ ꓕꓱ ꓟ ꓗꓪ ꓛꓳ ꓫꓱꓽ ꓔꓬ ꓕꓯ ꓓꓵꓽ ꓙ ꓟꓬꓽ꓾ ꓓꓵꓽ ꓙ ꓪꓴꓽ ꓧꓶ ꓓꓴ ꓮ ꓟꓬꓹ ꓔꓳꓹ ꓜꓳꓽ ꓡ ꓗꓴꓸˍ ꓡꓳ= ꓠꓬꓲꓸ ꓠꓬꓲ ꓟꓸ ꓟꓲꓽ ꓕꓳ ꓶ ꓗꓪ ꓒ-ꓡꓲ-ꓢꓷ ꓐꓴ ꓠꓬ ꓢꓲꓺ ꓒ ꓬꓰ-ꓢꓴ ꓐꓰ ꓗꓴꓸ ꓙꓲ ꓙꓳ ꓢꓲ ꓠꓲꓹ ꓟ ꓟꓬꓽ꓾ ꓠꓲꓹ ꓟ ꓪꓴꓽ ꓧꓶˍ ꓟ ꓣꓳ ꓑ ꓙ ꓪˍ ꓡꓳ= ꓬꓲ ꓪ ꓠꓬ ꓢꓲꓺ ꓒ ꓬꓰ-ꓢꓴ ꓔꓯ ꓠꓴ ꓠꓬ ꓙꓲ-ꓢꓴ ꓥ ꓡ= ꓙꓲ-ꓢꓴ ꓥ ꓠꓬ ꓥꓪ ꓠꓴꓽ ꓔꓯ ꓔꓱꓹ ꓔꓱꓹ ꓐꓯ ꓖꓶ ꓡꓯ= ꓥꓪ ꓠꓴꓽ ꓔꓯ ꓠꓲꓹ ꓟ ꓟꓬꓽ ꓡꓰ ꓠꓹ ꓟ ꓕꓽ ꓬꓰ꓾ ꓐꓯ ꓖꓶˍ ꓡꓳ= ꓢꓲꓺ ꓒ ꓬꓰ-ꓢꓴ ꓥˍ ꓟꓲ ꓬꓲ ꓪ ꓔꓯ ꓥꓪ ꓠꓴ ꓪ ꓔꓯ ꓔꓱꓹ ꓔꓱꓹ ꓐꓯ ꓖꓶˍ ꓥˍ ꓟꓲ ꓠꓴ ꓪ ꓟꓽ ꓙꓵꓻ= ꓥꓪ ꓠꓬ ꓙꓲ-ꓢꓴ ꓥ ꓡꓳ ꓐꓯ ꓟ ꓠꓴ ꓪ ꓔꓯ ꓐꓯ ꓖꓶˍ ꓥ ꓟꓲ ꓠꓴ ꓪ ꓟꓽ ꓙꓵꓻ= ꓠꓴ ꓪ ꓠꓬ ꓥꓪ ꓮ ꓣꓳ ꓗꓪ ꓐꓰ ꓟꓽ ꓥ= ꓥꓪ ꓮ ꓣꓳ ꓗꓪ ꓐꓰ ꓥ ꓕꓯ ꓠꓽ ꓥꓪ ꓢꓯꓼ ꓔꓯ ꓠ ꓠꓹ ꓡꓳ꓾ ꓐꓰ ꓬꓲ ꓡꓰ ꓒꓳꓹ ꓖꓶˍ ꓡꓳ=

ꓟꓸ ꓟꓲꓽ ꓢꓷꓸˍ ꓟ ꓒ-ꓡꓲ-ꓢꓷ ꓐꓴ ꓠꓬ ꓢꓲꓺ ꓒ ꓬꓰ-ꓢꓴ ꓐꓰ ꓗꓴꓸ ꓙꓲ ꓙꓳ ꓢꓲ ꓠꓬꓲ ꓬꓲ ꓪ ꓠꓲꓹ ꓟ ꓠꓬ ꓠꓬꓲꓽ ꓔꓱꓹ ꓓˍ ꓡꓳ= ꓢꓲꓺ ꓒ ꓬꓰ-ꓢꓴ ꓔꓯ ꓡꓳꓸ ꓠꓬꓲ ꓗꓷ ꓕꓯ ꓕꓲ ꓖ ꓕꓲ ꓧꓪꓹ ꓙꓲ-ꓢꓴ ꓔꓯ ꓫꓱꓸˍ ꓡꓳ= ꓕꓲ ꓖ ꓕꓲ ꓧꓪꓹ ꓗꓪ ꓠꓬ ꓙꓲ-ꓢꓴ ꓔꓯ ꓟꓽ ꓫꓱꓸ ꓐꓰ ꓬꓲ ꓪ ꓠꓲꓹ ꓟ ꓠꓯꓸꓼ ꓗꓪ ꓓꓵꓽ ꓙ ꓟꓬꓽ ꓓꓵꓽ ꓙ ꓪꓴꓽ ꓧꓶ ꓔꓬ ꓡꓳ=

ꓣꓳ ꓤꓶꓻ ꓗꓪ ꓥˍ ꓟꓲ ꓢꓲꓺ ꓒ ꓬꓰ-ꓢꓴ ꓔꓯ ꓣꓳ ꓚꓵ ꓚꓵ ꓙꓵꓻ ꓔꓬ ꓡ= ꓚꓵ ꓚꓵ ꓙꓵˍ ꓡꓳ ꓐꓯ ꓥ ꓟꓲ ꓕꓲ ꓖ ꓕꓲ ꓧꓪꓹ ꓢꓲꓺ ꓒ ꓠꓬ ꓣꓳ ꓐꓰ ꓔꓬ ꓢꓲ꓾ ꓕꓲ ꓖ ꓕꓲ ꓧꓪꓹ ꓠꓬ ꓣꓳ ꓐꓰ ꓶꓽ ꓤ ꓗꓷ ꓡꓰꓳ꓾ ꓐꓰ ꓓꓵꓽ ꓙ ꓟꓬꓽˍ ꓡꓳ ꓟꓽ ꓥ ꓡ= ꓢꓲꓺ ꓒ ꓬꓰ-ꓢꓴ ꓠꓬ ꓪꓴ-ꓢ ꓥ ꓡꓳ꓾ ꓐꓰ ꓐꓯ ꓢꓲ ꓮ ꓫꓵꓽ ꓪꓴꓸ ꓠꓬꓲ ꓡꓳꓺ ꓒꓰ  ꓗꓷˍ ꓡ= ꓮ ꓫꓵꓽ ꓪꓴꓸ ꓠꓬꓲ ꓥꓪ ꓔꓯ ꓫꓸ ꓙꓵ ꓟꓷ ꓙꓵ ꓓꓴ ꓔꓳꓹ ꓜꓳꓽ ꓔꓬ ꓝꓲˍ ꓡ= ꓥ ꓠꓬ ꓗꓳꓸ ꓡ ꓟ ꓦꓬꓼ ꓠꓬꓲ ꓗꓪ ꓢꓲꓺ ꓒ ꓮ ꓕꓯˍ ꓟꓲ ꓬꓰ ꓙˍ ꓥ ꓟꓲ꓾ ꓮ ꓟꓶ ꓠꓬꓲꓸ ꓠꓬꓲ ꓕꓱ ꓕꓲ ꓠꓬꓲ ꓗꓪ ꓥꓪ ꓫꓸ ꓙꓵ ꓔꓬ ꓟ ꓠꓬ ꓮ ꓫꓵꓽ ꓑꓶꓸ ꓓꓴ ꓢꓲꓺ ꓒ ꓬꓰ-ꓢꓴ ꓠꓬ ꓢꓲꓺ ꓡꓲꓺ ꓐꓰ ꓔꓬ ꓡ꓾ ꓐꓰ ꓓꓵꓽ ꓙ ꓟꓬꓽ ꓓꓵꓽ ꓙ ꓪꓴꓽ ꓧꓶ ꓓꓴ ꓔꓳꓹ ꓜꓳꓽ ꓡ ꓗꓴˍ ꓟ ꓦꓬꓼ ꓠꓬꓲˍ ꓟꓲ ꓙꓳ ꓡ ꓗꓴꓸˍ ꓡꓳ= 

ꓢꓲꓺ ꓒ ꓬꓰ-ꓢꓴ ꓠꓬ ꓪꓴ-ꓢ ꓥ ꓟꓽ ꓒꓳꓹ ꓒꓳꓹ꓾ ꓣꓳ ꓐꓰ ꓠꓶꓽ ꓡ ꓠꓬꓲ꓾ ꓶꓽ ꓡꓰ ꓠꓬꓲ ꓗꓹ ꓟ ꓦꓬꓼ ꓠꓬꓲˍ ꓟꓲ ꓙꓳ ꓡ ꓗꓴꓸˍ ꓡꓳ= ꓖꓳ ꓡꓱ ꓔꓳꓹ ꓜꓳꓽ ꓡ ꓕꓯ ꓠꓬꓲꓸ ꓠꓬꓲ ꓟꓸ ꓟꓲꓽ ꓗꓪ ꓢꓲꓺ ꓒ ꓬꓰ-ꓢꓴ ꓡꓰ ꓒ-ꓡꓲ-ꓢꓷ ꓐꓴ ꓔꓯ ꓐꓯ ꓖꓶˍ ꓟ ꓔꓯ ꓣꓳ ꓮ ꓕꓯˍ ꓟꓲ ꓠꓲꓹ ꓟ ꓠꓯꓸꓼ ꓗꓪ ꓗꓷ ꓔ ꓡꓯ= ꓬꓲ ꓡꓰ ꓒ-ꓡꓲ-ꓢꓷ ꓐꓴ ꓔꓯ ꓥꓪ ꓠꓬ ꓢꓲꓺ ꓒ ꓥ ꓡꓳ= ꓥꓪ ꓠꓬ ꓙꓲ-ꓢꓴ ꓥ ꓡꓳ= ꓖꓳ ꓡꓱ ꓥˍ ꓟꓲ ꓠꓴ ꓪ ꓟꓽ ꓙꓵꓻ ꓐꓰ ꓐꓯ ꓟ ꓡꓰ ꓐꓰ ꓣꓳꓽ ꓒ-ꓡꓲ-ꓢꓷ ꓐꓴ ꓡꓰ ꓐꓰ ꓟꓽ ꓥ ꓥ꓾ ꓢꓲꓺ ꓒ ꓬꓰ-ꓢꓴ ꓔꓯ ꓮ ꓕꓯ ꓟꓲ ꓙꓵꓻ ꓠꓹ ꓟ꓾ ꓬꓲ ꓠꓬ ꓪꓴ-ꓢ ꓥ ꓡꓳ꓾ ꓬꓲ ꓠꓬ ꓙꓲ-ꓢꓴ ꓥ ꓡꓳ꓾ ꓐꓯ ꓟ ꓔꓯ ꓠꓲꓹ ꓟ ꓠꓯꓸꓼ ꓗꓪ ꓣꓷꓠꓸ ꓢꓲ ꓠꓬꓲ ꓢˍ ꓥ ꓟꓲ꓾ ꓫ ꓙꓵˍ ꓥˍ ꓟꓲ꓾ ꓗꓹ ꓛꓲꓽˍ ꓥ ꓟꓲ꓾ ꓠꓲꓹ ꓫꓸ ꓥˍ ꓟꓲ꓾ ꓮ ꓕꓯ ꓟꓲ ꓢꓲꓺ ꓒ ꓔꓯ ꓪꓳꓺ ꓔ ꓢꓲ ꓞꓳ ꓙꓳ ꓠꓹ ꓟ ꓠꓬꓲꓸ ꓠꓬꓲ ꓟꓸ ꓟꓲꓽ ꓗꓪ ꓐꓰ ꓣꓳꓽ ꓔꓯ ꓟꓸ ꓖꓶ ꓡˍ ꓟ ꓥ ꓡꓳ=

ꓕꓱ ꓡꓰ ꓐꓰ ꓛꓳ ꓫꓱꓽˍ ꓕꓯ ꓬꓲ ꓡꓰ ꓥꓪ ꓮ ꓣꓳ ꓠꓬ ꓥꓪ ꓢꓯꓼ ꓠ ꓠꓹ ꓡꓳ= ꓬꓲ ꓪ ꓔꓯ ꓠꓬ ꓥꓪ ꓗꓪ ꓐꓰ ꓮꓽ ꓟˍ ꓟꓲ ꓧꓳꓽ ꓔꓯꓹ ꓙꓰ ꓟꓽ ꓐ ꓡ= ꓬꓲ ꓪ ꓔꓯ ꓠꓬ ꓥꓪ ꓕꓲ ꓞꓲꓼ ꓕꓲ ꓑ ꓢꓲꓺ ꓡꓲꓺ ꓟ ꓢꓯꓼ ꓟꓬ ꓖꓶˍ ꓥꓳ꓾ ꓐꓰ ꓢꓲꓺ ꓒ ꓬꓰ-ꓢꓴ ꓡꓰ ꓪꓵꓼ ꓘꓶꓽ ꓖꓶꓽ ꓔ ꓡꓳ= ꓣꓳ ꓥˍ ꓟꓲ ꓢꓲꓺ ꓒ ꓬꓰ-ꓢꓴ ꓔꓯ ꓙꓵꓻˍ ꓡꓳ= ꓢꓲꓺ ꓒ ꓬꓰ-ꓢꓴ ꓔꓯ ꓠꓲꓹ ꓠꓵˍ ꓡꓳ ꓐꓯ ꓟ ꓔꓯ ꓠꓲꓹ ꓟ ꓠꓯꓸꓼ ꓗꓪ ꓮ ꓕꓯ ꓟꓲ ꓗꓷ ꓔ ꓢꓲ ꓠꓬꓲ ꓞꓳ ꓙꓳ ꓙꓰˍ ꓥꓳ ꓐꓯ ꓠꓬ ꓢꓲꓺ ꓒ ꓬꓰ-ꓢꓴ ꓠꓬ ꓣꓳ ꓪꓴ-ꓢꓴ ꓥ ꓡꓳ= ꓣꓳ ꓙꓲ-ꓢꓴ ꓒꓬꓱꓼ ꓡˍ ꓥꓳ꓾ ꓐꓯ ꓟ ꓠꓬꓲꓸ ꓠꓬꓲ ꓟꓸ ꓟꓲꓽ ꓗꓪ ꓐꓰ ꓣꓳ ꓔꓯ ꓐꓯ ꓟꓳꓸ ꓖꓶ ꓡ ꓔꓬ ꓡꓳ=