ꓥꓪꓸ ꓮꓽ ꓟꓬꓹ ꓓꓳꓽ ꓟꓶ_ꓟ

Thursday, September 03, 2020

ꓬꓰ-ꓢꓴ ꓠꓬ ꓖꓶ-ꓠꓱ-ꓢ-ꓡꓱ ꓬꓲ ꓡꓴ ꓐꓱ ꓘꓶꓽ ꓗꓪ ꓦꓰꓼ ꓞ ꓔꓬ_ ꓕꓯ꓾ ꓡ ꓞꓳ ꓬꓲ ꓜꓴ ꓠꓬ ꓪꓴ-ꓢ ꓐꓯ ꓘꓶ ꓠ ꓠꓹ ꓠꓹ ꓟ ꓬꓲ ꓔꓯ ꓝꓲꓽ ꓡ_ ꓡꓳ꓿ ꓬꓲ ꓠꓬ ꓬꓲ ꓡꓴ ꓐꓱ ꓘꓶꓽ ꓗꓪ ꓓꓹ ꓟ ꓡꓲꓺ ꓠꓬꓲꓽ ꓟ ꓟꓳ_ ꓡꓳ꓿ ꓥꓪꓸ ꓓꓳꓽ ꓢꓴ ꓠꓽ ꓡꓲ ꓗꓪ ꓐꓰ ꓓꓳ ꓙꓰ ꓢꓲ꓾ ꓥꓪꓸ ꓑꓱꓸ ꓞꓲꓽ ꓔꓬ_ ꓡꓳ꓿ ꓬꓰ-ꓢꓴ ꓠꓬ ꓢꓲ-ꓟꓴ ꓡꓲꓺ ꓗꓪ ꓓꓵꓽ ꓙꓰ ꓢꓲ꓾ ꓡꓲꓺ ꓕꓱ ꓟ ꓟꓲ ꓠꓯ ꓘꓶꓽ ꓗꓪ ꓐꓰ ꓕꓲ ꓕꓱꓺ ꓤ ꓓꓱꓽ ꓩꓴ ꓗꓷ ꓖꓶ꓾ ꓐꓰ ꓬꓲ ꓔꓯ ꓓꓰꓽ_ ꓡꓳ꓿ ꓖꓳ ꓡꓱ ꓠꓬ ꓬꓲ ꓠꓽ ꓡꓲ ꓗꓪ ꓠꓬꓲꓸ ꓠꓸ ꓢꓲ꓾ ꓞꓳ ꓜꓴ ꓞꓳ ꓟꓯꓼ ꓖꓳ ꓟ ꓔꓯ ꓟꓸ ꓟꓲ ꓟꓸ ꓖꓶ_ ꓡꓳ꓿ ꓟꓸ ꓟꓲ ꓚ ꓓꓳ ꓡꓰ ꓠꓬ ꓬꓰ-ꓢꓴ ꓡꓰ ꓢꓲ-ꓟꓴ ꓔꓯ꓾ ꓬꓲ ꓙꓬ ꓠꓯꓸ_ ꓟ ꓗꓪ ꓡꓲꓺ ꓪꓳꓺ ꓙꓰ ꓢꓲ꓾ ꓥꓪꓸ ꓓꓳꓽ ꓠꓹ ꓟ ꓥꓪꓸ ꓑꓱꓸ ꓩꓴ ꓬꓯꓼ ꓙꓰ꓾ ꓐꓯ_ ꓡꓳ꓿ ꓢꓲꓹ-ꓟꓴ ꓒꓳꓹ ꓖꓶ ꓢꓲ꓾ ꓟꓸ ꓒꓽꓳ꓾ ꓥꓪ ꓠꓴꓽ ꓠꓬ ꓕꓲ ꓦꓬꓼ ꓡꓱꓸꓼ ꓢꓯꓼ ꓕꓵ_ ꓟꓲ ꓮ ꓫꓵ ꓓꓳꓽ ꓟꓽ ꓟꓶ꓿ ꓖꓳ ꓡꓱ ꓥ_ ꓟꓲ ꓠꓴ ꓡꓰ ꓐꓯ_ ꓟ ꓥ ꓠꓬꓲ꓾ ꓥꓪ ꓠꓬ ꓥꓪꓸ ꓑꓱꓸ ꓩꓴ ꓬꓯꓼ ꓙꓰ_ ꓥꓳ꓾ ꓐꓯ_ ꓡꓳ꓿ꓖꓳ ꓡꓱ ꓢꓲ ꓬꓲ ꓪ ꓖꓳ ꓡꓱ ꓩꓴ ꓬꓯꓼ ꓙꓰ ꓠꓬ꓾ ꓥꓪꓸ ꓬꓲ ꓜꓴ ꓓꓽ ꓟ ꓪꓴꓻ ꓡꓰ_ ꓡꓳ꓿ ꓥꓪꓸ ꓑꓱꓸ ꓧꓽ ꓡꓰ_ ꓐꓰ ꓗ_ ꓠꓬꓲ꓾ ꓬꓲ ꓪ ꓠꓬ ꓡꓲꓺ ꓖꓳ ꓕꓲ ꓟ ꓗꓪ ꓔꓬ_ ꓟ ꓛꓳ ꓒꓯꓹ ꓐꓴ ꓔꓯ ꓬꓰ ꓙ ꓡ ꓠꓹ ꓟ ꓡꓯꓼ ꓟꓰꓼ ꓖꓶ_ ꓡꓳ꓿ ꓖꓳ ꓡꓱ ꓠꓬ ꓬꓲ ꓪ ꓡ ꓢꓲ ꓡꓲꓺ ꓠꓬꓲꓽ ꓟ ꓗꓪ ꓗꓶ ꓐꓲ ꓡꓰ ꓠꓬꓲ꓾ ꓡꓲꓺ ꓠꓬ ꓬꓲ ꓙꓬ ꓠꓯꓸꓼ ꓗꓪ ꓦꓱꓺ ꓡꓰ_ ꓐꓰ ꓓꓹ_ ꓡꓳ꓿ ꓢꓲ-ꓟꓴ ꓒꓲ-ꓕꓱ ꓖꓳ ꓟ ꓔꓯ ꓟꓳꓻ ꓗꓷ ꓠꓬ꓾ ꓬꓰ-ꓢꓴ ꓛꓲ ꓔꓲ ꓗꓪ ꓟꓳꓼ ꓡꓰ ꓢꓲ꓾ ꓢꓲꓺ ꓒꓽꓳ꓾ ꓥꓪ ꓔꓯ ꓐꓰ ꓧꓹ ꓙꓰ꓿ ꓮ ꓡꓲꓳ ꓐꓯ ꓠꓬ ꓥꓪ ꓠꓽ ꓝꓴꓲ ꓙꓳ ꓢꓴ ꓥ ꓡꓳ꓾ ꓐꓯ_ ꓡꓳ꓿ ꓮ ꓡꓲꓳ ꓐꓯ ꓠꓬ ꓬꓲ_ ꓐꓰ ꓬꓲ ꓕꓲ ꓛꓳ_ ꓢꓴ ꓮ ꓙꓵ ꓠꓬ ꓕꓲ ꓓꓳꓽ_ ꓗꓪ ꓥꓪꓸ ꓕꓱ ꓟꓬ ꓟ ꓟꓶ_ ꓟ ꓔꓯ ꓓꓵ ꓙ ꓟꓶ_ ꓡꓳ꓿ ꓖꓳ ꓟ_ ꓡꓰ ꓐꓰ ꓢꓲ-ꓟꓴ ꓬꓲ ꓛꓳ ꓒꓯꓹ ꓐꓴ ꓜꓲ-ꓐꓱ-ꓓꓲ ꓬꓲ ꓮ ꓐꓲ ꓬ-ꓗꓴ_ ꓐꓰ ꓬꓳ-ꓦ_ ꓟꓲ ꓓꓵ ꓙ ꓟꓶ_ ꓡꓳ꓿ ꓬꓰ-ꓢꓴ ꓠꓬ ꓢꓲ-ꓟꓴ ꓔꓯ꓾ ꓕꓽ ꓙꓳꓺ꓿ ꓕꓱ ꓡꓱ ꓖꓳ ꓑꓳ ꓠꓴ ꓠꓬ ꓡ ꓞꓳ ꓓꓳꓽ ꓟꓶ_ ꓥꓳ꓾ ꓐꓯ_ ꓡꓳ꓿ꓬꓲ ꓪ ꓡꓰ ꓡꓲꓺ ꓠꓬꓲꓽ ꓟ ꓟꓲ ꓠꓯ ꓘꓶꓽ ꓗꓪ ꓪꓳꓺ ꓛꓲ ꓡ ꓠꓬ꓾ ꓬꓲ ꓪ ꓙꓳ_ ꓟ ꓮ ꓙꓵ ꓡꓳꓺ ꓔ ꓬꓰ ꓢꓲ ꓠꓬꓲ꓾ ꓬꓰ-ꓢꓴ ꓔꓯ ꓛꓳ ꓙꓰ_ ꓡꓳ꓿